1 ʼInega Ieisu vonedi vonaya, “Ge ona nuanua, ta ʼesi Yaubada ona vetumaqanea, ta wese yaʼa ona vetumaqanegu. 2 Tamagu ena vanuea sifaufa ʼeala iʼenoʼeno, ta yaʼa yatautauya ʼinaya emi ʼebetoa sabi ʼivaʼavaʼaina. Ta ʼeguma egu vona baʼe ge vonahaqiaqi, ʼinega ge wese eda vonevonemi. 3  * Ion 12:26 ʼInega ena tauya ta ena ʼivaʼavaʼaia, ta ʼabiboda ena ʼevivi ena mai sabi ʼebeʼewami be yaqisa omiʼa tuta qabuna yaʼa maega egu diʼwe ʼinaya kana toatoa. 4 Ta omiʼa diʼwe nana ʼinaya yatautauya ana ʼeda niʼau oalamania.”

5 ʼInega Tomasi Ieisu ʼinaya vonaya, “Kaiwabu, imaʼa ge ada alamania maʼinaya utautauya, ʼinega maʼoda ʼeda nana ana alamani ʼaiqei?”

6  * Ion 11:25; Lom 5:1-2 ʼInega Ieisu vonea vonaya, “Yaʼa ʼEda nana be Vonahaqiaqi ta wese Yawai ʼiuna. Ta ge taha toga ana fata be nalugu Tamagu ʼinaya mali ʼedega, ta ʼesi yaʼa agu ʼaidega otaqa ʼiguyega nalugu. 7  * Ion 8:19 ʼEguma oʼa uda alamania yaʼa togama, ʼinega wese Tamagu uda alamania. Ta ʼesi tuta baʼe ʼinega niʼau ualahalamania, ta wese niʼau uʼiteʼitea!”

8 ʼInega Filifi vonaya, “Kaiwabu, Tamau nana una veʼitema ta matamega ana ʼitea, ʼinega benaʼe taʼiwa ta ge wese taha tolaʼai weaqina ana vetalaʼaieu.”

9  * Ion 12:45; Kol 1:15; Ibe 1:3 ʼInega Ieisu veʼiea vonaya, “Filifi, yaʼa omiʼa maega tuta kuena katoatoa, ta nage oʼa nawale ge uda alamanigu, waisa? Ta ʼeguma taha toga yaʼa niʼa ʼitegu, e ʼinega tauna wese Tamagu niʼa ʼitea. ʼInega tolaʼai weaqina uvonaya, ‘Tamau uveʼitema’? 10  * Ion 12:49 Nage ge uda vetumaqanegu vonigo yaʼa be Tamagu kavona ʼaidegama, ge taha ada vedumaduma? Ta baʼe egu vonayavo ʼiuya ge taugumo egu nuenuega eda vonavonayedi, ta ʼesi Tamagu mayawaina ʼiguya toatoa ena nuanua viaviaqia ʼiguyega. 11  * Ion 10:38 Ta tuta nana yavonevoneu vonigo yaʼa be Tamagu kavona ʼaidegama ʼinega una vetumaqanegu. Ta ʼeguma ge au fata be baʼe vona nana una vetumaqanei, ʼinega luaqiaqieu be una vetumaqanegu egu viaqa ʼebenuavoqana be viaqa waiwaidi ʼidiega.

12  * Mk 16:19-20 “Yavona aqiaqiemi, ʼeguma taha toga vevetumaqanegu ʼinega tauna ana fata egu viaqa waiwaidi wese naviaqidi. Ta wese ana fata viaqa waiwai vaʼinedi naviaqidi, ta ʼabiboda egu viaqayavo, mana yaʼa yatautauya Tamagu ʼinaya. 13  * Md 7:7; Ion 15:16 Ta ʼeguma agu wawega toyani weaqina ona venoqiegu, ʼinega yaʼa ena veʼiea, mana yaʼa egu viaqayavo ʼidiega Tamagu awatubo lobelobea. 14 Vonahaqiaqi, ʼeguma yani taha taha weaqina agu wawega ona venoqiegu, e ʼinega yaʼa wese ena veʼiea.

15  * Ion 15:10; 1Ion 5:3 “Ta ʼeguma omiʼa oveveyolubegu ʼinega tolaʼai niʼa yavonayedi ʼimia ona matayagedi. 16  * Ion 14:26; 15:26; 16:7 ʼInega Tamagu ena venoqiea ta Toiula taha wese navetunei namai ʼimia ta tuta qabuna maega ona toatoa, 17  * Ion 16:13 ta tauna vonahaqiaqi Niboanina. Ta bwaʼobwaʼo ana tomotauyavo Niboani nana ge ina ʼawahaqiaqiei, mana ge ida ʼitei ta ge ida alamania. Ta ʼesi omiʼa niʼa oalamania, mana tauna omiʼa maega otoatoa, ta wese tauna giwalimia ʼenoʼeno. 18 Ta yaʼa ge wese ena nogemi be ona vetamatama geqa, ta ʼesi ena mai ʼimia. 19 Tuta kukusana ʼinaya totoa bwaʼobwaʼo ge wese ina ʼitegu, ta ʼesi omiʼa ona ʼitegu, mana yaʼa ena yawaha ʼevivi ta ʼinega omiʼa wese mayawaimi ona toatoa. 20  * Ion 17:21-23 Ta tuta nana ena yaʼitoto ʼevivi ʼaligega, ʼinega omiʼa ona alamani aqiaqiea vonigo yaʼa be Tamagu ʼaidegama, ta wese omiʼa be yaʼa ʼaidegada. 21 Ta tomeqabu egu vonayavo ivelumatamatayagedi taudina wese iveveyolubegu. Ta Tamagu naveyolubedi, mana taudi iveveyolubegu, ta yaʼa wese ena veyolubedi. Ta tauguyega ena veʼita ʼifoqeyegu taudi ʼaidega ʼaidega matadia.”

22 Ta Ieisu ana toʼabiboda ʼidiega Iudasa magilafudi itoatoa. Taha Iudasa Isakaliota ta wese mali Iudasa. ʼInega mali Iudasa nana Ieisu ʼinaya vonaya, “Kaiwabu, tolaʼai weaqina imaʼa mamo ʼimaya una veʼita ʼifoqeyeu, ta gebu totoa bwaʼobwaʼo qabudi ʼidia?”

23 Ta Ieisu voneaya, “ʼEguma taha toga veyoluba aqiaqiegu ʼinega egu vonayavo namatayagedi. ʼInega Tamagu naveyolubea ta imaʼa ana mai ʼinaya ta maega ana toa. 24  * Ion 7:16 Ta ʼeguma taha toga ge daveyolubegu taunana egu vonayavo ge nuanuana namatayagedi. Ta ona nuaveʼavinia be yaʼa egu vonayavo ge taugu ʼiguyega ida ʼifoʼifoqe, ta ʼesi baʼe simana nana agu Tovetune Tamagu ʼinega iʼifoʼifoqe.

25 “Yaʼa nawale omiʼa maega katoatoa, e ʼinega baʼe yani diavona weaqidi baʼitagana yavonevonemi. 26 Tamagu agu wawa ʼinega Niboana Gwalagwalana tauna ami Toiula navetunei ʼimia, ta Toiula nana yani taha taha weaqina naveʼitemi, ta wese egu vonayavo qabudi ʼimia weaqidi nagivenuahaʼuyemi. 27 Yaʼa nuadaumwala ʼiuna, ta yatautauya be nuadaumwala nana baʼidia yahaʼuya omiʼa maega. Yaʼa nuadaumwala nana yaneineimi. Ta egu nuadaumwala nana ge wese totoa bwaʼobwaʼo adi fata be ina neimi, mana egu nuadaumwala ge davelelelea totoa bwaʼobwaʼo edi nuadaumwala maega. ʼInega ge ona nuanua ta wese ge ona mwaniniva. 28  * Ion 20:17 Ta niʼa egu vona onoqolia tuta nana yavonemia, ‘Yaʼa yatautauya, ta ena ʼevivi mai ʼimia.’ ʼEguma omiʼa oda veyoluba aqiaqiegu ʼinega oda qaiawa qiduana egu tauya Tamagu ʼinaya weaqina, mana tauna veqidua vaʼinegu. 29  * Ion 13:19 Baʼe yani diavona weaqidi baʼitagana niʼa yavonevonemi ta ʼabiboda ana tuta naʼifoqe. Baʼe ʼidewani yamaduvonemi be yaqisa ona vetumaqanegu tuta nana ana aqiaqi ona ʼitea. 30 Ge agu fata be wese ena veqae ʼimia tuta kuena, mana bwaʼobwaʼo ana toluvine maimai. Tauna ge wese ana fata navewaiwai vaʼinegu, 31 ta totoa bwaʼobwaʼo luaqiaqiedi be ina alamania vonigo yaʼa Tamagu yaveveyolubea. Baʼe ʼiuna ʼinega ena vona qabudi ʼiguya yaviaviaqidi.

“Omai, vanue baʼena kana nogea.