ឆ៝ម់បុត
យោហាន
ញចីស
រើស ៣
នាវឞោកអ៝ន់ឞូគឹតល៝រ
នើមញចីសឆ៝ម់បុតអ្យារាញាយោហាន ពាង់ញចីសឆ៝ម់បុតអ្យាក្លាប់លាសតានាម់ ៦០-៩០។ តានាវងើយគ្រែក មោអោសគែសញចីសរាញាយោហាន តាឆ៝ម់បុតអ្យា នើមញចីសក្វាល់ឆាក់ពាង់នើម«កោរាញ» យើនមាផូងកោរាញផូងញឆីងមាឞ្រាសក្រីស ឞើសកើយជេសឞូញចីសនាវតឹមរាង្លាប់មហែ ញចីសលាសនើមញចីសយោហាន អីកោរាញអ៝សម៝នឞ្រាសក្រីស ។ ឞូមឹនលាសពាង់ញចីសឆ៝ម់បុតអ្យាតាប៝នអេផេឆោ ។ ពាង់ញជ្វាល់ឆ៝ម់បុតអ្យាអ៝ន់មាទូហ្វេឞូក្លោរាញាកៃយុស កៃយុស ជេងកោរាញផូងញឆីងមាឞ្រាសក្រីស ទូនតុក យើនមាឞ៝ន់មោអោសគឹតនទើអេងតាពាង់។ យោហាន ញចីសឆ៝ម់បុតយោហាន នាវមហែមហានអ្វែសដ៝ង់ ឆ៝ម់បុតយោហានរើស ១ រើស ២ នទ្រែលមាឆ៝ម់បុតនាវតឹមមពើលដ៝ង់។
នាវអុចនត្រ៝ង់តាឆ៝ម់បុតអ្យា
តាឆ៝ម់បុតអ្យាយោហាន រានេនោកៃយុស យ៝រលាសពាង់លែៈកើលមាផូងអីញឆ៝ងរ៝ៈនតុកអេងៗអីនតីនាវកោរាញឞ្រាស ជេសរីពាង់ដាៈកៃយុស ញជ្រាង់មាទូហ្វេឞូក្លោរាញាដីអោត្រែប យ៝រលាសដីអោត្រែប គែសនូយ្សនហ៝ម់អ្យើស នអ៝ប់មារានេទូហ្វេឞូក្លោរាញាដេមេត្រុស ។
មឞើសនាវខ្លៃតាងកោៈតាឆ៝ម់បុតអ្យា
- នាវអោបអ្វែសលាង់ (១:១-៤)
- នាវរានេមាកៃយុស (១:៥-៨)
- ដីអោត្រែប នទ្រែលមាដេមេត្រុស (១:៩-១២)
- នាវនតិញងគ្លែៈទុត (១:១៣-១៥)
1
នាវអោបអ្វែសលាង់
1 ឆ៝ម់បុតអ្យាតាៈឞើសគ៝ប់យោហាន អីកោរាញតាផូងអីញឆីងមាឞ្រាសយេឆូក្រីស ។ ទាន់អោបនាវអ្វែសលាង់មានោកៃយុស អីគ៝ប់រ៝ង់ងាន់ងេន។* ១:១៖ ២យហ ១:១ 2 អើនោអីគ៝ប់រ៝ង់ គ៝ប់រានើមមៃគែសនាវអ្វែសលាង់ កើតមៃលែៈគែសគុន៝ប់តានាវញឆីងមាឞ្រាសក្រីស ដ៝ង់។ 3 គ៝ប់គែសរាម់មអាកហោងាន់ នោកអ៝សនោតានាវញឆីងអាបាៈអីឆឹតត៝ត់អាគ៝ប់ យ៝រលាសខាន់ពាង់មឞើសងក៝ចមៃហោមគុរាប់ជាប់តានាវងាន់ ហោមជានតឹងនាវនតីងាន់។* ១:៣-៤៖ ២យហ ១:៤ 4 គ៝ប់មោអោសគែសនាវរាម់មអាកអីក្វ៝ង់រាលាវមានាវរាម់មអាកអីគ៝ប់តាង់ក៝នឆៅគ៝ប់តានាវញឆីងជានតឹងនាវនតីអីងាន់។
នាវរានេមាកៃយុស
5 អើនោតានាវញឆីងអីគ៝ប់រ៝ង់ មៃលែៈរាប់ជាប់ងាន់កើលមាផូងអ៝សនោតានាវញឆីងអីហាន់ត្រ៝ងរ៝ៈប៝នអេងៗត៝ត់តានតុកមៃ ឞ៝លលាសមៃមោគឹតនាល់ខាន់ពាង់។ 6 ខាន់ពាង់អីនៃលែៈមឞើសងក៝ចតាផូងញឆីងតានតុកអ្យានាវអីមៃលែៈញហើនាវរ៝ង់មាខាន់ពាង់នៃ។ ជេសរីដាៈមៃហោមកើលនទើខាន់ព្រែមាហាន់រ៝ៈត្រ៝ង ជេងតឹមទីមានទើជានការអីអ៝ន់កោរាញឞ្រាសរាម់មអាក* ១:៦៖ ១កោ ៩:៤, ៩-១០; តត ៣:១៣ 7 យ៝រលាសខាន់ពាង់ហាន់ញឆាកញឆ៝ងមឞើសងក៝ចនាវឞ្រាសយេឆូ ជេសរីខាន់ពាង់មោគែសអោសឆ៝ៈទើននទើទូនតីលតាៈឞើសផូងអីមោញឆីងមាឞ្រាសយេឆូ ។ 8 លាសនទ្រីអ្យាត់មាឞ៝ន់ឞ្លាវកើលមាឞូនុយ្សអីកើតនៃ គៃមាឞ៝ន់ជានការនទ្រែលឞាល់តានាវនតីអីងាន់។* ១:៨៖ មថ ១០:៤០; ហេឞ ១៣:២
នាវនទុយ្សមាដីអោត្រែប ជេសរីរានេមាដេមេត្រុស
9 គ៝ប់លែៈជេសញជ្វាល់ឆ៝ម់បុតអ៝ន់មាផូងញឆីងតានតុកមៃ យើនមាគែសទូហ្វេឞូក្លោរាញាដីអោត្រែប អីឞូនុយ្សអុចជានកោរាញក្វ៝ង់រាលាវឞូ ពាង់មោអោសអ្យាត់នាវហេន។ 10 យើនមានោកគ៝ប់ហាន់ត៝ត់តានៃ គ៝ប់មរាងកាសពាង់ទឹងលែៈនទើអីពាង់ជាននៃ។ ពាង់ងើយញចើតងើយអ្យើសហេនអ៝ន់មាឞូនុយ្សអេង មោទើនមានទើអីនៃ ជេសរីពាង់មោអោសរ៝មផូងអ៝សនោតានាវញឆីង ឞ្វៃផូងអីអុចរ៝មមោអ៝ន់រ៝មដ៝ង់ ជេសរីមព្រើសផូងអីអុចរ៝មទូលោសឞើសផូងញឆីងតានៃជឹត។
11 អើនោអីគ៝ប់រ៝ង់ លើយអោសតឹងជាននទើអ្យើស អ៝ន់តឹងជាននទើអ្វែសហ៝ៈ។ ឞូម៝សអីជាននទើអ្វែស ពាង់អីនៃជេងក៝នកោរាញឞ្រាស យើនមាឞូម៝សអីជាននទើអ្យើស ពាង់មោអោសគឹតនាល់កោរាញឞ្រាស។* ១:១១៖ ១យហ ២:២៩; ៣:១០ 12 យើនមានោដេមេត្រុស ទឹងលែៈឞូនុយ្សងើយអ្វែសតាពាង់ទាទេ ឞ៝លលាសអីនាវងាន់មឞើសងក៝ចអ្វែសតាពាង់ដ៝ង់។ ល៝ង់គ៝ប់តឹមឞានកើតនៃដ៝ង់ លែៈមឞើសងក៝ចនាវអ្វែសតាពាង់ដ៝ង់ មៃលែៈគឹតជេសនាវអីគ៝ប់មឞើសងក៝ចនៃជេងទីងាន់។ 13 គែសអ៝ក់នាវអីគ៝ប់អុចញចីសញជ្វាល់អ៝ន់មៃ យើនមាគ៝ប់មោអុចអោសញចីសមាទាកក្រាក់ មាម៝ង់ញចីស។* ១:១៣-១៤៖ ២យហ ១:១២ 14 គ៝ប់គែសនាវរានើមម៝ប់មៃគើញតានារឞើសនាប់អ្យាតៃ នទ្រីគ៝ប់អុចងើយនទ្រែលមៃរ៝។ 15 ទាន់នាវដាប់មពាន់គុតាមៃ ទឹងលែៈមឹតជាង់តាអ្យាអោបនាវអ្វែសលាង់មៃដ៝ង់។ លាសនទ្រីទាន់មៃអោបនាវអ្វែសលាង់មាមឹតជាង់តានៃបាៈ៕៚