1 Ndikatangola shitangodi shavanu na shavanjelo kanji ndikanavanavo linagwaledyo, ninkuva shitali shúma kwali shombo shinyakónya. 2 Ndikavanavo kulava na kumanya vipii uti na umanyimanyi uti, ndikavanavo likulupililo uti pakulota ngushe mashinga kanji ndikanavanavo linagwaledyo, hangunava shinu. 3 Ndikaumya uti vyanguvenavo na ndikajaula mili wangu pakulota vatae moto kanji ndikanavanavo linagwaledyo, hashipali shangupata.

4 Linagwaledyo ni kulipililila, linagwaledyo ni kutanana. Linagwaledyo halive ing'ou, halinalitumbyanga, halinalyona, 5 halinava lijinga, halinalambela vyake jo mwene, halinashimwa, halinakondya vyakunyata, 6 halinapuwangila ungave-shaliya kanji lipuwangila umwiu. 7 Lindáshikulila uti,* Kwali: Lindáuvauvanga uti. lindákulupila uti, lindálindililila uti, lindálipililila uti.

8 Linagwaledyo halive mwisho. Kwavyakulava, vindapita; kwadinangodi, dindamalilika; kwalimanyilo, lindapita. 9 Mwaa kwaupande padyoko, tunkumanya na kwaupande padyoko, tunkulava 10 kanji pashilota kuwika ashilá shilinganéne,† Kwali: …pashilota kuwika ashilá shashalowa-uti. ashilá shíkalinganene sho, shindapita. 11 Panguvéle nindyoko, ngushitangola kenga nindyoko, ngushikumbukila kenga nindyoko, ngushimanya kenga nindyoko. Panguvele ninang'olo apa, vyashidyoko uti, ndileka. 12 Mwenu, ambi tunkwona vila mushilolo kwakudingala kanji mushu mo, tundona mevo kwamevo. Ambi ninkumanya padyoko kanji mushu mo, ndamanya uti kenga mo mwangumanyikila nangu.

13 Napanelo linkupagwa likulupililo, lilindilililo na linagwaledyo, vinu vitatu kanji avi uti shikumene ni linagwaledyo.