នាវកោរាញឞ្រាសងើយនាវតឹមរាង្លាប់មហែ រោម 11

កោរាញឞ្រាសកើយ្សឞូនុយ្សអាបាៈតាផូងអីឆ្រាអែល

1 លាសនទ្រីគ៝ប់ទាន់អោប៖ កោរាញឞ្រាសលែៈមអារ់ផូងអីឆ្រាអែល អីប៝នលានពាង់នើមឞើស? មោអោស! កោរាញឞ្រាសមោមអារ់អោស យ៝រលាសឆាក់គ៝ប់នើមអីអ្យាផូងអីឆ្រាអែល ដ៝ង់ ជេងរាន៝យទែសអាឞ្រាហាម់ តាមពោលបែនយាមឹន *។* 2 កោរាញឞ្រាសមោគែសអោសមអារ់ផូងអីឆ្រាអែល អីប៝នលានពាង់ អីលែៈអើមពាង់នើមកើយ្សឞើសអាល៝រ។ អើមខាន់អៃមៃមោលាសគឹត នាវគែសញចីសតានាវកោរាញឞ្រាសងើយលាសមាឞូនុយ្សនតើយ្សនាវងើយកោរាញឞ្រាសរាញាអេលីយា ? ពាង់នតោនផូងអីឆ្រាអែល មាកោរាញឞ្រាសកើតនអា៖* 3 «អើកោរាញ! លែៈខាន់ពាង់ងខឹតលែៈផ្យៅជេសឞូនុយ្សនតើយ្សនាវងើយមៃ លែៈខាន់ពាង់លើសរាល៝ម់លើយលែៈផ្យៅដ៝ង់នតុកជានឞ្រាសមៃ។ ហោមអែក្លែនទូហ្វេគ៝ប់ទើម ជេសរីឞូអុចតឹងងខឹតគ៝ប់ជឹត»†។ 4 យើនមាមើមកោរាញឞ្រាសអើសមាពាង់? កោរាញឞ្រាសអើសមាពាង់កើតនអា៖ «គ៝ប់លែៈញជ្រាង់ជេសឞូនុយ្ស ៧០០០ នុយ្សអីហោមយើកមឞាសមាគ៝ប់ ខាន់ពាង់អីនៃមោអោសច៝នកោម៝ក់ឞើសនាប់ឞ្រាសបាល »†។ 5 កើតនទ្រីអាបៃអ្យាតឹមឞានកើតនៃដ៝ង់ ហោមអែគែសឞូនុយ្សផូងអីឆ្រាអែល អាបាៈអីលែៈកោរាញឞ្រាសទែកើយ្សអ៝ន់គែសនាវរាក្លាយ្សយ៝រមានាវអ្វែសពាង់អីពាង់អ៝ន់ទើមទាម។* 6 លាសកោរាញឞ្រាសកើយ្សខាន់ពាង់យ៝រមានាវអ្វែសពាង់ លាសនទ្រីមោអោសទីពាង់កើយ្សយ៝រមានាវខាន់ពាង់ជាន។ លាសកោរាញឞ្រាសកើយ្សយ៝រមានទើខាន់ពាង់ជាន លាសនទ្រីនទើអីឞ៝ន់ក្វាល់លាស៖ «នាវអ្វែសកោរាញឞ្រាស» មោអោសទី«នាវអ្វែស»ងាន់ យ៝រមាមោហោមជេងនទើអីពាង់អ៝ន់ទើមទាម។†* 7 លាសនទ្រីមើមឞ៝ន់មឹនដ៝ង់? ម៝សនទើអីផូងអីឆ្រាអែល អុចជ៝យនៃ ខាន់ពាង់ជ៝យមោឆៃអោស។ យើនមាគែសផូងអីឆ្រាអែល អាបាៈទើមអីកោរាញឞ្រាសលែៈកើយ្សជ៝យឆៃនទើអីនៃ ជេសរីគែសផូងអីឆ្រាអែល អាបាៈអេងជឹតខាន់ពាង់ទាង់ក៝ងាន់។* 8 នាវអីនៃទីកើតនាវលែៈគែសញចីសជេស៖

«កោរាញឞ្រាសអ៝ន់នូយ្សនហ៝ម់ខាន់ពាង់ជ៝ក់រាអាយ‌

អ៝ន់មាត់ខាន់ពាង់អ្វាញ់មោឆៃ‌

តោរខាន់ពាង់អ្យាត់មោតាង់‌

នហ៝មាត៝ត់នារអាបៃអ្យា»†។

9 ជេសរីកាដាច់ដាវីត លែៈលាសកើតនអា៖

«ទាន់អ៝ន់នទើឆោងឆាខាន់ពាង់ជេងទាក់នទើមឆាក់ខាន់ពាង់នើម ជេងងគុប

ជានអ៝ន់ខាន់ពាង់ជានតីស គៃមាមៃតេៈទោយ្សព្លើងនទើតីសខាន់ពាង់ជាន។

10 អ៝ន់មាត់ខាន់ពាង់ជេងង៝ អ្វាញ់មោឆៃអោស‌

ជេសរីជានអ៝ន់នទុរកើយខាន់ពាង់ក្រោនឹងតាៈឞើសនាវជេរ»†។

កោរាញឞ្រាសរាក្លាយ្សផូងអីមោទីផូងអីឆ្រាអែល

11 លាសនទ្រីគ៝ប់ទាន់អោប ផូងអីឆ្រាអែល អីតឹមរាលាច់មោអុចរ៝មឞ្រាសក្រីស ខាន់ពាង់តឹមឞានមាព្រាសឆ្រ៝ករី អាសខាន់ពាង់ចោតងក្រែឞើស? មោអោស! អាចមាខាន់ពាង់ជានតីសមោអុចរ៝មឞ្រាសក្រីស នទ្រីទឹងផូងអីមោទីផូងអីឆ្រាអែល គែសរាក្លាយ្ស។ នាវអីនៃគែសគៃមាផូងអីឆ្រាអែល គែសនាវកើញមានាវរាក្លាយ្ស។* 12 លាសនាវផូងអីឆ្រាអែល ជានតីសកើតនៃលែវទឹងលែៈឞូនុយ្សតានែសនតូអ៝ន់គែសនាវគែសជេង គែសនាវខ្លៃលាស ផូងអីមោទីផូងអីឆ្រាអែល គែសនាវរាក្លាយ្ស យ៝រលាសផូងអីឆ្រាអែល តឹមរាលាច់មាឞ្រាសក្រីស លាសនទ្រីលើមាហោរាលាវមានៃកោរាញឞ្រាសមរាអ៝ន់នាវគែសជេងមាទឹងលែៈឞូនុយ្សតានែសនតូ តានោកទឹងលែៈផូងអីឆ្រាអែល រ៝មឞ្រាសក្រីស តៃ។

13 អាបៃអ្យាគ៝ប់ងើយមាខាន់អៃមៃអីមោទីផូងអីឆ្រាអែល ៖ កោរាញឞ្រាសដាៈគ៝ប់អ្យាជេងកោរាញអ៝សម៝នគៃមាកើលផូងអីមោទីផូងអីឆ្រាអែល ។ គ៝ប់អុចយើកមានទើជានការគ៝ប់អីនៃ‌* 14 គៃមាងកើញផូងនទុលមពោលគ៝ប់នើម ងខេបលាសគែសឞូនុយ្សអាបាៈតាផូងខាន់ពាង់គែសនាវរាក្លាយ្សដ៝ង់។ 15 យ៝រមាខាន់ពាង់មអារ់លើយឞ្រាសក្រីស ទឹងឞូនុយ្សលាមនែសនតូជេងតឹមរាង្លាប់ដាសកោរាញឞ្រាសកើតនអា។ លាសកោរាញឞ្រាសរ៝មតៃខាន់ពាង់មើមជេង? ជេងតឹមឞានមាទឹងលែៈឞូនុយ្សអីលែៈខឹតទ៝ក់រេសងាន់រ៝! 16 ផូងអីឆ្រាអែល ជេងតឹមឞានមារានីសទូរាច្វាល់មាជាននុមពាង់ លាសឞូឆ៝ៈរានីសជានទូរាច្វាល់មាជាននុមពាង់ ជេសរីឞូឆ៝ៈអាបាៈមាញហើរមាកោរាញឞ្រាស លាសនទ្រីទឹងលែៈរាច្វាល់អីនៃជេងនទើកោរាញឞ្រាសនើមដ៝ង់។ ជេសរីលាសរែសជេងនទើកោរាញឞ្រាសនើម ងគីងតើមអីនៃជេងនទើកោរាញឞ្រាសនើមដ៝ង់។ កើតនទ្រីដ៝ង់ទឹងលែៈផូងអីឆ្រាអែល ជេងប៝នលានកោរាញឞ្រាស យ៝រមាអាឞ្រាហាម់ នអ៝ប់មាផូងចែខាន់ពាង់អាអេងជេងប៝នលានកោរាញឞ្រាស។*

នាវនតឹតមាងគីងតើមអោលីវ

17 ផូងអីឆ្រាអែល ជេងតឹមឞានមាតើមអោលីវ ប៝ន គែសងគីងអាបាៈលែៈឞូឆ្រែសលើយ ជេសរីខាន់អៃមៃអីមោទីផូងអីឆ្រាអែល ជេងតឹមឞានមាងគីងអោលីវ ឞ្រីអីឞូទែពូតនទ៝បតានតុកងគីងអីលែៈឞូឆ្រែសអីនៃ នហ៝មាអ្យ្រេបទាកកាសឞើសរែសអ្វែសពាង់នទ្រែលងគីងអាបាៈអេងអីហោមដ៝ង់។ 18 លាសនទ្រីខាន់អៃមៃលើយអោសនហីអេងឆាក់មាងគីងអីលែៈឞូឆ្រែសមអារ់អីនៃ។ លាសខាន់អៃមៃនហីអេងឆាក់ អ៝ន់ខាន់អៃមៃគឹត មោទីអោសខាន់អៃមៃឆ្យាម់រែស រែសអីឆ្យាម់អ៝ន់មាខាន់អៃមៃ!* 19 ក្លាប់លាសខាន់អៃមៃលាស៖ “ងគីងអីនៃកោរាញឞ្រាសឆ្រែសមអារ់លើយ គៃមាពូតនទ៝បហេន!” 20 ទីងាន់! ងគីងអីនៃទឹងកោរាញឞ្រាសឆ្រែសមអារ់លើយយ៝រមាងគីងអីនៃមោគែសនាវញឆីងមាឞ្រាសក្រីស ជេសរីខាន់អៃមៃទឹងក្រេបន៝ប់ យ៝រមាខាន់អៃមៃគែសនាវញឆីង។ លាសនទ្រីលើយអោសខាន់អៃមៃនហីអេងឆាក់ អ៝ន់ខាន់អៃមៃគែសនាវក្លាចមាកោរាញឞ្រាសហ៝ៈ។* 21 លាសកោរាញឞ្រាសឆ្រែសលើយមោរ៝ងមាងគីងអើម ពាង់ទើយឆ្រែសលើយមោរ៝ងខាន់អៃមៃដ៝ង់។ 22 លាសនទ្រីអ្វាញ់ហ៝ម់នាវអ្វែសកោរាញឞ្រាស នទ្រែលមានាវជាញពាង់។ ពាង់ជាញងាន់មាឞូនុយ្សមោអ្យាត់‡ ជេសរីពាង់ញហើនាវអ្វែសពាង់នើមមាខាន់អៃមៃ លាសខាន់អៃមៃហោមគុន៝ប់តានាវអ្វែសពាង់។ លាសមោអោសកើតនៃ ពាង់ឆ្រែសមអារ់លើយខាន់អៃមៃដ៝ង់។*

23 ជេសរីងគីងអើមអីលែៈឆ្រែសលើយ លាសខាន់ពាង់រាគ៝ល់លើយនូយ្សនហ៝ម់អីមោអុចញឆីងនើស កោរាញឞ្រាសមរាពូតនទ៝បតៃខាន់ពាង់ដ៝ង់ យ៝រលាសកោរាញឞ្រាសទើយពូតនទ៝បតៃខាន់ពាង់។ 24 លាសលែៈកោរាញឞ្រាសឆ្រែសជេសខាន់អៃមៃឞើសតើមអោលីវ ឞ្រី ជេសរីពាង់ពូតនទ៝បតាតើមអោលីវ ប៝ន មោទីអោសដាសនទើអីឞូវៃជាន លាសនទ្រីទើសងាន់កោរាញឞ្រាសឆ៝ៈខាន់ពាង់អីតឹមឞានមាងគីងអើមអីលែៈឆ្រែសនើស ជេសរីពូតនទ៝បតៃទូតឹជឹតដាសតើមឆីអើមអីនទើខាន់ពាង់នើម។

កោរាញឞ្រាសមរារាក្លាយ្សទឹងលែៈផូងអីឆ្រាអែល

25 អើអ៝សនោតានាវញឆីង គៃមាខាន់អៃមៃមោអោសអ្វាញ់អេងឆាក់ខាន់អៃមៃនើមជេងគែសនាវមឹនគឹតឞ្លាវហោងាន់ គ៝ប់អុចខាន់អៃមៃគឹតវ៝ត់នាវអីអ្យាអីឞើសនតើមនើសហោមនទ៝ប់មពោន៖ គែសឞូនុយ្សអាបាៈតាផូងអីឆ្រាអែល ហោមទាង់ក៝មោអុចញឆីងមាឞ្រាសក្រីស ។ យើនមាត៝ត់ទឹងលែៈផូងអីមោទីផូងអីឆ្រាអែល អីកោរាញឞ្រាសលែៈកើយ្សលាប់ញឆីងមាឞ្រាសក្រីស ទាទេ រីមើផូងអីឆ្រាអែល ឞាសទាង់ក៝លាប់ញឆីងមាឞ្រាសក្រីស ដ៝ង់។ 26 កើតនទ្រីទឹងលែៈផូងអីឆ្រាអែល មរាគែសរាក្លាយ្ស។ នាវអីនៃតឹមទីមានាវលែៈគែសញចីសជេស៖ «កោរាញឞ្រាសលាស៖

«មរាគែសទូហ្វេនើមរាក្លាយ្សលោសឞើសប៝នយេរូឆាលឹម §‌

ពាង់មរាលែវផូងអីឆ្រាអែល *រាគ៝ល់នូយ្សនហ៝ម់ឞាសតឹមរាទ៝ង់ដាសនាវគ៝ប់អុច។

27 នាវតឹមរាង្លាប់គ៝ប់ដាសខាន់ពាង់ជេងកើតនអា៖

គ៝ប់ឆ៝ៈលើយនាវតីសមោហោមកើបនាវតីសតាខាន់ពាង់»»†។

28 អាបៃអ្យាគែសអ៝ក់ឞូនុយ្សតាផូងអីឆ្រាអែល ជេងផូងរាលាង់តឹមរាទ៝ង់ដាសនាវមហែមហានអ្វែស តាៈឞើសនាវអីនៃជេងគែសនទើអ្វែសមាខាន់អៃមៃអីមោទីផូងអីឆ្រាអែល ។ យើនមាកោរាញឞ្រាសហោមរ៝ង់មាខាន់ពាង់ យ៝រមាកាល់អែនើសកោរាញឞ្រាសលែៈកើយ្សចែខាន់ពាង់អាឞ្រាហាម់ អីឆាក់ នទ្រែលមាយាកោប ។* 29 នាវអីនៃតាៈឞើសកោរាញឞ្រាសមោរាគ៝ល់អោសនទើអីលែៈពាង់អ៝ន់ទើមទាម ពាង់មោរាគ៝ល់ដ៝ង់មាឞូនុយ្សអីលែៈពាង់ក្វាល់។* 30 ឞើសនតើមនើសខាន់អៃមៃអេហ៝ៈអ្យាត់អោសនាវកោរាញឞ្រាស យើនមាអាបៃអ្យាកោរាញឞ្រាសលែៈកើលខាន់អៃមៃលែៈយោៈជេសមាខាន់អៃមៃ យ៝រមាផូងអីឆ្រាអែល មោអុចអ្យាត់អោសនាវពាង់។ 31 អាបៃអ្យាខាន់ពាង់មោអុចអ្យាត់អោស ជេសរីកោរាញឞ្រាសយោៈមាខាន់អៃមៃ លាសនទ្រីកោរាញឞ្រាសមរាយោៈខាន់ពាង់កើតពាង់យោៈមាខាន់អៃមៃដ៝ង់។ 32 កោរាញឞ្រាសអ៝ន់ទឹងលែៈឞូនុយ្សមោអ្យាត់នាវពាង់ គៃមាពាង់យោៈអ៝ន់មាទឹងលែៈឞូនុយ្ស។

នាវពោល រានេមាកោរាញឞ្រាស

33 អោ នាវមឹនគឹតឞ្លាវកោរាញឞ្រាសទុតជ្រូទុតក្វ៝ង់ងាន់ មោគែសអោសឞូនុយ្សទើយគឹតវ៝ត់អាមើមនាវពាង់ផាតទោយ្ស ជេសរីនទើពាង់ជានមោគែសដ៝ង់ឞូនុយ្សទើយវ៝ត់!*

34 «ឞូម៝សហោមទើយគឹតនាល់នាវមឹនកោរាញឞ្រាស?

ឞូម៝សហោមទើយឆើមមឞើសនាវអ៝ន់មាពាង់ដ៝ង់?»†

35 «មោអោសគែសទូហ្វេឞូនុយ្សអ៝ន់នទើមាកោរាញឞ្រាសល៝រ‌

ទឹងអ្យាត់មាកោរាញឞ្រាសព្លើងអ៝ន់នទើមាពាង់។»†

36 ទឹងលែៈនទើជេងតាៈឞើសកោរាញឞ្រាសទាទេ ទឹងលែៈនទើហោមគែសយ៝រមានាវទើយពាង់ទើម ទឹងលែៈនទើគែសគៃមានហាវនាវច្រេកលើបពាង់នើម។ អ៝ន់រានេនាវច្រេកលើបពាង់បាបើនហ៝រ៝ នាវអីនៃទីងាន់†!*

*11:1 ១១:១៖ ផូងអីឆ្រាអែល កើបមពោលក្វ៝ង់តឹង ១២ នុយ្សក៝នឞូក្លោយាកោប បែនយាមឹន ជេងទូហ្វេក៝នឞូក្លោតាមពោលទឹងលែៈអីនៃ។

*11:1 ១១:១៖ ផល ៣:៥

*11:2 ១១:២៖ យេរ ៣១:៣៧

†11:3 ១១:៣៖ ១កក ១៩:១០, ១៤

†11:4 ១១:៤៖ ១កក ១៩:១៨

*11:5 ១១:៥៖ រម ៩:២៧-២៨

†11:6 ១១:៦៖ ឆ៝ម់បុតអើមញចីសមាតីអាបាៈនត៝បលាស៖ «លាសពាង់កើយ្សយ៝រមានាវខាន់ពាង់ជានតឹងនាវវៃមោឆេ លាសនទ្រីកោរាញឞ្រាសមោហោមអោសអ៝ន់នាវរាក្លាយ្សទើមទាមតាៈឞើសនាវអ្វែសពាង់នើមទើម។ ជេងទីងាន់មាងខោមនទើឞូជាន យើនមាលាសកោរាញឞ្រាសកើយ្សតាៈឞើសនាវអ្វែសពាង់នើម លាសនទ្រីពាង់មោអោសងខោមមាឞូនុយ្សមានទើឞូនុយ្សជានតឹងមានាវវៃ»។

*11:6 ១១:៦៖ រម ៤:៤-៥

*11:7 ១១:៧៖ រម ៩:៣១

†11:8 ១១:៨៖ នវ ២៩:៤; អេឆា ២៩:១០

†11:10 ១១:១០៖ នម ៦៩:២២-២៣

*11:11 ១១:១១៖ រម ១១:២៩; ១០:១៩

*11:13 ១១:១៣៖ រម ១:៥; ១កោ ៩:១៩-២១

*11:16 ១១:១៦៖ នក ១៥:១៧-២១

*11:18 ១១:១៨៖ យហ ៤:២២

*11:20 ១១:២០៖ អេផ ២:១១-១៣; ១កោ ១០:១២

‡11:22 ១១:២២៖ «ឞូនុយ្សមោអ្យាត់» មោលាស «ឞូនុយ្សចោត»។

*11:22 ១១:២២៖ យហ ១៥:១-៤

§11:26 ១១:២៦៖ «ប៝នយេរូឆាលឹម » មោលាស «ឆីយោន »។

*11:26 ១១:២៦៖ «ផូងអីឆ្រាអែល » មោលាស «យាកោប »។

†11:27 ១១:២៦-២៧៖ អេឆា ៥៩:២០-២១; ២៧:៩; យេរ ៣១:៣៣-៣៤

*11:28 ១១:២៨៖ នវ ៧:៨

*11:29 ១១:២៩៖ នក ២៣:១៩; ១ឆា ១៥:២៩; មាល ៣:៦; ហេឞ ៦:១៨

*11:33 ១១:៣៣៖ រម ១៦:២៥-២៦; អេផ ៣:៦-១២

†11:34 ១១:៣៤៖ អេឆា ៤០:១៣

†11:35 ១១:៣៥៖ យោប ៤១:១១

†11:36 ១១:៣៦៖ «នាវអីនៃទីងាន់» មោលាស «អាមែន »។

*11:36 ១១:៣៦៖ ១កោ ៨:៦; កោល ១:១៥-១៧