1 Jesus pel sapda padahkjili in poahrinjed in Lehn Galilee. Pokon laplap oau pokonpene Ipoa kahrehda Ih ken doauda mwindi pohn pohs pas. Pohsso peipeipei nehn jeddo, a pokonno mine in poahrinjeddo. 2 Ih ken padahkihoang irai joang dihrdir in karajraj, doahroar Ah kin kalap wia nehn Ah padahk. Ih pwehng irai:

3  “Kamwai rong. Armaj men mine ma inlahng kamwroa ah liporrohk. 4  Doari, nehn ah kamwkamwroa ah liporrohk, epwi mwoardi oang nehn alin nehn mwoaswello, mahnsang pwi sangdo kangjang. 5  Epwi liporro kipdi nehn wija sakaikai ma pwirejjo poadpoad. Liporrohk pispisin koapda pwa pwirejjo poadpoad. 6  A anjoauwo ma joauwo dakda, suhkoahk pispisinnoar mengla pwa koalohraiok johpwa lel nehn wija loal. 7  Epwi liporrohk kipdi nehn pwungen suhkoa soaksoak. A suhkoa soaksoakkok koapda kajasihkeihla irai; ioar irai ken johpwa uhwahki. 8  A epwi liporrohk nehn pwirej mwehu; irai koapda, koalikla, uhwa mwehu; epwi uhwa min jilihjek, a epwi weneijek, a epwi epwiki.”

9 Jesus pel pwa, “Doari, Armaj men ma mine sioa mihn rongrong, a ih en rong.”

10 Doari, nehn en Jesus kalahpwukla, arai eijek roahmenno apel epwi ma pwili rong indoa ipoa pwa irai en poaki en kawoahwoahng irai karajraj kan. 11 Ih ken japoang irai, “Oang kamwai mweimweioang en kidal manman rir kan doahr wein Koahs. A oang irai kan ma minmine likin, irai pirin kidal joang ohroj jang in karajraj. 12  Pwa,

13 Jesus idoak iparai, pwa, “Kamwai johpwa woahwoahki karajraj pase? A imdoahr amwai kak woahwoahki karajraj pwiok? Doari, ioar doahr me: 14  Jounkamwoaroa, ioar ma kin kamwoar mahjan in Koahs. 15  Epwi armaj doahr Liporrohk ma mwoardi oang nehn al kan. Nehn ahr kin rong mahjanno, Jehsen kin indoa koawehjang irai. 16  Liporro ma kin mwoardi oang nehn wija sakai woahwoahki irai kan ma kin rong oaloahda apel perenkihda. 17  A johkin soangdi iparai, ma apwal oau ke kojkoj kin lel irai pwa padahkko, a irai kin pispis in lohdi. 18  Epwi armaj kin doahroar Liporro siksikkok ma mwoardi oang nehn pwungen suhkoa soaksoak. Ioar irai ma kin rong Mahjanno, 19  a ki pwunod in mourin jampah kan, noaroak in koapwoa kan, apel joangoan inoang sohrohr kan kin pwokda jakahpajihla mahjanno, kahrehda ken johpwa uhwahda. 20  Epwi doahroar liporro siksikoa ma mwoardi oang nehn pwirej mwehu. Irai kin rong mahjanno, oaloa, ken uhwa: epwi uhwa min jilihjek, epwi weneijek, a epwi uhwahda min epwiki.”

21 Jesus pel uhjehla Ah sikesik oang irai, “Mine ipamwai ma kin okojda nah lahm kihdi pehn jepjep ke pehn pehd? Ih joah nen kihdahng nehn uhdahn dohiah? 22  Johpwa me joaloang kij mine, ma johpwa pirin kajanjalda; pel johpwa me oakkoak kij mine, ma johpwa pirin kalohkjili. 23  Doari armaj men ma mine sioa mihn rongrong, a ih en rong!”

24 Ih pel pwehng irai, “Kamwai soahk mwehu mehkije ma kamwai pirin rong! Mihn jonngohr ma kamwai pirin jongki epwi, ioar Koahs pirin jongki kamwai — apel koalikjang mehlel. 25  Pwa armaj ma anki mehkij, ekij pirin pel aluhwoang; a ma joh ah mehkij, pirin pel kihekjang mehu ma mine ipoa.”

26 Ih pel pwehng irai, “Wein Koahs doahroar armaj men ma kamwoar liporro siksikpwi nehn japwahu. 27  Nehn ah moair inpwong apel poahd in rehn, liporrohk kin koap apel koalkoalikla, a ih johpwa woahwoahki doahr mehpwiai kin wihwiawi. 28  Pwa pwirejjo ma kin kakoapihda liporrohu, kakoalikihla, apel kioang wah: sapdahu dipwdipw siksik kij, mwerin, ih kin wiahla suhkoa siksik, apel mwerin, uhwahda; a nehn wahu dirin liporro siksik. 29  Nehn en wah kan kin mah, armaj kin poaloahdi, kihpene, pwa anjoauwo ioar anjoau in doddol.”

30 Ih pel pwa, “Da kisai pirin karjahng wein Koahs? Ke karajraj da kisai pirin doadoahkki pwa kisai en kawoahwoahda? 31  Ih doahroar liporrohn Mustard, ma keiou siksik nehn pwungen liporrohn suhkoa kan. 32  A nehn a kamwoarmwoardi oang nehn pwirej, ih kin koapda apel koalikla wiahla suhkoa koalik pas, koalikjang suhkoahn nehn mwoaswel kan ohroj. Ih kajangpijoang, a mahnsang in pehnloannge kan kin jokdo wiahda irai paj pehn ririn rah kan.”

33 Jesus kawoahwoahng armaj kan en Koahs mahjan in joangoan karajraj pwiai doahroar arai en kin kak woahwoahki. 34 Joh kapahrak oau Ih kin wiahng armaj kan ma Ih johkin doadoahkki karajraj; a nehn Ah kin kalahpwukla ipen Nah sohnpadahkkok, Ih kin kawoahwoahng irai karajraj ohroj.

35 Injoausikin rehnnohr Jesus pwehng Nah sohnpadahkkok, “Kisai dauluhlla oaloap pille.” 36 Nehn irai koamwurla pokonno, sohnpadahkkok kerda pohn pohsso ma Jesus mine puwoa pwili jeila; epwi pohs pel pwili irai kijkijoula loappoauwo. 37 Doahr ken eng koalikda, ne koalik jaudahdo pohn pohsso, enkennoar kamweihdi. 38 Jesus mine mwerin pohsso, moair a moange mine pohn Ah pilahu. Sohnpadahkkok panginda Ih, pwehng Ih, “Maing Jounpadahk, koawoa johpwa kaspoahki irai ne pirinken mehdi?”

39 Jesus pwohrdahr, ruwojehda melmello, pwa, “Uhdi!” Ih pel pwehng nohk, “Kamwai moaloailoaidi!” Anjoauwohr melmello uhdi, ken molundi dauluhl. 40 Ih ken pwehng irai, “Da kamwai majpwehk ki? Da, kamwai kahjikkoar pwojonla?”

41 Irai majpwehkda koalik, pwahpene nehn pwungarai, “Inje min mine, ma eng apel no kin peikkoang?”