1 नकिन जाँवाक येसु सहर सहर, नाखार नाखार भरी ब परमेस्‍वरए ओराज्‍यालाव चाव था ओरासथैज़्‍याव। बाह्र जना उसिसर ब ओलस ज़ यालिज़्‍याव। 2 येसुए ङ़ादा माचाव बेथारानी, माचाव पुरूसरानी ओरासगराँव मेंमार ब तोबो ऩेब्‍लो ओलस ज़ यालिज़्‍याव। नोरानी तोबो मरियम मग्‍दलिनी, नोए ओक्‍याँतिन सात गोता माचाव पुरूसर पले·द ओयो। 3 फरी राजा हेरोदए उझ़िमलाव य़ेन चलैज़्‍याव खुजासए ओज्‍या योअन्‍ना, स़ोनो सुसन्‍ना, नोराकिन छुतर ब याल्‍यो। नो भरिए या याझ़िमनी ज़ येसुलाई उसिसरास माथैंव मायो·वल सयो·द याराएज़्‍याव।

4 नजीलाव नाखार नाखारलाव मिँर येसुए ओल्‍योक बनै माहोल्‍या याहुज़्‍याव। नोरालाई अइ लिद घर्ती तोबो झाःद याएक्‍यो, 5 “तोबो मिँ ओएँःल धुर वास्‍ना बाके दी। धुर ओवास्ज़्याक ख्‍वा धुर येम जीदा परिके दी। नो येमलाव परिउ ख्‍वा मिँराए छिल्‍केर दी, ख्‍वा बाज़ाराए ज़्‍युकेर दी। 6 फरी ख्‍वा धुर गम छ्या छ्या ल्‍यो ओदादरत परिके दी। नत उझी ओमाल्‍योए उपरीव प़ाइँना ज़ थँके दी। 7 फरी ख्‍वा धुर ज़ुर ऱमराए खार्ल परिके दी। नो ज़ुर ऱमरास सरा भरी परीद ज़ुर ऱमराए गाल्‍क्‍यो दी। 8 फरी ख्‍वा धुर ते गमस्‍याल परिके दी। नो बनै चावस परीद सय गुना सैके दी।” येसुए निताव पाँर सथैद माहोल्‍यारालाई है ओरादोज़्‍याव, “आव पाँ जोए थैन्‍या उयुँ लिज़्‍या, चावस ओथैवक।”

9 येसुए उसिसराए ओललाई, “आव नझाःव घर्तीए ओअर्थ काता?” है यादोक ते, 10 येसुए, “जेलाई वाज़ परमेस्‍वरए ओराज्‍यालाव कप्‍सिउ पाँर छर्लङ्ग सतैंसिउ लिज़्‍या, उपुर्कावरालाई ते घर्ती मिताव ज़ लिज़्‍या। है जैद,

11 “है जैद नो आछ्याकाव ङाझाःव घर्तीए ओअर्थ आव ज़ — धुर परमेस्‍वरए ओपाँ ज़। 12 नो येमलाव परिउ धुर आव ज़, जोए परमेस्‍वरए ओपाँ ओथैक सैतान हुद ‘आव ते परमेस्‍वरए ल्‍योदा बाद अजम्‍बरी जुनी दैवा’ लिद उयुँलाव पसिउ पाँ ब स्‍याप सिप जैद लाँदिज़्‍याव। 13 फरी नो ओदादरताव परिउ आव ज़, जोए परमेस्‍वरए ओपाँ ओथैव प़ाइँना रेंद ज़ भैंःज़्‍या। खाली ओजरा माल्‍यो मिताव ओतावए नो पाँत जाँवा पै बाद कातारानी दुखर खिरीर उपसिकिन ह्‍वाँ हों ऱास्‍ज़्‍याव। 14 फरी नो ज़ुर ऱमराए खार्लाव परिउ आव ज़, जोए थैन्‍या ते थैज़्‍याव, खाली नोए ‘आव ङाजिउत कै तान्‍या ओताव, कातानी कोसै जैद थाँतस लिन्‍या?’ लिद व़ीनी फुइ उलिज़्‍यावए नो परमेस्‍वरए ओपाँत ओसै माझाःज़्याव ताज़्‍या। 15 फरी नो गमस्‍याल परिउ आव ज़, जोए परमेस्‍वरए ओपाँ थैद जात्त ज़ माऱास्‍द चाव साचो युँस दोज़्‍याव, नो परमेस्‍वरए ओपाँत थ॰रिद ओसै झाःज़्याव चाव धुर स्‍यासो ज़ ताज़्‍या।”

16 “सुए ज़ ल़ोसै तैंःद जाए माकबो, खात खँल ब माम़ोंव। बुरू ‘झ़िमल पसिज़्‍यावरालाई पलाँ घताक’ लिद दिउ बाल्‍न्‍यात झाःज़्‍याव। 17 हिताव ज़ मारैंःव भरी तछा रैंःन्‍या ज़ ले, कप्‍सिउ भरी ब फैसिद पलाँवल तान्‍या ले। 18 है जैद जे नो पाँलाई पाथस थैच्‍यो। जोए धिद थैज़्‍याव, होए झन ज़ तीधुन्‍या ले। जोए चावस माथैव, होए झन ज़ थैन्‍या युँ मादाद ङ़ादाङाव ओथैव ब ओपो·स ज़ म़ान्‍या ले।”

19 छींनी तछा येसुए ओआमा स़ोनो ओभाइर येसुस दैसिना याहुक मिँर बनै माहोल्‍या यातावए ओल्‍योक बान्‍या येम मादैकेर। 20 नलाव तोबो ऩेब्‍लो मिँराए येसुलाई, “लाँःक नआमा स़ोनो नभाइर नँस दैसिना हुद लेर,” है यादोक ते, 21 येसुए, “जोराए परमेस्‍वरए ओपाँ थैद दोज़्‍यार, होर ज़ ङाआमार ङाभाइर,” है यादोक्‍यो।

22 तछा येसु उसिसरास दोङ्गाल पसिद नोरालाई, “दह होफत गेबाया,” है दाद नो यालिज़्‍याव दोङ्गास बाकेर। 23 याबाज़्‍याक येसु उमीर हुद ङ़ल्‍द उलिज़्‍याव। नाःत ज़ दहल ल्‍यो माल्‍यो बतास हुद ऱी बनै छल्‍किद दोङ्गाल पसिद नोरालाई गदैवा गदैवा याजैक्‍यो। 24 उसिसराए येसुलाई सोचोइद, “गुर्बा, गुर्बा, खदम ज़ गेतारिके,” है यादोक ते, येसु सोद बतास स़ोनो ऱीनिलाई निसिङार्क्‍यो। हो प़ाइँना ज़ बतास ब थकनिके, ऱी ब अदिके। 25 हाःत ज़ उसिसरालाई, “खैकी जेयुँ उहुबो?” है ओरादोक ते, नोर छे·द अचम्‍ब ताद या याल, “आव किताव मिँ ओताव? बतासर ऱीराए ब ओपाँ यादोज़्‍याव,” है लिकेर।

26 येसु उसिसरास गालील दह होफताव गेरासेनस यादोज़्‍याव पोङ केस्‍केर। 27 दोङ्गानी यापुलुसोत नलाव सहरनी बो·लैज़्‍याव पुरूसए क्‍योःद ओनैज़्‍याव तोबो मिँस दैसिकिनी। नो मिँ क्‍वार ब ओमाक्‍वाइसिज़्‍याव, झ़िमक मालिद रील ब खादर जीदा ज़ उलिज़्‍याव। 28 नोए येसुलाई उरँःव प़ाइँना बनै चिर चिर क़िद येसुए उखँत फुलुप्‍सिद बनै चोइस, “अ येसु, माहान परमेस्‍वरए ओज़ा, ङास नखै काता उलिज़्‍याव? नँस ङाबिन्‍ती लिज़्‍या, ङालाई दुख तायाँयो,” है दोक्‍यो। 29 नो माचाव पुरूसलाई येसुए ङ़ादा ज़ “पुलुस्‍नी” है दाद ओनैज़्‍याव। नो माचाव पुरूसए नो मिँलाई घरी पाला ज़ ओक्‍योःज़्‍याव। कैताक मिँराए झँए साँगलए किद गुन्‍या मिँर यारानैदी ब साँगलर फ्या·द नो माचाव पुरूसए साइँसुइँवक ओलाँज़्‍याव।

30 येसुए फरी, “नमिन कै?” है ओदोक ते, “ङामिन फौजी,” है दोक्‍यो। नोए ओक्‍याँत माचाव पुरूसर कुधु याल्‍योए ज़ ‘फौजी’ है ओदोव। 31 फरी नोराए, “गेलाई नो नर्गलाव भल्‍खादाल ताझाःसियो,” लिद बिन्‍ती यादोज़्‍याव।

32 नो बेलाक ज़ नक तोबो दाँदात ऊर तबगाल यालाज़्‍याव। नो माचाव पुरूसराए, “गेलाई बुरू नो ऊराए क्‍याँत बाव यासिके,” लिद बिन्‍ती यादोक ते, येसुए भैंःद याएक्‍यो। 33 है जैद नो माचाव पुरूसर नो बूलिउ मिँए ओक्‍याँतिन पुलुस्‍द ऊराए क्‍याँत बाकेर। हो प़ाइँना ज़ ऊ भरी बूलिद दाँदातिन सुइँःकिनाद दहल ज़ो·द प़ाइँ ज़ स़ुद सिकेर।

34 निताव रँःद नो ऊ गावलार धोंःनाद नाखार जीदा, सहर जीदा बाद नो यारँःव भरी है यारादोकेर। 35 नो पाँ थैव भरी साचो सैं माःक लिद चिऊना हुवर येसुए ल्‍योक याबाक नो माचाव पुरूसराए याऱासो मिँ ओक्‍वार क्‍वाइसिद येसुए उखँक सोजोकाव ज़ च़ुसिद उलिज़्‍याव रँःकेर। निताव रँःद नोर छे·केर। 36 नो चिऊना हुवरालाई, नो य़ेन रँःव भरिए, “बूलिउ इतावनी ज़ गराँके,” लिद है यारादोक ते, 37 नो गेरासेनस खन्‍द जीलाव मिँराए याछ्याचेए येसुलाई, “आनी पुलुस्‍द बान्‍के,” लिद बिन्‍ती दोकेर। है जैद येसु दोङ्गाल पसिद ओल्‍द बाव ओपैंज़्‍याक, 38 निताव रँःद नो माचाव पुरूसराए याऱासो मिँए, “ङालाई ब नँस लाँनाके,” है लिद बिन्‍ती ओदोक ते, येसुए अइ लिद परींक्‍यो, 39 “नँ नझ़िमदा बाद ‘परमेस्‍वरए ङाजूँनी आःल्‍दिउ य़ेन दाद्याँक्‍यो’ है लिद सथैनाव ताके।” है जैद नो मिँ बाद सहर भरी ओल उजूँनी येसुए ओदोव य़ेन यासथैक्‍यो।

40 आफताव मिँर बनै माहोल्‍या दुप्‍सिद ‘येसु खर्क हुके’ लिद कींद यानैज़्‍याव। येसु ओल्‍द उहुवत नोराए सुम्‍केर। 41 नोरास तोबो याइरस यादोज़्‍याव धर्मसास्‍त्र झ़िमलाव याघेप्‍पा उलिज़्‍याव। नो मिँ येसुए ल्‍योक हुद उखँत फुलुप्‍सिद, “ङाझ़िमक तखेप बाद्याव ताके,” लिद बिन्‍ती दोक्‍यो। 42 नोए तोबोका तोबो बाह्र बर्सकाव मेंमा ओज़ा ओजोरो हुद सिउ ओपैंज़्‍याव।

है जैद येसु नोस ओबाज़्‍याक मिँर बनै माहोल्‍या ओलस याछुइसिनाज़्‍याव। 43 नो माहोल्‍याराए याखार्ल तोबो बाह्र बर्स भरी ओक्‍याँतिन झी भोन्‍या बेथाए क्‍योःद ओनैज़्‍याव मेंमा ब उलिज़्‍याव। नो मेंमालाई सुए ब यामासगराँधुज़्‍याव। 44 है जैद नो मेंमा माहोल्‍याराए खार्ल छुइसिनाद येसुए उछींनी हुद ओक्‍वाए उतुपात छाप्‍दिक्‍यो। ओछापो प़ाइँना नो झी भोन्‍या बेथा गराँके। 45 हाःत ज़ येसुए, “ङालाई सुए ओछाप्‍नाव?” है ओरादोक ते, प़ाइँए ज़ “ङा माःक” है दोकेर। पत्रुसए फरी, “प्रभु, माहोल्‍यार बनै छुइसिहुज़्‍यार सानी,” है ओदोक ते, 46 येसुए, “ङालाई तोबोए छाप्‍द ज़ नैनाव। ङाक्‍याँतिन सगराँन्‍या सक्ती पुलुस्‍द ओबाव दार्सिद ङाले,” है दोक्‍यो। 47 हाःत ज़ नो मेंमाए ‘ङा ङामाम़ोंसिधुके ब’ लिद ओछ्याचेए गूद येसुए उखँत फुलुप्‍सिद प़ाइँराए ङ़ाक येसुलाई, “ङा सुए ज़ यामासगराँनाधुज़्‍याव बेथाए उजूँनी ज़ ङाछाप्‍निउ। ङाछाप्‍निउ प़ाइँना ज़ ङागराँके,” है ओदोक ते, 48 येसुए, “अ माँज़ा, ङालाई नयुँ नसुहुबोनी ज़ नगराँके। चावस बानी,” है दोक्‍यो।

49 येसु नो मेंमास ओपाँज़्‍याक ज़ धर्मसास्‍त्र झ़िमलाव याघेप्‍पा याइरसए उझ़िमनी तोबो मिँ हुद याइरसलाई, “गुर्बालाई काराव हत्‍या यान्‍या, नज़ा सिधुके,” है दोक्‍यो। 50 नोए ओपाँ थैद येसुए याइरसलाई, “नयुँ तासतेयो, नयुँ वाज़ उहुप्‍क। नो नज़ा बाँचिन्‍या ले,” है दाद, 51 याइरसए उझ़िमक याकेसोत छुतरालाई ओलस बाव मायाद पत्रुस, यूहन्‍ना, याकूब स़ोनो नो ल़ुज़ाए ओबाबु ओआमानी वाज़ लाँद झ़िमल पसिकेर। 52 नल नो ल़ुज़ाए उजूँनी मिँर बनै याघर्ज़्‍याव रँःद येसुए, “ताघर्च्‍यो, ल़ुज़ा मासिए, अइज़ ङ़ल्‍द ले,” है ओरादोक ते, 53 नो घर्ज़्‍यावराए ‘सिधुव ज़’ लिन्‍या यासैंवए येसुलाई हसैकेर। 54 हाःत ज़ येसुए नो ल़ुज़ालाई उकुइनी क्‍योःद, “अ बुची सोनिके,” है ओदोव प़ाइँना ज़, 55 उपुरूस ओल्‍द हुद सोके। नकिन येसुए, “आवलाई ज़्‍यान्‍यार जैदिचिके,” है यादोक्‍यो। 56 येसुए ओय़ेन रँःद नो ल़ुज़ाए ओबाबु ओआमानी अचम्ब ज़ ताकिनी। खाली येसुए, “आव य़ेन सुलाई ज़ है तारादोच्‍यो,” है यादोक्‍यो।