Carta n‑kuaꞌa nuu ñayiu Israel
1
Xiꞌin Daꞌya Yɨɨ‑ia, n‑jaꞌan Ianyuux nuu‑ro
1 Xá n‑kuu kueꞌe kuia n‑jaꞌan Ianyuux nuu taxaꞌnu tnetnu‑ro. Kueꞌe vuelta n‑tundaꞌa‑ia se ka jaꞌan tnuꞌu‑ia nuu ñayiu jan, te ɨɨn ɨɨn vuelta, n‑ka teku ñayiu jan itaꞌu itaꞌu tnuꞌu Ianyuux. 2 Ko vitna, kɨu vax ndɨꞌɨ ntdaa xa io, n‑tundaꞌa Ianyuux Daꞌya Yɨɨ‑ia n‑kixee ñuñayiu, xa jaꞌan Ianyuux nuu‑ro. Xiꞌin Daꞌya Yɨɨ‑ia n‑kidavaꞌa Ianyuux ntdaa xa io. Te n‑kida Ianyuux xa ntdaa xa io, kuu kuenda Daꞌya Yɨɨ‑ia. 3 Dandeꞌa ñaꞌa Daꞌya Yɨɨ Ianyuux, xa Ia kunxaꞌnu ka, Ia taxnuni nuu ntdaa xa io, kuu Ianyuux. Na jini‑ro Daꞌya Yɨɨ Ianyuux, jini‑ro Ianyuux, chi nani kuu Ianyuux, dani kuu Daꞌya Yɨɨ‑ia. Ndeka vaꞌa Daꞌya Yɨɨ Ianyuux ntdaa xa io, xiꞌin tnuꞌu‑ia taxnuni‑ia nuu ntdaa xa io. Na n‑xiꞌí‑ia, n‑chiyaꞌu‑ia kuechi‑ro, n‑kida‑ia xa n‑ndundoo‑ro. Te dada n‑nukoo‑ia ndaꞌa kuaꞌa Ianyuux, te ijan taxnuni‑ia nuu taxnuni Ianyuux andɨu.
Kunxaꞌnu ka Daꞌya Yɨɨ Ianyuux dada ángel
4 Kunxaꞌnu ka Daꞌya Yɨɨ Ianyuux dada davaꞌa nga ángel. Chi danani Ianyuux Daꞌya Yɨɨ‑ia, Daꞌya Mani‑ia. Ko danani Ianyuux ángel, ia ka xinokuechi nuu‑ia. 5 Chi nuncas ña n‑jaꞌan Ianyuux nuu ia ka xinokuechi nuu‑ia, xa n‑jaꞌan‑ia nuu Daꞌya Yɨɨ‑ia:
Daꞌya‑r kuu‑n;
vitna n‑kudaꞌya ñaꞌa‑r.
Te na n‑kakuneꞌe Ianyuux ángel, ia ka xinokuechi nuu‑ia, nuncas ña n‑jaꞌan‑ia:
Ku kuu‑r Taa‑ia,
te ku kuu mee‑ia Daꞌya Yɨɨ‑r.
6 Na n‑kida Ianyuux xa n‑kixee Daꞌya Yɨɨ‑ia ñuñayiu, n‑jaꞌan‑ia nuu‑ia:
Na ndadakaꞌnu ñaꞌa koio ntdaa ia ka xinokuechi nuu‑r.
7 Na n‑kakuneꞌe Ianyuux ángel, n‑jaꞌan‑ia:
Kida‑ia xa ka kuu ia ka xinokuechi nuu‑ia ná kuu tachi kane,
kida‑ia xa ka kuu‑ia ná ka kuu yañuꞌu.
8 Ko na n‑kakuneꞌe Ianyuux Daꞌya Yɨɨ‑ia, n‑jaꞌan‑ia:
Ianyuux kuu‑n.
Taxnuni‑n kuia ma jɨn ndɨꞌɨ.
Taxnuni‑n, te ndadandaa‑n ntdaa xa io.
9 Vaꞌa xemani‑n ntdaa xa kuu xavaꞌa,
uꞌu juini‑n ntdaa xa kuu xa uꞌu.
Xijan kuu xa xá n‑kida Ianyuux xa kunuu mee‑n nuu ntdaa se kutnaꞌa xiꞌin‑n.
Ná ka xodo ñayiu aciti dɨkɨ se kunxaꞌnu ka,
da n‑xodo Ianyuux aciti dɨkɨ mee‑n,
xa kuvete‑n xa kuvete ka‑n.
Kuu Ianyuux xiaꞌan‑ia nuu Daꞌya Yɨɨ‑ia.
10 Dɨuni n‑jaꞌan Ianyuux nuu Daꞌya Yɨɨ‑ia:
Kiꞌna nuu, antecas xa kuaꞌa ntdaa xa io,
n‑kidavaꞌa mee‑n ñuñayiu yaꞌa.
Te xiꞌin ndaꞌa mee‑n, n‑kidavaꞌa‑n andɨu.
11 Jɨn ndɨꞌɨ ntdaa xa io andɨu,
ko kutuu naꞌi ka mee‑n kuia ma jɨn ndɨꞌɨ.
Ná kutuꞌu ɨɨn daꞌma,
da kutuꞌu ntdaa xa io andɨu.
12 Ná xajan tnatnu ɨɨn seyɨɨ doo‑s,
duꞌa ndajan tnatnu mee‑n ntdaa xa io.
Ná nadama ɨɨn ñayiu daꞌma‑i,
da nadama mee‑n ñuñayiu xiꞌin andɨu.
Ko mee‑n, ku kuu‑n ná kuu‑n vitna,
te nuncas ma jɨn ndɨꞌɨ kuia kutuu‑n.
13 Nuncas ña n‑jaꞌan Ianyuux nuu ángel, ia ka xinokuechi nuu‑ia, ná n‑jaꞌan‑ia nuu Daꞌya Yɨɨ‑ia:
Nkoo‑n ndaꞌa kuaꞌa‑r,
nde kada‑r xa jueñi niꞌna‑n ntdaa xa jantnaꞌa xiꞌin‑n.
14 Chi ángel, ia ka xinokuechi nuu Ianyuux ka kuu‑ia. Tundaꞌa Ianyuux ia ka xinokuechi nuu‑ia kixi, xa chindee koio‑ia ñayiu dakaku ñaꞌa Ianyuux, xa kutuu vaꞌa koio‑i xiꞌin Ianyuux andɨu.