1 Aam refo mbam kʼjõ, Paulus tsya anu bao Timotius. Allah ksoh tibyo jõ tamo raabis (rasul) ro Kristus Yesus rAit. 2 Amu mbewok nkom aam refo kʼanu raa ro Allah wAit mam kota ro Kolose. Anu to, beroh smot Kristus tna Allah yse anu nmo raa wAit nsya Kristus Yesus su ye. Amu skabuk Bja Allah, re Ait kbe yatmof anu tna yno re anu nhau nhaf tnok sai.

3-4 Raa mkyas anu kʼamu nri mawe anu smot Yesus Kristus matak. Tna raa ro Allah wAit beta to, ja anu natmof ana beta kaket ye. Amu nri bo ro anu nno weto, tibyo amu skabuk anu to, ja amu nyoh asik mase kʼAllah yoyo. Tuhan ranu Yesus Kristus tait, ytu Allah Yaja rAit. 5 Watum ro ati to, Bokyas Moof ro Yesus (Injil) to, tiwya raa mkyas kʼanu nri. Anu nri tna ninaut nwe meen anu nkai bo ro Allah siwyan kʼanu yse mam sawro rAit. Anu ninaut tna ste bo ro yse mam sawro rAit weto, tibyo anu smot Ait matak. Tna anu ninaut bo weto tibyo natmof anya kaket feto ye. 6 Tiwya tinyi anu nri Bokyas Moof reto tibyo nhar nwe boatmof ro Allah to bo mabo. Maban tinyi rau weto mamo snok mam mfo refo to, Bokyas Moof reto to, anu fri mafer mawat. Tna anu nkyas Bokyas Moof reto kʼraa roto renti ye. Tibyo ana fri mafer rau ye. Bokyas Moof reto mfi ara make sau ro mo maut tna make mawat. Tna mam woyõ-woya raa mkyas Bokyas Moof reto mam tabam refo beta to, raa mkai mafer rau tna mkyas renti mnan fi anu feto ye. 7 Bi Epafras tait, ait ysya amu ja nkah bo ro Kristus su. Tna amu nhafri ait ye. Tiwya ait yamo ykyas Bokyas Moof reto kʼanu nri. Tna ait ja mur-mur yno bo ro Kristus ybis ait yno re anu fri mafer rau ye. 8 Tna ait ykyas anu kʼamu yawe, ja Har ro Tuhan mno anu natmof anya ye.

9 Feto to, maban tii tinyi Epafras ykyas anu kʼamu to, amu sorni anu fee. Amu skabuk anu tna nyoh re kbe Har ro Tuhan yno anu nsrau miyõ tna nkit maan ye. Re kbe anu nhar bo ro Ait ksoh anu nno to kaket. 10 Amu nyoh bo weto re kbe anu nno bo ro moof mnan raa ro ja nkro iso ro Tuhan. Re kbe Ait yhaf mnan bo ro anu nno beta. Tna amu skabuk re kbe bo moof ro anu nno beta to, kbe raa fri mafer rau yoyo. Re kbe anu nhar Allah renti-renti naut. 11 Allah yatak rAit to msai toni. Amu nyoh re kbe Ait yoo yatak rAit reto yse kʼanu ye. Re kbe bo bawya ro btek mai kʼanu to, kbe anu beroh smot Ait tna nhau nhaf knar. 12 Tna amu nyoh re kbe anu simaut mase nyoh asik mase kʼanu Bja ranu. Ait oh mi tubat anu yse nsya raa wAit. Anu to, Ait ysok yse hayah mam wore wo maah. Tna kbe Ait yuumto bouum baro kʼanu beta ye. 13 Tiwya, kabes yabi (Iblis) ybo anu mam wore wo mamur. Tna Allah oh mi yisnok anu bbam wore wo mamur reto tna yse anu mam raa mana ro mfo refo Ku rAit yamo Raja ybo. Tna Ku rAit tait, Allah yhafri toni. 14 Allah yoo Yesus yfes anu. Au oh mi iro ro anu bno to, Ait yyon beta.

15 Allah tait, anu raa bmat bkah bsu fee. Menohe Yesus tait, raa mmat oh. Yesus yhaf srau rAit to merif Allah yhaf srau rAit kʼanu ye. Yesus tait, Kubum ro yhau abyõ ybo bosair wAit beta. 16 Allah ybis Yesus ysair bombra beta. Bombra ro mhau mam sawro ye, bombra ro mhau mam tabam refo ye, bo ro ja raa mmat ye, bo ro ja raa mahni ye to, Yesus ysair beta. Bo ro ja anu bahni to: Kabes msya malaikat sor ye, aban mana wana ye, ro mase ye, bobot ye beta to. Yesus yesait ysair beta re kbe yesait fri mafer rau ye. 17 Bombra weto beta marak fares to, Yesus yhau wia yatim oh. Tna Ait yno re bombra weto mhau muuf sai fares. Oos Ait maami bombra weto mbtek-tak makus sai. 18 Raa ro smot Ait makin (jemaat) to mfi Ait yetsu rAit. Tna Ait yamo mana ybo Ait yetsu rAit reto ye. Ait oh mi ysair jemaat rAit tinyi to. Tna Ait ro tinyi yrok yasen. Allah yno feto, afo re Kristus yesait yrok yase yatim raa msya bombra beta. 19 Tna bo yase ro Allah rAit msya bobot wAit beta to mhau mam Kristus. Allah ksoh yse bo yase rAit mam Kristus feto to. Tibyo Allah yse Kristus yamo yase yatim raa msya bombra beta to. 20 Raa mame Kristus yajat mam ara warok. Tna Allah yoo mees ro Kristus rAit reto yisoh iranya ro Allah ysya bombra beta. Bo ro mhau mam tabam refo ye msya bo ro mhau mam sawro ye to, Allah yoo mees ro Kristus yno Allah yrok yiranya ysya bo beta to. 21 Tna anu to, tiwya anu nhau hayah mfi raa ro srim sai. Tna tiwya anu srau wanu to, ja mafa msya Allah tibyo nno bo ro mkair-kar. 22 Menohe mfo refo, Allah yisoh iranya ranu nsya Ait oh. Ati ro Kristus yhau mam tabam refo, raa mame Ait yetsu yajat. Ajat rAit oh mi misoh iranya ranu nsya Allah to. Tna yisoh iranya ranu afo re meen yse anu mam wore wo Allah yhau. Yse anu mam sawro rAit to, tna kbe ymat anu yawe anu to, raa wAit ro nhau nno bo wAit sai. Tna mam sawro rAit to, kbe Ait ymat anu yawe anu nfi raa ro wase mber safo to. Tna mam sawro rAit to, kbe raa maun boun anu aro u fee ye. 23 Menohe beroh nbo bosmot wanu kaket be kbe nkai iranya reto nsya Allah fee. Bito oh! Nros ntak. Bokyas Moof ro ja jõ, Paulus, tkyas to, Allah ybis jõ tamo tkyas. Tna Bokyas reto ja raa mkyas woyõ-woya mam tabam refo ye. Tna Bokyas Moof reto to, anu tiwya nri ye to, tibyo ninaut nwe meen kbe anu nkai roon ro hame wajin. Ninaut bo reto matak. Susu fari re sorni bo reto ma!

24 Tiwya Kristus yno bo ro mafer moof mkah anu bkin ro smot Ait. Anu weto to Ait yetsu rAit oh meto. Yno feto, tibyo bo ro samyoh mawat btek mai kʼAit. Tna mfo refo fo, jõ ye. Jõ tno bo ro mafer moof kʼanu, tibyo bo ro samyoh baro btek mai kʼjõ tetsu ye. Jõ tkai bo samyoh ro mabut fares weto baro to, jõ simaut mase. 25 Allah ysok jõ ybis re tamo sryan rAit. Tamo sryan rAit tno bo ro kbe mafer moof kʼanu raa wAit. Re kbe jõ tkyas watum rAit beta kʼanu. 26 Maban tiwya tinyi anu hohos na wanu wase watum wAit baro. Ait betoo watum weto kʼana fee. Ait ymyõt watum weto sai. Menohe mfo refo, Ait yasbrah watum weto kʼanu raa wAit to. 27 Anu raa ro Kolose to, nbam raa mana ro Yahudi fee. Tna Allah ksoh re anu nrok nhar mafer watum ro tiwya raa wase weto. Tna mafer watum reto to, mfi bo kta ro msai toni kʼanu. Kʼanu raa mana ro Yahudi fee.* Raa ro Yahudi fee msya mafer ro ana fri refo fo, Paulus beto mam Efesus 3:1-9. Bo ro tiwya raa wase reto to, Kristus yhau mam kʼanu. Tibyo anu ninaut nwe meen kbe anu nkai bo yase rAit mam sawro rAit. 28  Kristus oh mi amu nkyas kʼraa. Allah yisoh amu nkit re maan toni. Tibyo amu nkyas Kristus to, amu bhah wa raa awya sai, tna amu betoo bo kʼraa awya sai kaket ye. Afo re meen raa awya sai ro mari bokyas ramu reto kbe siwyan moof kaket. Tna kbe Allah yoo ana ymat yawe ana msya Kristus su to mrok moof mnan si meto. 29 Tna jõ tomer siwyan raa feto to, Kristus yatam jõ yoo yatak rAit yee ybo jõ matak. Tna Ait yatak rAit to matak toni!