Iwarakha i Napaolo wa
Attu o Ufilipi
Malhove o uholhelha
Napaolo yaalhempe iwarakha wa attu anrumelhenlhe Kuristo o Ufilipi iyaakha yo 61 baada yo uyaria wa Kuristo, ikatema Napaolo vaari aya anattukiye (nlhako wo 1:13), veekinaka vaari aya Urumi. Iwarakha iyo yaalhepiye wa nlhoko wa attu anrumelhenlhe Kuristo yaakhalha iwani yo Ufilipi. Ninowooria tho waachuwelha attu o Ufilipi mwi ikitabu yo Mitheko cha akarumiya. Iwani yo Ufilipi yaari iwani yulhupalhe mwi ilhapo yo Umakedoniya. Ni uwo chiicho wahaawo nlhoko wo upachera uchokholhiya Umakedoniya. Napaolo ni Nasila yaari attu yaachokholhinhe nlhoko wa attu anrumelhenlhe Kuristo vamoka, tho ni uttukiya uhiyu mmoka vaari aya wowo (Mitk nlhako wo 16).
Napaolo vaalhepa aya ilha iwarakha ilha, yaari ni nrima mwinchi wo waaruma ulhepa ilha iwarakha ilha. Tho, wo nenno nipesha nno, ahaashukuru attu anrumelhenlhe Kuristo wo izawadi chaakuminhe aya veewilhe aya wiira Napaolo yaari muuttukiyani, (nlhako wo 4:10-19). Tho, ahaahimiachera yayo manyaattu ayo mwaha wo makhalhelho yaakhalha aya muuttukiyani. Ahaathanlha Natimotheo ni Naepafrodito ni waachuwelhiha wa attu anrumelhenlhe Kuristo (nlhako wo 2:19-30) wiira apocheriye ni wiiwelhelhiya rata, vanohalha aya uvara ntheko wo waaholhelha attu.
Chiri nhina.
Napaolo anochokholha iwarakha aya wo waashikuria attu anrumelhenlhe Kuristo o Ufilipi (nlhako wo 1:1-2).
Tho, anoohimiacha mwaha waapantte unaacha mitheko chaya (nlhako wo 1:3-2:30).
Anowaavaha ikano chinothananiya aya attu ukhalha makhalhelho a attu anrumelhenlhe Kuristo (nlhako wo 3:1-4:9).
Napaolo anomalhiha wo waashukuru attu anrumelhenlhe Kuristo o Ufilipi wo izawadi chaarweehelhiye aya ni waavaha isalamu (nlhako wo 4:10-23).
1
1 Mii Paolo ni Timotheo namitheko a Yesu Kuristo, ninoolhepa iwarakha iwe uwaninyu mwaatti attu a Nlhuku nlhutanne ni Kuristo Yesu nri Ufilipi vamoka ni aholhelhi ni attu anaakaviha ushunga nlhoko wa attu a Nlhuku. 2 Kinoulhapelhelhani nnema ni mpuha ukhuma wa Nlhuku Athumwanihu ni Athithi Yesu Kuristo.
Napaolo anowaalhapelhelha attu a Nlhuku o Ufilipi
3 Kinonshukuru Nlhuku aka kila ikatema vanowupuwelhaakani mwaatti, 4 ni kila vanoulhapelhelhakani mwaatti onkhaye, kinolhepelha wo uteelhiya munrimani, 5 wo nlhatu no ukhalha nlhoko mmoka ni mii uvara ntheko wo uhimiacha Malhove Orera ukhuma nihuku no upachera nne mpaka lhelho nna va. 6 Paahi, mii kihochuwelha we ikekhiaye wiira Nlhuku chokhonlhe ulha ntheko woombone uwaninyu ulha phi nowa aamalhihera nihuku no uhokolhia Kuristo Yesu nne.
7 Phi nrera aya irusho chaka chuwuupuwelheni chiicho, kwaani mwaatti nri munrimani mwaka. Ukhalhawaya mwaatti onkhaye va nhokikaviha munnemani mukivanhe awe Nlhuku wo wiinanelha ni uhimiechesha Malhove Orera, vattukiye aka va ama vaari aka kihinattukiya. 8 Ukhalhawaya we ikekhiaye Nlhuku phi nohimiechesha ittu inoolhumacha aka, wo uttuna unokhuma munrimani mwa Yesu Kuristo ulhe, kiholhakelha chinene uwoonani mwaatti.
9 Cho phi nonlhapelha aka Nlhuku, uttuna winyu uthepeke wunchereria chinene vamoka ni uchuwelha ikeekhene wo irusho wo iphiro chonkhaye, 10 wiira nchuwelhe ittu yo ulhoka. Nkhalhe ni nrima ntakatifu wo uhikhalha ni nlhatu uriwoothe wo unanara mpaka nihuku no uhokolhia Kuristo nno. 11 Vavawo ukumi inyu unocharihiya meetelho e ikekhia mmiholho wa Nlhuku anokhuma wa Yesu Kuristo mwanene wiira Nlhuku athimichiye ni utotopelhiya.
Ukhalha ukumi wo unkavihera Kuristo
12 Ashilhoko aka, kinothanana nchuwelhe wiira mwaha wonkhaye ukipantte mii, uhokaviha uwanelhiha Malhove Orera. 13 Paahi etu wo yoyo nlhatu uyo, manyaasikari onkhaye anolhitelhelha inupa ya amwene vamoka ni attu akina onkhaye o va, ahochuwelha wiira kittukiye wo nlhatu no urumiya ni Kuristo. 14 Ukhalhawaya uttukiya waka uhaapanga attu enchi anaarumelhelha Athithi athepe ukhalha ni machiri o waakhulhuvelha Athithi chinene ni uhimiacha nlhove na Nlhuku wo uhoova ittu.
15 We ikekhiaye attu akina anohimiacha Nlhove na Kuristo wo nlhatu wo ihache ni uhilhoka nrima, nansho attu akina anonhimiacha wo nlhatu woombone. 16 Yayo manyaattu ayo anonhimiacha wo uttuna ukhalhawaya ahochuwelha wiira Nlhuku hokivaha ulha ntheko wo winkelha Malhove Orera ulha. 17 Nansho attu akina alhe anohimiacha Nlhove na Kuristo wo nlhatu wo wiishipa kuhii wo uteelhiya munrimani, yaanyiheraka wiira anokuncherera uhuva urina aka vattukiye aka va.
18 Nansho yayo uwannyaka mii khave ittu. Wo iphiro choothe, ikhalhe wo nrima woombone ama wo ikekhiaye, Malhove Orera a Kuristo anoohimiachiya. Ni wo yoyo nlhatu uyo, mii phi nothepa aka uteelhiya nrima, 19 ukhalhawaya kihochuwelha wiira wo ulhapelha winyu ni ukavihereriya ni Iphumu ya Yesu Kuristo kinoohiyereriya. 20 Mathananelho aka molhupalhe ni ukhulhuvelha waka uri woona wiira wo iphiro iriyoothe akinoolhiya muru munthekoni waka. Nansho kilhipeke nrima, kila ikatema, kichokholhaka vano, wiira mwiiruttuni waka mwonkhaye kinari nkumi ama kinakhwilhe Kuristo athimichiye. 21 Ukhalhawaya uwannyaka mii ukhalha nkumi phi unkaviha ntheko Kuristo ni ukhwa phi ifaida.
22 Nansho yakhalhaka wiira ukhalha nkumi phi ifaida yuulhupalhe yo munthekoni, paahi etu, akichuwenlhe inohalha aka uthanlha. 23 Alha melhi alha etu ahokivara. Kinoothanana chinene uthama kihiye ulha ukumi ulha kakhalhe ni Kuristo, ukhalhawaya phi ittu irii yoombone chinene, 24 nansho ukhalha nkumi wo nlhatu winyu mwaatti phi ittu yo lazima chinene. 25 Ni mii kihochuwelha wiira kinoothepa ulhokelha vamoka ni inyu mwaatti onkhaye kuukaviheni mmwe mwaathepa uvarechesha ni uteelhiya nrima, 26 wiira vanohalha aka ukhalha ni inyu mwaatti vawo, mmwe mwaateelhiya chinene wo ulhutaana winyu ni Kuristo Yesu.
27 Paahi etu, meetelho inyu akhalheke thoko chinothananiya ni Malhove Orera a Kuristo, wiira kooriaka uwa ama kaahorieke, kiwe keewa wiira nheemelha rata wo nrima mmoka ni wo nnikwa mmoka wo wiinanelha nrima unowiihiya wo Malhove Orera. 28 Nhoove attu anoovingani nansho mweemelheke rata. Yeyo phi ittu inooniha upotera waya, ni inyu mwaatti nnowa mwoopolhiya ukhalhawaya Nlhuku phi nouvaherani noopo. 29 Ukhalhawaya kila ntu Nlhuku hommaha imboote yo unkaviha Kuristo, kuhiwe wo unrumelhelha vekha ayaru nansho ni utwarushiya wo nlhatu wawe. 30 Vano nnowooria ukavihana ni mii ikhoto yo wiinanelha Malhove Orera mwonne inyu kaatakanaka katashi valhe. Ni iyo phi iyo inothepa aka waatakana mpaka nna thoko chineera inyu wo wiiwa.