1 Oh inminjoang jamwrou laplappok apel koaunnok ne wiahda arai koajoandi pwa irai en kojukdi Jesus. 2 Arai joalihdi Ih, ukla jang wijahu ukla ipen Pilate, koapina in Rome.

3 Nehn en Judas, ma pangla Ih, kidalda pwa Jesus ne dipda pwa Ih en mehdi, ih inenin koluhla mehlel. Doar ih oaloa mwani silper jilihjek kapwurihlahng jamwrou laplappok apel koaunnok. 4 “Ngoahi ne wiahda dihp,” ih pwehng irai, “pwa ngoahi pangla woal pwung men.”

“Ia kaspoahng kamai?” irai japoang ih. “Men pwen oamw pwukoa.”

5 Doar Judas kerpwihdi mwanihkoa nehn Umw Joarwiho ih inla lohjakla.

6 Jamwrou laplappo pwoakda mwanihok, “Kisai johkak kioang mwani pwiai nehn wijahn nahk in mwanihn Umw Joarwiho,” irai pwa, “pwa uhwoang kojonned kisai en oaloa mwani dupkoan kojukdi armaj.” 7 Mwerin irai ekij sikoa irai koajoanehdi pwa arai en dupukla japwen jounwia ainpwoahsso, irai wiahkihla pei in armaj in likin. 8 Ioar kahrehda mohj oauwo adanki Mohj in Insa.

9 Me ne kapwaihahda kokohp in Jeremiah ma pwa, “Arai oaloa silper jilihjek, dopdopla mihn Israel lemleme pwa ioar woahr dupkoa, 10 irai dupuk kihda mohjjo en jounwia ainpwoahsso, doahr en Koaunno kaweid.”

11 Apkas Jesus uhda mwohn Pilate, koapinahn Rome. “Koawoa ioar Nahmwarkihn mihn Jew?” koapina idoak oang Ih.

Jesus japoang, “Eh, ma koawoa ne pwa.” 12 A anjoauwo ma jamwrou laplappok apel koaunnok kajalehda irai iroahk kadpoahki Ih, Jesus nennenla johpwa lallal.

13 “Koawoa johpwa rong dirin arai iroahk ma irai kadpoahki koawoa?” Pilate idoak.

14 A Jesus johpwa pwa mehkij, oang iroahk ma uhwoang Ih, ma inenin kapwuriamwei oang koapinahu.

15 Nehn anjoau in joarwihn Passover ohroj. Koapina kin kapisla emen sohn kalpwuhjjo oang mihn Jew‑ok, joah lipilpil emen ma irai pilda. 16 Nehn anjoauwo mine woal mwoarjuwed men nehn kalpwuhj oadoa Jesus Barabbas. 17 Nehn en armajjok pokon pene mwohn umwen Pilate‑o minjoanngo, ih idoak oang irai, “Inje kamwai nimen ngoahi en mweidoahng kamwai — Barabbas ke Jesus ma adanki Messiah?” 18 (Ih woahwoahki mwehu pwa koaun in mihn Jew‑ok joalihdi Jesus jang in pihrin.)

19 Anjoauwohr, nehn en Pilate ah minmine nehn ah jeiahn koapwung, pahioahu kadardohng ih rong pas, “Mweidla woal pwung menen, pwa ngoahi loklok koalik nehn oai oarmoane ih pwohng.”

20 Jamwrou laplappok apel koaunnok kaweidki pokonno en poaki Barabbas en lapwda, a Jesus en kojkojdi.

21 Koapinahu pel pwuroahng idoak, “Inje in ara roahmenne kamwai nimen ngoahi en mweidoahng kamwai?”

Pokonno rahukihla japoang ih, “Barabbas!”

22 Pilate pel pwuroahng idoak, “A da ngoahi en wiahng Jesus ma adanki Messiah?”

Arai ohroj pel rahukihda, “Kalohpwuhla ih!”

23 “Kahrpoa?” Pilate idoak oang irai. “Dihp da ih wiahda?”

A irai kapwa kakoalikihla ngilarai, “Kalohpwuhla ih!”

24 Pilate ne kidalda pwa ih johpwa kak wia mehkij ma en kak kauhdi pwa pingpinngo ne koalkoalikla. Doar ih pwa oau pwohl in pil en wijikdo ih amwunla poah mwohn pokonno, pwehng irai, “Ngoahi pijekjang insahn woal mene. Kamwai wud pwukoahki.”

25 Armajjok ohroj pel rahukihla, “Kamai pirin pwukoahki Ah mehdi — kamai apel nihmai jerihkan.”

26 Doari, Pilate kadarla Barabbas oang irai. Ih koajoanehdi arai en poki Jesus ki joal pahrang imwin pas, irai kioang jounpeihok en kalohpwuhla ih.

27 Epwi nihn koapina jounpeihok wahla Jesus oang nehn arai umwen koapinahu a pangindo pwihnin jounpeiho ohroj. 28 Irai kihjang Ah likkoau a pwainkihdi Ih robe wahssahioau. 29 Irai wiahda mwarmwar dokdok ingkoang roairoai pas kamwarmwarihkihdi moange, a irai kioang suhkoa pas nehn poah en wia kilel in manman. Doar irai poardi jang Ih nehn irai kapiski Ih, rahrahuki, “Kapang! Nahmwarkihn mihn Jew kan!” 30 A irai andipoa Ih pel doapwoa jang suhkoahu nehn poah pokihki nehn moange. 31 Nehn irai ne lok in wia mwahlki Ih, irai kihjang robe‑o irai wud kioang pein Ah likkoauwok. Doar irai ukla Ih en lohpwuhla.

32 Nehn irai allalu jang nehn kahnihmmwo, ihr koanoahdi woal in Cyrene men adanki Simon, irai ipong oang ih en wahda en Jesus lohpwuhwo. 33 Irai inla lel wijahkij adanki Golgotha (woahwoahki wijahn sihn moang). 34 Irai kioang Jesus wain doal kihda ad kasik pwa en nim, a mwerin Ah jong ekij, Ih johpwa nimla.

35 Mwerin irai poanihdi Ih oang in lohpwuhwo, irai wijwijki Ah likkoauwo pwa inje en anki, irai ken nehkpijoang nehn pwungarai. 36 Irai ken mwindihoang wijahu jiljiloa Jesus. 37 Pohn moange in lohpwuhwo ihr poanihdihoang insing oau ma kawoahwoahda kahrpoan Ah kalohpwuhla. Insinngo pwa,

38 Jounpirap roahmen pel pwili Ih lohpwuhla, emen mine loap moaun, a emen loap meing.

39 Armajjok ma kin dauli wijahu kin mwasmwasoahki arai kapiski Jesus, pwahpwahpwa, 40 “Ioar koawoa ma pirin koauwehla Umw Joarwiho pel pwuroahng kouda mwerin rehn jiluh! Pein kapisla koawoa, ma koawoa Nihn Koahs! Doaudi jang in lohpwuhwen!”

41 Jamwrou laplappok, apel jounpadahkkok in Kojonneddo, apel epwi koaunnok pwili kapiski Jesus, 42 “Ih kapisla epwi, a Ih johkak kapisla pein Ih! Jaudi Ih ioar nahmwarki in Israel? A Ih en kerdihjang in lohpwuhwen, a kamai nen kamehlele Ih. 43 Ih koapwoarpwoarki Koahs; doari, Koahs en kapisla Ih en kajalehda Ah pwungki Ih! Ih pwahla pwa, Ih Nihn Koahs.”

44 Jounpirappok ma pwili Ih lohpwuhla; ara pel pwili lahlahwe Jesus.

45 In jauwaj, roasoahdi oau wiawi pohn jappwo pwon, oaroain awa jiluh. 46 Koaroan oang kiloak jiluh mwerin jauwaj, Jesus ngil koalikda pwa, “Eli, Eli, lema sabachthani?”* “Eli, Eli, lema sabachthani?” Psalm 22:1 ma woahwoahki, “Oai Koahs, Oai Koahs, amwda Koawoa ke moalkoahla Ngoahi?”

47 Epwi armajjok ma uhuhu wijahu ken rongda, irai pwa, “Ih pangpangin Elijah!” 48 Emen irai pispis kijoula pwoakda spwoanj oau kapwuhrihdi wain kasik, kioang in mijen suhkoa pas kihdahlahng Ih pwa Ih en nim.

49 A epwi irai pwehng Ih, “jowi. Kisai kapang ma Elijah nen indoa kapisla Ih.”

50 A Jesus pel pwuroahng ngil koalikda, doar Ih ken mweidla ngenin.

51 Anjoauwohr kahdenngo ma poaroa mwoal joarwiho nehn Umw Joarwiho soahroakpijoang in riau, jang puwoa lel pah. Jampah roarda, sakai kan pwalpijoang, 52 joaujoau kan rispijoang. Palwoaroan nihn Koahs armaj dihrdir ma ne mehdi iejda. 53 Arai injang nehn ahr joaujoau kan; a mwerin en Jesus Ah iejda, irai pwokda nehn Kahnihmw Joarwiho pwokkoang armaj dir.

54 Laplap in jounpei apel jounpeihok ma pwili jiljiloa Jesus inenin majpwehkda nehn irai kapang roarroarin jappwo apel joang ohroj ma wiawi. Irai pwa, “Mehlel minmene uhdahn Nihn Koahs.”

55 Li dir ma pel pwilihdo mine wijahu, pwili kapkapang mehkan ma wihwiawi, a irai mine ekij doh jang wijahu; ioar irai koa ma pwili Jesus jang Galilee apel kin papah Ih. 56 Mary mihn Magdala, Mary inen James apel Joseph apel inen nihn Zebedee jermweinnok ma pwili mine ipen lihok.

57 Injoausikdi, woal koapwoahpwoa men jang Arimathea ma adanki Joseph, ih pel sohnpadahk in Jesus men. 58 Ih inla ipen Pilate poakihda palwoaroan Jesus. Pilate koajoanehdi pwa en mweimwei oang ih. 59 Joseph oaloa palwarro kidimkihpene likkoau roairoai oau. 60 Ih wahlahng nehn pein ah joaujoau kapw, ma kapwehsene wiawihda nehn sakai. Ih kasahpwroahng sakai koalik oau nehn wanihmw in joaujoauwo ih injang. 61 Mary mihn Magdala apel emen Mary mwindi koaroannoang kapkapang joaujoauwo.

62 Rehnwa mwerin, ioar rehn keiou in kasman in Passover — jamwrou laplappok apel Pharisee‑ok pokonpene ipen Pilate. 63 Irai pwehng ih, “Maing, kamai samanda en min likamw meno Ah pwa anjoauwo Ih pe mour: ‘Ngoahi pirin pwuroahng mourda mwerin rehn jiluh.’ 64 Koawoa en ruwoj pwa irai en jiloa ah joaujoauwo oaroh lel kajiluh in rehn, pwadoar nah sohnpadahk indoa pirapoahjang palwarro, ken pwehng armaj pwa ‘Ih iejdahjang mehdi.’ Pwa likamw pase pirin nauna jang minin mijkoalkoallo.”

65 Pilate pwehng irai “jiloapoahwa men, alwe jiloahdi mwehu joaujoauwo uhwen amwai kak.”

66 Irai inla pinahla joaujoauwo ki sakai oau apel kioang jiloapoahpwi pwa en jiljiloa.