1 Coi³ cjoa⁴ nca³ an³ Pablo, xi³ cjoa⁴ñˀain³ ti²jna⁴ tˀa³tsˀe⁴ Cristo xi³ to⁴tˀa³tsaon⁴³ jon² xi³ cho⁴ta⁴ xi³ li² judío-jion²³. 2 Cˀoa⁴-sˀin² qui³no²ˀyao²³ nca³ xa¹ qui³sˀe³ne²-na³ nca³ an³ xi³ tˀa³tsˀe⁴ je² cjoa⁴nta³-le⁴ Ni³na¹ xi³ qui³tsˀai²-na³ xi³ tˀa³tsaon⁴³, 3 jo³-sˀin² nca³ Ni³na¹ tsa³ca³co¹son²tsen³-na³ je² cjoa⁴ xi³ tji¹ˀma³, jo³-sˀin² nca³ je³qui³squia³-vi⁴ nca³ to⁴choa³ en¹ qui³si³chjen¹³. 4 Cˀia⁴ nca³ cˀoe¹xquiao⁴³ je²-vi⁴, cˀoa⁴²-sˀin² jchao⁴³ jo³-sˀin² ma³cho⁴ya³-na³ tˀa³tsˀe⁴ je² cjoa⁴ˀma³ xi³ tˀa³tsˀe⁴ Cristo. 5 Je² xi³ cja⁴ˀai¹ ni⁴čhjin³ Ni³na¹ li²coi³ tsa³ca³co¹-le⁴ ni⁴jnco³-jin² cho⁴ta⁴son³ˀnte je² cjoa⁴ˀma³, jo³-sˀin² ntˀai⁴-vi⁴ xi³ to⁴tˀa³tsˀe⁴ je² Espíritu Santo tsa³ca³co¹son²tsen³-le⁴ je² pa²stro⁴-le⁴ xi³ tsje³ cao⁴ je² xi³ qui³nchja⁴ya³ tˀa³tsˀe⁴. 6 Coi³ xi³ cjoa⁴ˀma³-vi⁴: Je² cho⁴ta⁴ xi³ li² judío-jin² cˀoa⁴-sˀin² to⁴jnco³ sˀe³-le⁴ je² cjoa⁴tjao² je²-vi⁴, cˀoa⁴ to⁴jnco³ yao³-le⁴ xi¹ncjin¹. To⁴jnco³ qui³ni²sˀe³nqui³-le⁴ nca³ tjio¹cao⁴ Cristo xi³ to⁴tˀa³tsˀe⁴ je² en¹nta³ tˀa³tsˀe⁴ Cristo. 7 Qui³tsˀai²-na³ nca³ si³xa¹³-le⁴ xi³ coi³ en¹nta³ tˀa³tsˀe⁴ Cristo, jo³-sˀin² Ni³na¹ qui³tsjoa³cjoa⁴tjao²-na³ cjoa⁴nta³-le⁴ nca³ si¹xa¹ je² nca³nˀion¹-le⁴. 8 Je² xi³ nqui²sa⁴-sa³ na³nqui³ tjio¹ xi³ cho⁴ta⁴-le⁴ Cristo, an³ xi³ nqui²sa⁴-sa³ nˀion¹ na³nqui³ ti²jna⁴-le⁴. An³ tsa³cˀai²-na³ cjoa⁴nta³-vi⁴ nca³ cˀoa⁴-sˀin² coi³nchja²ya³jin³-le⁴ cho⁴ta⁴ xi³ li² judío-jin² je² en¹nta³ tˀa³tsˀe⁴ je² cjoa⁴nta³ xi³ tjin¹-le⁴ Cristo xi³ li²coi³ coan⁴ jcha⁴yi³je³. 9 An³ si³ˀi³sen³-le⁴ nca³tsˀi³ jo³-sˀin² nca³ Ni³na¹ xa¹ tsa³cˀe¹nta³-ni³ xi³ cˀoa⁴-sˀin² tsa³cˀe¹jna³ˀma³ jo³ sa³ˀnta³ to²tsˀin³-le⁴ cjoa⁴. Ni³na¹ tsa³cˀe¹nta³ nca³yi³je³ xi³ tjin¹ son³ˀnte³. 10 Cˀoa⁴ coan³ jme¹-ni³ nca³ je² na⁴xi⁴na³nta¹-le⁴ Cristo coa⁴co²ya³-si¹ni³le⁴ ntˀai⁴-vi⁴ je² xi³ tjin¹-le⁴ xa¹ti¹tjon² cao⁴ xi³ tjin¹-le⁴ nca³nˀion¹ ya⁴ ncˀa³jmi³. Cao⁴co²ya³-le⁴ je² cjoa⁴ˀi³sen³ta³con²-le⁴ Ni³na¹ xi³ cjai¹ ncjin² jco⁴ya³ tjin¹. 11 Cˀoa⁴-sˀin² tjin¹nta³ cjoa⁴fa³ˀai³tsjen³-le⁴ Ni³na¹ nca³ntsjai², nca³ cˀoa⁴-sˀin² tsa³cˀe¹nta³ xi³ to⁴tˀa³tsˀe⁴ Cristo Jesús Nai³-na¹. 12 Cˀia⁴ nca³ ti³yo³coa⁴² Cristo cjai¹nca³ nta³ nˀion¹-ta³coan³², cˀoa⁴ coan⁴ coi⁴tja¹sˀen³² nca³ li²jme³ xi³ xcon¹ coan⁴-na¹, nca⁴ ma³cjain¹-na¹ tˀa³tsˀe⁴ nca³ je². 13 Coi³ cjoa⁴ nca³ si³je¹³-no³, a³li² ni²ˀi³nta³-jion² ni⁴ma⁴-no³ xi³ to⁴tˀa³tsˀe⁴ jña³-le⁴ cjoa⁴ñˀain³ xi³ an³ ti²fa²ˀa⁴toa³ xi³ tˀa³tsaon⁴³. Je² cjoa⁴ñˀain³-na⁴ xi³ cˀoa⁴sje³je³ya³-no³.

14 Coi³ cjoa⁴ va²sen⁴xco¹nchˀin³tˀa³-le⁴ nca³ vˀe³tsˀoa²³-le⁴ Nˀai³-le⁴ je² Nai³-na¹ Jesucristo. 15 Xi³ to⁴tˀa³tsˀe⁴ Nˀai³-na¹ nca³tsˀi³ xi¹ncjin¹ ma³ ya⁴ ncˀa³jmi³ cao⁴ i⁴ son³ˀnte³. 16 Cˀoa⁴-sˀin² to⁴tˀa³tsˀe⁴ je² Espíritu Santo-le⁴ ca²ta³tsjoa¹jin³ ni⁴ma⁴-no³ xi³ tse³ nca³nˀion¹, jo³-sˀin² nca³ nˀion¹ tse³ cjoa⁴je³ya³-le⁴. 17 Nta³ ca²ta³vˀe²jna³jin³ ni⁴ma⁴-no³ Cristo nca³ ma³cjain¹-no³. Vˀe³tsˀoa²³ nca³ nˀion¹ coi⁴yo³cao⁴³ nca³ nˀion¹tˀa³ coaon⁴³ cjoa⁴tjao²cha³, 18 jme¹-ni³ nca³ cˀoa⁴-sˀin² sˀe⁴-si¹ni³no³ nca³nˀion¹ nca³ ña³qui³ nta³ coan⁴cho⁴ya³-si¹ni³no³ cao⁴ nca³tsˀi³ cho⁴ta⁴-le⁴ Cristo jo³ cji³ cjoa⁴tjao²cha³-le⁴ Cristo, jo³ cji³ te³ya³, jo³ cji³ nto³, jo³ cji³ na⁴nca⁴, jo³ cji³ ncˀa³. 19 Cˀoa⁴-sˀin² jcha⁴-nio¹³ je² cjoa⁴tjao²cha³-le⁴ Cristo, xi³ ña³qui³ fa³ˀa³ti¹tjon²-le⁴ nca³yi³je³ cjoa⁴fa³ˀai³tsjen³, jme¹-ni³ nca³ jtse¹jin³-si¹ni³no³ nca³yi³je³ xi³ tsˀe⁴ Ni³na¹. 20 Ni³na¹ nqui²sa⁴ to⁴tse³ ma³-le⁴ sˀin¹ nca³yi³je³ cjoa⁴ jo³ cji³ xi³ ni²je¹, jo³-sˀin² fa³ˀai³tsjen³-na¹, to⁴tˀa³tsˀe⁴ je² nca³nˀion¹ xi³ si¹xa¹jin³-na¹. 21 Je² ca²ta³vi³tjo³je³ya³ ya⁴jin³-le⁴ na⁴xi⁴na³nta¹-le⁴ Cristo xi³ to⁴tˀa³tsˀe⁴ Cristo Jesús, to⁴jo³ tjin¹ ni⁴čhjin³ nca³ntsjai² nca³ntsjai². Cˀoa⁴ ca²ta³ma³.