1 Mmanung'unumunu, pakati penu mmoe hamunave mmamwalimu mwaa mwenu mundimanya kenga wetu túpundisha po, tundaukumigwa poe. 2 Kwakutangola mwiu wetu uti tunkulikuvala mudinamuna dyoe. Ikava kenga munu hanalikuvala shinu kwashitangodi, munu ajo ankuva washalowa-uti, namomo ankuulula kutawala mili wake uti.

3 Patunavaunga dimbuu vakavalu ndikanywa mwave tulota vanavo vatwigwilile, tunkuvalangalalela momo mili vyave uti. 4 Namomo lola mpano wadimeli, ata ikava kenga dyanavo ding'umene na kugang'alegwa na imepo ing'umene, dindalangalalegwa na ing'wau idikidiki namene ilodya kwoekwoe kwodananavo malotelo mwalota kwamulila nkútukusha. 5 Nimumo momo lulimi ni imbandi idikidiki yamumili kanji inkulitamangila vinu vikumene. Lola mwitu ukumene úndakalela kwayee idikidiki tu, yamoto. 6 Nadoni lulimi yadavo ni moto na lilangalanga lyaungave-shaliya. Lwanavo lunkuvanavo lyutu lyake pakati padimbandi dyamili vyetu, lunkumwambukisha mili uti, lunkukaledya shingumi uti; lwo lwene lwo lundikalela moto walakéla kushena.

7 Mwenu, munu ankutawala namomo anditawala kula likola lyavanyama uti, vyuni, vakoko vakulyuta na viumbi uti vyamwimanga; 8 kanji napane hapali munu áulula kutawala lulimi. Lwanavo ni ukalau úkaululika kutawaligwa, lundyumbala ishumu ibyáa.

9 Na lwo lulimi alu tunkuntumbyangidya Umu Atata, namomo na lwo lulimi tunkuvataa dilana vanu vakandyangígwe kwaing'ope yake jo mwene Nnungu. 10 Kwalaliya na dilana dinkuma mo nkanywa. Mmanung'unumunu, hainave davo! 11 Da inkuululika muto umo wowo kuma medi akunogwa na medi akulalama? 12 Mmanung'unumunu, inkuululika mwembe kutwala kupa malalange kwali mpapaja kupa membe? Nimumo momo muto wamedi akulalama hayululika kuma medi akunogwa.

13 Wakwashi pakati penu walimanyilo na avénavo ding'ano? Bai alodye vitendo vyake kwaindila yamavalelo ake ambone atandeka kwabila makukulu nkati mulimanyilo. 14 Kanji ikava kenga mmitima myenu munkuvanavo ing'ou yakujowa na malotelo augweka, hanapagwe wakulitamanga na ata hamunalishang'apile umwiu. 15 Shinamidyo ashi hashinalangalalegwa shinu na limanyilo lyakwalakela kuwa ila ni lyashilambo sho shapai ashi, lyashivalakwelo na lyashindamoni. 16 Mwaa paipagwite ing'ou na malotelo augweka, apo pankupagwa ungaigwania na dinamuna uti dyavitendo vyakunyata.

17 Kanji napane limanyilo lyalakéla kuwa, lyanavo shitandi halive ushapu; ling'oto kuva lyamani, kulimaladya, kwigwilila, kuumbaligwanavo shididi na vyepo vyambone, líkamwapula munu na líkave shinankulaba. 18 Vo vaídanavo amani vo, vankupanda imbeju yaamani na vankupata mapuno aishaliya.