3
1 Baŋa kiya uwaga ma, magay zil Yahudiya ma, mana akəs vok ma? Makədəv vok à uda ma, azlak anu takay? 2 Haɗay, aɗuwa vok gesina, teraŋa dadàŋ kà, Zəzagəla afà gay aŋha kà atà à ahàl. 3 Iyay zlà, kakay mədagoɗay la lagwa ma? Tsa azlaanik la tataka aŋatà la abà kà, tanəfa gay uwaga aw ma? Kadzugwaw ma Zəzagəla kà adàɗah uwana apə̀h aw takay? 4 Awaŋ! Bà amiyaka azladza gesina azlaməna fida babay kà, ndzer Zəzagəla adàɗah dziriga aŋha. Bokuba uwana tatsetsèr à wakità aŋa Zəzagəla abà kà:
ˈKak Zəzagəla: Baŋa kaɓaɗmà à azladza gesina tasəlay kà kapə̀h dziriga, amiyaka tapuwa à ka gudzi à gəl kà kadàkəɗasl atà.ˈ✡ 3.4 Mahabay 51.4
5 Lagwa zlahaw azladza anik tagoɗay kà, ‘Mawisiga uwana məɗehəŋ kà, azlaka à azladza’ tagoɗay, ‘Kà Zəzagəla kà aɗehəŋ mawisiga aw’. Gay ma uwala à uwana mədàwulla atà ala la? Məgoɗay kà Zəzagəla kà aɗehəŋ mawisiga la matərəɓay, mədàgoɗay ay? Uwanay gəpə̀h kà bokuba uwana azladza tapəhay. 6 Aŋa kiya uwaga ma, Zəzagəla ma dziriga aw zlà ma ay? Awaŋ, kiya uwaga aw. Agayŋa Zəzagəla agay dziriga aw kà, naka aslala vok aŋa maɗàh seriya à gudəŋ à vok à gəl takay? 7 Zlahaw, azladza anik tagoɗay babay kà: ‘Fida uwana məɗehəŋ kà, azlaka kà azladza aŋa masəl dziriga aŋa Zəzagəla, kiya uwaga kà tadàzləɓ masla kà uwaga. Tsa baŋa kiya uwanay kà, anu azlaməna tsakana ma, la tetəvi uwali zlà ma li?’ 8 Kiya uwaga azlaanik tagoɗ: ‘Məɗàh mawisiga kà masəlay kà Zəzagəla kà masla mawoyəŋ, ma aɗehəŋ mi?’, tagoɗ. Azlaanik tatugw à gi mawisiga à vok, tagoɗ kà: Gi babay kà, gi gədzugway kà kiya uwaga. Zəzagəla adàɗah seriya à azladza uwaga à gəl, kà uwana seriya uwaga kà azlayla à atà kà madukwatàŋ à gəl aŋa Zəzagəla.
Dza dziriga la ahəŋ amiyaka tekula aw
9 Lagwa ma, anu azla Yahudiya ma məɗuwa azladza anik takay? Awaŋ. Tetuwa məɗuwa azladza anik aw. Gədapəha à akul, kà azla Yahudiya la azladza anik anik gesina, kà anu la tsəh makoray aŋa tsakana. 10 Iyay, bokuba uwana tatsetsèr à wakità Zəzagəla à abà:
ˈDza dziriga la ahəŋ la huma Zəzagəla amiyaka tekula aw.
11 Dza la ahəŋ asəl dziriga aw
Dza la ahəŋ amiyaka tekula à uwana ayàh Zəzagəla aw
12 Azladza gesina tagola à lig à Zəzagəla à gay, tawis ala gesina.
Dza la ahəŋ amiyaka tekula, aɗàh delga à azladza aw.
13 Kay, gay uwana atsa à afik la kuda aŋatà la ahəŋ kà, mawisiga bokuba mazinay aŋa zəvay mapəzlla à ama ala gà.
Alàh aŋatà kà avavar azladza.
Uwana atsa à waŋ la paŋaw aŋatà la awtày kà, kalkal la magur aŋa bebi uwana akəɗ dza.
14 Sləray aŋatà kà say matsafla dza pəra, ŋgaha gay ɗəhakakga pəra atsa à waŋ la gay aŋatà la awtày koksikoksi.
15 Tavay kà makaɗ dza.
16 Kəla slaka uwana taday kà, say gay atsən atà à tsəh ala.
17 Tasəl madz à ahəŋ la tələmma la abà la azladza aw.
18 Ɗikiɗiki tahoy yewdi aŋa Zəzagəla aw.ˈ✡ 3.18 Mahabay 5.10; 10.7; 14.3; 36.2; 140.4; Yesayya 59.7
19 Tekeɗika kà mapəhay aŋa Zəzagəla kà, apəhay kà azladza uwana mapəhay uwaga aga la atà la ahàl, kà maməts gay à gəl aŋa magay la ahəŋ, ŋgaha kà azladza gesina aŋa masəlay, kà atà azlaməna tsakana la huma Zəzagəla. 20 Tsa aŋa kiya uwaga kà, dza la ahəŋ adàgay dziriga la huma Zəzagəla la manəf mapəhay aw, kà uwana mapəhay aŋa Zəzagəla apəhla ala kà masəl tsakana.✡ 3.20 Mahabay 143.2
Kakay azladza tapaka dziriga la huma aŋa Zəzagəla ma?
21 Ama lagonay kà, tetəvi uwana azladza tadàgəla dziriga la huma Zəzagəla kà, Zəzagəla adapəhla ala: Gay aŋa mapəhay la abà à tetəvi uwatà aw. Ama la wakità mapəhay aŋa Zəzagəla la abà, ŋgaha azladza uwana Zəzagəla apə̀h à atà gay à ahàl, kà mapàh à azladza, tapàhàh lakəl aŋa tetəvi uwatà dagay uwarà la magoɗay kà: Zəzagəla adàpəhla tetəvi anik mawga ala. 22 Tetəvi gà, uwana Zəzagəla apakla azladza dziriga ala la huma aŋha kà, la madiŋ gəl à Yesu Kristu à vok, Zəzagəla adapəzl tetəvi à azlauwana tadiŋ gəl à Yesu à vok, awkà azla Yahudiya pəra aw. Zəzagəla kà avàh dza aw. 23 Dza gesina taɗahaŋ tsakana, ŋgaha taɓəzà mazləɓay uwana naka Zəzagəla avà à atà aw. 24 Ama Zəzagəla apis à atà gay à vok kà deyday, apakà atà ala dziriga la huma aŋha. Aɗahàŋ uwaga kà la ahàl aŋa Yesu Kristu, à uwana apə̀lla atà ala la tsakana la abà. 25 Zəzagəla afà à ahəŋ, kà masla aŋa mamətsay kà aŋa azladza, kà aŋiz aŋha aŋa mazəɓ à atà tsakana lakəl ala. Tetəvi uwaga kà, Zəzagəla apə̀zl à azladza, uwana tadiŋal gəl à Yesu à vok. Uwana aɗahà uwaga kà, kà azladza aŋa masəlay kà masla kà dziriga. Bokuba magoɗay kà, tsakana uwana uwarà taɗahàhàŋ kà, Zəzagəla afal sləm aya aw. 26 Abasàŋ ndzer, ama lagonay apəhla à azladza, kà masla kà dziriga. Masla asal maɗehəŋ kà uwana dziriga, ŋgaha asal aya magəŋ azladza, uwana tadiŋ gel à Yesu à vok dziriga la huma aŋha bay.
27 Tsa baŋa kiya uwanay kà, tatak la ahəŋ mətsalla zlapay takay? Awaŋ, tatak la ahəŋ aya aw. Zəzagəla adapaka anu ala dziriga kà, kà uwana mədiŋ gel à Yesu Kristu à vok. Awkà apakà anu ala dziriga kà, kà uwana mənəfa mapəhay aw. Tsa aŋa kiya uwaga kà, tatak la ahəŋ kà matsalla zlapay gami aya aw. 28 Məsəl kà Zəzagəla apakà azladza ala kà dziriga la huma aŋha, à baŋa tadiŋ gəl à Yesu à vok, awkà kà uwana tanəfa mapəhay aw. 29 Zəzagəla ma aŋa azla Yahudiya pəra takay? Awaŋ, aŋa azla Yahudiya pəra aw, ama Zəzagəla aŋa dza gesina. 30 Kà uwana Zəzagəla kà tekula pəra. Baŋa azla Yahudiya tadiŋ gəl à Yesu à vok, adàpaka atà ala dziriga la huma aŋha. Kà aŋa azladza tsəhay anik, uwana tadiŋ gəl à masla à vok bay kà, bà adàpaka atà ala dziriga la huma aŋha suwaŋ 31 Zəzagəla apaka azladza ala dziriga, kà uwana tadiŋ gəl à Yesu à vok, uwana məgoɗ ma? Məpəsew mapəhay takay? Tetuwa kiya uwaga aw! Məgəɗa mapəhay à afik kà la uwaga.