49
Yakubti yubu komopto elmaboag pibogha (49:1-28)
1 Wamekti Yakub, si nhon Israel nenekori elmabo ni yopsiogti, yubu ambarelamsiogti, “Namabo, amik a'unag talamlulne sembe ambatsinundi, winilahut!
2 Na Yakub na a'uni Israel yubu ka'eamlulom!
3 Ruben name, an me yandonge, na ani kabuni wamsiri,
pipkehinge eneng samenagne an wamlam.
An nong mikip wamlamdi, nimi maiknori maiplangkeong.
4 Mag nubunge mikipti ni pabinep saog uro wamlaba,
andi babe naringe mali nembaom.
An nari kel nembanongeap mabomdi,
nari ae usah son nembaom.
An samen paliag pat pipkehene,
aghana wene, 'Ankaboap nika-nika uro wamlulom,' alamna.
5 A'un eldo ilipsae Simeonap Lewiap,
a'undinge yin yonge abaltolneog piro amtom.
6 Na sin yubu saekag palilamikag palamnun kom,
sin winil talamikag palamnun kom.
Sin yo ulamsila sembe nimi olamsirangdi,
pham sapi yan poltheng karep lolamsirang.
7 Sindi yoa ulamdangne nene sembe karong senelamna.
Yoa ulamdangne sikin yo sirik wamdang.
Yoaba ulamdangne nene kaupsile,
yareag senelamsirang komba,
nari na namaboag agha sin a'ebahineri,
sindi wamtukangne nimi sekelanan nang saog uro
Israel nimi anabiag wamtukang.
8 Yehuda, an ankabori kibiang towalenglangkiikti,
yabu sanukto pulangkukang.
Anna isa nang urongag lopnagha salelamsululam.
9 Yehuda kam singa me saog uro wamlulam.
Tenaba opleri, teleri, mon taleba,
nen kwanerobag yingkina ibog sengkelaglamleri, kwanelamlul.
Unulamleba, palisong nimi nhondi babe logti, kaombalul kom.
10 Yehuda andi nimi nubu nangdi salerop kame tunguna saelbapmenba,
andi mangaroba amik yalamlengeriba, ya'ag saelbamukang.
Andi mangaroba pere agha nimi nubunge nhon yaleba,
nimi mog so'o ni wamik nimi ni el umag wamikti,
eldi yubu ka'elamukang.
11 Eldi anggur alonga uro mepleba, mauro yina tinilamleba
Pham keledai me eldinge anggur yo'o walingeag kerekamlul.*Yahudi yubuag “Pham keledai anggur yo'oag kereklamlul,” seogne ane sembe, nun yubuag, “Aweag pham mo'olamogne” aro.
Ag enektopne anggur maghag a'alelamlul.
Anggur lolteroba maghag agha eldi ag enektopne uwong talul ana eneng saog uro.
12 Haing eneng seret alamlulne sembena, anggur lolteroba mag telamle saog uro.
Elag kembiag agha eldi sina kororop wamlul ana, maum kororop saog uro wamlul.
13 Zebulonna, mag longorop mag peramag wamleba,
kabong ae soropne mag alip toman pol keaglamik nimiri,
“Zebulondi mog so'oag pat pipsilul,” aro maikno yalamukang.
Eldi mog so'o wilnirobagna Sidon simbik wamlul.
14 Isakhar sunumna, pham keledai yo'o mikipne saog wamleba,
ikinaba porobari lingniamukang.
15 Eldi kemelamleba, 'So'o aneko wali wamlul. Mog so'o aneko sai wamleba, so'o aneko na tanun' aro,
nimiri aruklamikpa, ikinaba maghan og uro polamlul.
16 Dan, andi mabo Israelnang anabiag wamikti,
sisa nhon mo wamikpa andi tam ikinne sinag wamleba,
wali uro kareplamlulam.
17 Name Dan phae inaag ma uropba palisong urop saog uro wamle.
Phaeri pham kuda yanag saplamnaba,
nimi kuda alibag walelem agha palamnange eba tinirop saog uro.
Phae ane olog aghana yo wamla saog uro wamlulam.
18 Nani Allah, 'Andi taulbanululam' aro nang-nangaro wamna.
19 Gad, nimiri 'Anenge aba topkukap,' aro ulamikag agha,
andi babe 'Tangoro sarekerepto yan pubuag saelbahinun,' aro ulamlulam.
20 Aser, andinge tenaba maikno wamleba,
andi nimi nubunang sembe meneklamlulam.
21 Naftali, an pai pham rusa kel pham agha kobea loptangka pirop saog uro wapmendi,
me walingeog mangalamsululam.
22 Yusup an wamlamne pai pham keledai me mikipne mag luag wamlange saog uro wamlamdi,
yimag merero walerop pham keledai saog wamlam.
23 Nimiri isa nembangkeangdi,
'Yin maldi opkukap,' aro yinap malapti sarekereplangkeang.
24 Aghana an Yusup wamlamne,
Allah pham yae ua uropne saog uro wamla.
Ani Israeldi Kirik Sildiri lilbangkelul.
Allah Mikipne Yakubti omeklamlangeri yeplangkeleba
Yin mal andinge weapmendi,
andinge sae lin kong mikip wamlulam.
25 Ani Israeldi Nai Allahri yeplangkelul.
Allah Im So'o Saelbamlangeri mikip nenelangkelul.
Mag imag agha kulukul alamleri,
mag so'o lomag agha walel alamleri,
mikip nembahileba me mangaro maum tinilamsukang.
26 Main samenag sekogne ane we wamla.
yimag agha wali-walia maikno tomnepne wamla aghana,
aniringe saeag agha nia mangkia Yusup saeag wali uro phelekto palilamnaba,
elkabo nusamag agha sikini saog uro wamlul.
27 Benyamin an kam yonge serigala saog uro wapmendi,
yo'obi inipna tenaba ol palapmendi,
an telapmendi, ankabo poglamsululam,”
seog.
28 Ni ambatsiogne ni ane sin aobare nangdi mangaroba likto pileba, sinag uro yabinepne ambarelamsiogti, kipsiog.
Yakub Tebaogpa Kanaan so'oag sikil pieka (49:29-33)
29-30 Yakubti ni yubu kopkop tagto elmaboag ambarelamsiogti, “Usa nuni yabo piek saog uro na babe punun. Sin piekpa, pil phiekag kirik arame Makhpela heng walelingkirobag sip Mamre Kanaan so'oag sikil punululom. So'o anena Abrahamdi kirik arameap so'o kanero wamla aneap Hetne Efron saeag agha tobog. 31 Anea Abraham eldamne babe, elkel Sara babe, elme Ishak babe, Ishakti kel Ribka babe, so'o siksiek. Anea babe a'unin Lea so'o siksi. 32 So'o wamla aneap, kirik arame wamla aneap, Het elmabori saeag agha kamna toro tobog. Kamna toboghag ane pil punululom,” aro ambatsiog.
33 Wene aro yubu kopkop tagto ambatsiogti, ae koloag yan togto winiptangom agha hain orog taogpa, ilisag yaboag yame samen piogpa, loba taog.
*49:11 Yahudi yubuag “Pham keledai anggur yo'oag kereklamlul,” seogne ane sembe, nun yubuag, “Aweag pham mo'olamogne” aro.