1 Wahoolo Yakopi ahokhuma ni ahaakumanana ancelo a Nluku. 2 Vano woona wawe, Yakopi aheera: Ala anakhotto a Nluku! Ni ahovaha nipuro nno ncina na Manayimu.

3 Vaavale, Yakopi ahaaveleliha mayanhupi awe wa Isawu munnaawe, akhala uSeyiri ilapo yo Eetomu. 4 Ni aheerela mwanhimerye nkunyaka Isawu wiira: Mi karumeya enyu Yakopi kari wamoca ni Lapanu, kihaawo mpaka ilelo. 5 Kihaana imope na apuuru, ikhontwaa, ipuri, ipottha cithiyana ni cilopwana. Nkunya, kinovelelihera ula nhupi ula, wiira ukakhelele wosalaama.

6 Vano mayanhupi yahoturuwela wa Yakopi phimwiirelaka: Nihomphwanya munnaa Isawu ni uyo nowa wonwo, nawuphavela, ni haana alopwana iminya cese.

7 Vano Yakopi ahoova venci ni ahocukula. Phimaana ahaakawaniha atthu ayo miphwinko miili, ciicammo ahokawaniha ikhontwaa, ipuri, imope ni inkamira miphwinko miili, 8 kontha oopuwela coo: Isawu awaaka na anakhotto awe aatuphelaka mphwinko mmoca nkina uyo unkohala. 9 Vano Yakopi ahoswali eeraka: Nluku a paapa Aparahamu, Nluku a paapa Isaki, we Mwaneene Nluku ukireenle wiira: Uturuwele uwannyaa waalokwaa kinawupanka yooreera. 10 Mi kinacuwela wiira khaninkiphwanela nifento neekhweeli ninkipankaa mi karumeyaa. Kilapuwile mooloko Yortani ni nttontto aka paahi, nanso nna va kihaana miphwinko miili. 11 Sontte ukoopole mmatatani mwa munnaka Isawu, kontha mi kinamoova, wiira hiiwe ukiiva mi, asaana wamoca na anumwanaya. 12 Kontha we uheera: Kinaweettiha ratta. Kinawuvaha ucuulu mwinci toko nhava wo mpharyaa ni mphwinko wa atthu wohaalikelyaa.* Mphattuwelo 22.17

13 Yoole uhiyu ule Yakopi ahorupa nenne nipuro nne ni ahothanla mihuwo commaha munnaawe Isawu: 14 ipuri cithiyana iminya piili ni anapinkula sirini, ikhontwaa cithiyana iminya piili ni anapinkula sirini okhontwaa, 15 inkamira talathini cithiyana co wamwinya na asaana aya, imope cithiyana arupayini ni imope khumi cilopwana, apuuru onthiyana sirini ni apuuru onlopwana khumi. 16 Ahaakawela mihuwo nnyo ipottha cawe wiira awacawace, ni wo khula nhuwo wari mphantte aya, ni aheerela: Nhoolelaceke ni nhiye ikhato nhuwo ni nhuwo nkhwaya. 17 Ahonlamulela oopacera ole: Munnaka Isawu oophwanyaka, ni ookohaka wiira: We uri naani, unrwa vayi ni nhuwo urinaa ula wawani? 18 Vano umwakhuleke wiira ca karumeya enyu Yakopi. Ciri itthuvo cinonveleliherawe nkunya awe Isawu ni uyo neera awaka uttuli wihu. 19 Ciicammo ahonlamulela onayeeli, oneeraru nale othene yawa uttuli mihuwo eeraka: Uphwanyakani Isawu othene munhimyacere nuulumo nimoca nenna. 20 Munhimerye tho wiira: Karumeya aa Yakopi nawa uttuli uno. Kontha Yakopi hoopuwela coo: Kahoolihaka itthuvo caka nnyo, kinattipiha urusiya wawe nwo, vano nakumanacaka ni mi uyo, atthunaka nakakhelela wooreera. 21 Phimaana inama cotthuvo nnye cahohoolihiya, nanso ule ahohala veekhawe nipuro nomakiya nne ni ahorupa uhiyu wothene.

22 Yoole uhiyu ule ahonwa ni ahaakusa asaarawe eeli, na asaarawe eeli oohitteeliheraninya, wamoca na asaanawe khumi na mmoca, ni yaholapuwaca nsepa no Yappoko. 23 Ahaalapusaca nsepa nno asaarawe ayo ni citthu cothene carinawe. 24 Vano Yakopi ahohala veekhawe ni ahomwanana nlopwana mmoca uhiyu wothene mpaka usa. 25 Nlopwana ule, woona wawe wiira khamoorya untthema, ahomwaatta wakumanacile makhuva oonatara, ni Yakopi ahorepenyuwa wakumanacile makhuva ni amwananaka ono.

26 Nlopwana ule aheera ukihiye kirwee kontha uhosa. Nanso Yakopi ahomwaakhula eeraka: Akinoohiya urwaka wahikireeriheke. 27 Ni ahonkoha: Ncina naa tipani? Ule ahomwaakhula: Mi kineehaninya Yakopi. 28 Vano nlopwana ule aheera: Ncina naa khaninhala wiihaninya tho Yakopi, nanso Israyeli, kontha we uhomwaanana Nluku na atthu ni uhotthema.

29 Ni Yakopi ahonkoha eeraka: Kinapheela ucuwela ncina naa. Ule aheera: Unkikoherani ncina? Vaavale ahonreeriha.

30 Vano Yakopi ahovaha ncina na Peniyeli nenno nipuro nno, eeraka: Kontha kihomoona Nluku ni miitho aka ala ni mi kinkumi.

31 Aakhumile uPeniyeli, ukati wakhumaya ncuwa ni Yakopi anattumpela. 32 Phimaana mpaka nihuku noleelo annasirayeli khankhuraca ntinka unluttaniha natara ni iyuunu, kontha Yakopi ahaattiya wantinkani ukumanihile natara ni iyuunu.