1 येसु ननी पुलुस्‍द ओल ओनाखारल ज़ बाके। उसिसर मनी ओलस ज़ यालिज़्‍याव। 2 ऩासिन्‍या छ्याम उहुवत धर्मसास्‍त्र झ़िमक बाद येसुए परमेस्‍वरए ओपाँ ओरासथैज़्‍याव। नो पाँ थैज़्‍यावर बनै अचम्‍ब ताद, “आवए इताव अचम्‍बलाव पाँर, अचम्‍बलाव सक्तीर कातानी ओरैव? आवए ओदैव किताव ग्‍यान ओल्‍यो! 3 काता, आव नो सीं त़ुज़्‍याव माःक रो? आव नो गेस लिज़्‍याव मरियमए ओज़ा ज़ सानी। आव ते याकूब, योसेफ, यहूदा स़ोनो सिमोनराए यादाज्‍यु ज़ सानी। ओबैंनीर मनी गेस ज़ लिज़्‍यार,” है लिद जाँ सोव माँःती जैकेर।

4 येसुए नो यापाँ सैंद, “अगमबक्तालाई ओल ओनाखारलावर स़ोनो ओक्‍याँदाङावराए वाज़ ओमान नैद माएर, उपुर्कावराए ते नैदिज़्‍यार,” है यादोक्‍यो। 5 है जैद येसु नक उलिज़्‍याक अचम्‍बलाव य़ेनर ब कोसै मादोधुक्‍यो, खाली तोबो ऩेब्‍लो याजोरो हुवरालाई वाज़ याक्‍याँत उकुइ नैद्याद यासगराँक्‍यो। 6 ओललाई यायुँ ओमाहुप्‍ज़्‍यावए येसु अचम्‍ब ताके।

येसु ननी पुलुस्‍द नाखार नाखार बाद परमेस्‍वरए ओपाँ यासथैनाक्‍यो। 7 हाः बेलाक बाह्र जना उसिसरालाई ओल्‍योक खुल्‍द नोरालाई ऩेबरें ऩेबरें जैद माचाव पुरूसर पले·न्‍या सक्तीर याद यापरींक्‍यो, 8 “येमत जेबाक जेस काता ज़ तालाँच्‍यो। जेकुइताव झुइस वाज़ बाच्‍यो। अर्नी तादी ब, झ़ैं तादी ब, जेवाँःत पैसा तादी ब, काता ज़ तालाँच्‍यो। 9 जेखँताव पोला स़ोनो जेक्‍याँताव क्‍वास वाज़ बाच्‍यो,” है लिद याअर्थैक्‍यो।

10 फरी, “जो झ़िमक जेपसिज़्‍या नो नाखारनी जेमापुलुसा पै नक ज़ लिच्‍यो। 11 फरी जेबाव पोल जेलाई ल्‍यो मायाद जेपाँ ब थैव यामाभैंःकिन नो पोनी जेपुलुस्‍क नोरालाई चेतावनी यान्‍याए जूँनी जेखँताव गालो धुइरो ब नल ज़ थरैद ख्‍यानैद याराएच्‍यो,” है लिद यापरींक्‍यो।

12 है जैद नोर ननी पुलुस्‍द बाद प़ाइँलाई ज़, “मादान्‍या जेदोज़्‍याव भरी ऱास्‍द जेयुँ परमेस्‍वरए ल्‍योदा फर्कैचिके,” है लिद यारासथैकेर। 13 मिँराए याक्‍याँताव माचाव पुरूसर मनी कुधु ज़ यारापले·केर, याजोरो हुवरालाई ब परमेस्‍वरए उमिननी म़ास थीद नोरालाई यारासगराँकेर।

14 हाः बेलाक येसुए उमिन बनै ओथास्‍नावए हेरोद राजाए मनी ओय़ेनर थैक्‍यो। येसुए उजूँनी ख्‍वाराए, “आव ते ऱील सछैंज़्‍याव यूहन्‍ना जन्‍द ची उहुव सा। है जैद ज़ ताखेहो नाः सक्तीलाव य़ेनर ओदोज़्‍याव।” 15 ख्‍वाराए फरी, “आव ते एलिया ची सा।” ख्‍वाराए फरी, “भाःकाव अगमबक्ता मितावर फरी तोबो उपुलुसो ताखेहो,” है यालिज़्‍याव। 16 ओल हेरोदए फरी निताव पाँर थैद, “ओहो! ओङ़ै च़म्‍द ङासैःव यूहन्‍ना ते जन्‍द ची हुके काना,” है लिके।

17 नो हेरोदए ङ़ादा ओभाइ फिलिपए ओज्‍या हेरोदियासए ओपाँनी यूहन्‍नालाई क्‍योःद किद झ्यालखानाल झाःद ओनैज़्‍याव। हेरोदए हेरोदियासलाई ओरैवए, 18 यूहन्‍नाए नो राजालाई, “नँ नभाइए ओज्‍यालाई रैन्‍या माताए,” है ओदोक ते, 19 हेरोदियासए यूहन्‍नालाई रँःद उरिस चोद, ‘आवलाई कै जैद ङासैःके’ लिद उयुँल ओनैज़्‍याव। खाली सैःन्‍या मौका ओमादैताव। 20 ओल राजाए ते यूहन्‍नालाई बनै सतलाव धर्मी मिँ ज़ थ·रैद ओछे·ज़्‍याव। है जैद नोए यूहन्‍नालाई जोगोइद नैक्‍यो। यूहन्‍नाए ओपाँत फरी उयुँ आँचानी पाँचा ओताज़्‍यावत ब सर्बा थैन्‍या युँ ओदोज़्‍याव।

21 तछा राजा हेरोद उजर्मिउ छ्याम मानिन्‍या उहुवत ओज्‍याए मौका छुपिक्‍यो। नो छ्याम मानिन्‍याए जूँनी बनै घ्‍योःव भत्‍यार जैद घ्‍योःव घ्‍योःव ओकर्मचारीर, फौजीलाव ओअफिसरर स़ोनो गालीललाव घ्‍योःव घ्‍योःव मिँरालाई याखुल्‍क्‍यो। 22 नो बेलाक ज़ हेरोदियासए मेंमा ओज़ा नो भत्‍यार ज़्‍युना हुवराए याङ़ाक बाद स़्याद याएक्‍यो। राजा हेरोद स़ोनो ओपाहुनार बनै खुसी ताद राजाए नो ल़ुज़ालाई, “नँ जो नपैंज़्‍या ङास ऩिके, हो ज़ ङायाँ,” है दोक्‍यो। 23 फरी, “नँ नपैंकिन तभा ङाराज्‍या तादी ब ङायाँ,” है लिद किर्‍या झाःक्‍यो। 24 है जैद नो ल़ुज़ा ओआमाए ल्‍योक बाद, “आमा, ङा काता ङाऩिके?” है ओदोक ते, ओआमाए, “ऱील सछैंज़्‍याव यूहन्‍नाए ओङ़ै ऩिके,” है दोक्‍यो।

25 नो ल़ुज़ा बेहार ज़ राजाए ल्‍योक बाद, “ङालाई ऱील सछैंज़्‍याव यूहन्‍नाए ओङ़ै ताथील झाःद आख ज़ याँके,” है दोक्‍यो। 26 राजाए नो पाँ थैद उयुँर स्‍यासे सतेक्‍यो। खाली ओपाहुनाराए ङ़ाक किर्‍या ओझाःवए नो ल़ुज़ाए ओपाँ माख्‍याधुक्‍यो। 27 है जैद ओपाल्‍यारानी तोबोलाई खुल्‍द, “झ्यालखानाल लिज़्‍याव यूहन्‍नाए ओङ़ै च़म्‍द रैके,” है दाद परींक्‍यो। नो झ्यालखानाल बाद यूहन्‍नाए ओङ़ै च़म्‍द, 28 ताथील झाःद नो ल़ुज़ालाई रैदिक्‍यो। नो ल़ुज़ाए फरी ओआमालाई लाँदिक्‍यो। 29 छींनी यूहन्‍नाए उसिसराए नो पाँर थैद ओमोरोलाई च़िहुद लाँद गादैकेर।

30 येसुए नो ओरापरींव ओसाचीर ओल्‍द हुद ओल्‍योक दुप्‍सिद यादोव य़ेन भरी, यारासथैव पाँ भरी है दोकेर। 31 नकिन येसुए नोरालाई, “जे जाँवा पै ऩासिन्‍याए जूँनी ङास तोबो साइँसुइँवक हुव ताके,” है यादोक्‍यो। काराव ल्‍यो ताकिन हो बेलाक मिँर याल्‍योक बनै कुधु ज़ आदा होदा लिन्‍यार यातावए काँर ज़्‍यान्‍या ब यामाधाःज़्‍याव। 32 है जैद येसु उसिसरास दोङ्गाल पसिद तोबो साइँसुइँव पोक बाकेर। 33 खाली मिँराए याबाज़्‍याव रँःद, “नोर ज़ याल्‍यो,” लिन्‍या सरेस्‍द प़ाइँनी ज़ धोंःहुद दह छ्यो छ्यो बाद नोरालाई बलेंद याङ़ात ज़ केस्‍नाकेर। 34 येसु दोङ्गातिन उझरिउ प़ाइँना मिँर बनै माहोल्‍या यारँःक्‍यो। नोर यागावला माल्‍यो बेधा स्‍यासोर यातावए येसुए उयुँ नाद परमेस्‍वरए ओपाँर कुधु ज़ यासथैक्‍यो। 6:34 गन्‍ती २७:१७; १ राज २२:१७; २ इति १८:१६; इज ३४:५

35 जाँ ऱिमदा ऱिमदा येसुए उसिसर ओल्‍योक हुद, “गे इताव साइँसुइँवक गेलिज़्‍या, नम ब नुप्नाके। 36 आव माहोल्‍यारालाई आजीलाव नाखार जीदा यापरींके, ज़्‍यावर लँःद घज़्‍युरक,” है यादोक ते, 37 येसुए, “आवरालाई ज़्‍यावर जे ज़ याव ताके,” है ओरादोक ते, उसिसराए, “हुकी आवरालाई ऩेसय तोला चाँदीए उमींवा भरेस रैद्यान्‍या है नलिज़्‍याव रो?” है यादोक ते, 38 येसुए, “जेस भरेस खागोता उलिज़्‍याव, चिऊनाचिके,” है ओरादोक ते, नोर चिऊनाद गनिद, “गेस भरेस पाँच गोता, ङाँः ऩेब्‍लो वाज़ लिज़्‍या,” है दोकेर।

39 हाःत ज़ येसुए उसिसरालाई नो माहोल्‍यारालाई पींव छी ल्‍यो बाँल ताना ताना जैद सोचोइँव यापरींक्‍यो। 40 नोर पचास पचास स़ोनो सय सयलाव ताना जैसिद च़ुसिकेर। 41 हाःत ज़ येसुए नो पाँच गोता भरेस ऩेब्‍लो ङाँः उकुइत रैद स्‍वर्गदा भाल्‍सिद, असिक ऩिद भरेसर केःद उसिसरालाई नो माहोल्‍याराए याङ़ाक याङ़ाक भाःद्याव यापरींक्‍यो। फरी नो ऩेब्‍लो ङाँःनिलाई मनी हिताव ज़ जैद भाःद याएक्‍यो। 42 नोर प़ाइँए याफू तसी ज़्‍युकेर। 43 नो यासय़ेलो भरेस स़ोनो ङाँःए उकुतुरार यादुप्‍क बाह्र झुर्नु ताके। 44 नो भरेस ज़्‍याज़्‍यावर खेपार वाज़ पाँच हजारा याल्‍यो।

45 हाःत ज़ येसुए उसिसरालाई दोङ्गाल पसिउ परींद दह होफताव बेथसेदा यादोज़्‍याव पोदा ओलकिन ङ़ादा ज़ यापरींक्‍यो। ओल येसुए ते नो माहोल्‍यारालाई याझ़िमदा याझ़िमदा ओरापरींज़्‍याव। 46 नोरालाई ओरापरींधुव छींनी ओल तोबो दाँदात बाद पोंखारिनाक्‍यो।

47 नम ओझ्यानाक उसिसर दोङ्गात दह माँजल ज़ यालिज़्‍याव। येसु ओबातङ पाखाक उलिज़्‍याव। 48 छींनी बतास उसिसराए ल्‍योदा बनै चोइस हुद नोर यादोङ्गालाई बनै धो धो यालाँज़्‍याव। येसुए नोरालाई रँःद रीलाव तीन बजेवाक ऱी तर्त तर्त याल्‍योदा ज़ बाके। यालापनिकाव घ्याँ बाव ओपैंज़्‍याक, 49 नोराए येसुलाई ऱी तर्त तर्त उहुज़्‍याव रँःद, “आव ते झ़्या ची सा!” लिद, 50 बनै छे·द चिर चिर क़िकेर। हाःत ज़ येसुए, “ताछे·च्‍यो, जेयुँ होलाँ जैचिके, ङा ची,” है दाद, 51 यास दोङ्गाल उपसिउ प़ाइँना ज़ बतास ब थकनिके। निताव रँःद उसिसर बनै अचम्‍ब ताकेर। 52 येसुए निताव भरेस ओसबा·व रँःद ब ओय़ेन चावस यामाथ·रैताव। यायुँ बनै खाव ओतावए मातीधुकेर।

53 दह होफताव गनेसरेत यादोज़्‍याव पोङ केस्‍द यादोङ्गालाई दह छ्योक सुर्द, 54 पाखाक यापुलुसो प़ाइँना नलाव मिँराए येसुलाई बेहार ज़ सरेस्‍द, 55 नजीलाव भरिल सरसाप बाद याजोरो हुव भरिरालाई याझेलोङ्गारास घुर्द येसु जोक जोक बाज़्‍या होक होक ज़ यारालाँकेर। 56 है जैद सहरल तादी ब, नाखारल तादी ब, पाखाङ तादी ब येसु जोक बाज़्‍या, होक ज़ मिँराए याजोरो हुवरालाई तोबोक यारादुप्‍ज़्‍याव। नोराए, “नक्‍वाए उतुपा वाज़ छापो गेदैक,” है दाद छापो भरी ओपो·स ज़ गराँकेर।