3
Itampi yoopacera
1 Yooyo ukati uyo inwaa phaari yotepa ulavilavi wopwaha cikhwamwe capankilyaya Apwiya. Inwaa yahaakoha athiyana yiiraka: Nluku phinryawe ciicammo, wiira nhilye mihokhorokho cothene ciri nluwani? 2 Vano athiyana yahaakhula yiiraka: Mihokhorokho co miri ciri nluwani niireliye nilyeke, 3 nanso nhokhorokho wo mwiri uri iriyari iluwani, Nluku eenre nhilye, ni nhikwanyakwanye wiira nhikwe.
4 Vano inwaa yaheerela athiyana ale: Khweeli khannokhwa. 5 Kontha Nluku naacuwela wiira, nihuku ninhaleenyu ulya, anawuuhulyani miitho enyu nuukhala toko Nluku, nuupacera ucuwela yooreera ni yoonanara.
6 Woonyaya athiyana wiira mwiri ule uri wooreera ulya ni woociva wamiithoni, ni mwiri woophwanela uvaha ankhili, yahorukula nhokorokho aya ni ulya, ni ciicammo yahaavaha awaanyaya nayo yaholya. 7 Phimaana oyeeli yahotthukuwa miitho aya ni yahopacera ucuwela wiira ari phwitipwiti. Yahottotthanihaca matakhuru o mwiri ni yahowaraca. 8 Watthekuwaya ncuwa, yaheewa uwuka wophyoo wawaaya Apwiya Nluku weettakaca nluwani. Vano nlopwana wamoca na amwaarawe yaheepitthaca Apwiya Nluku mmirini co nluwani. 9 Vaavale Apwiya Nluku yahomwiihana nlopwana ule yiiraka: Uri vayi?
10 Ule ahaakhula: Kihowiiwa uwuka wophyoo yawinyu nluwani, vano mi kihoova, kontha kiri pwitipwiti phimaana wiipithilyaka.
11 Ni Nluku ahonkoha: Tipani uthonyenre wiira uri pwitipwiti? Uholya nhokhorokho wo mwiri uwirenlyaka wiira uhilye?
12 Vano nlopwana ule ahaakhula eeraka: Athiyana akivahilyaa ayo wiira akhale nkhwaaka, yaayo phikivahile mi nhokorokho uyo, ni kiholya.
13 Apwiya Nluku yahaakoha athiyana ale: Nyu mpankacenreni ciicammo? Athiyana ale yahaakhula yiiraka: Inwaa phikithepile, ni mi kiholya.
14 Phimaana Apwiya Nluku yaheerela inwaa: Upanka waa commo, kihoolapha woopwaha mihuwo cothene ni inama cothene co ntakhwani, unhala weettela wamirimani, ni yoolyaa inhala ukhala ntthupi mahuku othene ookumi aa. 15 Ni wariyari waa we ni athiyana ayo, ni wariyari wo ucuulu aa we ni ucuulu wa nthiyana uyo, kinaweesa umwiinani. Yooyo ucuulu uyo unaahala wuurakaliha muru we, ni we unkoorakaliha ikottokottho aya. 16 Vano Apwiya yaheerela athiyana ale:
Kinawuuncerera coowerya cinyu
ukati unkeelenyu ukhala ni irukulu;
ni ukati wooyara nnokowoona uwerya;
nyu nnokoophavela waapwaha awannyu
nanso ayo phinhala wuulamulani.
17 Vano Apwiya yahomwiirela Atamu:
Ukhala wiira we uheewelela amwaaraa,
ni uholya nhokhorokho wawiirenlyaka uhilye,
iholaphyaa itthaya iyo mwanlattu wawaa we;
muuhuvani unarwaa weelihe mahuku othene ookumi aa.
18 Itthaya iyo inkomeela miiwa ni malasi,
ni we unkoolya matakhuru o ntakhwani.
19 Ni unhala ulya ni nttukuttha nomwiirutthuni mwa,
mpaka wanhalaa uturuwela watthayani;
kontha we wuupiye ni itthaya, nna va uri ntthupi,
ni unaturuwela ukhala ntthupi.
20 Vaavale nlopwana ule ahaavaha amwaarawe ayo ncina na Hawa; kontha ayo yaari anumwanaya atthu othene. 21 Vano Apwiya Nluku, yahompakela nlopwana ule na amwaarawe ikuwo co nrapala ni yahaawarihaca.
22 Wahoolo Apwiya Nluku yaheera: Nkoonani, ntthu ula ri toko hii, naacuwela yooreera ni yoonanara; vano wiira hitaphule ntata nawe, ciicammo arukulaka nhokorokho womwiri wookumi, alyaka nukhala wohikhwa. 23 Apwiya Nluku, yahomoomola ule nluwani yo Eeteni wiira alime itthaya yakumihiyaawe. 24 Paahi, noomoliyene ntthu ule, yaheesiya Makerupii ookhaliha, mphantte unkhuma ncuwa woluwani yo Eeteni, ni ikatana yoopharela yaarukurerya nceresere mothene, wiira isunke iphiro inrwaa uryaya mwiri wookumi.