1 नल फरिसीर स़ोनो सदुकीराए येसुलाई जाँचिन्‍याए जूँनी ओल्‍योक हुद, “गेलाई स्‍वर्गताव नसरेस तोबो सतैंद्याव ताके,” है यादोक ते, 2 येसुए, “जे ऱिमदा नम घाव जेरँःकिन ‘पराःती बेल्‍न्‍या ले’ है लिन्‍या जेसैंज़्‍या। 3 छकाल्‍न्‍या नम घाव जेरँःकिन ‘आछिम नम वान्‍या ले’ लिन्‍या ब जेसैंज़्‍या। है जैद जे निताव नमताव सरेसर थ·रैधुज़्‍यावराए कै जैद बेलाए ओसरेसर ताकितर जेमाथ·रैधुज़्‍याव? 4 आव जुकलाव यायुँ माहुबो पापीराए सरेस वाज़ खिम्‍ज़्‍यार। खाली यादैरिज़्याव सरेस ते योनाए ओक्‍याँत ताव सरेस वाज़ दैरिज़्यार,” है दाद याख्‍यानैक्‍यो।

5 नकिन येसु उसिसरास दह होफत याबाक उसिसराए यास भरेस लाँन्‍या यामेंःव ओल्‍यो। 6 नक याकेसोत येसुए उसिसरालाई, “जे फरिसीर स़ोनो सदुकीराए भरेसल याझाःज़्याव वासःनी जोगोइसिद लिच्‍यो,” है ओरादोक ते, 7 नोराए या याल, “भरेस रैन्‍या गेमेंःवए नै ओदासिज़्‍याव ताक्‍या,” है यालिज़्‍याव। 8 येसुए थैद, “ए जेयुँ माहुबोर, काराव जे ङापाँलाई झन भरेस त॰दा जेथ·रैनाज़्‍याव? 9 आःपै जेमातीधुइ रो? पाँच गोता भरेसए पाँच हजारए याफू तसी ज़्‍यादकाव यासय़ेलो कुधु झुर्नु ओताव माःक रो? काता घरी जेमेंःधुव। 10 स़ोनो सात गोता भरेसए चार हजार मिँए याफू तसी ज़्‍यादकाव यासय़ेलो कुधु झुर्नु ओताव माःक रो? 11 कै जैद जेमाबुझिधुज़्याव? ङा ते भरेसए जूँनी ङापाँव माःक। फरिसीर स़ोनो सदुकीराए जूँनी ङापाँव ची,” है ओरादोक ते, 12 बल्‍ल, “भरेसए जूँनी ते माःक ची ओल्‍यो, फरिसीर स़ोनो सदुकीराए यापाँनी जोगोइसिद लिच्‍यो है ओदासिउ ची ओल्‍यो,” है लिकेर।

13 नकिन येसु कैसरिया फिलिप्‍पी खन्‍द जीदा ओबावत उसिसरालाई, “ङा मिँ मिन्‍सिद हुवलाई मिँराए सु है दाँज़्‍यार?” है ओरादोक ते, 14 उसिसराए, “ख्‍वाराए ऱील सछैंज़्‍याव यूहन्‍ना है दींज़्‍यार, ख्‍वाराए एलिया है दींज़्‍यार, ख्‍वाराए फरी यर्मिया ताक्‍या, सैं काताकाव अगमबक्ता ताक्‍या है दींज़्‍यार,” है यादोक ते, 15 येसुए, “जे ङालाई सु है जेदाँज़्‍या नी?” है ओरादोक ते, 16 सिमोन पत्रुसए, “नँ जींदो परमेस्‍वरए ओज़ा ख्रीस ज़,” है दोक्‍यो। 17 येसुए नो थैद पत्रुसलाई, “धन्‍याकाव, योनाए ओज़ा सिमोन पत्रुस, नल्‍योदा परमेस्‍वर दाइनो ताव। आव पाँ मिँए बुद्धीनी नथ·रैव माःक, स्‍वर्गताव ङाबाबुनी नथ·रैव ची। 18 है जैद ङा नमिन पत्रुस* 16:18 पत्रुसए ओअर्थ — पहर। जैद ङाईंज़्‍या। नो पहर तर्त ज़ ङामन्‍दली ङाजैरिज़्या, स़ोनो नर्गलाव सक्तीराए नोलाई पल्‍तैधुन्‍या मालेर। 16:18 १ कोर ३:११; १०:४; एफि २:२०; १ पत्र २:६-८; दर्सन २१:१४ 19 स्‍वर्गताव राज्‍यालाव साँचार ब नँलाई ङाईंरिज़्‍या। है जैद नँ आव मानुवात जो नथ·रैज़्‍या, स्‍वर्गत ब हो ज़ थ॰रिन्‍या ले। फरी, आव मानुवात जो य़ेन मादान्‍या नथ·रैज़्‍या, स्‍वर्गत मनी हिताव ज़ थ॰रिन्‍या ले,” है दोक्‍यो। 20 नकिन उसिस भरिरालाई, “ङा ख्रीस ज़ लिद सुलाई ज़ है तारादोच्‍यो,” है यादोक्‍यो।

21 हो बेलाकिन ज़ येसुए यरूसलेमल ओक्‍याँत हुरिज़्‍याव दुखर उसिसरालाई है यादोनाक्‍यो। “ङा यरूसलेमल ङाकेसोत गेदेसलाव स़ेरर, मुख्‍या पुजारीर स़ोनो सास्‍त्रीराए ल्‍योनी बनै धो सहिउ दुखर ङादैरिज़्‍या। नोराए यासैःनाव स़ोंलात सिउनी सैंसिद ङासोरिज़्‍या,” लिद उसिसरालाई है ओरादोक ते, 22 पत्रुसए येसुलाई तँदा लाँद सिङार्द, “प्रभु, परमेस्‍वरए निताव ताव तायोक, नक्‍याँत निताव खर्क ज़ ताताक,” है ओदोक ते, 23 येसु पत्रुसए ल्‍योदा भाल्‍सिद, “ए सैतान, ङाङ़ाकिन पुलुस्‍निके। नँ ते ङालाई परमेस्‍वरए ओय़ेनत ङायुँ केःद्यान्‍या ची नपैंके। नँ नयुँ परमेस्‍वरए ल्‍योदा माझाःद मिँराए याझाःज़्‍यावदा ची नझाःके,” है दोक्यो।

24 उसिस भरिरालाई येसुए, “जोए ङास हुन्‍या युँ दोज़्‍याव, होए उजिउए मया मादाद क्रुसत सिन्‍या मिताव दुखर सहिद ङाछींत उहुक। 25 जोए आव उजिउत ओललाई तान्‍या वाज़ खिम्‍ज़्याव, होए उजुनीलाई सम़ैज़्‍याव। फरी जोए आव उजिउत उजिउए मया मादाद ङा ङाजूँनी दोज़्याव, होए जुनी दैरिज़्‍याव। 26 जोए आव मानुवात लिज़्‍याव भरी दुप्‍द उजुनीलाई ओसम़ैकिन नोलाई काता फाइदा ची तायादा? नोए उजुनीए ओपोल काता यान्‍या? 27 ङा मिँ मिन्‍सिउ तछा स्‍वर्गताव ङाबाबुए ओज़गै मगैरास ओचाकर्‍यारास आव मानुवात फरी तखेप हुद मिँराए यादोव याय़ेनए ओजेला ङाराएरिज़्‍या। 16:27 भज ६२:१२ 28 ङा जेलाई साचो है ङादाचिज़्‍या, आकाव च्‍याँःसिद लिज़्‍यावरानी जे ख्‍वा ख्‍वाराए ङा मिँ मिन्‍सिउलाई ङाराज्‍यास ङाहुज़्याव जेमारँःवा पै सिन्‍या जेमाले,” है लिद यासथैक्‍यो।