1 Ukhuma wawe wenwe, ahorwaa wamoca ni owiitthuca awe. 2 Nihuku no ntivela ahopacera wiitthuciha nnsinakoka na atthu enci yamwiiwa, wanawooma mwaano ni yaanahimya: Inonkhuma vayi itthu ila ni ucuwelani uno uvahiyawe uno? Cinopankya cani cotikineeha nya ni ntata nawe? 3 Kahi nkarapintero, mwanawe Mariya, ni nhimaawe Yakopu, Yosefi, Yutta ni Simoni? Ni asirokorawe khari ni hi? Yahoviruwaca. 4 Yesu aheerela: Namilohi notarawiya uwaanyawe paahi, waama wawe ni wapuwani wawe. 5 Ni wonwo khoonrye upanka cotikineeha hata mena. Ahaavooniha aretta vakani paahi, athatelaka matata. 6 Ahotikhinaca uhikupali waatthu ale. Vano ahoviravira itthoko co wattamana eetthucihaka wonwo.

7 Aheehana khumi na eeli, ni ahopacera waruma eeli eeli, ni ahaavaha ikuru yolamulela minepa coonanara. 8 Ahaalamulela wiira ahikuse itthu yootthumiri ni iphiro, wala nkatthe, wala nrupa, mena nsurukhu nyununi, akuse ikopo paahi. 9 Aware ikwakwatta ni ahiwye ihancu piili. 10 Ni ahaahimerya tho: Mwakelaka inupa, nkhale wonwo mpaka wunwa nipuro nno. 11 Ni mwahaakheleliyeke nipuro nno, na atthu ale yahiwiwekeni, woothama vale, nkukutthe ntthupi no manyaa enyu, wiira ikhale itthu inthoonyera mirima caya atthu ale. 12 Amitthenka yahorwaca ni yahaalaka atthu oottharuwela itaampi. 13 Yahoomola minepa coonanara ciinci, yahaattikitthela ni makhura aretta enci mpaka waavoniha.

14 Mwene Heroti aheewa cuulumaceriyaka ca Yesu, nanruma ncina nawe ni anawiira: Ula phi Yohani Mpatisa oonwelenle mwaatthu ookhwa, phimaana cinawithoonyera mwa ule ikuru coopanka cotikhineeha. 15 Akina yaanawiira: Phi Eliya. Akina yanalipihera: Ri nnapiyu toko anapiyu akina. 16 Heroti nanso, wowiiwa itthu ila anahimya eeraka: Yohani unthikinlyaka isiko phunwelenle. 17 Khweeli, Heroti phalamunle utthukiya Yohani ni weesiya nkalaposo, nlattu wa Herotiyata, amwaarawe Filipe nhimaawe, anthenlyawe. 18 Nlattu Yohani anamwiirela Heroti: Khunleveliya ukhalana amwaarawe nhimaa. 19 Herotiyata hopophela nreca ni anatthuna umwiiva, nanso khoorya, 20 nlattu Heroti anamoova Yohani ni, acuwelaka wiira ari ntthu ooloka ni nttakattifu, anamwaakhiha; wamwiiwawe anasanka, nanso anammiriyana ni uciveliya. 21 Nanso nahophiya nihuku nooreera, Heroti wopuwelenlyawe nihuku nayariyawe ahophavela yoolya yinci yowaavaha oolupale owahano, oolupale anakhotto, ni mamwene o Kalileya. 22 Nakenle wiina mwana nthiyana a Herotiyata wahoncivela Heroti na atthu yaalattuliye. Mwene ahomwiirela mwali: Ukilepele itthu phi itthu intthunaa ni mi kimmowuvaha. 23 Ni ahopwahera: Kimmowuvaha itthu yothene inhalaa ukilepela hata ukhalaka mwanusu omwene aka. 24 Mwali ahokhuma waakoha anumwane wiira: Kilepele isiyani? Ala yahaakhula: Muru wa Yohani Mpatisa. 25 Mwali akelaka tho nenna nna, ahonlepela mwene, eeraka: Kintthuna uvahiya nananoru, unaheliye munttiisini muru wa Yohani Mpatisa. 26 Mwene ahotuthuwa, nanso nlattu woolupela wawe ni, nlattu waatthu yaalatuliye, khathunne unthuwa. 27 Nenna nna ahonlamulela mayorontta uwiha muru wa Yohani. Mayorontta ahorwaa nkalaposo ni ahothikila isiko ya Yohani, 28 ni wahoolo ahowiha muru munttiisini mpaka ummaha mwali, ni ula ahaavaha anumwane. 29 Ucuwela waya itthu ila owiitthuca a Yohani, yahokusa nrutthu ni yahothipela mmahiyeni.

30 Amitthenka yahothukumana wa Yesu ni yahonttonkacera citthu cothene capankilyaya ni citthu cihilyaya. 31 Ni Yesu ahaahimerya: Mmweeke, nirwe nipuro nowiipithyaa ni mmumule vakani, nlattu yaari enci yaarwa ni yaawa mpaka uhikhalana ukati woolya. 32 Vano yahorwaa ni ikalawa nipuro nowiipithyaa nahaariwo hata ntthu. 33 Yoonaka arwaka, enci yahocuwela ukitthu unkelaya. Ni mmatthokoni mothene yahorwaa, yeetaka vathi, nipuro nne, ni yahophiya nraci. 34 Wakhuruwawe nkalawani, Yesu ahoona mphwinko muulupale ni ahoonela ikiriri, nlattu yaari toko ikhontwaa cohikhalana nhaakheli. Vano ahopacera weetthuciha ukati mwinci. 35 Ncuwa wakelaya utthekuwa, owiitthuca awe yahomwattamerya nuunhimerya: Nipuro nna niri toko mwini, ni ncuwa notthekuwa. 36 Walamulele urwaa mmawaani ni mmatthokoni cowattamana wiira yathume yoolya. 37 Ahaakhula: Mwaavahe nyenyu wa yoolya. Na ale yahonhimerya: Wothuma mikatthe cowavaha atthu ale othene, nimphavela ncurukhu iminya piili. 38 Yesu ahopwahera: Nhaana mikatthe mikavi? Nrwee moone. Anakohile atthu, yahaakhula: Mikatthe mithanu ni ihopa piili. 39 Ahaalamulela wonkomiha atthu vakani khila nipuro mmalasini makithi. 40 Ni yaanawunkoma khila ipuwa atthu iminya ni ipuwa ikhwawe atthu hansini. 41 Vano ahokusa mikatthe mithanu ni ihopa piili ni, aweehaka wirimu, ahosukurela. Ahomyaniha mikatthe ni ahaavaha owiitthuca awe wiira yakawele atthu. Ni ahaakawela ihopa piili, 42 na atthu ale yaholya mpaka uvona. 43 Ni ahocariha tho itthuttu khumi na piili ikalakathela cahanle co mikatthe ni co ihopa. 44 Vano yalilyayo mikatthe nye yaari atthu elufu thanu.

45 Nananoru ahaakhanyereriha owiitthuca awe ukela nkalawani nuulapuwela nikhopela nikhwawe no Petsayita; mwaneene alaseraka mphwinko. 46 Analasenre mphwinko ule, ahowela umwakoni, uswali. 47 Wiila waya, ikalawa yari iriyari ntthiya, ni Yesu aheemela nceresere veekhawe. 48 Woona wawe wiira yahoocya weettiha ikalawa nlattu iphyoo yanavirikana, aheekamela weeraka mapikoosa, eettaka wamaasini mpaka utthuna uhapuwa. 49 Nanso owiitthuca yamoonaka weetta wamaasini yahopuwela wiira nnepa, ni yahokhuwa. 50 Othene mweeco yahomoona ni yahotuthuwa. Mwaneene nanso aholumacera, eeraka: Mpise nrima, phi mi, nhoove! 51 Wahoolo, ahokela nkalawani mwariyaya, ni iphyoo yahowukuwa. Othene yanawoova venci. 52 Khayeewehile ni nlelo itthu yeranele ni mikatthe nye nlattu woolipa mirima caya.

53 Analapuwenle ukhopela, ahophiya ilapo yo Yenesare ni ahovonyera vathi nankura. 54 Anakhumile nkalawani, atthu uwonwo yahoncuwela. 55 Yahophiya atthu enci olapo ile ni yahopacera wawiha aretta mmarepani ni aharweha nipuro nacuwenlyaya wiira phiryawe. 56 Mmatthokoni makani, itthoko cuulupale ni mmawaani, nipuro phi nipuro nakelawe yanaweesiya aretta mparaparani ni yahoonlepela wiira aleve mena ukwanyiya nlempe no nhancu awe. Na atthu othene yankwanya yanavona.