1-2 Adec Esuquidistu abi tantiaquido chuibanec Nuquin Papabëd onquequid dapa Nuquin Papa tabadacnombobi puduedoash aton Papa Abiambo Yampidbëdquio onquec tabadec. Debipadquidoen aton matses chuibanec nidaidënshun Nuquin Papa tabadte shubu uashunaidën puduedash auëshquio Nuquin Papabëd onquepanëdash.

3 Con matsesbëdi icsaposh icmanendac, queshun aid shubun puduednu queshun umanucshun nidaidën capuquid yua aidon cuesunepampic. Adembidi Nuquin Papa tantiaquin menenuequin aton matsesën bë-bëaid bedshun nadenepampic. Esusien Nuquin Papa yacno puduedoanush, Ëbi icsaid ëbibi cuidadnu, quenquio yec matses icsaid bedshunash abided cuidadpanëdash. 4 Aidi unësabi yec nidaidën tabadnuc Moisesën chiacpadec Debipadquid matses chuibanec Nuquin Papa chiec onquequid icpanëdash. Adquid icnuc nidaidënuësh matses chuibanec Nuquin Papabëd onquequid dapa ictiapimbo Esuquidistu icpanëdash. 5 Nidaidën tabadquin Nuquin Papa tabadte shubu uashunaidën puduedshun Debipadquidën nashumpampic. Ëndenquimbo Nuquin Papan shubu naden icchitec, quequin abi tabadte shubu uanu, quesho tantiashun: “Macuësh yacnoshon chuibocpadomboen shubu uame,” Nuquin Papan cac Moisesën chuioapampic. Aden chiac Nuquin Papa tabadte shubu uashumpampic. 6 Adnubien yuecash Nuquin Papa tabadacnombo aton Madombo abi tantiaquido chuibanec Nuquin Papabëd onquec puduedpanëdash. Aidi abi tantiaquido yuedquid nec. Aid ambo puduedabicnuc ambi naden nata cain chiaid Nuquin Papan Moises meniampicpadomboen naquin aton matses chuibanec Debipadquid Nuquin Papabëd onquec abi yacnombo yuedanquid ictiapimbo icpampic. Esuquidistuen Nuquin Papabëd abia yampid bëyucanec abi yacnombo nidoash abi tantiaquido chuibanec Nuquin Papabëd onquequid yec yuedanquidquio nec.

7 Ëndenquimbo nadomboen nata cain chiacpadomboen nadenequi matses icsaisa yanuc naden nata cain chiaid utsi Nuquin Papan chienquio ictsempanëdash. 8 Nadomboen nata caqui ambi chiacpadomboen nadenequi matses icsaisa yantiapimbo icsho isash: