3
UYookhani uMwozyi akʉlʉmbɨɨlɨla
(Mataayi 3:1-12; Maalika 1:1-8; Yookhani 1:19-28)
1 Wáamɨle mwanha uwi shumi na gasaanʉ kufuma uKaisaali uTibeliyo ayande kʉtabhaala ʉwʉmwene ʉwa Shiluumi. Akhabhalɨlo khanaakho uPontiyo Pɨlaato akhalongozyaga ʉmʉkoa ʉwa Yudeeya, uHeloodi* 3:1 UHeloodi Bhaazya mu Wilulanyo ʉwa mazwi amajeni. akhalongozyaga ʉmʉkoa ʉwa Galɨlaaya. Khabhɨlɨ uFilipo ʉkhambakʉ waakwe akhalongozyaga ʉmʉkoa ʉwa Ituleeya nʉ wa Tulakooniti, woope uLisaniya áamɨle mulongozi wa mʉkoa ʉwa Abileene. 2 UAanasi nʉ Kayaafa bháamɨle bhapuutili abhapɨtɨ.† 3:2 UAanasi nʉ Kayaafa bháamɨle bhapuutili abhapɨtɨ Ɨpa bhakʉlolekha abhapuutili abhapɨtɨ bhabhɨlɨ poope she yáamɨle mwata kʉbha nu mupuutili ʉmʉpɨtɨ weeka. UAanasi we áamɨle mʉpɨtɨ kʉ khabhalɨlo ɨkho. Ɨleelo ʉmwene ʉwa Bhaluumi akhamʉsebha ʉKayaafa we áamɨle mʉlʉme wa mwalɨ waakwe na kʉmʉbhɨɨkha pa mbombo. Ye nongwa bhakʉlolekha abhapuutili abhapɨtɨ bhabhɨlɨ. Bhaazya abhapuutili mu Wilulanyo ʉwa mazwi amajeni.
Akhabhalɨlo khanaakho izwi lya Mʉlʉngʉ lɨkhamwɨnzɨla uYookhani ʉmwana wa Zakaliya, mu shilozu. 3 Pe akhabhalaga ɨmbalɨ zyonti zye zyámɨle papɨɨpɨ nu lwizi ʉlwa Yoolodani, akhalʉmbɨlɨlaga akhatɨnjɨ abhantʉ bhapɨndʉkhaje, bhazɨlekhaje imbiibhi zyabho na kwozelwa kʉtɨ, ʉMʉlʉngʉ abhatʉʉyɨle imbiibhi zyabho. 4 Ziniizi zye zyásimbiilwe ɨmaandɨ mu shitaabu ɨsha mazwi ga mukuwi ʉYeesaya kʉ zya Yookhani kʉtɨ,
“Umuntu akʉkhoola mu shilozu akʉtɨ,
‘Linganyaaji ɨdala lya Mwene,
golosyaji ɨdala lye atɨshɨle.
5 Amakhombe gatifushilwe,
amagamba nu tudunyunzu vɨtɨbhe khantelama.
Pe pagombaanile patɨgoloshe,
amadala aga makhoga gatifushilwe,
6 pe abhantʉ bhonti bhatɨwʉlole
uwuposhi wa Mʉlʉngʉ.’‡ 3:4-6 Bhaazya Yeesaya 40:3-5.”
7 Abhantʉ abhinji bhakhabhalaga kwa Yookhani kwozelwa, ɨleelo akhabhabhʉzyaga akhatɨnjɨ, “Ɨmwe mʉbhaana bhɨ njokha! Wu naanu we abhasoshile kʉtɨ mʉwʉshɨmbɨle ʉmʉlakha wa Mʉlʉngʉ we wʉkwɨnza? 8 Ishi bhombaji ɨmbombo inyinza zye zɨkʉlolesya kʉtɨ mulaatile imbiibhi zyinyu zyonti, anzi kwi lye lɨkwela amatunda aminza. Mʉtayɨbaadaje kʉtɨ, ‘Ʉmaama wɨɨtʉ wu Abulahaamu!’§ 3:8 UAbulahaamu Bhaazya mu Wilulanyo ʉwa mazwi amajeni. Nalyoli ɨnkʉbhabhʉʉzya kʉtɨ, ʉMʉlʉngʉ angakhola kuumupa uAbulahaamu abhazʉkʉlʉ kufuma mʉ mawe ɨga! 9 ɄMʉlʉngʉ alinganyiinye ulufundo kʉ bhe bhatalaatile, anzu muntu we alemile intemu akwanza kudiba amazi aga makwi. Ikwi lyolyonti lye lɨtakwela amatunda aminza, atɨlɨtʉʉlɨle na kʉlɨsʉmba mʉ mwoto.”
10 Pe abhantʉ bhaala bhakhamʉbhʉzɨɨlɨzya bhakhatɨ, “Ishi tʉbhombe lyoni?” 11 UYookhani akhabhaamʉla akhatɨ, “We alɨ na makooti gabhɨlɨ, amʉpanje we atalɨ ni kooti, woope we alɨ ni shaakulya, amʉpanje we atalɨ ni shaakulya.” 12 Bhoope abhasonshezya nsonho* 3:12 Abhasonshezya nsonho Bhaazya mu Wilulanyo ʉwa mazwi amajeni. bhe bhínzile kʉtɨ bhoozelwe, bhakhamʉbhʉzɨɨlɨzya uYookhani bhakhatɨ, “Mumanyizyi, nɨɨtwe tʉbhombe lyoni?” 13 Akhabhabhʉʉzya akhatɨ, “Mʉleshe kʉsonshezya ɨnsonho kʉshɨla zye zibhishiilwe.” 14 Bhoope abhasikaali bhakhamʉbhʉzɨɨlɨzya bhakhatɨ, “Nɨɨtwe tʉbhombe lyoni?” Akhabhabhʉʉzya akhatɨ, “Mʉleshe kʉfwʉla ɨnhela zya bhantʉ, awe kwega ku wushevu ʉwa kʉkhopela, lyoli mʉkhobhokhaje na vwe mʉkʉposheela kʉ mbombo yiinyu.”
15 Akhabhalɨlo khanaakho abhantʉ bhakhasʉbhɨlaga kwɨnza kwa Kilisiti, pe bhakhasɨɨbhaga kʉtɨ pamu uYookhani we wu Kilisiti. 16 Pe uYookhani akhabhabhʉʉzya bhonti akhatɨ, “Ɨne ɨnkʉbhoozya ku minzi, ɨleelo akwɨnza umuntu we alɨ na makha kʉnshɨla ɨne, we ɨne ɨntakhondeeye poope kʉbha ne mubhombi ʉwa kʉsatʉla amakhobha gɨ ndaala zyakwe.† 3:16 Ɨntakhondeeye poope kʉbha ne mubhombi ʉwa kʉsatʉla amakhobha gɨ ndaala zyakwe Umujeni ɨnga ayinjila mu nyumba, umubhombi akhamʉsatʉlaga amakhobha gɨ ndaala na kwozya ɨvɨnama vwakwe. Ɨmbombo yɨnɨɨyo yáamɨle ya mubhombi ʉwa paasɨ nzɨɨla. Wʉnʉʉyo we akhayɨbhoozya kwa Mupepu uMufinjile na kʉ mwoto. 17 Ʉweene akhayɨbhagabhʉlanya abhagolosu na bhabhomba mbiibhi, ngatɨ muntu we akʉkhoma na kʉpementa ɨngano pa shikhomelwi, akʉbhʉngaanɨkha ɨngano na kʉbhɨɨkha mʉ shanga, ɨleelo amampunyunzi akʉpembeelela nʉ mwoto we wutakuzima.”
18 Ku mazwi ganaago na ganjɨ aminji uYookhani akhabhasokhaga abhantʉ we akʉbhalʉmbɨɨlɨla iNtumi iNyinza. 19 Pɨlongolela, akhamʉkhajɨla ʉmwene uHeloodi, kʉnongwa ye ámwejile uHelodiya ʉmʉshɨ wa khambakʉ waakwe uFilipo, na ku mbiibhi inyinji zye ábhombile. 20 Pe uHeloodi akhonjezya uwubhiibhi, akhamʉkʉnga uYookhani mwɨ jeela.
UYeesu akwozelwa
(Mataayi 3:13-17; Maalika 1:9-11)
21 UYookhani we ashɨɨlɨ kʉkʉngwa mwɨ jeela, akhabhalɨlo khe akhozyaga abhantʉ abhinji, woope uYeesu akhoozelwa. Pe uYeesu we akupuuta, kʉmwanya kukhiigukha, 22 uMupepu uMufinjile akhamwishila mu shifwani shɨ nkʉnda. Pe izi lya Mʉlʉngʉ kufuma kʉmwanya lɨkhavwɨnha lɨkʉtɨ, “Ɨwe we Mwana waanɨ‡ 3:22 ɄMwana waanɨ Bhaazya ʉMwana wa Mʉlʉngʉ mu Wilulanyo ʉwa mazwi amajeni. ʉmʉganwa, we ɨnkʉkʉseshela.”
Ɨshɨkholo sha Yeesu
(Mataayi 1:1-17)
23 UYeesu we akwanda ɨmbombo yaakwe, áamɨle na manha ge gáfishiiye amashumi gatatʉ. Abhantʉ bhakhasɨɨbhaga kʉtɨ áamɨle mwana wa Yoosefu.
UYoosefu áamɨle mwana wa Eli,
24 uEli áamɨle mwana wa Masaati,
uMasaati áamɨle mwana wa Laawi,
uLaawi áamɨle mwana wa Meeliki,
uMeeliki áamɨle mwana wa Yanaayi,
uYanaayi áamɨle mwana wa Yoosefu,
25 uYoosefu áamɨle mwana wa Matasiya,
uMatasiya áamɨle mwana wa Amosi,
uAmosi áamɨle mwana wa Nahuumu,
uNahuumu áamɨle mwana wa Esili,
uEsili áamɨle mwana wa Nagaayi,
26 uNagaayi áamɨle mwana wa Maasi,
uMaasi áamɨle mwana wa Matasiya,
uMatasiya áamɨle mwana wa Semeini,
uSemeini áamɨle mwana wa Yooseki,
uYooseki áamɨle mwana wa Yooda,
27 ʉYooda áamɨle mwana wa Yoanani,
uYoanani áamɨle mwana wa Leesa,
ʉLeesa áamɨle mwana wa Zelubabeli,
uZelubabeli áamɨle mwana wa Shealitiyeeli,
uShealitiyeeli áamɨle mwana wa Neeli,
28 uNeeli áamɨle mwana wa Meeliki,
uMeeliki áamɨle mwana wa Adi,
uAdi áamɨle mwana wa Kosamu,
uKosamu áamɨle mwana wa Elimadamu,
uElimadamu áamɨle mwana wa Eli,
29 uEli áamɨle mwana wa Yoshua,
uYoshua áamɨle mwana wa Eliezeli,
uEliezeli áamɨle mwana wa Yoolimu,
uYoolimu áamɨle mwana wa Masaati,
uMasaati áamɨle mwana wa Laawi,
30 uLaawi áamɨle mwana wa Similyoni,
uSimilyoni áamɨle mwana wa Yʉʉda,
ʉYʉʉda áamɨle mwana wa Yoosefu,
uYoosefu áamɨle mwana wa Yoonamu,
uYoonamu áamɨle mwana wa Eliakimu,
31 uEliakimu áamɨle mwana wa Meleeya,
ʉMeleeya áamɨle mwana wa Meena,
ʉMeena áamɨle mwana wa Mataasa,
ʉMataasa áamɨle mwana wa Naasani,
uNaasani áamɨle mwana wa Daudi,
32 uDaudi áamɨle mwana wa Yeese,
ʉYeese áamɨle mwana wa Obedi,
uObedi áamɨle mwana wa Boazi,
uBoazi áamɨle mwana wa Salimoni,
uSalimoni áamɨle mwana wa Naashoni,
33 uNaashoni áamɨle mwana wa Aminadaabu,
uAminadaabu áamɨle mwana wa Adimiini,
uAdimiini áamɨle mwana wa Aalamu,§ 3:33 UAalamu Uwusimbe wumo ʉwɨ maandɨ wʉkʉtɨ Aalini.
uAalamu áamɨle mwana wa Hezelooni,
uHezelooni áamɨle mwana wa Peleesi,
uPeleesi áamɨle mwana wa Yʉʉda,
34 ʉYʉʉda áamɨle mwana wa Yaakobo,
ʉYaakobo áamɨle mwana wa Isaaka,
uIsaaka áamɨle mwana wa Abulahaamu,
uAbulahaamu áamɨle mwana wa Teela,
ʉTeela áamɨle mwana wa Nahooli,
35 uNahooli áamɨle mwana wa Seluugi,
uSeluugi áamɨle mwana wa Lagau,
uLagau áamɨle mwana wa Peleegi,
uPeleegi áamɨle mwana wa Ebeli,
uEbeli áamɨle mwana wa Saala,
36 ʉSaala áamɨle mwana wa Keenani,
uKeenani áamɨle mwana wa Alufakisadi,
uAlufakisadi áamɨle mwana wa Sheemu,
uSheemu áamɨle mwana wa Noowa,
ʉNoowa áamɨle mwana wa Laameki,
37 uLaameki áamɨle mwana wa Mesuseela,
uMesuseela áamɨle mwana wa Enoki,
uEnoki áamɨle mwana wa Yaaledi,
uYaaledi áamɨle mwana wa Mahalaleeli,
uMahalaleeli áamɨle mwana wa Keenani,
38 uKeenani áamɨle mwana wa Enoshi,
uEnoshi áamɨle mwana wa Seeti,
uSeeti áamɨle mwana wa Adamu,
woope uAdamu áamɨle mwana wa Mʉlʉngʉ.
*3:1 3:1 UHeloodi Bhaazya mu Wilulanyo ʉwa mazwi amajeni.
†3:2 3:2 UAanasi nʉ Kayaafa bháamɨle bhapuutili abhapɨtɨ Ɨpa bhakʉlolekha abhapuutili abhapɨtɨ bhabhɨlɨ poope she yáamɨle mwata kʉbha nu mupuutili ʉmʉpɨtɨ weeka. UAanasi we áamɨle mʉpɨtɨ kʉ khabhalɨlo ɨkho. Ɨleelo ʉmwene ʉwa Bhaluumi akhamʉsebha ʉKayaafa we áamɨle mʉlʉme wa mwalɨ waakwe na kʉmʉbhɨɨkha pa mbombo. Ye nongwa bhakʉlolekha abhapuutili abhapɨtɨ bhabhɨlɨ. Bhaazya abhapuutili mu Wilulanyo ʉwa mazwi amajeni.
‡3:6 3:4-6 Bhaazya Yeesaya 40:3-5.
§3:8 3:8 UAbulahaamu Bhaazya mu Wilulanyo ʉwa mazwi amajeni.
*3:12 3:12 Abhasonshezya nsonho Bhaazya mu Wilulanyo ʉwa mazwi amajeni.
†3:16 3:16 Ɨntakhondeeye poope kʉbha ne mubhombi ʉwa kʉsatʉla amakhobha gɨ ndaala zyakwe Umujeni ɨnga ayinjila mu nyumba, umubhombi akhamʉsatʉlaga amakhobha gɨ ndaala na kwozya ɨvɨnama vwakwe. Ɨmbombo yɨnɨɨyo yáamɨle ya mubhombi ʉwa paasɨ nzɨɨla.
‡3:22 3:22 ɄMwana waanɨ Bhaazya ʉMwana wa Mʉlʉngʉ mu Wilulanyo ʉwa mazwi amajeni.
§3:33 3:33 UAalamu Uwusimbe wumo ʉwɨ maandɨ wʉkʉtɨ Aalini.