1 Tna fyio jõ tkyas kak ro ja raa moo msan kʼberhala* Berhala to bo ro raa mfen tna mse mkah smot mfi Allah. Wore weto to, raa ktan kak tna moo msan kʼberhala soh mfe kabes aro. Tna raa baro ja moo kak reto masim mam pasar to, pitis mabyoh mroh. Tna raa Kristen ro mhau mam Korintus mtu kʼPaulus mawe, “Fyi, kak reto mbau kʼamu fe mfe a? Kbe amu nbo fe mfe a? wia. Tkyas bo reto baro kʼanu: Anu beta to raa ro nhar bo oh. Tna jõ tawe kʼanu tawe: “Kaket anu; re kbe bo ro anu nhar reto mno re anu safuk anu ai to ma.” Raa taro to safuk ana ai mawe ana mhar bo toni. Bohar ro ja ana safuk reto to, ja tubat raa taro to fee. Nnaut nwe: Anu natmof raa anya to bo ro ati. Iso reto oh mi anu tubat raa anya to. 2 Mfi bo raa sait tait safuk tna ynaut yawe, “Jõ fi thar bo.” Ait retait yhar bo ro ati fefares. 3 Raa ro ja hafri Allah to, ana weto oh mi raa ro Allah yhar.

4 Kbe anu, raa ro kro Kristus nbo kak ro raa riwai moo msan kʼberhala wia to fe mfe a? Berhala ro raa mfen to, anu bhar bwe berhala weto to Allah meto fee. Allah yesait aran yum. Allah roto aro magin fee. 5 Raa taro smot bombra aro rau-rau ro mhau mam tabam refo tna mam ayoh ye. Bombra ro ja raa smot msya kabes aro ro mbo raa to msis. Tna raa taro mari kabes weto mnan fi 'tuhan' rana. 6 Menohe anu bhar bwe Bja ranu Allah tait yesait aran yase tna yatak yum. Tiwya Ait yfen bombra beta. Tna anu bhau mam tabam refo mkah bo bbaut Ait. Tna anu bhar bwe Yesus Kristus yesait aran tait Tuhan ro ybo anu. Yesus yesait yfen bombra beta mkah Allah yatak rAit. Tna Yesus yatak rAit reto oh mi mno re anu bhau baam mam tabam refo fo.

7 Menohe bo reto to, raa taro to wase fares. Tiwya ana weto mamo kro Kristus fefares to, ana smot berhala weto ye. Tna ana weto mnaut mawe kak ro raa moo msan kʼberhala to mbau. Ana mnaut feto fares. Tna mfi bo ana weto mnaut mamo-me fares menohe mberoh mabo kak reto to, ana mnaut mawe ana mno iro meto. 8 Boit aro ja misoh iranya ranu bsya Allah to fee. Tna boit aro ja mno re iranya ranu bsya Allah to mkair fee ye. Tna mfi bo anu bhau biit boit aro to, bo ro bno feto to misoh iranya ranu bsya Allah to fee ye.

9 Anu fo boo bo bawya-bawa biit sai saah. Menohe raa taro to, ana mnaut mamo-me fares. Feto to kaket anu afo re bo ro anu ksoh bno to mno re raa taro mbtek mam iro fee. Bo reto to, bo ro ati. 10 Anu weto, taro smot Yesus kaket matak oh. Tna taro nhaf smot Ait matak fefares. Mfi bo anu taro ro nhar bo to nmo twok mam samu ro berhala sau tna hre niit bo to, tna raa sait yamo twok to, kbe fyi? Mfi bo ait ro yama retait ynaut mamo-me fares tna ymat bo ro anu nno to, kbe ait yait boit reto ye. 11 Kaket anu! Soh raa ro yhaf rait smot Yesus matak fefares ymat he nyõ nait bo reto to, bo ro nyõ nhar tna nno reto kbe tko ait retait tibyo ait ynaut yawe yno iro. Nno be anu sait yisti meto. Kristus Ait tiwya yajat afo re ana weto mkai riof ye. 12 Anu ja biit bo bawya-bawa sai saah. Tna raa taro mamo kro Kristus oh menohe ana mnaut boit ro mait mamo me fares. Mfi bo anu sait to beroh yait bo bawya sai wore raa ro ynaut mamo-me fares to hre ye, fyi? Nyõ ntko ait re yno bo ro ait ynaut yawe mkair to, nyõ nesait nno iro meto. Nyõ nno iro mai kʼait retait. Tna nyõ nno iro mai Kristus ye oh meto. 13 Feto to jõ hawe bo tko raa ro kro Kristus yabo kak ro ait ynaut yawe mbau to. Nno be jõ tisti re ait yno iro. Mfi bo tafoh ajõ sait waa yabo kak ro raa msan kʼberhala wia to, kbe jõ tabo kak u fee saut.