នាវកោរាញឞ្រាសងើយនាវតឹមរាង្លាប់មហែ ១ យោហាន 4

ឞូនុយ្សនតើយ្សងក្លាៈ

1 អើផូងអីគ៝ប់រ៝ង់ តានែសនតូអ្យាគែសអ៝ក់ឞូនុយ្សនតើយ្សងក្លាៈនាវងើយកោរាញឞ្រាស។ លាសនទ្រីលើយហ៝ៈអ្យាត់អោសទឹងលែៈឞូនុយ្សអីមឞើសអេងឆាក់ពាង់នើមគែសឞ្រាសហ្វេងអ្វែសគុតាខាន់ពាង់។ អ្យាត់មាខាន់អៃមៃរាល៝ងអ្វាញ់ខាន់ពាង់ប៝ត់ គៃមាគឹតនហេលនទើខាន់ពាង់មឞើសងក៝ចនៃតាៈឞើសកោរាញឞ្រាសងាន់មោលាសមោ។* 2 កើតនអាឞ៝ន់ទើយគឹតនាល់ឞ្រាសហ្វេងអ្វែសកោរាញឞ្រាសគុតាទូហ្វេឞូនុយ្ស៖ ឞូម៝សពាង់អីមឞើសងក៝ចឞ្រាសយេឆូក្រីស ជេងឞូនុយ្សងាន់ ឞូនុយ្សអីនៃគែសឞ្រាសហ្វេងអ្វែសងាន់គុតាពាង់។* 3 យើនមាលាសឞូម៝សអីលាសឞ្រាសយេឆូក្រីស មោអោសជេងឞូនុយ្សងាន់ ពាង់អីនៃមោគែសអោសឞ្រាសហ្វេងអ្វែសគុតាពាង់ ពាង់អីនៃជេងលោសតាៈឞើសកោរាញអីតឹមរាទ៝ង់ដាសឞ្រាសក្រីស ច្រាវ។ ខាន់អៃមៃលែៈតាង់ជេសកោរាញអីតឹមរាទ៝ង់ដាសឞ្រាសក្រីស វាច់ អាបៃអ្យាពាង់លែៈគុតានែសនតូអ្យាដ៝ង់។*

4 អើក៝នឆៅ ខាន់អៃមៃក៝នកោរាញឞ្រាស ជេសរីខាន់អៃមៃលែៈទើយដាសមាមពោលឞូនុយ្សនតើយ្សងក្លាៈនាវងើយកោរាញឞ្រាសអីនៃ យ៝រលាសឞ្រាសហ្វេងអ្វែសគុតាខាន់អៃមៃ។ ពាង់គែសនាវទើយក្វ៝ង់រាលាវមាកោរាញមពោលឞ្រាសអ្យើសអីគុតាផូងឞូនុយ្សអីមោញឆីងមាឞ្រាសក្រីស ជឹត។* 5 ឞូនុយ្សនតើយ្សងក្លាៈនាវងើយកោរាញឞ្រាសមោអោសញឆីងមាឞ្រាសក្រីស នទ្រីទឹងនាវនតីខាន់ពាង់តឹមទីមាឞូនុយ្សមោញឆីងមាឞ្រាសក្រីស ជេសរីទឹងលែៈឞូនុយ្សអីមោញឆីងមាឞ្រាសក្រីស អ្យាត់នាវខាន់ពាង់ដ៝ង់។ 6 យើនមាឞ៝ន់ ឞ៝ន់ជេងក៝នកោរាញឞ្រាស នទ្រីទឹងឞូម៝សអីគឹតនាល់កោរាញឞ្រាស ពាង់អីនៃអ្យាត់នាវឞ៝ន់ដ៝ង់។ ជេសរីឞូម៝សអីមោអោសជេងក៝នកោរាញឞ្រាស ពាង់អីនៃមោអោសអ្យាត់នាវឞ៝ន់។ តាៈឞើសនទើអីនៃឞ៝ន់ទើយគឹតនាល់ឞូម៝សអីគែសឞ្រាសហ្វេងអ្វែសគុតាពាង់ ជេសរីឞូម៝សអីនតីងក្លាៈមរោសឞូ។*

កោរាញឞ្រាសជេងនាវរ៝ង់

7 អើក៝នឆៅអីគ៝ប់រ៝ង់ អ៝ន់ឞ៝ន់តឹមរ៝ង់នទ្រាង់មាឞូនុយ្សអីញឆីងមាឞ្រាសក្រីស យ៝រលាសនាវរ៝ង់ជេងតាៈឞើសកោរាញឞ្រាស។ ឞូម៝សអីតឹមរ៝ង់នទ្រាង់មាឞូនុយ្សអីញឆីងមាឞ្រាសក្រីស ពាង់អីនៃក៝នកោរាញឞ្រាស ជេសរីគឹតនាល់កោរាញឞ្រាសដ៝ង់។ 8 យើនមាឞូម៝សអីមោអោសតឹមរ៝ង់នទ្រាង់មាឞូនុយ្សអីញឆីងមាឞ្រាសក្រីស ឞូនុយ្សអីនៃមោអោសគឹតនាល់កោរាញឞ្រាស យ៝រលាសកោរាញឞ្រាសជេងនាវរ៝ង់។ 9 កោរាញឞ្រាសលែៈញហើជេសនាវរ៝ង់ពាង់អ៝ន់មាឞ៝ន់កើតនអា៖ ពាង់លែៈញជ្វាល់ក៝នពាង់នើមង្វាយអឹអ៝ន់ជុរតានែសនតូអ្យា គៃមាអ៝ន់ឞ៝ន់គែសនាវរេសនហ៝រ៝យ៝រមាតាៈឞើសក៝នពាង់នៃ។* 10 អ្យាជេងនាវកោរាញឞ្រាសរ៝ង់៖ មោទីអោសឞ៝ន់អីលែៈរ៝ង់មាពាង់ល៝រ យើនមាពាង់អីលែៈរ៝ង់មាឞ៝ន់ល៝រ នទ្រែលមាលែៈញជុនក៝នពាង់នើមនៃជេងនទើជានឞ្រាសមាច្វាយឞ៝ន់ឞើសនាវអីកោរាញឞ្រាសមរាតេៈទោយ្សយ៝រមានាវតីសឞ៝ន់។ 11 អើក៝នឆៅអីគ៝ប់រ៝ង់ លាសទាសនៃជេសកោរាញឞ្រាសរ៝ង់មាឞ៝ន់ អ្យាត់មាអ៝ន់ឞ៝ន់តឹមរ៝ង់នទ្រាង់មាឞូនុយ្សអីញឆីងមាឞ្រាសក្រីស ដ៝ង់។*

12 មោគែសអោសទូហ្វេឞូនុយ្សលែៈឆៃកោរាញឞ្រាស។ យើនមាលាសឞ៝ន់តឹមរ៝ង់នទ្រាង់មាឞូនុយ្សអីញឆីងមាឞ្រាសក្រីស កោរាញឞ្រាសគុតាឞ៝ន់ ជេសរីនាវរ៝ង់ទុតក្វ៝ង់ពាង់នើមគុតាឞ៝ន់ងាន់ងេន។ 13 ឞ៝ន់លែៈគឹតឞ៝ន់គុតាពាង់ ជេសរីពាង់គុតាឞ៝ន់ តាៈឞើសនាវពាង់អ៝ន់ឞ្រាសហ្វេងអ្វែសពាង់នើមលែៈគុតាឞ៝ន់។* 14 ហេនលែៈឆៃ នអ៝ប់មាមឞើសងក៝ច កោរាញឞ្រាសញជុនក៝នពាង់នើមហាន់តានែសនតូអ្យាគៃមារាក្លាយ្សទឹងលែៈឞូនុយ្ស។*

15 ឞូម៝សអីមឞើសងក៝ចមាឞូឞ្រាសយេឆូ ជេងក៝នកោរាញឞ្រាសនើម ពាង់អីនៃគែសកោរាញឞ្រាសគុតាពាង់ ជេសរីពាង់នើមគុតាកោរាញឞ្រាសដ៝ង់។ 16 ឞ៝ន់លែៈគឹតជេស នាវរ៝ង់កោរាញឞ្រាសមាឞ៝ន់ក្វ៝ង់ហោងាន់ ជេសរីឞ៝ន់ញឆីងមានាវរ៝ង់ពាង់នៃ។ កោរាញឞ្រាសជេងនាវរ៝ង់ ជេសរីឞូម៝សអីគែសនាវរ៝ង់មាឞូនឹង ពាង់អីនៃគុតាកោរាញឞ្រាស ជេសរីកោរាញឞ្រាសគុតាពាង់អីនៃដ៝ង់។* 17 នាវរ៝ង់ទុតក្វ៝ង់កោរាញឞ្រាសនើមគុតាឞ៝ន់ងាន់ងេន នទ្រីឞ៝ន់គែសនូយ្សនហ៝ម់ឞាញ់មោហោមអោសក្លាចរាវៃតានារកោរាញឞ្រាសផាតទោយ្សទឹងលែៈឞូនុយ្សតៃ យ៝រលាសតានែសនតូអ្យាឞ៝ន់លែៈគុរេសតឹមឞានមាឞ្រាសក្រីស ។* 18 លាសតានូយ្សនហ៝ម់ឞ៝ន់លែៈគែសជេសនាវរ៝ង់ ឞ៝ន់មោហោមអោសគែសនាវក្លាចរាវៃមាកោរាញឞ្រាសជឹត។ លាសនាវរ៝ង់តានូយ្សនហ៝ម់ឞ៝ន់លែៈរឹងជេស នាវរ៝ង់អីនៃមព្រើសនាវក្លាចឞើសនូយ្សនហ៝ម់ យ៝រលាសនាវក្លាចរាវៃតាៈឞើសគឹតនាវកោរាញឞ្រាសតេៈទោយ្សតៃ។ ឞូម៝សអីហោមគែសនាវក្លាច នាវរ៝ង់តានូយ្សនហ៝ម់ពាង់អេហ៝ៈអោសរឹង។* 19 កោរាញឞ្រាសលែៈរ៝ង់ជេសមាឞ៝ន់ល៝រ ទឹងឞ៝ន់គែសនូយ្សនហ៝ម់រ៝ង់មាពាង់ គែសនូយ្សនហ៝ម់រ៝ង់មាអ៝សនោតានាវញឆីងដ៝ង់។

20 លាសគែសទូហ្វេឞូនុយ្សលាស៖ “គ៝ប់រ៝ង់កោរាញឞ្រាស” យើនមាជីឞ្យាញ់មាអ៝សនោតានាវញឆីងមាឞ្រាសក្រីស ឞូនុយ្សអីនៃងើយមរោសទើម។ យ៝រលាសអ៝សនោអីនៃអីលែៈមាត់ពាង់នើមឆៃនៃពាង់ហោមមាមោរ៝ង់ លាសនទ្រីមើមពាង់អីនៃឞ្លាវរ៝ង់មាកោរាញឞ្រាសអីមាត់ពាង់អ្វាញ់មោអោសឆៃ?* 21 ឞ៝ន់លែៈគែសជេសនាវដាៈអ្យាតាៈឞើសកោរាញឞ្រាស ពាង់លាស៖ “ឞូម៝សអីរ៝ង់កោរាញឞ្រាស អ្យាត់មាពាង់អីនៃរ៝ង់មាអ៝សនោតានាវញឆីងមាឞ្រាសក្រីស ដ៝ង់”។*

*4:1 ៤:១៖ មថ ២៤:២៤; ១តេ ៥:២១

*4:2 ៤:២៖ យហ ១:១៤; កាល ៤:៤

*4:3 ៤:៣៖ ១យហ ២:១៨, ២២

*4:4 ៤:៤៖ លក ១១:២១-២២

*4:6 ៤:៦៖ យហ ៨:៤៧

*4:9 ៤:៩-១០៖ យហ ៣:១៦

*4:11 ៤:១១៖ យហ ១៣:៣៤

*4:13 ៤:១៣៖ ១យហ ៣:២៤

*4:14 ៤:១៤៖ ១យហ ១:១-២; យហ ៣:១៧

*4:16 ៤:១៦៖ ១យហ ៣:២៤

*4:17 ៤:១៧៖ ១យហ ៣:២១

*4:18 ៤:១៨៖ រម ៨:១៥

*4:20 ៤:២០៖ ១យហ ២:៤, ៩

*4:21 ៤:២១៖ មថ ២២:៣៧-៣៩