2
1 Mmanung'unumunu, nangu pangwidile kwenu hanimmalangangidile ushuda wa Nnungu* Maandiko anji akala ankushidoni, hanimmalangangidile shipii sha Nnungu… kwashitangodi shakumanyangila kwali shalimanyilo. 2 Mwaa ndyámuwa namanye shoeshoe pakati penu ila Yesu Klistu na yakukamalalegwa panshalaba. 3 Doni, nangu panguvéle namu mwenu nguvele mukudabadabanga, mukujopa na mukutatamela kukumene. 4 Malove angu na kuvalanganga kwangu hakuvéle kwamalove akuutila kwalimanyilo kanji kwakulilodya kwa Imumu na kwadimongo 5 kwambangidya likulupililo lyenu halinananapele mulimanyilo lyavanu kanji mudimongo dya Nnungu.
Limanyilo lyalakéla kwa Imumu
6 Kanji napane pakati pa avalá vakaméle, limanyilo tundátangola ata likanava limanyilo lyawakati au kwali lyavakutawala vawakati au vo vapagwíte nkati mukulambaleka. 7 Leka apo, tundátangola limanyilo lyake Nnungu lìpiike mushipii, lyo lyapanganienge wakati ukanava kwalishangelo lyetu wetu. 8 Hapali ata jumo pakati pavakutawala vawakati au ámanyite mwaa leka vàmanyite, havanampambilile Umu walishangelo. 9 Kanji kenga indyandikigwa,
“Víkagwene mevo, ata víkaigwite lyatu na ata víkakumbukiligwe muntima wamunu,
ni vyovyo vyapanganienge Nnungu kwa avalá vannagwalédya;”† Lola Ishaiya 64:4.
10 Nnungu napane anditulodya wetu kwaindila ya Imumu. Mwenu, Imumu inkulalyanga kula shinu ata mpaka vivéle nkati-uti vya Nnungu. 11 Da nyani ámanyite makumbukililo amunu paikava yo imumu yamunu ipagwíte nkati mwake? Nimumo momo hapali ámanyite makumbukililo ake Nnungu pakava jo Imumu wake Nnungu. 12 Kanji napane wetu hatupatile imumu yamushilambo ashi kanji Imumu áalakadile kwake Nnungu pakulota tumanye vinu vyatupele Nnungu monyo. 13 Vyanavo momo tunkutangola i kwamalove apundishígwa kwalimanyilo lyashimunumunu kanji kwamalove apundishígwa kwa Imumu avalangangilila umwiu waimumu kwa avalá vaimumu.
14 Munu washivalakwelo hanakubali vinu vya Imumu wa Nnungu mwaa kwake nae ni ujinga; haulula kumanya pakuva vyanavo vinkujavaniangigwa mwimumu. 15 Aijá waimumu andáukumu vinu uti na jo mwene jo, hapali wakumuukumu. 16 “Mwaa wakwashi ámanyite ding'anong'ano dimwe Umu pakulota ampundishe?”‡ Lola Ishaiya 40:13. Kanji wetu tunkuvanavo ding'anong'ano dimwe Klistu.