1 Ahopacera tho wiitthuciha nceresere ntthiya. Mphwinko muulupale wahothukumana ntotho wawe, phimaana ahowela nkalawani ni ahoonkoma mmwe, phukhalaka mphwinko woonene. 2 Anaweetthuciha citthu cinci mmalikaniheroni ni anawahimerya mmeetthucihoni mwawe: 3 Mmiriyane. Mayowaala ahokhuma arwaka uwaalani. 4 Waalaawe, ipyo ikina yahomorela nceresere iphiro ni yahowaca asanuni, yaholya. 5 Ipyo ikina yahomorela wakokotthoni, wonwo wahakhanle itthaya yinci, khipicile umela nlattu itthaya khayaakenle uttayi. 6 Nanso, ncuwa, ukhuma waya, yahopahiya, nlattu wohikhalana itthaya yinci mitithari cahooma. 7 Ikina yahomorela wamwiwani, ni miwa cahoonuwa, cahomirya ipyo ni khayeemile. 8 Ikina yahomorela itthaya yooreera ni yunuwaka, ni inarenre, yaheema, ni wuncereriya mpaka ukhala talathini, sitiini ni iminya khila ipyo. 9 Ni ahopwahera eeraka: Urina manyaru uwiwelela, eeweke.

10 Nahanle veekha, atthu yanrukurerya wamoca ni owiitthuca awe khumi na eeli yahonkoha manaaya nlikanihero nne. 11 Ahaakhula: Nyu nhovahiya ucuwelaca ikano yo omwene wa Nluku, nanso, atthu ari utaa citthu cothene anahimeriya ni malikanihero, 12 wiira yoonaka, yoone, ni ahicuwelele; yiiwaka, yiiwe, ni ahiiwehe wiira ahirukunuse mirima, aleveleliyaka itaampi caya.* Isaya 6.9-10

13 Ni ahopwahera: Khanneeweeha manaaya nlikanihero nna? Nnohala mweeco, wiitthuca cani malikanihero makina ayo? 14 Mayowaala nawaala nuulumo, 15 ari nceresere iphiro, pha ale yahimerye nuulumo, aneewile nuulumo. Sotwani nawa waatamiha nuulumo naaliye. 16 Ciicammo, ale yaakhenle ipyo mapuro ookokoottho, pha ale yiinre aneewile nuulumo, woohipica anawaakhelela ni nrima wootteeliya, 17 nanso kharina mitithari mwaale, khankhala nthiti ni yawaaka mahuviho, atthuna yomolanihaciyaka nlattu wo nuulumo, wohipica anattittha. 18 Ahaawo akina, anaakhela nuulumo mapuro o miiwa. Ala anawiiwa nuulumo, 19 nanso nlattu woramela itthu yo nttuniyani, wothokociya ni mihakhu ni citthu cikina cinonlelaya, cinakela munrimani mwaya anattitthiha nuulumo ni khaneema. 20 Atthu anakhela nuulumo itthaya yooreera pha ale aneewa nuulumo, anaakhelela, aneewa mpaka wiima ni wincereriya talathini, sitiini ni iminya khila ipyo.

21 Ahaahimerya tho: Pooti inaweesiya isamaninya nhina mwaya itthuttu atthuna vathi waya nkori? Keera ineesiya waculu mmutto? 22 Nlattu khiiwo yovithiya ihinhala wooneleliya, ni khiiwo yowipithya ihinhala ukhumela woonene. 23 Ntthu akhalanaka manyaru oowiiwelela, eeweke! 24 Ni ahopwahera: Mmiriyaneke ratta itthu ineewenyu. Nnowophimiya ni itthuttu inhalenyu uphimela, ni thotho nnowowincereriya. 25 Vano ntthu rina, nowowuncereriya, ni ntthu hirina, nowowaakhiya, mpaka citthu cirinawe.

26 Ni anawiira: Omwene wa Nluku uri toko ntthu avonyenre ipyo awe vathi. 27 Arupe, unwe, uhiyu ni uthana, ipyo inamela ni inawunuwa, ule woohicuwela cani. 28 Itthaya inavaha veekhaya, woopacera ntathi, wahoolo ncasi, ni umwiisoni ncasi nocara meele. 29 Ni yowiima yattokotthaka, naahepha nlattu wahophiya ukati woohephiya.

30 Vano aheera: Ninhala ulikanihera ni isiyani omwene wa Nluku? Atthuna ninhala utaphulela ni nlikaniheroni? 31 Uri toko inuku yo nrale, ineera inaliye vathi, iri yootepa uyeva mweenuku cothene; 32 nanso, yaaliyakaru, inawunuwa, inathatuwa mwiri muulupale woopwaha miri co mmattani ni inamwarya miritta caya mpaka asanuni o wirimu woorya uteka ipuuru muntthucini mwaya. 33 Ni malikanihero menci toko ala Yesu anaweetthuciha nuulumo, toko woonawe wiira anawiiweha. 34 Khoolumacera woohikhala ni malikanihero; nanso uyo anawataphulela cothene owiitthuca awe anari veekhaya.

35 Nihuku nne, unaripenle, ahaahimerya: Nrwee nilapuwele ukhopela. 36 Ahiyaka miphwinko, owiitthuca yahonkusa, toko caryawe nkalawani, ni cahommelela ikalawa cikina. 37 Vano ahokhumelela naphuvo muulupale ophyoo ni mawiimpi yanawicattakanihaca ni ikalawa mpaka yahala vakani ucara maasi. 38 Yesu, nari mphantte wottuli wokalawa, anarupa naphitenrye nsawu. 39 Yahoommusa ni umwiirela: Mwalimu, khunoona wiira ninakumpwela? Unwaka, aholamulela iphyoo ni aheerela ipahari: Imaale, ihittinke! Iphyoo yahomaala, ni ipahari yothene yaheera riya-riya. 40 Wahoolo ahaahimerya: Nlattuni nkhalaka atthu oowoova osilili? Nhikupaliki? 41 Yanawoova venci ni yaanahimeryana: Tipani Yoola? Hata iphyoo, ni ipahari cinamwiiwelela?