1 Ling'oto lyavinu avi, Paulu andyúma pa Atena kuka ku Kolintu. 2 Pa Kolintu, Paulu andíkadyania na muyuda Akila munu wa ku Pontu àwikile mwaambi aalakela ku Italiya pamo namu Pilishila nkongwe ndyagwe mwaa Kalaudiu andívakumulanga vayuda uti pa Loma. Nae andívaukila 3 napanelo kwodamwaa shimadengo shave shivele shimo shosho shakukandyanga dyema, bai nae andíikala namu vanavo vakola pamo madengo ave. 4 Kula liduva lyakupumula Paulu ashindatangola muvitala vyamikodyanio alota avashombe vayuda pamo na vagalegu.

5 Napanelo Shilashi namu Timoti pavawikile vaalakela ku Makedoniya, Paulu ashindabanigwa kwalilove aumya ushuda kwavayuda kenga Klistu ni Yesu. 6 Kanji vanavo vakampinge na vakamwabalange, Paulu andípumunanga dinguvo dyake kutwala kushidoni, “Myadi vyenu vipagwe pamuti penu! Nangu hanguve likosha kwenu mwenu. Kutunduvangila ambi apa, mwanda kwavamidi.”

7 Bai Paulu andyúma pashitala shakulipudidya po kuka kwing'ande yamunu jumo walina Titu Yustu, munu wakunjopa Nnungu na ing'ande yake indíijamananga na shitala shakulipudidya. 8 Napane Klishipu nanangalaledi wapashitala shakulipudidya anínkulupila Umu pamo na vanu uti vapaing'ande pake. Namomo vakolintu voe vakaigwe vyashitangola, vandíkulupila na vandípata ubatisho. 9 Napanelo muliduva limo shilo, Umu andímwaulila Paulu mwindoti kushidoni, “Haunajope, kaleya kutangola, haunamalale 10 mwaa nangu ngupali namu wako na hapali munu álota kukwinjila pakulota akubyae mwaa nkaja amu ninkuvanavo vanu voe.” 11 Bai Paulu andíikala nkaja amo mwaka umo na myedi sita avapundisha lilove lya Nnungu.

12 Napanelo Galyu àvele gavana walijimbo lya Akaya, vayuda kwaunapamo vanínnyanyamalila Paulu na vaníntwala kumuukanavo kumwe gavana kushiwanja shamikodyanio 13 ndaashidoni, “Munu aju ankuvashomba vanu valipudye kwa Nnungu kanji kwaindila íkaitikananga na Lilamulo.” 14 Paulu alota ajang'ule, Galyu andívaulila vayuda kushidoni, “Mmayuda, ing'ano ai leka ìvele yakutenda kunyata kwali ukalau wakumamodya, ikandipagwa shaliya yakulota nimwigwilile 15 kanji kwodamwaa ing'ano yene ai yamalove, yamena na yalilamulo lyenu, aangangalanga mmene. Nangu hangutamwa kuva nkúukumu wamyaa avi.” 16 Nadoni nae andílamulila vavakumulange palyutu alyo. 17 Bai vanavo vanínkamula Shoshiteni nanangalaledi wapashitala shakulipudidya kunkoma, Galyu amwona kanji Galyu hashitanana ata padyoko.

18 Napanelo Paulu andíikala maduva oe pa Kolintu. Kutwala apo, andívalaila vanung'unumunu kuka ku Kenkeleya akakwele mwingalava auke ku Shiliya namu Pilishila pamo namu Akila. Kanji pa Kenkeleya, andíbubula ugwimbu wake mwaa andílivikila kwa Nnungu. 19 Pavawikile pa Epeshu, nae andívaleka kutwala kuka ndainjila mushitala shakulipudidya ndataukananganavo vayuda. 20 Bai vanavo vanínjugwa Paulu vaikanavo maduva akudyangangila kutwala nae kwita 21 kanji andívalaila aashidoni, “Nnungu akalota ndamwidila.” Kutwala apo, andíkwela mwingalava kuma pa Epeshu. 22 Pawikile pa Shashaleya, andyámbwakenneu kuka ndaudyanga liganisha ku Yelusalemu kutwala kwalalela ku Antiyokiya. 23 Akaikalange maduva aikalenge pa Antiyokiya, andyúma kupita awanawananga mmaganisha a ku Galata na a ku Piligiya avanonowanga vakwoda uti.

24 Napanelo ku Epeshu andíwika muyuda jumo walina Apolu wa ku Alishandaliya. Nae avele munu wakumanya kutangola na andímanya namene Maandiko. 25 Munu aju andípundishigwa shana mwindila yake Umu na atangola na ntima wake uti ashindapundisha pakakowa shinu avalanganga vimwámba Yesu ata ikava kenga amanyite vila ubatisho umwe Nshuwau. 26 Bai jojo jo, andítunduvanga kutangola pakajugulanga shinu pashitala shakulipudidya. Pilishila namu Akila vakamwigwe mwashitangalela, vaníntwala kumuukanavo kukaja kwave kuka nammalangangila kwankati indila yake Nnungu. 27 Napanelo Apolu pakumbukidile kwamboka imanga kuka ku Akaya, vanung'unumunu vanínnonowanga na vandyándika ibalugwa pakulota vakwoda vakwanavo, vampwashalele. Kuwika kwake Apolu ku Akaya nae andívapwashela namene avalá ve vakulupidíle kwaindila yaumonyo 28 mwaa ashindavataukanga kwadimongo vayuda paumbala alodya mumaandiko kenga Klistu ni Yesu.