1 Nkwaha mmoca, Tina, mwana a Leya ayanryawe ni Yakopi, ahokhuma wiira aacuwelane athiyana oyeele ilapo ele. 2 Sikeni, mwanawe Hamori, nHevewu, mwene o yoole nttetthe ule, ahomoona ni ahontuphela. 3 Nanso nrima awe wahonphelyaa nlattu wa Tina, mwana a Yakopi, ni ule ahoncivela mwanthiyana ole ni ahomuulumana wonifento. 4 Phimaana Sikeni ahorwaa waahimerya athumwane eerelaka: Nkuulumele ule nthiyana ole wiira akhale mwaaraka. 5 Yakopi wacuwenlyawe wiira mwamwanawe Tina ahotankanyinya iharusi, asaanawe anari utakhwani walihaaya mihuwo; ahomaala awehereryaka uturuwaca. 6 Vano Hamori, athumwane Sikeni yahorwaa woopa mwaha ni Yakopi. 7 Ukati waturuwacilyaya utakhwani asaana a Yakopi yahocuwelaca cothene ni yahocukulaca nuurusiya venci cinenne kontha Sikeni ahopanka itthu yowuulihaca muru uIsirayeli, wanrupanyawe mwana a Yakopi; itthu ihimpankiya. 8 Nanso Hamori aheerelaca: Mwanaka Sikeni hociveliya ni mwaninyu. Kinawuvekelani wiira munvahe akhale mwaarawe. 9 Ni niyaranace nyu ni hi, nnivahaka asaanenyu asithiyana ayo ni hi ninawuvahani awihu ayo, 10 ni nkhale wamoca ni hi. Ilapo inoonenyu ila nkhale wohitwana. Mpanke marontta enyu ni nkhalane mathala. 11 Vano Sikeni aheerela athumwane ni asunnawe mwanthiyana ole: Nkikupali. Nkivahe mwanthiyana oyo. Mi kinawuulivani ihisapu yothene inhalenyu ukilamula. 12 Mwatthuna mmwelihe ihisapu yoothela ni contthuva mwali uyo. Mi kinakumiha cothene cinhalenyu uhimya, nanso nkivahe mwali uyo kinthele.

13 Vaavale, asaana a Yakopi yahonthepyaca Sikeni ni athumwane yeehaninya Hamori nlattu wootankanyaa iharusi ya Tina, mwanrokoraya. 14 Ni yahomwiirelaca: Khaninlamuliya upanka commo, unvaha mwanrokorihu nlopwana oohuula icantto kontha iri itthu yowuuliha muru. 15 Phimaana ninhala wutthunani nyu mwakhalaka toko hi. Mooliheke alopwana othene toko hi. 16 Vano ninawuvahani asaanehu ayo wiira mwaatheleke, ni hi, asaanenyu ayo ninawathela. Ni ninhala ukhala wamoca ni amocaru ni nyu. 17 Nanso mwahiniweke ni mwahuuleke icantto, ninankusa mwanihu uyo nuuthama.

18 Yaayo moolumo ayo yahoncivela Hamori ni mwanawe Sikeni. 19 Sikeni khapicile nuupanka yeereliyawe iyo kontha ahoncivela venci mwana a Yakopi. Ni Sikeni phaari oofentiya venci wowapwaha atthu othene yaariwo ntthoko na athumwane. 20 Phimaana ahorwaa Hamori ni Sikeni wathukumaniha alopwana othene oparasa ni wahimerya eeraka: 21 Ale atthu ale ari osalaama ni hi, phimaana naahiye akhale ilapo ehu ila ni apanke marontta aya. Kinawoona ilapo ihu iyo iri yinci. Ananivaha waathela asaanaya ayo ni hi ninawavaha asaanehu ayo. 22 Nanso ayo atthu ayo anhala ukupali ukhala ni hi ni ukhala amocaru. Hi alopwana va othene nolaka icantto, toko ayo cunlyaya. 23 Nnoona cani, imope caya nyo, ni nhakhu aya uyo, ni mihuwo caya nyo, khacinhala ukhala cawihu? Neewanane paahi ni anaahala ukhala wamoca ni hi. 24 Vaavale atthu othene yavira nkhora wo oparasa, yahomwiiwelela Hamori ni mwanawe Sikeni, ni alopwana othene yaavira wa nkhora woparasa, yahoolihiya icantto.

25 Waphilyaya nihuku noneeraru, ukati waryaya muhuvani ni yaweryaka venci makhwatta ayo, asaana eeli a Yakopi, Simeyoni ni Levi, asirokorawe Tina, yahokusaca khula ntthu ikatana awe, yahokelaca mparasa mmwe ni yaheevakaca alopwana othene. 26 Ciicammo yahomwiivaca ni ikatana Hamori ni mwanawe ni yahonkusaca Tina aari inupa ya Sikeni ni yahokhumaca. 27 Asaanawe Yakopi yahophiyaca wa atthu ookhwa ni yahohukhaca mparasa mmo mothene kontha yanootankanyinya iharusi ya mwanrokoraya Tina. 28 Yahokusaca ikhontwaa, imope, apuuru caari mparasa ni cothene caari mmattani. 29 Yahokusaca mihakhu ni yahavarakaca asaana na athiyana urwaa wapanka ipottha, ni yahohukhaca mmapaani mothene. 30 Phimaana Yakopi ahomwiirela Simeyoni ni Levi: Mokivelaveliha, nhokiputaniha na atthu ankhala ilapo ela, ni makanani ni maperesewu ncuwelaka wiira hi niri vakani, anaahala ulattulana nuuhonona ntthoko ehu. 31 Vano ale yahaakhulaca: Mpaka uyo umpanka mwanrokorihu toko puuta?