46
Yakub elmaboap Mesir pieka (46:1-7)
1 Wameka Yakub nenekori eldinge nia togto tobogti, “Mesir mog so'o punun,” aro as Bersyeba piogti, ili Ishakti Allah omeklamogne sembe pham obogti, mhong towalengkaog. 2 Mhong towalengkaogpa, imbaogpa, Yakubti haing uamna kwelekamna senenag agha Allahri yubu lelamogti, “Yakub, Yakub,” seogpa, Yakubti, “Nani na ane wamna,” seog.
3 Wene seogpa, Allahri, “Na Allah, ani Ishakti Omeklamneogne Na wamna. Mesir panne sembe log sembaheng kom! Mesir mog so'o anea anisag yabo maikno nembahineba, as nubu tangto wamukang. 4 Na anap Mesir nhon pinemeri, amik anisag yabo samoro payaghenun. An loba tamenba, anme Yusupti o'obaghelul,” aro ambarog. 5 Ambarogpa, Yakub elmabo tanekori sikiniap, sindi kelabo meap, pham kudari kiliro poa phiroba alibag Mesir nimi sikini yubu sia leropneri arukahiogpa, sin tol ahinep yaekne tanekoag waelbaek. 6-7 Sikininge phamap, sikininge aba Kanaan wamekpa, saeag taogneap, taneko poro agha mog so'o Mesir palamek. Palamekti Yakub sikinisag yabo nengabo me kelabo me toro agha Mesir ni palamek.
Yakub elmaboap sin Mesir piekne sina tane (46:8-27)
Yakubap Leaapti mangkahirekne
8 Eldamne Yakubap, elmaboap, sikinmaboap, kelaboap piekne sina tane:
Ruben, Yakubti me yandonge.
9 Ruben elmabona:
Henokh, Palu, Hezron, apna Karmiap.
10 Simeon, Yakubti me nabime.
Simeondi mabona:
Yemuel, Yamin, Ohad, Yakhin, Zohar, apna Kanaan keldi me Syaulap.
11 Lewi, Yakubti me Simeon iklibagne.
Lewiri mabona:
Gerson, Kehat apna Merariap.
12 Yehuda, Yakubti me Lewi iklibagne.
Yehudari mabona:
Syela,Peres, apna Zerahap.
Yehudari mabo Kanaan so'oag agha tebaeknena:
Er apna Onanap.
Yehuda elme Peresti mabo nen phende mabona:
Hesron apna Hamulap.
13 Isakhar, Yakubti me Yehuda iklibagne.
Isakhar elmabona:
Tola, Pua, Yasyub,apna Simronap.
14 Zebulon, Yakubti me Isakhar iklibagne.
Zebulon elmabona:
Sered, Elon, apna Yahleelap.
15 Ni ane Lea elmaboap elau yaboap. Aram mog so'oag wamekti, Yakub sembe mangkahiog. Ni nimi si palilamapne anena Yakub elmaboap ilisagyaboap nina teng nhon eptopne no'op bare (33). Yakubti kelmabona Dina wene babe palilamap.
Yakubap Silpaapti mangkahirekne
16 Gad, Yakubap Silpaapti me amikne mangkahirekne.
Gad elmabona:
Sipyon, Hagi, Syuni, Esbon, Eri, Arodi, apna Areliap.
17 Aser, Yakubti me Gad iklibagne.
Aser elmabona:
Yimna, Yiswa, Yiswi, Beria, apna Serah sikinipsa'elap.
Beriari mangkhaiognena:
Heber, apna Malkielap.
18 Nimi ao tarabare anena Yakubap Silpaapti mangkahirekne. Silpa kelenena, Lea ili Labandi, “Lea arukna wamlul,” aro tarog keldi mangkahiog.
Yakubap Rahelap mangkahirekne
19 Raheldi mabona me phende
Yusubapna Benyaminap.
20 Mesira Yusubap elkel Asnatapti me phende mangkahireknena:
Manasyeapna Efraimap.
Asnat ilina, Potifera memne poneko as On wamog.
21 Benyamin, Yakub elme elabonge.
Benyamin elmabona:
Bela, Bekher, Asbel, Gera, Na'aman, Ehi, Ros, Mupim, Hupin apna Aredap.
22 Anena Raheldi Yakub sembe mangkahiognena. Sin nina mekpare.
Yakubap Bilhaapti mangkahirekne
23 Yakubti kel taogne Bilha anekori elme amikne Dan mangkaog.
Dan elmena Husim.
24 Naftali, Yakub elme Dan iklibagne.
Naftali elmabona:
Yahseel, Guni, Yeser, apna Syilemap.
25 Anena Bilhari Yakub sembe mangkahiogne. Bilha kel enena Labandi, “Rahel arukna wamlul,” aro tarog keldi mangkahiog. Sin ni anena saekbare.
26 Yakub elyamal yabo sikindi me wamla aghana Yakub elyamal sembe tane mome torop kom. Sin ni Yakub elmaboap Mesir so'oag pieknena teng phende eptopne aobare (66) piek.
27 Yusup elmabo Mesira mangkahiogne me phende abenekoap tanena sin teng phendeap eptopne ao tarabare (70) taog.
Yakub elmaboap Mesir wameka (46:28-34)
28 Mesir palamekti, Yakub nenekori elme Yehuda ambarelamogti, “An samenag pimendi, 'As Gosyen haiptukap,' aro Yusup ambatlulam,” seog.
Wene aro poghogti, Yakub neneko as Gosyen pina wamogpa, 29 Yusup neneko “Nani whingag punun,” aro pham kudari kiliro pabiroba alibag waelbaogti, ili whingag yaogti, somoro saelbamogti, kiplamogti, engkaog. 30 Engelamogpa, Yakubti elme Yusubag yubu lelamogti, “Nari an ipkekendi, 'Name kamag wamla,' aro wana aingnibanelba, wali loba tanun,” seog.
31 Wene seogpa, Yusupti elkabonge tanekoag yubu lelamogti, “Na nari nai yubu sia leropneag pineri, 'Nari naiap nangkaboap Kanaan so'oag agha yaong,' sunun. 32 'Na nangkabo taneko pham dombaap, sapiap, yae uro mo'olamsiang-nang sikininge phamap, sikiningeaba ni poro agha yaong,' sunun. 33 Na nani nimi nubunge yubu sia leropne ponekori yopsileri, a'undi awe saelba weropne sembe haibahilul. 34 A'undi ambarelapmundi, 'Nuniyabori babe pham mo'olamek saog uro nuri babe nun ologhag agha pham mo'on nang wamap,' aro ambatlulom,” seogti, “Wene aro ambatmunba, 'A'un Gosyen so'oag wamlulom,' sulul,” seog.
Wene aro ambatsiognena, Mesir nimiri pham pia urop nimiap, sin nikag ua unna sin karong senerop, ane sembe Yusup eldi elkaboag wene aro ambatsiog.