នាវកោរាញឞ្រាសងើយនាវតឹមរាង្លាប់មហែ នាវតឹមមពើល 22

1 ជេសរីតោងពារ់អីនៃញហើអ៝ន់គ៝ប់ឆៃទាករាលាយ ជេងទាកអីអ៝ន់នាវរេស រាឆាងតឹមឞានមាលុងលាង ហ៝ចលោសឞើសរានើលកាដាច់កោរាញឞ្រាសនើម ជេងរានើលកាដាច់ក៝នឞែឞ្យាប់ដ៝ង់។* 2 ទាករាលាយអីនៃហ៝ចរ៝ៈតាងក្លាងងគូលត្រ៝ងប៝នក្ល៝សអ្វែសអីនៃ រ៝ៈមែងទាករាលាយអីនៃឞើសតីឞើសអ្យាគែសតើមឆីអីអ៝ន់នាវរេស ព្លៃពាង់ ១២ តឹតាទូនាម់ គែសព្លៃអាប់ខៃ។ ល៝ង់អីនហាពាង់នៃមាជានទាកឆីមាឆាម់ទឹងលែៈឞូនុយ្សទឹងលែៈឞ្រីទាកអ៝ន់ឞាស។* 3 មោហោមអោសគែសនាវរាតាប់មាទូនតីលនទើជឹត។ រានើលកាដាច់កោរាញឞ្រាសនើម អីជេងរានើលកាដាច់ក៝នឞែឞ្យាប់នើមដ៝ង់ គុតាប៝នអីនៃ ល៝ង់ឞូនុយ្សអីឆើមកើលជានការមា*ពាង់ ខាន់ពាង់មរាយើកមឞាសមាពាង់។* 4 ខាន់ពាង់មរាឆៃមុសមាត់ពាង់ ជេសរីតានទាង់ក្លែងខាន់ពាង់គែសរាញាពាង់ដ៝ង់។* 5 តាប៝ននៃមោហោមអោសគែសមាង់ជឹត មោខាច់គែសនារ មោខាច់គែសនទើមាអាងដ៝ង់ យ៝រលាសកោរាញឞ្រាសអីកោរាញជេងនាវអាងមាខាន់ពាង់ ជេសរីខាន់ពាង់មរាម៝ត់អ្វាញ់បាបើនហ៝រ៝។*

នតីលនាវងកាសអេងៗ

6 តោងពារ់អីនៃលាសមាគ៝ប់៖ “ទឹងលែៈនាវតាឆ៝ម់បុតអ្យាជេងនាវងាន់ ជេងទីមាអ្យាត់។ កោរាញឞ្រាសអីអ៝ន់ឞ្រាសហ្វេងអ្វែសមាមពោលឞូនុយ្សនតើយ្សនាវងើយពាង់ពាង់ជេងកោរាញពាង់ដាៈទូហ្វេតោងពារ់ពាង់នើមហាន់មឞើសងក៝ចមាឞូនុយ្សអីឆើមកើលជានការមាពាង់អ៝ន់គឹតម៝សនតីលនាវមរាគែសគើញតានារជឹតនាប់តៃ”។* 7 ឞ្រាសយេឆូ លាស៖ “ល៝ង់គ៝ប់ហាន់មរាត៝ត់គើញ! អ្វែសមអាកងាន់មាឞូម៝សអីញអោតជានតឹងនាវញចីសតាឆ៝ម់បុតអ្យាអីជេងនាវនតើយ្សនាវងើយកោរាញឞ្រាស”។ 8 គ៝ប់យោហាន អីលែៈតាង់ អីលែៈឆៃទឹងលែៈនាវអីនៃ លោចជេសគ៝ប់តាង់ គ៝ប់ឆៃនាវអីនៃ គ៝ប់ពាន់តាជ៝ង់តោងពារ់អីញហើអ៝ន់គ៝ប់ឆៃនាវនៃនើស អុចយើកមឞាសមាពាង់‌* 9 យើនមាតោងពារ់អីនៃលាសមាគ៝ប់៖ “លើយអោសយើកមឞាសមាគ៝ប់ គ៝ប់ជេងនើមឆើមកើលជានការនទ្រែលមៃទើម ជេងនើមឆើមកើលជានការនទ្រែលអ៝សនោមៃអីមពោលឞូនុយ្សនតើយ្សនាវងើយកោរាញឞ្រាស ជេងនើមឆើមកើលជានការនទ្រែលទឹងលែៈឞូនុយ្សអីញអោតជានតឹងទឹងលែៈនាវអីគែសញចីសជេសតាឆ៝ម់បុតអ្យាដ៝ង់។ យើកមឞាសមាកោរាញឞ្រាសហ៝ៈ!”

10 តោងពារ់អីនៃលាសតៃមាគ៝ប់៖ “លើយមពោនអោសនាវអីគែសញហើតាឆ៝ម់បុតអ្យា យ៝រលាសនារលោចងាន់នាវអីនៃលែៈឞើយមាត៝ត់ជេស។* 11 ឞូម៝សអីជានក្វែ អ៝ន់ពាង់ជានក្វែជឹតទោ! ឞូម៝សអីជានបឹបើច អ៝ន់ពាង់ហោមជានបឹបើចជឹតទោ! យើនមាឞូម៝សអីជានឆ៝ង់ អ៝ន់ពាង់ហោមជានឆ៝ង់ហ៝ម់! ឞូម៝សអីក្ល៝សអ្វែស អ៝ន់ពាង់ហោមគុក្ល៝សអ្វែសហ៝ម់!”*

12 ឞ្រាសយេឆូ លាស៖ “គ៝ប់មរាហាន់ត៝ត់គើញ នអ៝ប់មាញអោតនទើងខោមអ៝ន់ទូហ្វេទូហ្វេ តឹងនាវជានទូហ្វេទូហ្វេឆាក់នើស។* 13 គ៝ប់អ្យាជេងអាលផា នទ្រែលមាអោមេកា ជេងអីឞោកទាក នទ្រែលមាងគ្លែៈទុតមាទឹងលែៈនទើ ទឹងលែៈនតីលនទើនតើមគែសតាគ៝ប់ មោហោមគែសតាគ៝ប់ដ៝ង់។* 14 អ្វែសមអាកងាន់មាឞូម៝សអីគ៝ប់លែៈជូតលើយនាវតីសជេងតឹមឞានមាពីសអាវជ៝ងពាង់នើមលែៈអ្វែស គៃមាទើយគែសពែៈព្លៃឞើសតើមអីអ៝ន់នាវរេស នអ៝ប់មាទើយលាប់រ៝ៈមពោងប៝នអីនៃដ៝ង់។* 15 ឞើសទីសប៝ននៃគែសមពោលឞូនុយ្សអ្យើសអីតឹមឞានមាមពោលឆ៝† គែសមពោលអីម៝ត់នអាង គែសមពោលអីតឹមទ៝ង់ គែសមពោលអីងខឹតឞូ គែសមពោលយើកមឞាសមារូបឞ្រាស នទ្រែលមាទឹងលែៈឞូនុយ្សអីមរោសរាលាម់ឞូ!”*

16 “គ៝ប់យេឆូ លែៈដាៈតោងពារ់គ៝ប់នើមមឞើសងក៝ចទឹងលែៈនាវតាឆ៝ម់បុតអ្យាអ៝ន់មាផូងអីញឆីងមាគ៝ប់អាប់នតុក។ គ៝ប់ក៝នឆៅកាដាច់ដាវីត ‡គ៝ប់អ្យាជេងទូមល៝ម់មឞីងអីអាងនោកអោយ”។*

17 ឞ្រាសហ្វេងអ្វែស នទ្រែលមាអូរអីមានអាប់§លាសកើតនអា៖ “វាច់ហ៝ម់!”

ជេសរីឞូម៝សអីតាង់នាវអីនៃ អ៝ន់លាសកើតនៃដ៝ង់៖ “វាច់ហ៝ម់!”

ឞូម៝សជីហីរអ៝ន់ពាង់វាច់ហ៝ម់‌

ឞូម៝សកើញគែស ទាន់ឆ៝ៈទើមទាមហ៝ម់ទាកអីអ៝ន់នាវរេស!*

18 គ៝ប់មឞើសមាទឹងលែៈឞូនុយ្សអីតាង់នាវងើយកោរាញឞ្រាសអីលែៈញចីសជេសតាឆ៝ម់បុតអ្យា អ៝ន់ញជ្រាង់ឆាក់ ឞូម៝សអីនត៝បនាវង្វាយតាឞើសលើនាវអ្យា កោរាញឞ្រាសមរាឆ៝ៈនទើជេរជ៝ត់អីលែៈគែសមឞើសងក៝ចជេសតាឆ៝ម់បុតអ្យាតេៈតាពាង់អីនៃ។* 19 ជេសរីឞូម៝សអីរាហ្វាត់នាវង្វាយតានាវងើយកោរាញឞ្រាសអីលែៈគែសញចីសជេសតាឆ៝ម់បុតនតើយ្សនាវងើយកោរាញឞ្រាសអ្យា កោរាញឞ្រាសមរាមោរ៝មពាង់ឆាព្លៃតើមឆីអីអ៝ន់នាវរេសអីនៃដ៝ង់ ជេសរីមោអោសអ៝ន់ពាង់លាប់តាប៝នអីលែៈគែសមឞើសងក៝ចជេសតាឆ៝ម់បុតអ្យា។*

20 ឞ្រាសយេឆូ អីលែៈលាសនាវមឞើសងក៝ចតាឆ៝ម់បុតអ្យាទីងាន់ ពាង់លាស៖ “នានេៈងាន់ គ៝ប់មរាវាច់គើញរ៝!” នាវអីនៃទីងាន់*! អើកោរាញយេឆូ ទាន់វាច់ហ៝ម់!* 21 ទាន់នាវអ្វែសកោរាញយេឆូ គុនទ្រែលទឹងលែៈផូងប៝នលានកោរាញឞ្រាស!†៚

*22:1 ២២:១៖ អេឆេ ៤៧:១-១២; ឆាក ១៤:៨

*22:2 ២២:២៖ នតម ២:៧; នន ២:៨-៩; ៣:២២

*22:3 ២២:៣៖ «ឞូនុយ្សអីឆើមកើលជានការមា» មោលាស «ទឹក»។ តាត្រ៝ង ៦ គែសកើតនៃដ៝ង់។

*22:3 ២២:៣៖ ឆាក ១៤:១១; កាល ៣:១៣

*22:4 ២២:៤៖ នង ៣៣:២០; នម ១៧:១៥; មថ ៥:៨

*22:5 ២២:៥៖ នតម ២១:២២-២៥; អេឆា ៦០:១៩; ដាន ៧:១៨, ២៧

*22:6 ២២:៦-៧៖ នតម ១:១-៣

*22:8 ២២:៨-៩៖ នតម ១៩:១០

*22:10 ២២:១០៖ ដាន ១២:៤

*22:11 ២២:១១៖ អេឆេ ៣:២៧; ដាន ១២:១០

*22:12 ២២:១២៖ នតម ២០:១២-១៣; រម ២:៦

*22:13 ២២:១៣៖ នតម ១:៨; អេឆា ៤៤:៦

*22:14 ២២:១៤៖ នតម ៧:១៣-១៤; នម ១១៨:១៩-២០

†22:15 ២២:១៥៖ ផូងអីឆ្រាអែល កើបឆ៝ជេងមពោមពា(ឆ្យុម)បឹបើច។

*22:15 ២២:១៥៖ នតម ២១:២៧; អេផ ៥:៥

‡22:16 ២២:១៦៖ មោលាស «គ៝ប់អីរែស នអ៝ប់មាអីក៝នឆៅកាដាច់ដាវីត »។

*22:16 ២២:១៦៖ នតម ៥:៥; អេឆា ១១:១, ១០; មក ១២:៣៥-៣៧; លក ១:៧៨

§22:17 ២២:១៧៖ «អូរអីនអាប់»ងើយហោរមាទឹងលែៈផូងអីញឆីងមាឞ្រាសក្រីស។

*22:17 ២២:១៧៖ អេឆា ៥៥:១; យហ ៧:៣៧

*22:18 ២២:១៨-១៩៖ នវ ៤:២

*22:19 ២២:១៩៖ នតម ២:៧

*22:20 ២២:២0៖ «នាវអីនៃទីងាន់» មោលាស «អាមែន »។

*22:20 ២២:២០៖ ១កោ ១៦:២២

†22:21 ២២:២១៖ ឆ៝ម់បុតអើមអីញចីសមាតីអាបាៈនត៝បលាស៖ «អើអ៝ន់គែសកើតនៃងាន់រ៝» មោលាស «អាមែន »។