1 Wakhumaawe Mpani mwa Nluku owiitthuca mmoca ahonhimerya: Mwalimu, moone, maluku menci ale ni cootekiya nnya! 2 Yesu ahaakhula: Unawoona cootekiya nnye cuulupale? Khaninkela naahalaka nluku nimoca waculu nluku nikhwaya, cothene cimmotankuliya.

3 Ni nonkomile mmwako wo Olivera uhoolo waya Inupa ya Nluku, Peturu, Yakopu, Yohani ni Anteree, yahonkoha ntthikini: 4 Unihimerye wiira citthu nnye cinhala wiiranyaa yaakhani, ni ikanyero inhala uthonyera wiira citthu nnye ciri vakhiviru. 5 Yesu ahopacera wahimerya: Mwisunke wiira hikhale ntthu noothepyani. 6 Kontha, anaahala uwa atthu enci mwancina naka yiiraka 'Phi mi!' mpaka wathepya atthu enci. 7 Mwiiwaka cuulumaciyaka cokhotto, ni myaha cokhotto, nhituthuwe. Citthu nnye cinalamuliya wiiranyaa nanso khunakhalaka mwiso. 8 Nloko nimoca ninhala uvaraana ni nloko nikhwaya, omwene mmoca ni omwene nkhwaya. Ilapo inaahala uthukumela mapuro makina, ni immovola itala. Citthu nnye ciri mapacerero woona coowerya.

9 Nkhale miitho! Anaahala wurwehani upwaroni, nnaahala wapsyuliya nnsinakokani. Nnaahala weemesiya wa miithoni wa mayansatoro ni mamwene nlattu wo Miyano, wiira mmahe usaahiti wamiithoni waya. 10 Nanso woopacera Nhupi Wooreera unaahala uhimeriya maloko othene. 11 Vano mwakusiyaka wiira moolumaciye makhuce, nhoove itthu inhalenyu uhimya. Nanso nhimye itthu inhalenyu uvahiya ukati yooyo, kahi mweeco nyuva nnohala wuulumaca, nanso Nnepa Nttakattifu. 12 Munna naahala unrweha unokhwani munnawe, ni athumwane mwanawe; ni asaana ammowuulumacera makhuce athumwanaya, mpaka weeva. 13 Ni nnaahala wiinananinya nlattu wo ncina naka, nanso ntthu nohala ukhalana nthiti mpaka umwisoni, nowowoopwa.

14 Moonaka citthu co miikho cikhumelelaka toko itankuleliyo wahimphwanelaya ukhala (nosoma uyo eeweehe), vano ale ari uYutteya atthawele mmwakoni. 15 Ari wancarani ahikhuruwe hata ahikele mpani wiira akuse citthu caya. 16 Ari mmattani ahituruwele uwaani wiira yakuse coowara caya. 17 Atakhaliye pha ale ari ni irukulu, na ale anamwiha asaana mahuku ale! 18 Nswali wiira itthu ile ihiiranye ukati weyiita. 19 Nlattu mahuku ale coohosiya cinkokhala toko caharyaya ukhalakaru, ikhumelo wapattusilyawe Nluku ittuniya, mpaka nnava, hata khacinkela cakhalaka tho. 20 Ni yahari Apwiya akhuvehaka mahuku ale, hata ntthu khoopwa, nanso nlattu wa atthu oothanliya naahala ukhuveha. 21 Akhalaka ntthu nohimeryani: 'Mesiya ri vava!' atthuna, 'Umoone wonwo!', nhikupali, 22 kontha anaahala wunwa amesiya oowootha ni anapiyu oowootha ni ankopanka ikanyero ni cootikhineeha wiira yaathepye, wanooranyaya, hata oothanliya. 23 Nanso nyu, mwisunke; kihohimeryani cothene marapuroru.

24 Nanso mahuku ale, anamanle mahuviho ale, ncuwa ninaahala uripela, ni mweeri khunhala waarya, 25 itthoottwa cinaahala umora wirimu, ni ikuru conculu cinaahala upukunyiya. 26 Vano naahala wooniya, awaka mmahutteni Mwanawe Pinattamu ni ikuru cuulupale ni waarya. 27 Nahala waruma ancelo awe ni wathukumaniha atthu yathanlilyawe mittetthe co micese cophyoo, umalenlyaya ilapo nuumalenlyaya irimu.

28 Mwiitthuce, mweeco, nlikanihero no mwiri wonhokorokho. Miritta caya cakhalaka miheenya, ni capaceraka uphuwa, nhocuwela wiira iyiita iri vakhiviru. 29 Ciicammo nyu, moonaka ukumelela citthu nnya, ncuwele wiira Mwanawe Pinattamu ri vakhiviru, wankhora. 30 Khweeli kinawuhimeryani: Khanimmira nloko nna cihiraneele citthu cothene nnya. 31 Irimu ni ilapo cinaahala uvira, nanso moolumo aka khanhala uvira.

32 Nanso khaawo nocuwela nihuku nne, hata ukati ule, mena ancelo o wirimu, mena Mwana, nanso Athumwane paahi phincuwela. 33 Nkhale miitho, nrontte! Nlattu khannocuwela nihuku ninhalaya uphiya ukati ule. 34 Uri toko ntthu alakenle ikhwaha awe, ahiyaka inupa awe, ahaahiyera iyuulupale arumeyi awe, khula ntthu ahovahiya nteko woovara, ni ahonlamulela mayokhaliha wiira arontte. 35 Vano nrontte, nlattu khannocuwela ukati unhalaawe uwa mwaneene itthoko; toko yocoocilo, atthuna uhiyu iriyari, atthuna uneepile nthupi, atthuna wicisu, 36 wahikhumelele wiira, nawile ni wututuserani, huphwanyeni nrupaka. 37 Itthu inohimeryakani nyu, kinahimerya atthu othene: Nrontte!