3
Kareba napalanda' Yohanes to simantedok
Mat. 3:1-12; Mrk. 1:1-8; Yoh. 1:19-28
1 Kasapulo limanna taunna ma'parenta tomaraya Tiberius, attunna Pontius Pilatus mendadi gubernur dio Yudea, anna Herodes ummanda'i kaparentaan dio Galilea, attunna Filipus sirondongna Herodes ma'parenta dio Iturea sola dio Trakhonitis, attunna duka' Lisanias ummanda'i kaparentaan dio Abilene 2 anna attunna Hanas sola Kayafas mendadi Pongkena Imam ma'kadami Puang Allata'alla lako Yohanes anakna Zakharia dio padang alla'. 3 Napolalan laomo Yohanes ullelean angganna angngenan dio lembangna Salu Yordan umpalanda' Kadanna Puang Allata'alla nakua: “Mengkatoba'mokoa' ammu ditedok anna malara nagarri'iangkoa' kasalaammu Puang Allata'alla.” 4 Susi mangka napayolo lamban nabi Yesaya illalan sura'na nakua:
“Dengan tau metamba-tamba dio padang alla' nakua:
‘Patokanni lalan Dewata,
maloloananni lalan la naola.
5 La ditambunni angga mellembangna,
anna dirantean angga mentanetena sola ma'buntunna,
la dimaloloan angga sengko'na
anna dipomarante ma'kaleok-leokna.
6 Angganna ma'rupa tau illalan lino la ummita kasalamasan lu yao mai Puang Allata'alla.’ ”* Yes. 40:3-5.
7 Ma'kada Yohanes lako tau buda to la sae ditedok nakua: “O anggammua' to kadake gau', benna ungkuangkoa' kumua la malakoa' nasala ara'na Puang Allata'alla la sae? 8 Kenamala kembua mapiakoa' sitinti pa'palakomu mengkatoba'. Dau anna kendek illalan penawammua' kumua peampoannakoa' Abraham. Kupokadangkoa' sitonganna, inde mai batue mala napopendadi peampoanna Abraham Puang Allata'alla. 9 Tokami wase la dilellengan kayu tae' kembua mapia anna ditibe tama api.”
10 Nakuamo inde mai taue: “Akamo la kipogau'?”
11 Natimba' Yohanes nakua: “Benna-benna ummampui dua bayu, la nabeen to tae' ummampui bayu mesa. Anna benna-benna ummampui andean la natawa duka'.”
12 Dengan duka' sae pira-pira tuang passima morai la ditedok, mekutana nakua: “O tuangguru, aka kami la kipogau'?”
13 Natimba' Yohanes nakua: “Dau pala'bii musinga' anna mangkanna dipatantu.”
14 Mekutana duka' pira-pira tantara nakua: “Anna kami, aka kami la kipogau'?”
Natimba' Yohanes nakua: “Dau tokke' ummala babang ewananna tau ke tangngia lalanna anna tae'koa' la umpaalinni kasalaan tau annu la nabaya'koa'. Pasiruaimia' kalemu passaromu.”
15 Attu iatoo mangngampa liumi anna parannu tau buda lako kasaeanna To dibassei bayu-bayu la ma'pasalama', napolalan kendek pekutana illalan penawanna kumua umbai iamo. 16 Iamo too anna ma'kadamo Yohanes lako inde mai taue nakua: “Wai kao kutedokangkoa', sapo dako' la sae to marru ma'kuasa anna kaleku annu angga la kubukaianni pekapu' palopakna anna tae'na' sipato'. Inde taue Penawa Masero sola api la natedokangkoa'. 17 Sirapan to ma'tappi, tokami petappinna la napake ungkayoi gandumna anna mane annai tama talukunna. Mengke'de' tappianna napatama api tae' dengan leleanna la pi'de.”
18 Budapi kada pa'nanna' natula' Yohanes attunna anna umpalanda' Kareba Kadoresan.
19 Sapo ungkambaroarria to ma'parenta dio lembangna Galilea iamo Herodes diona kasipobaineanna Herodias bainena sirondongna, anna diona angganna kakadakeanna, 20 napolalan urrangnganni pole omo kakadakeanna Herodes annu untarungkun Yohanes.
Puang Yesus ditedok
Mat. 3:13-17; Mrk. 1:9-11; Yoh. 1:32-34
21 Marassanni untedok tau buda Yohanes, saemi duka' Puang Yesus anna ditedok. Mengei ma'sambayang Puang Yesus, titungka'mi langi' 22 anna turun Penawa Masero merrupa dangan-dangan sae urrampoii. Dirangngimi kamara yao mai langi' nakua: “Ikomo anakku to kukamasei, to umpomasannang penawangku.”
Rettenanna kabuttuanna Puang Yesus
Mat. 1:1-17
23 Inde anna umparanduk pengkaranganna Puang Yesus-e, umbai tallu pulomo taunna. Anna situru' tula'na tau, Puang Yesus anakna Yusuf.
Yusuf anakna Eli, 24 Eli anakna Matat,
Matat anakna Lewi, Lewi anakna Malkhi,
Malkhi anakna Yanai, Yanai anakna Yusuf,
25 Yusuf anakna Matica, Matica anakna Amos,
Amos anakna Nahum, Nahum anakna Hesli,
Hesli anakna Nagai, 26 Nagai anakna Maat,
Maat anakna Matica, Matica anakna Simei,
Simei anakna Yosekh, Yosekh anakna Yoda,
27 Yoda anakna Yohanan, Yohanan anakna Resa,
Resa anakna Zerubabel, Zerubabel anakna Sealtiel,
Sealtiel anakna Neri, 28 Neri anakna Malkhi,
Malkhi anakna Adi, Adi anakna Kosam,
Kosam anakna Elmadam, Elmadam anakna Er,
29 Er anakna Yesua, Yesua anakna Eliezer,
Eliezer anakna Yorim, Yorim anakna Matat,
Matat anakna Lewi, 30 Lewi anakna Simeon,
Simeon anakna Yehuda, Yehuda anakna Yusuf,
Yusuf anakna Yonam, Yonam anakna Elyakim,
31 Elyakim anakna Melea, Melea anakna Mina,
Mina anakna Matata, Matata anakna Natan,
Natan anakna Daud, 32 Daud anakna Isai,
Isai anakna Obed, Obed anakna Boas,
Boas anakna Salmon, Salmon anakna Nahason,
33 Nahason anakna Aminadab, Aminadab anakna Admin,
Admin anakna Arni, Arni anakna Hezron,
Hezron anakna Peres, Peres anakna Yehuda,
34 Yehuda anakna Yakub, Yakub anakna Ishak,
Ishak anakna Abraham, Abraham anakna Terah,
Terah anakna Nahor, 35 Nahor anakna Serug,
Serug anakna Rehu, Rehu anakna Peleg,
Peleg anakna Eber, Eber anakna Salmon,
36 Salmon anakna Kenan, Kenan anakna Arpakhsad,
Arpakhsad anakna Sem, Sem anakna Nuh,
Nuh anakna Lamekh, 37 Lamekh anakna Metusalah,
Metusalah anakna Henokh, Henokh anakna Yared,
Yared anakna Mahalaleel, Mahalaleel anakna Kenan,
38 Kenan anakna Enos, Enos anakna Set, Set anakna Adam, Adam anakna Puang Allata'alla.