1 “Nangu ninkumwaulila uti avi kwambangidya hamunalikuvale. 2 Mwenu mundavingigwa muvitala vyakulipudidya; leka apo, wakati unkuwika umwe aijá álota kummyaa mwenu andona kenga alipudya kwa Nnungu. 3 Vinu avi vandatenda mwaa havammanyite Atata na ata nangu momo havangumanyite. 4 Kanji napane vyovyo vyo, ninkumwaulila kaladavo pakulota pavitandeka po, mukumbukilinneu vyanimmanyiya.

“Vyanavo kunantandi hanimwaulidile mwaa nangu ndípagwa namu mwenu. 5 Napane ambi apa panguka kumwe aijá ángutumididye, pakati penu hapali ata jumo wakungudya, ‘Da wenda kwashi?’ 6 Doni, kwoda nimwaulila davo, mmitima myenu mo shinimuumbala shipalodi. 7 Kanji napane ninkumwaulila mwiu uti doni, kudyanga nangu nguke mwaa ndikanauka, nkúpambadyanga jo hamwidila; nangu ndikauka, nantumidya nae. 8 Palota kwida po, nae jo andaundukula shilambo kwamwaa wamadambi, ishaliya na ukumu; 9 kwamadambi mwaa havangukulupidile nangu; 10 kwaishaliya mwaa nangu ninkuka kumwe Atata na mwenu hamungwona kavili; 11 kwaukumu mwaa nkútawala washilambo ashi andyukumigwa.

12 “Nangu ninkuvanavo vinji vyoe vyakulota kummanyiya ila ambi apa, hamulipililila. 13 Napane palota kwida aijá Imumu Waumwiu anannangalalela mwenu uti muumwiu mwaa nae halivalanganga shinu jo mwene, ila andavalanganga vyalota kwigwa na anammalangangila vilóta kwida. 14 Nae po anangupa nangu lishangelo mwaa alota kupata ashilá shangu nangu kutwala kummalangangila mwenu. 15 Uti vyavenavo Atata, vyàngu. Ni ashi shitadídye nguushidoni, vyangu nangu nae andapata kutwala kummalangangila mwenu.

16 “Muwakati padyoko hamungwona; muwakati padyoko kavili, munangwona.”

17 Napanelo pakati pavakwoda vake vanji vandyáulanila doni, “Da shosho sho amba nyamani paashidoni, ‘Muwakati padyoko hamungwona; muwakati padyoko kavili, munangwona,’ na, ‘Mwaa ninkuka kumwe Atata’?” 18 Nadoni vashindaudyania, “Da amba nyamani paashidoni, ‘Wakati padyoko’? Wetu hatunamwigwa shámba.” 19 Yesu andívamanya kenga vashilota kumudya, nae kutwala kuvaudya, “Da muudyania malove lo angutangwele doni, ‘Muwakati padyoko hamungwona; muwakati padyoko kavili, munangwona?’ 20 Ninkumwaulila mwiu mwiu doni, mwenu mundalila na mundatangadikanga kanji shilambo shipuwanga. Mundavanavo shipalodi ila shipalodi shenu sho shindava lipuwilo. 21 Nkongwe ukamwikila wakati wake wakuvaleka, andávanavo shipalodi mwaa wakati wamauvilo undimwikila. Napane pammaleka mwana, nae andálivaliva mauvilo uti kwamwaa walipuwilo lyakwida munu mushilambo. 22 Doni, mwenu ambi apa munkuvanavo shipalodi kanji nangu ndamwona kavili na mitima vyenu vindapuwanga, lipuwilo alyo hapali wakumpoka. 23 Muliduva alyo hashipali shamulota kungudya. Nangu ninkumwaulila mwiu doni, shoeshoe shamunjugwa Atata palina lyangu, nae andamupa. 24 Mpaka ambi apa hashipali shamunjugwile palina lyangu nangu. Jugwa mundapata kwambangidya lipuwilo lyenu liwikile popo.

25 “Vinu avi nditangola kwamikong'o; undawika wakati wandikatangola ngutumila mikong'o, napane kwamwaa umwe Atata nammalangangila ngala. 26 Muliduva alyo mundajugwa palina lyangu. Hangunatangola shinu kenga nangu nanjugwila kumwe Atata 27 mwaa jo mwene Atata aju ankunnagwaledya mwenu kwoda mwenu muningunagwaledya nangu na muningukulupila kenga ngwaleké kumwe Nnungu. 28 Nangu ngwaleké kumwe Atata kutwala kwida mushilambo shapai, napane ninkuma mushilambo amu kuujila kumwe Atata.”

29 Vakwoda vake kutwala kushidoni, “Napanelo unkutangola ngala haunatumila shinu mikong'o. 30 Wetu napane ambi tunkumanya kenga wako undimanya kula shinu na haunalindila shinu vanu vakuudyangidye. Napavedoni tunkukulupila kenga walakadilé kumwe Nnungu.” 31 Yesu kutwala kushidoni, “Da napane munkukulupila? 32 Mwenu! Wakati unkuwika na wakati wene ni wowo au wavalota kummwadilikanianga kula munu kuka kwing'ande yake. Munanguleka gweka yangu kanji hangunava shinu gweka, Atata apali pamo namu nangu. 33 Vinu avi nangu nimwaulila pakulota nkati mwangu, mwenu muvenavo amani. Mushilambo mundapata mauvilo kanji lyunge ntima; nangu nditema shilambo.”