1 फरी तछा येसुए ल्‍योक मिँर बनै माहोल्‍या दुप्‍सिहुद यालिज़्‍याव। यास ज़्‍यान्‍यार प़ाइँ खेम्‍द उलिज़्‍याव। है जैद येसुए उसिसरालाई ओल्‍योदा खुल्‍द, 2 “आव माहोल्‍यार रँःद ङायुँ नाज़्‍या। आवर ङास याल्‍यो आछिम स़ोंला ताकेर। याज़्‍याव भरी ब खेम्‍के। 3 आवरालाई अइज़ झ़िमदा परींकिन येमत याकरेए माधुन्‍या लेर। आवर ख्‍वा ख्‍वार ते तादानी हुवर लिज़्‍यार,” है ओरादोक ते, 4 उसिसराए, “इताव साइँसुइँवक आःकाव मिँरालाई कातानी ज़्‍यावर रैद सव़ाँन्‍या की?” है यादोक ते, 5 येसुए, “जेस भरेस खागोता उलिज़्‍याव?” है ओरादोक ते, “भरेस सात गोता लिज़्‍या,” है दोकेर।

6 नकिन येसुए नो माहोल्‍यारालाई नामक च़ुसिउ परींद नो सात गोता भरेस उकुइत रैद, धन्‍याबाद चरैःद नो भरेसलाई केःद उसिसरालाई नो माहोल्‍यारालाई भाःद्याव ओरापरींक ते, भाःद याराएकेर। 7 नोरास ङाँःजुँर ब ऩेबरेंवा यालिज़्‍याव। येसुए नोरालाई मनी उकुइत रैद, असिक ऩिद माहोल्‍याराए याङ़ाक याङ़ाक भाःद्याव यापरींक्‍यो। 8 नोराए याफू तसी ज़्‍याद यासय़ेलो यादुप्‍क सात झुर्नु ताके। 9 नो भरेस ज़्‍युज़्‍यावर चार हजारा याल्‍यो। नकिन येसुए नो माहोल्‍यारालाई याझ़िमदा याझ़िमदा यापरींक्‍यो। 10 ओल बेहार ज़ उसिसरास दोङ्गाल पसिद दलमनुथा खन्‍द जीदा बाकेर।

11 नल फरिसीर येसुलाई जाँचिन्‍याए जूँनी ओल्‍योक हुद खर्लेसिद, “गेलाई स्‍वर्गताव नसरेस तोबो सतैंद्याव ताके,” है यादोक ते, 12 येसु ओनालर क़्याद, “आव जुकलाव मिँराए काराव सरेस वाज़ याखिम्‍ज़्‍याव? ङा साचो है ङादाचिज़्‍या, आव जुकलाव मिँराए ङासरेस काता ज़ दैन्‍या मालेर,” है दाद, 13 नोरालाई ख्‍यानैद उसिसरास दोङ्गाल पसिद दह होफत बाकेर।

14 येसुए उसिसराए यास भरेस लाँन्‍या मेंःद यानैज़्‍याव। दोङ्गाल नोरास भरेस तोबो वाज़ उलिज़्‍याव। 15 याबाज़्‍याक येसुए नोरालाई सम्‍जैद, “जे हेरोद राजा स़ोनो फरिसीराए भरेसल याझाःज़्याव वासःनी जोगोइसिद लिच्‍यो,” है ओरादोक ते, 16 नोर, “भरेस रैन्‍या गेमेंःवए नै ओदासिज़्याव ताक्‍या,” है लिद या याल यापाँनाज़्याव 17 येसुए थैद, “काराव ङापाँलाई झन भरेस त॰दा जेथ·रैनाज़्‍याव? आःपै जेमातीधुइ रो? काता जेयुँ आः खाव उलिज़्‍याव? 18 जेमी लिज़्‍यावत ब जेमारँःधुज़्‍याव रो? जेर्ना लिज़्‍यावत ब जेमाथैधुज़्‍याव रो? काता घरी जेमेंःधुव, 8:18 यर ५:२१; इज १२:२ 19 पाँच गोता भरेसए पाँच हजारए याफू तसी ज़्‍यादकाव यासय़ेलो जेदुप्‍क खाझुर्नु ओताव?” है ओरादोक ते, “बाह्र झुर्नु ताके,” है दोकेर। 20 “फरी सात गोता भरेसए चार हजार मिँए याफू तसी ज़्‍यादकाव यासय़ेलो जेदुप्‍क खाझुर्नु ओताव?” है ओरादोक ते, “सात झुर्नु ताके,” है दोकेर। 21 येसुए फरी, “कै जैद आःपै जेमाबुझिधुज़्‍याव?” है यादोक्‍यो।

22 नकिन येसु उसिसरास बेथसेदा नाखारल बाकेर। नक मिँराए तोबो उमी मारैंःवलाई ओल्‍योक रैद, “आवलाई छुद सगराँके,” है यादोक ते, 23 येसुए नो उमी मारैंःवलाई उकुइनी क्‍योःद दोरैद नाखारनी अछतङ लाँद, उमीत त़िल्‍द्याद ओक्‍याँत उकुइ नैद्याद, “कातार नमारँःज़्‍या?” है ओदोक ते, 24 नोए आदा होदा भाल्‍सिद, “रँःन्‍या ते ङारँःज़्‍या, खाली मिँर ते सींर आदा होदा याबाज़्‍याव स्‍यासो ङारारँःज़्‍या,” है दोक्‍यो। 25 हाःत ज़ येसुए फरी नोए उमीत उकुइ नैद ओएक ते नो मिँए लँ लँ चिऊद प़ाइँ ज़ छर्लङ्ग रँःक्‍यो। 26 है जैद येसुए नोलाई, “नाखारल मापसिद ज़ नझ़िमदा बान्‍के,” है दाद परींक्‍यो।

27 नकिन येसु उसिसरास कैसरिया फिलिप्‍पी सहर लापजीकाव नाखार नाखार याबाज़्‍याक येमत येसुए उसिसरालाई, “ङालाई मिँराए सु है दाँज़्‍यार?” है ओरादोक ते, 28 उसिसराए, “ख्‍वाराए ऱील सछैंज़्‍याव यूहन्‍ना है दींज़्‍यार, ख्‍वाराए एलिया है दींज़्‍यार, ख्‍वाराए फरी काताकाव अगमबक्ता ताक्‍या है दींज़्‍यार,” है यादोक ते, 29 येसुए, “जे ङालाई सु है जेदाँज़्‍या नी?” है ओरादोक ते, पत्रुसए, “नँ ख्रीस ज़,” है दोक्‍यो। 30 नकिन येसुए नोरालाई, “ङा हो ज़ लिद सुलाई ज़ है तारादोच्‍यो,” है दाद याअर्थैक्‍यो।

31 हो बेलाक येसुए, “ङा मिँ मिन्‍सिउए कुधु दुखर दैद आव गेदेसलाव स़ेरर, मुख्‍या पुजारीर स़ोनो सास्‍त्रीराए ल्‍योनी सोसी ऩिन्‍या ङातारिज़्‍या। नोराए यासैःनाव स़ोंलात सिउनी सैंसिद ङासोरिज़्‍या,” है दाद, 32 उसिसरालाई ओक्‍याँत हुरिज़्‍याव दुखर ङ़ादाकिन ज़ छर्लङ्ग सतैंद याएक्‍यो। हाःत ज़ पत्रुसए येसुलाई तँदा लाँद उसिङार्क ते, 33 येसु उछींदा फर्किद उसिस भरिरालाई चिऊद पत्रुसलाई, “ए सैतान, ङाङ़ाकिन पुलुस्‍निके। नँ नयुँ परमेस्‍वरए ल्‍योदा माझाःद मिँराए याझाःज़्‍यावदा नझाःके,” है दोक्‍यो।

34 नकिन येसुए उसिसर स़ोनो नक लिज़्याव माहोल्‍यारालाई ओल्‍योक खुल्‍द प़ाइँलाई ज़, “जोए ङास हुन्‍या युँ दोज़्‍याव, होए उजिउए मया मादाद क्रुसत सिन्‍या मिताव दुखर सहिद ङाछींत उहुक। 35 जोए आव उजिउत ओललाई तान्‍या वाज़ खिम्‍ज़्याव, होए उजुनीलाई सम़ैज़्‍याव। फरी जोए आव उजिउत उजिउए मया मादाद ङाजूँनी स़ोनो चाव थाए उजूँनी दोज़्याव, होए जुनी दैरिज़्‍याव। 36 जोए आव मानुवात लिज़्‍याव भरी दुप्‍द उजुनीलाई ओसम़ैकिन नोलाई काता फाइदा ची तायादा? 37 नोए उजुनीए ओपोल काता यान्‍या? 38 जो आव पापी जुकलाव परमेस्‍वरकिन तँदाङाव मिँराए खार्ल ङा स़ोनो ङापाँत ओलाज हुज़्‍या, ङा मिँ मिन्‍सिउ ब फरी छैंव ङाचाकर्‍यारास ङाबाबुए ओज़गै मगैरास ङाहुक ङा ब नोलाई रँःद ङालाज हुन्‍या ले,” है लिद यासथैक्‍यो।