11
Ka Pulus to Pogtuu to Dongan no mgo Otow
1 Ko duon pogtuu ta to Magboboot, nataga kid on to ogkatuman ka og-im-imanan tanow no innangon din. Agad ka kono ta ogkakitaan, nataga ki to duon dod 2 su ka pogtuu to mgo masalig no otow dongan, ian ligkatan to igkarago to Magboboot kandan.
3 Nò, ligkat to pogtuu ta to Magboboot, nakasabut kid to nohimu soini no kalibutan ligkat to kagi ro to Magboboot. Su ian ian, nataga kid to ka ogkakitaan ta, nigligkat to sikan no kono tad ogkitoon.* Ogkabasa to Genesis 1:1 woy Salmo 33:6,9.
4 Ligkat to pogtuu ni Abil dongan, madmaroyow ka kandin no intubad dio to Magboboot to sikan no intubad ni Kain. Woy su nigtuu si Abil kandin, impamalogot to Magboboot to maroyow si Abil dio to tangkaan din su narago to intubad din. Agad nalugoy on namatoy si Abil, di ligkat to pogtuu din, ogkaanad ki rod to maroyow.† Ogkabasa to Genesis 4:3,4. 5 Ligkat to pogtuu ni Inuk, pig-angoy to Magboboot sikandin no warad mogbayo to kamatayon din. Nigpammitow to mgo otow sikandin di wa dan kitaa su diad on to langit. Duon ingkasulat dongan tongod ki Inuk to waro pad angaya sikandin, to narago ka Magboboot kandin.‡ Ogkabasa to Genesis 5:21-23. 6 Nò, kono ogkarago ka Magboboot kanta ko waro pogtuu ta kandin su sikan no otow no ogdani kandin no og-ampu, og-awoson to ogtuu to duon ian sikandin woy to ogbogayan din to maroyow ka sikan no otow no ogpamangho kandin.
7 Si Noi dongan, ligkat to pogtuu rin to Magboboot, nigpamminog to mgo imbohog kandin ko nokoy ka ogkatuman no waro pad nigbunsud. Nigpaagad-agad no nighimu to dakol no arka oyow ogpokountud ka asawa rin, mgo anak din woy ka mgo asawa to mgo anak din oyow kono ogkallonod sikandan.§ Ka sikan no arka, noiling to dakol no barku di waro kun igtimun. Mohon-ing ka sinabong din litos to mgo ayam woy mgo ulod-ulod no impasakoy. Ka sikan, ogkabasa to Genesis 6:14-16. Ligkat to kandin do no pogtuu, nabobootan ka tibo no waro nigtuu kai to kalibutan woy nigbogayan to Magboboot si Noi to sikan no naayun no goinawa rin dio to tangkaan din no ogligkat to pogtuu tanow kandin.
8 Ligkat to pogtuu ni Abraham, nigpaagad-agad to pogsugu ka Magboboot to oyow ogpohipanawon sikandin dio to songo ugpaan. No ian ka innangon din no igbogoy rin no ogpougpaan din kandan. No sikan ian no nig-ongkoran ni Abraham ka kandin no ugpaan no nighipanow on to waro dan matagoi ka ogdatongan dan.* Ogkabasa to Genesis 12:1. 9 Ligkat dod to pogtuu rin, nigtagood do nig-ugpo no ogkounawa to agpot do sikandin dio to sikan no ugpaan no innangon to Magboboot no igbogoy kandin. No ka baloy ran, inhimu ligkat to laplap to ayam. Si Abraham, si Isaak, woy si Hakub, tibo sikandan no matalag-alunggun, nigtatagooran dan doka pog-ugpo dan. Ian su si Abraham woy ka mgo pinanganak din ka ogpakapurut uromo to sikan no innangon to Magboboot. 10 Ian dod ka pog-ugpo dan su ogtatagaran dan ka sikan no ogkougpaan dan no lunsud no dio to langit no nighimu to Magboboot. No ka sikan no lunsud, konad ogkahalin.
11 Ligkat dod to pogtuu, agad to buyag on si Abraham woy to kono ogpakapanganak si Sara, nigpangiram dod su nigbogayan sikandin to kabogbogan. Ian su nigsalig si Abraham to ogtumanon to Magboboot ka innangon din to og-anak si Sara.† To kinagian to Ginirigu, ogkohimu ko ian igkatuon ka pogtuu ni Abraham oyow ogkohimu on sikandin no amoy, woy ko ka pogtuu ni Sara ka igkatuon no sikan ian to nakatood sikandin no ogpangiram dod. Ka sikan, ogkabasa to Genesis 18:11 woy 21:2. 12 Sikan ian, agad to magaan porom ogkamatoy to igkabuyagi rin, di ligkat do ki Abraham, impaanak pad sikandan to Magboboot. No ka mgo pinanganak dan, nohimu on no mohon-ing su ogkounawa to mgo bituon dio to langit woy songo ogkounawa to mgo bayokbok dio to dagat no kono ogkasool.‡ Ogkabasa to Genesis 15:5; 22:17.
13 Agad to tibo kandan noumaan on to kamatayon dan to waro moumoi to sikan no innangon to Magboboot kandan, di waro dan ongkori ka pogtuu ran to Magboboot. Di, ligkat to pogtuu ran, narago nasi sikandan su nakitaan dan dio to mariu ka igbogoy to Magboboot kandan uromo, woy nigtokod to mgo agpot do sikandan no waro tu-tuu no ugpaan dan kai to soi tano.§ Ogkabasa to 1 Cronicas 29:15. 14 Ka sikan no mgo otow no ogtokod to kono no tu-tuu ian no ugpaan dan ka soini no kalibutan, ogpohitaga to ogpamangho sikandan to tu-tuu ian no ugpaan dan. 15 Waro dan doromdoma ka sikan no nig-ongkoran dan no ugpaan. Di ko nigdoromdom dan pa, ogpokouli porom sikandan ko ian ka ogkoiniatan dan. 16 Dokad di, lagboy ran ogkoiniatan ka madmaroyow no lunsud no ian ka dio to langit. No su ian ka ogkoiniatan dan, kono ogkasipod ka Magboboot to og-abinon dan to sikandin ka Magboboot dan. No duon impanagana rin no songo lunsud no litos kandan no dio to langit.
17-18 Duon dod. Ligkat to pogtuu ni Abraham no nig-ol-ologan to Magboboot ka pogtuu rin, intubad din porom to Magboboot ka bugtung no anak din no si Isaak. Agad to si Abraham ka nignangonan to Magboboot to, “Si Isaak ka ogligkatan to mgo pinanganak now,” nighimatayan din on poron no igtubad.* Ogkabasa to Genesis 22:1-14. 19 Ian su nakaroromdom sikandin to, agad ko namatoy pa si Isaak, ogkouyag do to Magboboot sikandin. Di su waro din matoori to poghimatoy su nigpangabangan to Magboboot, ogkounawa to nig-uyag on ian to Magboboot si Isaak ligkat to kamatayon din.
20 Ligkat to pogtuu ni Isaak, nigpakohoy-uan din to Magboboot ka mgo anak din no si Hakub woy si Isau.† Ogkabasa to Genesis 27:27.
21 Ligkat to pogtuu ni Hakub to Magboboot, ko magaan on ogkamatoy si Hakob, nigpakohoy-uan to Magboboot ka daruwa no apu din no anak ni Husi. Pogkaponga on, nig-unduk to tukod din no nigsimba to Magboboot.‡ Ogkabasa to Genesis 47:31.
22 Ligkat to pogtuu ni Husi to Magboboot, ko magaan on ogkamatoy, nigpanuguntugun to duon dod allow no ka tibo no mgo pinanganak ni Israil, ogkaawo on to ugpaan to Ehipto. Songo nignangonan din sikandan ko ogmonuon dan ka bokog din ko oghipanow on sikandan.§ Si Israil ka dangob no ngaran no imbogoy to Magboboot ki Hakob. No si Husi ka anak ni Hakob woy ko anak ni Israil. Ka sikan no nangnangonon, duon to Genesis 32:22-28.* Ogkabasa to Genesis 50:24,25.
23 Ligkat to pogtuu to amoy woy ka inoy ni Moisis, ko nootow sikandin, inholos dan sikandin to tatolu no bulan. No ian dan inholos su nakita ran to maroyow ka bato woy su kono ogkahallok sikandan no oglop-ang to mgo sugu to igbuyag to Ehipto.† Ogkabasa to Exodo 2:2. 24 Ligkat to pogtuu ni Moisis to Magboboot, ko dakol on sikandin, nigligal to oghingaranan sikandin to anak to nig-uyamu kandin no anak to igbuyag to Ehipto.‡ Ogkabasa to Exodo 2:10. 25 Madmaroyow rin atag, to og-aguantoon din ka mgo igkabaybayari to mgo duma rin no mgo pinanganak ni Israil no sakup to Magboboot to ogpakaamut pa sikandin to sikan no igkarago no magaan do ogkaawo no ogligkat to mgo maroot no oghimuon dan dio to Ehipto. 26 Goinawa rin ian to og-aguantoon din ka igmasakit to goinawa rin su ka pog-iman-iman din to sikan no Im-imanan to mgo Koot-otawan no si Kristu.§ To kinagian to Ginirigu, Kristu ka ighingaran dan to nig-im-imanan dan no Lagboy no Igbuyag dan no igpoindini to Magboboot kai to tano. Di to kinagian to Hinibriu, Misias ka ighingaran dan. Hondoi ka dakoldakol no pulus ni Moisis ko kono no ka sikan no pog-aguanta din? Kono no ian din pad pulus ka dakol no igkaratui dio to Ehipto su nigdoromdom din ka sikan no igkasayo kandin uromo.
27 Ligkat dod to pogtuu rin, nig-ongkoran din ka ugpaan din dio to Ehipto no waro nahallok din to igkabolu to sikan no Igbuyag to Ehipto. Nig-aguanta ni Moisis ka kohirapan rin su nounawa to nigkita rin ka Magboboot no kono ogkakita.* Ogkabasa to Exodo 2:15. 28 No ka pogtuu din dod ka igpabunsud to sikan no pagkoonan no oghingaranan to Paligad. No sikan ian to nigsugu si Moisis to oyow ogpamilikpilikan dan ka mgo gumawan dan to langosa to ayam oyow ka diwata no nigsugu to Magboboot no ogpanhimatoy to mgo panganoy no lukos dio to Ehipto, ko ogkakitaan din on ka langosa, ogligaran din doka baloy ran; kono din oghimatayan ka mgo panganoy no lukos to mgo pinanganak ni Israil.† Ogkabasa to Exodo 12:21.
29 No ligkat to pogtuu to mgo pinanganak ni Israil to Magboboot, nakalapas sikandan to sikan no Malalab no Dagat no nig-otian to Magboboot oyow ogkounawa to tano no mammara no ogkabayaan dan. Di ka mgo taga Ehipto atag no nigpababaan to niggapon, nallonod on ka tibo su niglibong on ka dagat.‡ Ogkabasa to Exodo 14:21-26.
30 No ligkat dod to pogtuu to mgo pinanganak ni Israil dongan, ko nigpalpalibut sikandan to lunsud to Hiriku taman to papitu no allow, nayabyab on tibo ka alad no batu to sikan no lunsud.§ Ogkabasa to Josue 6:20.
31 Ligkat dod to pogtuu ni Rahab no sagboka no boi no maroot ka batasan din, napangabangan on no waro makalagkos to nammatoy on ka mgo otow no waro nigpaagad-agad to Magboboot no dio to Hiriku. Ian su maroyow ka pogsagman din to mgo pinanganak ni Israil no mgo talagbangan.* Ogkabasa to Josue 6:22.
32 Warad buwa igkabatbat ku su warad igliwak ku to ogbatbat tongod ki Gidion, woy si Barak, si Samson, si Dipta, si Dabid, si Samuel, woy ka mgo talagnangon to kagi no ogligkat to Magboboot dongan.† Ogkabasa to Maghuhukom 4:6, 6:11, 11:1, 13:2, woy Isaias 1:1, 16:1. 33 Ligkat to pogtuu to tibo soini, mohon-ing ka nohimu ran. Duon nakaroog to mgo koot-otawan woy ka mgo igbuyag dan no nigmoog-ogotoy on kandan. Maayun ka pogpangatondanan dan woy natuman on to duma ka innangon to Magboboot kandan. Woy duon duma no nakaroog to mgo lion no waro kagata. 34 Duon dod duma no nakaparong to makahallokhallok no logdog to hapuy. Duon duma no nohimatayan porom to moirob di nakapanalia. Tibo, waro porom amana dayagang dan di nabogayan to Magboboot to og-awoson dan no dayagang no nigmanokal on sikandan to ogmoog-ogotoy. Nokogsuwoysuwoy on ka mgo sundalu no nan-agpot no oglusud poron kandan. 35 Woy ligkat dod to pogtuu ran, duon mgo boi dongan no duon anak dan no nammatoy no nouyag on.
Dokad di, duon duma no mgo otow no nigbaybayaran to mgo waro nigtuu. Agad to ogpakasabuk porom di nigbalagad dan on ko ogkamatoy oyow madmaroyow ka igkasayo kandan ko ogkouyag on uromo.‡ Ogkabasa to 1 Hari 17:17, woy 2 Hari 4:25. 36 Duon dod duma no mgo otow no pigsusumpalit woy nigpambarasan. Ka duma pad, nigbanggutan to karina no inhatod dio to pirisuan.§ Ogkabasa to 1 Hari 22:26,27, woy Jeremias 20:2. 37 Duon dod duma no pigdogpak to dakol no batu taman to namatoy on. Duon pigtampod to gabas. Duon duma no namatoy to pigtigbas. No duon duma no waro himatayi di nakalohowlohow. No ka sabinit dan mgo laplap to karniru woy ko kambing. Noiluan lagboy sikandan to pog-ugpo dan woy pigbaybayaran sikandan to mgo otow no waro nigtuu.* Ogkabasa to 1 Cronicas 24:21,22. 38 Ogkounawa to waro ogkougpaan dan no ungod ogpakalohowlohow dio to mgo bubungan woy ko dio to mammara no tano. Mgo pilang woy ko mgo sinoropan ka hirogoanan dan. Waro tokora to mgo otow no waro nigtuu ko nokoy ka pulus to sikan mgo otow no nakalohowlohow.
39 Maroyow lagboy dio to Magboboot ka pighimu to tibo to soini no mgo otow ligkat to pogtuu ran. Di waro dan pad mapurut ka sikan no innangon to Magboboot. 40 Ian su duon madmaroyow no tuud to Magboboot kantanow, su ian goinawa rin to woy rin do ogbogayan sikandan to tibo no karoyawan no innangon din kandan dongan ko songo ogpakalagkos kinow rod.
*11:3 Ogkabasa to Genesis 1:1 woy Salmo 33:6,9.
†11:4 Ogkabasa to Genesis 4:3,4.
‡11:5 Ogkabasa to Genesis 5:21-23.
§11:7 Ka sikan no arka, noiling to dakol no barku di waro kun igtimun. Mohon-ing ka sinabong din litos to mgo ayam woy mgo ulod-ulod no impasakoy. Ka sikan, ogkabasa to Genesis 6:14-16.
*11:8 Ogkabasa to Genesis 12:1.
†11:11 To kinagian to Ginirigu, ogkohimu ko ian igkatuon ka pogtuu ni Abraham oyow ogkohimu on sikandin no amoy, woy ko ka pogtuu ni Sara ka igkatuon no sikan ian to nakatood sikandin no ogpangiram dod. Ka sikan, ogkabasa to Genesis 18:11 woy 21:2.
‡11:12 Ogkabasa to Genesis 15:5; 22:17.
§11:13 Ogkabasa to 1 Cronicas 29:15.
*11:17-18 Ogkabasa to Genesis 22:1-14.
†11:20 Ogkabasa to Genesis 27:27.
‡11:21 Ogkabasa to Genesis 47:31.
§11:22 Si Israil ka dangob no ngaran no imbogoy to Magboboot ki Hakob. No si Husi ka anak ni Hakob woy ko anak ni Israil. Ka sikan no nangnangonon, duon to Genesis 32:22-28.
*11:22 Ogkabasa to Genesis 50:24,25.
†11:23 Ogkabasa to Exodo 2:2.
‡11:24 Ogkabasa to Exodo 2:10.
§11:26 To kinagian to Ginirigu, Kristu ka ighingaran dan to nig-im-imanan dan no Lagboy no Igbuyag dan no igpoindini to Magboboot kai to tano. Di to kinagian to Hinibriu, Misias ka ighingaran dan.
*11:27 Ogkabasa to Exodo 2:15.
†11:28 Ogkabasa to Exodo 12:21.
‡11:29 Ogkabasa to Exodo 14:21-26.
§11:30 Ogkabasa to Josue 6:20.
*11:31 Ogkabasa to Josue 6:22.
†11:32 Ogkabasa to Maghuhukom 4:6, 6:11, 11:1, 13:2, woy Isaias 1:1, 16:1.
‡11:35 Ogkabasa to 1 Hari 17:17, woy 2 Hari 4:25.
§11:36 Ogkabasa to 1 Hari 22:26,27, woy Jeremias 20:2.
*11:37 Ogkabasa to 1 Cronicas 24:21,22.