1 Na n‑yaꞌa xaꞌa, te io ɨɨn viko ñayiu Israel, te juaꞌan Jesús ñuu nani Jerusalén. 2 Ijan, yatni nuu nani Yeꞌe Tkachi, katuu ɨɨn tanque kaꞌnu ñuꞌu ndute. Ñayiu ka jaꞌan tnuꞌu hebreu danani tanque jan Betesda. Yundute jan io oꞌon portal. 3 Ijan n‑ka kaa kueꞌe xa kueꞌe ñayiu kuꞌu. Ñayiu kuaa, ñayiu yakua, ñayiu n‑xiꞌí ndaꞌa‑i n‑xiꞌí xeꞌe‑i. Xndetu‑i nahora na kanda nuu ndute. 4 Danaa, xo juun ɨɨn ángel, ia xinokuechi nuu Ianyuux. Xo juun‑ia tanque, xa dakanda‑ia ndute. Na yaꞌa xa dakanda‑ia ndute, te davaꞌa nga ñayiu keé kiꞌna nuu nuu ndute, te ndvaꞌa‑i davaꞌa nga kueꞌe tnaꞌa‑i. 5 Te ijan n‑xo ndetu ɨɨn seyɨɨ. Xá n‑kuu oko xaun uni kuia kuꞌu‑s. 6 Na n‑xini Jesús se kuꞌu kaa ijan, n‑kutnuni ini‑ia xa da kaa‑s n‑kuu kueꞌe kuia. N‑xijan tnuꞌu‑ia nuu‑s:

—¿Juini‑n xa ndvaꞌa‑n a?

7 N‑jaꞌan se kuꞌu:

—Dito, ñayo ñayiu io xa kandeka ñaꞌa‑i jɨꞌɨn hora kanda ndute. Nɨni juaꞌan‑da, te kiꞌna ka ɨnka ñayiu keé nuu ndute.

8 N‑jaꞌan Jesús:

—Ndokoo. Ndoneꞌe yuu‑n te kaka.

9 Hora ijan ni, n‑ndvaꞌa‑s. N‑ndoneꞌe‑s yuu‑s te n‑xika‑s. Te kɨu ijan kuu kɨu ndetatu ñayiu Israel. 10 Xijan kuu xa n‑ka jaꞌan se fariseu nuu se n‑ndvaꞌa:

—Kɨu ndetatu‑ro kuu. Jaꞌan tnuꞌu taꞌu tniu xa ni ɨɨn ñayiu maxku kaneꞌe‑i yuu‑i kɨu ndetatu‑ro.

11 N‑jaꞌan‑s:

—Se n‑ndadavaꞌa ñaꞌa n‑jaꞌan xa ndoneꞌe‑da yuu‑da te kaka‑da.

12 N‑ka xijan tnuꞌu‑s:

—¿Jundu kuu se n‑jaꞌan xa ndoneꞌe‑n yuu‑n te kaka‑n?

13 Ko se n‑ndvaꞌa, ña xini‑s ndese kuu se n‑ndadavaꞌa ñaꞌa. Chi xaxeꞌe xa kueꞌe ñayiu n‑xio ijan, te juaꞌan ni Jesús. 14 Dada n‑nanitnaꞌa Jesús xiꞌin se n‑ndvaꞌa veñuꞌu kaꞌnu. N‑jaꞌan‑ia:

—Kundeꞌa xa xá n‑ndvaꞌa‑n vitna. Maxku kada ka‑n xa uꞌu, nada kueꞌe ka vida yaꞌa‑n.

15 Te juaꞌan se n‑ndvaꞌa nuu se Israel, te n‑xian tnuꞌu‑s xa Jesús kuu se n‑ndadavaꞌa ñaꞌa. 16 Xijan kuu xa n‑ka xini uꞌu se Israel Jesús. N‑ka juini‑s xa kaꞌni‑s‑ia, xaxeꞌe xa tniu yaꞌa n‑kida‑ia kɨu ndetatu ñayiu Israel. 17 Ko n‑jaꞌan Jesús nuu‑s:

—Taa‑r, kidatniu‑ia nde vitna. Dɨuni kidatniu mee‑r.

18 Xijan kuu xa yo n‑ka juini se Israel xa kaꞌni‑s‑ia. N‑ka jaꞌan‑s xa ña chinuu‑ia kɨu ndetatu ñayiu Israel. N‑ka jaꞌan‑s xa xa uꞌu kuu xa n‑jaꞌan‑ia xa Ianyuux kuu Taa‑ia, chi duꞌa n‑jaꞌan‑ia xa ɨɨn nuu kuu mee‑ia xiꞌin Ianyuux.

19 Xijan kuu xa n‑jaꞌan Jesús nuu‑s:

—Xandaa kuu xa jaꞌan‑r. Daꞌya Yɨɨ Ianyuux, meni mee‑ia, ña kuaꞌa‑ia xa kada‑ia ni ɨɨn. Ndeꞌa‑ia xa kida Taa‑ia, te duꞌa kida mee‑ia. Davaꞌa nga xa kida Ianyuux, xaꞌa kida Daꞌya Yɨɨ‑ia tuku. 20 Chi xemani Ianyuux Daꞌya Yɨɨ‑ia. Ntdaa xa kida‑ia dandeꞌa‑ia Daꞌya Yɨɨ‑ia. Te tniu naꞌnu ka dada xaꞌa dandeꞌa‑ia Daꞌya Yɨɨ‑ia, xa jini koio‑n te yuꞌu koio‑n. 21 Nani kida Taa‑ia xa nandoto ndɨyɨ xa kutuu vaꞌa‑i, dani kida Daꞌya Yɨɨ‑ia xa kutuu vaꞌa koio ñayiu juini‑ia xa kutuu vaꞌa‑i. 22 Chi Taa‑r, ña ndadandaa‑ia ni ɨɨn ñayiu. Xá n‑taxi‑ia xa taxnuni‑ia xa ndadandaa Daꞌya Yɨɨ‑ia ntdaa ñayiu. 23 Duꞌa koo xa koo koio ntdaa ñayiu xañuꞌu nuu Daꞌya Yɨɨ‑ia, nani xndaxio‑i xañuꞌu nuu mee‑ia. Ñayiu ña io xañuꞌu nuu Daꞌya Yɨɨ‑ia, dani ña io‑i xañuꞌu nuu Ia n‑tundaꞌa ñaꞌa.

24 ʼXandaa kuu xa jaꞌan‑r. Ɨɨn ñayiu xeka vaꞌa tnuꞌu mee‑r te jandixa‑i Ia n‑tundaꞌa ñaꞌa mee‑r, tuu vaꞌa‑i vitna xiꞌin kuia ma jɨn ndɨꞌɨ. Ma kada uꞌu‑r‑yɨ, chi xá n‑yaꞌa‑i xa ma kuú‑i xiꞌin kuechi‑i, xa kutuu vaꞌa‑i xiꞌin Ianyuux kuia ma jɨn ndɨꞌɨ. 25 Xandaa kuu xa jaꞌan‑r. Vaxi hora, te vitna xá n‑xee hora, xa ñayiu ka xiꞌí xiꞌin kuechi‑i, teku koio‑i tnuꞌu Daꞌya Yɨɨ Ianyuux. Ntdaa ñayiu ka xeka vaꞌa tnuꞌu‑ia, kutuu vaꞌa koio‑i xiꞌin Ianyuux kuia ma jɨn ndɨꞌɨ. 26 Nani kida Taa‑r xa kutuu vaꞌa koio ñayiu, dani n‑kida‑ia xa kada Daꞌya Yɨɨ‑ia xa kutuu vaꞌa koio ñayiu. 27 N‑kida‑ia xa ndadandaa mee‑r ñayiu, chi Se kuu ñani tnaꞌa ñayiu kuu‑r. 28 Maxku yuꞌu koio ka‑n xa duꞌa jaꞌan‑r. Vaxi hora xa kunini koio ntdaa ndɨyɨ xa jaꞌan mee‑r. 29 Ndee koio‑i nuu xyɨnduxi‑i. Ñayiu n‑ka kida xavaꞌa, nandoto koio‑i xa kutuu vaꞌa‑i xiꞌin Ianyuux kuia ma jɨn ndɨꞌɨ. Ñayiu n‑ka kida xa uꞌu, nandoto koio‑i xa ndadandaa‑r‑yɨ, te jɨꞌɨn koio‑i andea.

30 ʼMeni mee‑r, ña kuaꞌa‑r xa kada‑r ni ɨɨn. Nani taꞌu tniu Taa‑r, dani ndadandaa‑r ñayiu. Te vaꞌa ndadandaa‑r‑yɨ, chi ña kida‑r xa juini mee‑r, ko kida‑r xa juini Taa‑r n‑tundaꞌa ñaꞌa. 31 Nux n‑jaꞌan mee‑r xaxeꞌe mee‑r n‑kuu, te jaꞌan koio mee‑n xa ña ndaa. 32 Ko jaꞌan ndaa Taa‑r xaxeꞌe‑r tuku, te naꞌa‑r xa ndaa jaꞌan mee‑ia. 33 Xá n‑ka tundaꞌa mee‑n se n‑ka xeꞌen nuu tuu Sua, te n‑jaꞌan ndaa Sua xaxeꞌe xa kuu xandaa. 34 Ko ña ndoñuꞌu‑r xa jaꞌan ndaa ɨɨn seyɨɨ xaxeꞌe‑r. Kakuneꞌe‑r xa n‑jaꞌan Sua, xa teku koio mee‑n, xa ma kuú koio‑n xiꞌin kuechi‑n. 35 Ná kuu iti vaꞌa ka koko n‑kuu Sua. Xaku kɨu n‑ka tna ini‑n xa n‑kida Sua, te n‑ka kudɨ ini‑n. 36 Ko io ɨnka, kaꞌnu ka dada Sua, jaꞌan ndaa xaxeꞌe‑r. N‑taxi Taa‑r tniu daxinokava‑r. Tniu kida‑r jaꞌan ndaa xaxeꞌe‑r xa n‑tundaꞌa ñaꞌa Taa‑r. 37 N‑tundaꞌa ñaꞌa Taa‑r, te n‑jaꞌan ndaa‑ia xaxeꞌe‑r. Nuncas ña n‑ka teku mee‑n tnuꞌu‑ia, ni ña ka xini‑n nanda kuu‑ia. 38 Ñatu ka xeka vaꞌa‑n tnuꞌu‑ia, chi ña ka jandixa‑n Ia n‑tundaꞌa ñaꞌa. 39 Ka kaꞌu‑n xa ka kaꞌu‑n tnuꞌu Ianyuux, chi ka xani ini‑n xa duꞌa kutuu vaꞌa koio‑n xiꞌin Ianyuux kuia ma jɨn ndɨꞌɨ. Ko tnuꞌu ka kaꞌu‑n jaꞌan ndaa xaxeꞌe mee‑r. 40 Te ña ka juini‑n xa kunduu‑n xiꞌin‑r, xa kutuu koio‑n xiꞌin Ianyuux.

41 ʼÑa ndoñuꞌu‑r xa najuen tnuꞌu ñaꞌa ñayiu. 42 Ko xini ñaꞌa‑r mee‑n. Naꞌa‑r xa ñatu xemani koio‑n Ianyuux. 43 Xaxeꞌe Taa‑r n‑kixee‑r, ko ñatu ka xeka vaꞌa ñaꞌa‑n. Nux kixi ɨnka seyɨɨ xaxeꞌe mee‑s, te se ijan kuu xa kueka vaꞌa koio‑n. 44 Ña ka kuaꞌa mee‑n xa jandixa ñaꞌa koio‑n. Ka kida‑n xa juini mee‑n, te ka najuen tnuꞌu tnaꞌa mee‑n, ko ña ka kida‑n xa juini idini Ianyuux, xa najuen tnuꞌu ñaꞌa mee‑ia mee‑n. 45 Maxku kani ini koio‑n xa tekuechi ñaꞌa mee‑r nuu Taa‑r. Tekuechi ñaꞌa Moisés mee‑n. Ka jaꞌan‑n xa kida‑n nax n‑taꞌu tniu Moisés, ko ña ndaa. 46 Nux n‑ka jandixa‑n Moisés n‑kuu, te jandixa ñaꞌa koio‑n mee‑r. Chi n‑kakuneꞌe ñaꞌa Moisés mee‑r, na n‑chidotnuni‑s tnuꞌu Ianyuux. 47 Nux ña ka jandixa‑n tnuꞌu n‑chidotnuni Moisés, ¿janda kada koio‑n xa jandixa‑n tnuꞌu mee‑r?