1 Lɔkɔ á Yisu pa o'o nœ ye kɔ fœ azu á endje sœ lima kœdji she, tshe na ga lœ Kaparnawumu. 2 Anga gbozu tshapa aturugu tshelœ Roma sœ lima dœ anga kanga nœ ye bale á tshe yindœ ye tɔpanœ kpuru. Kanganœ asœmœ sœ lima dœ koɓa, ndoo dœ kuzu. 3 Lɔkɔ á gbozu tshapa aturugunœ dji upu nœ Yisu, tshe vwa anga agbɔ agbozu Ikrizia adœke endje na œ kɨ fœ she dœ́ tshe na œ she kanga nœ œne. 4 Endje wuta ɓa ndœ Yisu, yé œ kɨ fœ she kpœpanœ kpœpanœ adœke: «Uzunœ á tshe vwa 'a kœdœ ɔtshɔ uzu, œ li adœke ɓœ mbœrœ œrœ á tshe pa tœnœ, fœ she. 5 Gbambanœ nene, tshe yindœ ogo nœ azœ yé œshe dá mɔ Sinagoga fœ azœ.» 6 Yé Yisu gu tœ awanœ bale dœ endje. Lɔkɔ á tshe wuta lima ndoo dœ anda, gbozu tshapa aturugu vwa anganœ mbœrœ kœpa fœ Yisu adœke: «Ayi kœyisœrœ, wuwu oyo tœ zœ nene, mbœrœ mœ sœsœ ndjii adœke ɓœ kœli ga lœ anda nœ mœ nene. 7 Mbœrœ tœnœ ndje ataa á mœ wa adœke, mœ na dœ tœ mœ œrrr ga ndœ zœ nene; kashe pa kolœ o'o bale dœ́ kanga nœ mœ á mœ yindœ ye waa, she. 8 Œmœ ndje, mœ sœ dœ agbozu tshapa mœ á mœ sœ kœdji endje, yé dœ aturugu á endje sœ tshakudu mœ. Œdœ mœ kœpa fœ anga bale adœke: “Na”, ngbewo tshe na da ye. Œdœ mœ kpa kœpa ndje fœ anga adœke: “Na ga mœ”, ngbewo tshe na ye. Yé œdœ mœ kœpa ndje fœ kanga nœ mœ adœke: “Mbœrœ œrœnœ asœ”, ngbewo tshe mbœrœ ye.»

9 Lɔkɔ á Yisu dji o'onœ asœmœ, tshe sœ dœ yanga ga ndœ ye. Tshe fatœ ye ga ndœ ukpulu azu á endje sœ lima kœna manda ye, yé œ pa fœ endje adœke: «Mœ sœ kœmɨndœ nœ fœ 'e adœke, œdœ ndje ɓa ugurutœ azu Israyelenœ gbaa, mœ gbɔgbɔ mara kœyindœrœ sœke nene.» 10 Lɔkɔ á azunœ á gbozu tshapa aturugu vwa endje, gu ɓa sœnda nœ gbozu tshapa aturugunœ ɓa zœ, endje gbɔ ayi akwanœ tshe sœ dœ ɔtshɔ ɔkɔ ye.

11 Manda nœ, Yisu ro ga lœ anga ongbo bale á ɨ'ɨrɨnœ kœdœ Nayine. Ayambarœ nœ ye œdœ pe ukpulu azu ndjoro sœ lima kœna tœ awanœ bale dœ she. 12 Lɔkɔ á endje wuta lima ndoo tœ kœli ga lœ ongbonœ atake, endje gbɔtœ endje dœ ukpulu azu ndjoro á endje sœ lima kœna ndœ kœshi kuzu: Œ dœ lima gbolo yakoshe tshebabale nœ anga yashe koya. Azu tshelœ ongbonœ ndjoro na lima tœ awa bale dœ yashenœ. 13 Lɔkɔ á Gbozu wu yashenœ asœmœ, oyo ye ká she yé tshe pa fœ she adœke: «Kpa kɨkɨ nene.» 14 Yisu gitœ ye ga utshunœ œ goro ngbongbo kuzunœ. Azu á endje za lima ngbongbonœ ka, yé Yisu pa adœke: «Ovoro gbolo yakoshe, mœ pa fœ ɓœ, jo ye!» 15 Ngbewo kuzunœ sœ ga atɨ, œ tetœ kœpa o'o. Yé Yisu za she fœ ayinœ.

16 Awa li lima tœ azu para kɔkɔ, yé endje te lima tœ kœdonga Ndjaba adœke: «Egerœ ayi kœgbara o'o wuta ga lœ ugurutœ azœ!» Yé œ kpa pa ndje adœke: «Ndjaba na kœshe azu nœ ye!» 17 Yé o'o tœ́ upu nœ œrœnœ á Yisu mbœrœ asœmœ za tshelœ lœ ogo Yuda œdœ tshalakpɨ kɔ á sœ ɨndɨrɨnœ ndjengene.

18 Ayambarœ nœ Yowane pandœ akwa kɔ á Yisu mbœrœ asœmœ fœ she. Tshe e anga endje bisha ugurutœ endje, 19 yé œ vwa endje fœ Gbozu Yisu kœyu she adœke: «Œɓœ kœdœ Masiya á tshe sœ kœna tœnœ a, too 'a kate anga angbɨ uzu?» 20 Lɔkɔ á endje wuta ɓa ndœ Yisu, endje pa fœ she adœke: «Yowane ayi kœza batisimu vwa 'a ɓa ndœ zœ mbœrœ kœyu ɓœ adœke: “Œɓœ kœdœ Masiya á tshe sœ kœna tœnœ a, too 'a kate anga angbɨ uzu?”» 21 Kolœ dœ lɔndɔnœ asœmœ, Yisu she azu ndjoro lœ koɓa nœ endje, lœ kœndɨ nœ endje. Tshe gɔrɔ ekpe ɨshirɨ pa endje yé œ she ndje aayibula. 22 Manda nœ, tshe gi lima fœ azu á Yowane vwa endje adœke: «'E gu œ pandœ neke á 'e wu dœ ala 'e yé á dji dœ utu 'e, fœ she. 'E pandœ nœ adœke: “Aayibula tetœ kœwu osho, azu á ada endje tshu tetœ kœna ana, aayi boroma she, aayi bitu tetœ kœdji o'o, akuzu kwatœ endje ga lœ soro, yé endje pandœ Ɔtshɔ O'o fœ aayi oyo. 23 Yanga nœ uzu á tshe kakatœ kœyindœrœ nœ ye ga ndœ mœ nene.”»

24 Lɔkɔ á aayi avwa nœ Yowane gu lima da ye, Yisu tetœ kœpa tœ upu nœ Yowane fœ ukpulu azu asœmœ adœke: «Œrœ gaɗe dá 'e na kœwu tœnœ ɓa lœ kpagagasho a? 'E na kœwu mulu á yugu sœ kœmea tœnœ kpangi kpangi a? Œ̃ œ̃ nene. 25 Yé ata œrœ gaɗe dá 'e na lima kœwu tœnœ a? 'E na kœwu uzu á tshe verœ ɔtshɔ lœba a? Œ̃ œ̃ nene. Gbambanœ nene, azu á endje sœ kœverœ ɔtshɔ lœba, yé á sœ dœ œrœ waa, endje sœ ɓa lœ anda nœ agbozugo. 26 Ata 'e na lima ndœ kœwu gaɗe? 'E na kœwu anga ayi kœgbara o'o a? Œ̃, kashe mœ sœ kœmɨndœ nœ fœ 'e adœke tshe rosœ ayi kœgbara o'o ye. 27 Gbambanœ nene, Yowane kœdœ uzu á endje pa o'o tœ upu nœ ye ɓa la buku nœ Ndjaba adœke:

28 Yé Yisu kpa pa adœke: «Mœ sœ kœmɨndœ nœ fœ 'e adœke lœ ugurutœ azu tshapashɔ asœ kɔ, uzu bale á tshe ropa Yowane gugu nene. Kashe aya uzu ɓa lœ ogo Gbozu nœ Ndjaba ropa ye ye.» 29 «Azu para kɔkɔ dœ pe aayi kœko ngendja lapo á endje dji o'o má Yowane pa, wusœ nœ adœke Ndjaba sœ ndjii yé œ gbɔ lima batisimu nœ Yowane. 30 Kashe Afarisayi œdœ aayi kœyisœ awa akwa vwaratœ endje kœyindœ œrœ á Ndjaba yindœ kœmbœrœ fœ endje, yé œ tshapu kœgbɔ batisimu nœ Yowane ye.»

31 Yisu kpa pa adœke: «Mœ li mara azu nœ asœ dœ azu ɗe? Endje li dœ azu ɗe? 32 Endje liili dœ agbolo á endje sœ ɓa ushu, yé á sœ kœ'etœ endje lœ tœ endje adœke: “'A 'uru ngbake fœ 'e, kashe 'e vivi ipi nene! 'A ɓi itshi kuzu fœ 'e, kashe 'e kɨkɨ nene!” 33 Gbambanœ nene, Yowane ayi kœza batisimu na, œ vwaratœ ye tœ kœzɨ mapa œdœ kœndjo ipi, 'e pa adœke: “Tshe sœ dœ ekpe ɨshirɨ pa ye!” 34 Gbolo nœ uzu na œ sœ kœzɨ mapa dœ kœndjo ipi, 'e pa adœke: “'E wu uzunœ asœ, tshe gbe kolœ dœ kœzɨrœ œdœ kœndjorœ, yé anganœ kœdœ aayi kœko ngendja lapo œdœ pe azu kœmbœrœ ekperœ.” 35 Kashe kœwusœtœ nœ Ndjaba matœ ye ndjii lœ awa nœ azu kɔ á endje yindœ nœ.»

36 Anga Farisayi bale vwa osho fœ Yisu adœke tshe na kœzɨ œrœ ɓa ndœ œne. Yisu li ga sœnda nœ Farisayinœ asœmœ, yé œ sœ ga ɨndɨrɨ ndaba kœzɨrœ. 37 Kashe anga yashe bale á akwa tshelœ ye gaga nene sœ lima lœ ongbonœ asœmœ. Lɔkɔ á tshe dji adœke Yisu sœ kœzɨ œrœ ɓa ndœ Farisayi, tshe za yombo kperœ dœ anga albatre yé œ na dœ tœnœ. 38 Tshe ka djagamanda Yisu, œ gote ndoo dœ ada ye. Tshe sœ lima tœ ɨkɨ, yé ngola ye sara œ gba lima tshapa ada Yisu. Tshe turu dœ sukumu ye, œ ndjoro tshapanœ dœ ama ye, yé manda nœ á su lima yombo kpɔɔ kpɔɔ ga panœ. 39 Lɔkɔ á Farisayinœ á tshe vwa osho ndœ Yisu asœmœ wu atamœ, tshe pa ɓa lœ ye dœ tœ ye adœke: «Œdœ uzunœ asœ kœdœ má adja ayi kœgbara o'o, tshe wu ma sœ nœ adœke yashenœ á tshe goro œne asœmœ, œshe kœdœ ayi kœmbœrœ ekperœ.»

40 Yisu za o'o yé œ pa fœ Farisayinœ asœmœ adœke: «Shimu, mœ sœ dœ anga o'o kœpa tœnœ fœ ɓœ.» Shimu gi fœ she adœke: «Pa 'onœ zœ, Ayi kœyisœrœ!» 41 Yé Yisu kœpa adœke: «Azu bisha sœ lima dœ kuɗa nœ anga uzu bale. Anga bale daka lima egerœ ngendja, yé anga yanganœ daka œnœ ye teasho* 7.41 Dœ o'o ama Greke endje sú lima adœke uzu tshatshunœ ko deniye kama mindu yé bisha uzunœ ko deniye zazu bisha dœ ndjokpa. 42 Ɓata á endje bibisha lili lima kœgi kuɗanœ nene, ayengɔ kuɗanœ wu oyo endje yé œ katœnœ ye. Lœ ugurutœ endje bisha asœmœ, uzu ɗe dá yindœ ayengɔ ngendjanœ asœmœ kœropa nœ a?» 43 Shimu gi fœ she adœke: «Mœ wu adœke uzu á kuɗa sœ lima dœ egerœnœ lœ kumu ye dá yindœ ye tɔpanœ kpuru.» Yisu kœpa fœ she adœke: «Ɓœ gi adja o'o.»

44 Manda nœ, tshe fatœ ye ga ndœ yashenœ yé œ pa fœ Shimu adœke: «Ɓœ wu yashenœ asœ? Mœ li ɓa sœnda nœ zœ yé ɓœ susu ungu fœ mœ adœke mœ djutɔ dœ ada mœ nene, kashe tshe djutɔ ada mœ dœ ngola ye, yé œ turu dœ sukumu ye. 45 Ɓœ nana œ uru tshelœ utu mœ nene, kashe tshe kakatœ kœndjoro tshapa ada mœ tœ kœli mœ á mœ li gamœ asœ nene. 46 Ɓœ djadja tshapa kumu mœ dœ kada nene, kashe tshe su yombo kpɔɔ ga pa ada mœ. 47 Mbœrœ tœnœ ataa, mœ sœ kœmɨndœ nœ fœ ɓœ adœke: Ndjaba djerœndœ ekperœ nœ ye para mbœrœ egerœ kœyindœsho á tshe ma. Kashe tsheneke á endje djerœndœ ekperœ nœ ye teasho, tshe ma ndje kœyindœsho teasho.» 48 Yé Yisu kœpa fœ yashenœ adœke: «Mœ djerœndœ ekperœ nœ zœ para ye.» 49 Azu á endje sœ ɨndɨrɨ ndaba kœzɨrœ bale dœ she, te lima tœ kœyutœ endje lœ tœ endje dœ tœ endje adœke: «Uzunœ asœ kœdœ ma œnœ ye ɗe yeka á li ndœ kœdjerœndœ ekperœ nœ azu a?» 50 Kashe Yisu kœpa fœ yashenœ adœke: «Kœyindœrœ nœ zœ she ɓœ ye. Gu dœ kœsœ gee.»