1 Mmagalata mmajinga mwe! Da mwenu annagwilé nyani, mwemwe wavammalangangidile ngala pamevo penu kenga Yesu Klistu andikamalalegwa panshalaba? 2 Shangushilota ngumanye ni ashi, da Imumu jo, mumpwashaladile kwakwodedya lilamulo kwali kwalikulupililo kwa avilá vyamwigwite? 3 Da mwenu mmajinga mmakumamodya? Shapo mundítunduvanga mu Imumu, napane ambi po mulyaladyanga dashi kwamili? 4 Mwenu mundinama muvinu vyoe,* Kwali: mundyuvauvanga vinu vyoe. Kwakuvalangangila kunji kwatuvenavo, Paulu ankwamba vinu vya mu Imumu vyavanamile. da muvinu avyo munamilé monyo? Davo, i mwanavo. 5 Nnungu pampele Imumu na kutandedya vyadimongo pakati penu, da ni kwakwodedya lilamulo kwali kwalikulupililo kwa avilá vyamwigwite?

6 Mo, “mwankulupilidile Abulaamu Nnungu na likulupililo lyolyo, Nnungu jo anímmalangilila Abulaamu kuva ishaliya”† Lola Kutunduvanga 15:6. 7 manya doni, vo valikulupililo vo, vanavo ni udukulu umwe Abulaamu. 8 Maandiko pagwene kaladavo doni, Nnungu andavapa vamidi ishaliya kwaindila yalikulupililo, anímmalangangila ntenga wambone shitandi Abulaamu aashidoni, “Kwako wako, venentete uti vandaalaligwa.”‡ Lola Kutunduvanga 12:3; 18:18; 22:18. 9 Nadoni uti avalá vakulupíla, vandaalaligwa pamo namu aijá nkúkulupila Abulaamu.

10 Mwaa uti avalá vakulupíla lilamulo vandilanigwa kwoda indyandikigwa doni, “Alaanigwe aijá ákapagwa muvinu avi uti vyandikígwe mulibuku lyalilamulo na vinu avyo me kutandedya.”§ Lola Kumbukumbu 27:26. 11 Kanji napane inkuva ngala do, hapali álota kupata ishaliya pamevo pake Nnungu kwaindila yalilamulo mwaa “Waishaliya andanama kwalikulupililo.”** Lola Abakuki 2:4. 12 Doni, indila yalilamulo hainatakigwa shinu mulikulupililo ila “Jo átandedya vinu avyo, andanama.”†† Lola Valawi 18:5. 13 Klistu anditwambola mudilana dyalilamulo palitandile jo mwene kuva ilana adiva lyutu lyetu mwaa indyandikigwa, “Alaanigwe aijá álota kupambililigwa munnandi.”‡‡ Lola Kumbukumbu 21:23. 14 Nae andilanigwa kwambangidya kwalaligwa kumwe Abulaamu kukavawikile vamidi nkati mumwe Klistu Yesu na kwalikulupililo tupwashalele kulivikila, kulivikila aku àvele Imumu.

15 Mmanung'unumunu, ndavalanganga shinamidyo shetu wetu tuvanu. Ata pakave munu ápanga imbodi hapali ánatauka na wakwanjedya shinu shinji kavili. 16 Kumwe Abulaamu kulivikila kunditangaleka; kutangaleke kwake nae namomo kwaudukulu wake. Nnungu hanatangola shinu doni, “kwavadukulumunu” kenga avamba vanu voe ila amwamba munu jumo doni, “kwandukuluvo”§§ Lola Kutunduvanga 12:7; 13:15; 24:7. yani Klistu. 17 Shangutangola ni ashi, Nnungu papangile imbodi tangu kala, likaumilile lilamulo ling'oto lyavyaka dimiya nsheshe na selasini, halanatingudyanga shinu imbodi yo yakulota kutimbanga akulá kulivikila. 18 Mwaa ikava kenga maleko*** Maleko ala ni ashilá shavalivikidile kumwe Abulaamu; kwaindila yake nae makola uti andaalaligwa. Lola Kutunduvanga 12:3. Napanelo apa Paulu ankuvalangangila maleko alo kuva vinu vivili: ishaliya pamo na Imumu. Linganianga 3:8-9, 14. ankwodana na lilamulo bai hanatakigwa shinu kavili mukulivikila kanji ni kwaindila yakulivikila yampalalele Nnungu Abulaamu maleko alo.

19 Napanelo shitadídye lipagwe lilamulo ni nyamani? Lyanavo lindyanjadyeka kwamwaa waukalau mpaka aide aijá ndukulumunu álota kupata akulá kulivikila.††† Kulivikila aku kwambika, vamba Imumu. Linganianga 3:14. Lilamulo lyo, lindikuvika kwaindila yavanjelo kupitila kumwe nkúdumangila. 20 Napane nkúdumangila hanava wamunu jumo kanji Nnungu avelé jumo. 21 Da doni po lilamulo linkutaukanga kulivikila kwake Nnungu? Ata padyoko vela. Mwaa leka lìpagwite lilamulo líng'a shingumi, mwiu ishaliya ikandyalakela mulilamulo. 22 Kanji Maandiko alo anditadya‡‡‡ Apa, Maandiko amba Lilamulo. vinu uti vitawaligwe na lidambi pakulota kulivikila kwalakéla kwaindila yalikulupililo kumwe Klistu Yesu kukapatikanange na avalá vakulupíla.

23 Likulupililo likanava kuwika, tushindashungigwa mulilamulo, tùngwidye mpaka likulupililo alilá palyukile ndaunukuligwa. 24 Napavedoni lilamulo jo avele nkúlela wetu wakutuukanavo kumwe Klistu kwambangidya tupate ishaliya kwaindila yalikulupililo. 25 Likulupililo napane paliwikile, hatunava shinu kavili mmakono mwankúlela. 26 Mwaa mwenu uti mmanavake Nnungu kwaindila yalikulupililo nkati mumwe Klistu Yesu 27 mwaa uti múpatile ubatisho mumwe Klistu, Klistu muningwala. 28 Hapali muyuda na ata ngalegu, ntumwa na ata wamuunaiti, nnume kwali nkongwe mwaa uti mwenu ni munu jumo mumwe Klistu Yesu.

29 Ikava kenga mwenu ni mmake Klistu, bai mmadukuluvake Abulaamu na kwaupande wakulivikila wo, mmakupata maleko ni mwenu.