17
Ɨmanyɨzyo ku zyi mbiibhi na kʉtʉyɨlana
(Mataayi 18:6-7, 21-22; Maalika 9:42)
1 UYeesu akhabhabhʉʉzya abhalandati bhaakwe akhatɨ, “Ɨndɨngo zye zɨkwazya abhantʉ kʉbhomba imbiibhi zɨlɨɨpo insiku zyonti. Ɨleelo, asheleeye umuntu we akwazya ɨndɨngo zɨnɨɨzyo! 2 Yaamɨle kwashi kwa muntu wʉnʉʉyo kʉkʉnjɨɨlwa iwe ɨpɨtɨ ɨlya kʉsyela mu nsingo na kʉsʉmbwa mwa sʉmbɨ, na kʉtɨ amʉpʉvwe weeka mu bhansi ɨbha abhombe imbiibhi! 3 Ishi, mʉbhe amiiso, mʉtakhabhombe shɨnɨɨsho!
“Uwamwinyu mʉ lwɨtɨkho ɨnga akʉbhombela ibhiibhi, mʉsoshe, ɨnga alaata, ʉmʉtʉyɨlaje. 4 Poope ɨnga akʉbhombela akhabhiibhi khabhɨlɨ khabhɨlɨ* 17:4 Khabhɨlɨ khabhɨlɨ Mʉ ndongo ɨya Shiyunaani yɨkʉtɨ khonti saba, kwe kʉtɨ akhinji bhʉʉlo. kwi siku lyeka, na kʉgalʉkha kʉkwakho khabhɨlɨ khabhɨlɨ akʉtɨ, ‘Ntʉʉyɨle,’ ɨwe ʉmʉtʉyɨlaje.”
Amakha aga lwɨtɨkho
5 Pe abhasundikwa bhaala bhakhamʉbhʉʉzya ʉMwene bhakhatɨ, “Twonjezye ʉlwɨtɨkho!” 6 ɄMwene akhabhaamʉla akhatɨ, “Ɨnga mwabha nʉ lwɨtɨkho, poope ulunsi anza khasanga akhi nhaladaali, khe khansi kʉshɨla ɨnsanga zyonti, mʉngakhola kʉlɨbhʉʉzya ikwi ɨkʉyʉ ili kʉtɨ, ‘Kumpukha ʉyɨsʉmbe mwa sʉmbɨ,’ lyope lingabhatinikha!
Ulutinikho mʉ mbombo
7 “Tʉtɨ weeka mukaasi yiinyu alɨ nu mubhombi we akʉlɨma awe kudiima ɨngoole. Bhʉlɨ, umubhombi we aafuma kʉbhomba ɨmbombo, angamʉbhʉʉzya kʉtɨ, ‘Nzaaga ishi, yɨɨkhala ulye ishaakulya’? 8 Nʉʉmo! Lyoli angatɨ, ‘Ndɨnganɨshɨzye ishaakulya, khabhɨlɨ ʉmbombele paka we naamala kulya na kʉmwela. We naamala, pe nɨɨwe ulye na kʉmwela.’ 9 Bhʉlɨ, angamusalifwa umubhombi, kʉnongwa ye abhombile she amulajiziizye? 10 She zɨlɨ na kukwinyu, we mwamala kʉbhomba zyonti zye ʉMʉlʉngʉ abhalajiziizye, pe mʉtɨnjɨ, ‘Ɨtwe twe bhabhombi twe tʉtakhondeeye, tubhombile bhʉʉlo zye tʉkwanzɨwa kʉbhomba.’ ”
UYeesu akʉbhaponɨa abha maketa ishumi
11 UYeesu we akʉbhala ku Yelusaleemu, akhashɨlɨla ɨdala lye lyáshɨlɨɨye pakaasi pa nsɨ ɨya Samaliya nɨ ya Galɨlaaya. 12 We akwinjila mʉ khakhaaya khamu, akhakhomaana na bhantʉ ishumi abha maketa. Abhantʉ bhaala bhakhɨmɨɨlɨla apatali na weene, 13 bhakhamʉbhɨlɨshɨla kwi zi bhakhatɨ, “We Yeesu, we Mʉpɨtɨ, ʉtʉlolele ishisa!” 14 UYeesu we abhalola, akhabhabhʉʉzya akhatɨ, “Bhalaji mʉyɨlolesye ku bhapuutili.”† 17:14 Bhalaji mʉyɨlolesye ku bhapuutili Kufumilana nɨ ndajɨzyo zya Moose, abhapuutili bhe bhakhasimishizyaga kʉtɨ umuntu aponile amaketa. Bhaazya Bhalaawi 14:1-32; Nkʉmbʉshɨzyo 24:8. We bhalɨ mwɨ dala bhakʉbhala, bhakhasatʉkha.
15 Weeka mʉ bhaala, we aalola kʉtɨ aapona, akhagalʉkha kwa Yeesu, kumo akʉmʉpaala ʉMʉlʉngʉ kwi zi ɨlya kʉdandɨzya. 16 We aafikha, akhagwa shikupama pɨlongolela pa vɨnama vwa Yeesu na kumusalifwa. Umuntu wʉnʉʉyo, áamɨle Musamaliya.‡ 17:16 UMusamaliya ABhayahuudi bhakhabhasholanyaaga aBhasamaliya, kʉnongwa ye bhakhapuutaga kwa Mʉlʉngʉ kʉ madala ge gatakhondeeye. Ishi, abhantʉ kufuma mʉ vɨkholo vɨbhɨlɨ viniivi, bhatakhɨmvwanaga. 17 UYeesu akhabhʉzɨɨlɨzya akhatɨ, “Bhatasatushile abhantʉ bhonti ishumi? Bhamu tisa bhalɨ kwoshi? 18 Atalɨɨpo we agalʉkha kʉmʉpaala ʉMʉlʉngʉ, lyoli umujeni ʉnʉ?” 19 Pe uYeesu akhamʉbhʉʉzya akhatɨ, “Yɨmɨɨlɨla, sogolaga, ʉlwɨtɨkho lwakho lwakʉponɨa!”
Kwɨnza ʉwʉmwene wa Mʉlʉngʉ
(Mataayi 24:23-28, 37-41)
20 Isiku limo, aBhafalisaayi bhakhamʉbhʉzɨɨlɨzya uYeesu bhakhatɨ, “Ʉwʉmwene wa Mʉlʉngʉ wʉkhayɨnza liino?” UYeesu akhabhaamʉla akhatɨ, “Ʉwʉmwene wa Mʉlʉngʉ wʉtakwɨnza kwɨ dala ɨlya vɨlolesyo vwe vɨkʉlolekha na miiso. 21 Abhantʉ te bhakhatɨ, ‘Yeenya! Wʉlɨ ɨpa!’ Awe ‘Wʉlɨ paala!’ Yeenya, ʉwʉmwene wa Mʉlʉngʉ wʉlɨ pakaasi yiinyu.”
22 Pe uYeesu akhabhabhʉʉzya abhalandati bhaakwe akhatɨ, “Zɨkhayɨnza insiku zye mʉkhayɨsʉngʉkha kʉbha nʉ Mwana wa Muntu poope kwi siku lyeka, ɨleelo te mʉkhandole. 23 Abhantʉ bhakhayɨbhabhʉzyaga bhakhayɨtɨnjɨ, ‘Yeenya! Alɨ paala!’ Awe ‘Ʉnʉ ɨpa!’ Mʉtakhasheele kʉbhɨɨtɨkha, poope kʉbhalandata. 24 Imbabhuziizye ganaago, kʉnongwa ye akhabhalɨlo khe akhayɨgalʉkha ʉMwana wa Muntu, akhayɨnza ngatɨ mvula ye yɨkʉmwangʉkha nalʉbhɨlo na kʉkhozya ɨmbalɨ zyonti. 25 We ganaago gashɨɨlɨ kufumila, isuuti ʉMwana wa Muntu, kʉ shɨgane sha Mʉlʉngʉ atɨyɨmbe ku minji na kʉkhaanwa na bhantʉ abha khabhalɨlo ɨkha.
26 “Anza she yáamɨle insiku ɨzya Noowa, she yɨkhayɨbha akhabhalɨlo akha kʉgalʉkha ʉMwana wa Muntu. 27 Insiku ɨzya Noowa, abhantʉ bhakhalyanga na kʉmwela, bhakheegaga na kwejelwa, kufishila pi siku liila lye ʉNoowa akhinjila mu safina. Pe imvula ɨmpɨtɨ yɨkhatoonya, yɨkhayazya abhantʉ bhonti.
28 “Shɨnɨɨsho she yáamɨle insiku ɨzya Looti. Abhantʉ bhakhalyanga na kʉmwela, bhakhakalaga na kʉkazya, bhakhawaalaga na kʉzenga. 29 Ɨleelo isiku liila uLooti we ayeepa mu Sodoomu, ʉmwoto ni shibiliiti kufuma kʉmwanya wukhiikha ngatɨ mvula, wʉkhabhayazya abhantʉ bhonti. 30 She yɨkhayɨbha isiku liila, lye ʉMwana wa Muntu akhayɨnza.
31 “Isiku lɨnɨɨlyo, umuntu ɨnga alɨ kwi gulu, atakhiishe kʉtɨ ayeeje ivintu vwakwe vwe vɨlɨ mukaasi mu nyumba. Woope we alɨ ku shiizi, atakhasheele kʉgalʉkha kʉkhaaya kwega khakhonti. 32 Mʉkʉmbʉshe zye zyámwajile ʉmʉshɨ wa Looti.§ 17:32 Ʉmʉshɨ wa Looti ágalunhanile kʉbha khagamba akhɨ bheeya kʉnongwa ɨya kʉshoolanya ɨndajɨzyo zya Mʉlʉngʉ. Akhasʉngʉkha kʉgalʉkha mu Sodoomu, ɨnhaaya ye ʉMʉlʉngʉ átɨlɨ atɨyazye. Bhaazya Wandɨlo 19:26. 33 Umuntu wowonti we akwanza kʉponɨa uwuumi waakwe, wʉnʉʉyo akhayɨwʉyazya. Ɨleelo umuntu wowonti we akʉwʉyazya, wʉnʉʉyo we akhayɨwʉponɨa.
34 “Ɨnkʉbhabhʉʉzya kʉtɨ, isiku lɨnɨɨlyo abhantʉ bhabhɨlɨ bhakhayɨgona ɨshɨtala sheeka, ʉmo akhayɨnyamvʉlwa, ʉmo akhayɨsyala. 35 Isiku lɨnɨɨlyo, abhantanda bhabhɨlɨ bhakhayɨsyanga peeka, weeka akhayɨnyamvʉlwa, weeka akhayɨsyala. [ 36 Isiku lɨnɨɨlyo, abhasakhaala bhabhɨlɨ bhakhayɨbhombaga ɨmbombo ku shiizi, weeka akhayɨnyamvʉlwa, weeka akhayɨsyala.]* 17:36 Umusitaali uwu wʉtalɨɨpo mu wusimbe wumo ʉwɨ maandɨ ʉwa Shiyunaani.”
37 Abhalandati bhakhamʉbhʉzɨɨlɨzya bhakhatɨ, “Mwene, ganaago gakhayɨbhombekha kwoshi?” Akhabhaamʉla ku shiili akhatɨ, “Poponti pe shɨlɨ she shifuuye, pe abhashɨpʉngʉ bhakʉbhʉngaana.”
*17:4 17:4 Khabhɨlɨ khabhɨlɨ Mʉ ndongo ɨya Shiyunaani yɨkʉtɨ khonti saba, kwe kʉtɨ akhinji bhʉʉlo.
†17:14 17:14 Bhalaji mʉyɨlolesye ku bhapuutili Kufumilana nɨ ndajɨzyo zya Moose, abhapuutili bhe bhakhasimishizyaga kʉtɨ umuntu aponile amaketa. Bhaazya Bhalaawi 14:1-32; Nkʉmbʉshɨzyo 24:8.
‡17:16 17:16 UMusamaliya ABhayahuudi bhakhabhasholanyaaga aBhasamaliya, kʉnongwa ye bhakhapuutaga kwa Mʉlʉngʉ kʉ madala ge gatakhondeeye. Ishi, abhantʉ kufuma mʉ vɨkholo vɨbhɨlɨ viniivi, bhatakhɨmvwanaga.
§17:32 17:32 Ʉmʉshɨ wa Looti ágalunhanile kʉbha khagamba akhɨ bheeya kʉnongwa ɨya kʉshoolanya ɨndajɨzyo zya Mʉlʉngʉ. Akhasʉngʉkha kʉgalʉkha mu Sodoomu, ɨnhaaya ye ʉMʉlʉngʉ átɨlɨ atɨyazye. Bhaazya Wandɨlo 19:26.
*17:36 17:36 Umusitaali uwu wʉtalɨɨpo mu wusimbe wumo ʉwɨ maandɨ ʉwa Shiyunaani.