3
Manusia langgar Allah pu printa
3:1-13
1 Waktu TUHAN Allah bikin binatang-binatang liar, dari dong smua, ada binatang satu yang paling pintar putar balik kata skali, de tu ular. Satu kali begini, ular de pi bicara ke prempuan. De bilang begini, “Betul ka, Allah larang kam makan bua dari smua pohon dalam taman ini?”
2 Trus prempuan de jawab, “Trada, bukan begitu. Bua-bua dari pohon dalam taman ni, tong bole makan. 3 Tapi Allah bilang kalo bua dari pohon yang ada di bagian tenga taman tu yang tong tra bole makan ato raba de pu bua, supaya tong jang mati. ”
4 Tapi ular de bilang prempuan begini, “Eh, kam trakan mati. Trada skali. 5 Allah bilang begitu karna De tau kalo kam makan bua itu, nanti kam pu mata tabuka, kam jadi tau mana yang baik deng mana yang jahat, macam Allah Dia.”
6 Prempuan de liat pohon ni de pu bua macam enak trus de kliatan bagus skali, baru bisa bikin de mngerti smua deng baik skali. Jadi, de ambil pohon itu pu bua trus de makan. Trus de kasi bua itu ke de pu paitua yang ada sama-sama deng de juga. Trus de pu paitua juga makan. 7 Habis makan, langsung dong dua pu mata tabuka, trus dong tau kalo dong ada tlanjang. Jadi, dong dua ikat daun-daun dari pohon ara trus pake tutup dong pu badan.
8 Sore-sore begini, dong dengar TUHAN Allah ada jalan-jalan di taman situ. Jadi, manusia deng de pu maitua tu, dong dua sembunyi dari TUHAN Allah di cla-cla pohon yang ada dalam taman situ. 9 Tapi, TUHAN Allah panggil manusia itu, “Ko di mana?”
10 Manusia itu de jawab, “Ah... waktu sa dengar Tuhan ada jalan di taman sini, sa takut jadi sa sembunyi. Sa tlanjang jadi.”
11 TUHAN Allah tanya dia, “Sapa yang kastau kalo ko tlanjang? Ko pasti su makan bua dari pohon yang Sa larang ko makan itu to?”
12 Manusia itu de jawab, “Prempuan de yang kasi sa bua dari pohon itu, prempuan yang Tuhan kasi untuk jadi sa pu maitua tu. Itu yang sa makan.”
13 Trus TUHAN Allah bicara ke prempuan, “Knapa sampe ko bisa bikin begitu?”
Prempuan itu de jawab, “Ular tu, de yang tipu saya, itu yang sa makan bua itu.”✡ 3:13 2 Korintus 11:3; 1 Timotius 2:14
Allah kasi hukuman deng kasi pakean
3:14-21
14 Habis itu, TUHAN Allah bicara ke ular begini, “Karna ko su bikin begitu, Sa kasi kutuk ini ke ko:
Dari smua binatang piara
deng smua binatang liar,
ko yang nanti jalan mrayap pake perut,
trus debu tana yang jadi ko pu makanan
sampe nanti ko mati.
15 Sa nanti bikin ko deng prempuan ini baku musu.
Ko pu turunan deng prempuan ini pu turunan nanti baku musu juga.
Nanti de pu turunan kas hancur ko pu kepala,
trus ko nanti patok de pu tumit.”✡ 3:15 Wahyu 12:17
16 Trus TUHAN Allah bicara ke prempuan begini,
“Nanti ko pu rasa stenga mati waktu ko hamil, Sa kas tamba banyak.
Trus nanti waktu ko mo lahir anak, ko rasa sakit skali.
Biar su begitu tapi, ko tetap mau deng ko pu paitua,* 3:16 tetap mau deng ko pu paitua - Ada juga yang bilang kalo ini arti, de mo pu kuasa atas de pu paitua.
tapi ko pu paitua yang nanti pu kuasa atas ko.”
17 Baru ke Adam,† 3:17 Adam - Nama ini pu arti ‘manusia.’ TUHAN Allah bilang begini, “Ko ikut ko pu maitua pu kata-kata untuk makan bua dari pohon yang Sa larang ko makan.
Gara-gara ko pu klakuan itu, Sa kasi kutuk ke tana ini.
Slama ko hidup, ko harus kerja tana ini stenga mati untuk bisa dapat makanan dari situ.
18 Tana ini yang nanti kas tumbu apa yang ko makan,
tapi ada rumput deng tanaman duri juga yang tumbu dari situ.
19 Ko harus kerja sampe kringat-kringat
untuk dapat ko pu makanan dari tana ini.
Ko pu hidup nanti begitu trus sampe ko kembali ke tana.
Ko ini dari debu, jadi, ko nanti kembali jadi debu lagi.”
20 Adam de panggil de pu maitua deng nama Hawa,‡ 3:20 Hawa - Nama ini mirip deng kata yang pu arti ‘hidup.’ karna nanti prempuan ini de jadi mama yang lahir moyang-moyang dari smua manusia.
21 Habis itu, TUHAN Allah bikin pakean dari kulit binatang untuk kas pake ke Adam deng de pu maitua.
Manusia dapa usir dari taman Eden
3:22-24
22 Habis itu smua, TUHAN Allah bicara begini, “Skarang, manusia de su sama macam Kitong,§ 3:22 Kitong - Ini Allah bicara ke diri sendiri. Allah tra bicara sama orang lain ato hal lain. tau yang baik deng yang jahat. Tong harus jaga baik-baik, jang sampe nanti de ambil dari pohon yang de pu bua bikin orang tetap hidup trus, baru makan itu. Begitu nanti de tetap hidup trus.” 23 Jadi suda, TUHAN Allah usir dong dua kluar dari taman Eden. Allah bikin manusia dari tana, tapi skarang De suru manusia pi kerja tana itu. 24 Habis itu, Allah taru malaikat-malaikat penjaga di bagian timur taman Eden. Trus Allah taru pedang api yang taputar ke smua ara juga. Allah taru dong di situ, untuk jaga jalan yang mo ke pohon yang de pu bua bikin orang hidup trus.
✡3:13 3:13 2 Korintus 11:3; 1 Timotius 2:14
✡3:15 3:15 Wahyu 12:17
*3:16 3:16 tetap mau deng ko pu paitua - Ada juga yang bilang kalo ini arti, de mo pu kuasa atas de pu paitua.
†3:17 3:17 Adam - Nama ini pu arti ‘manusia.’
‡3:20 3:20 Hawa - Nama ini mirip deng kata yang pu arti ‘hidup.’
§3:22 3:22 Kitong - Ini Allah bicara ke diri sendiri. Allah tra bicara sama orang lain ato hal lain.