1 नकिन येसु ध्‍यान झ़िमनी पुलुस्‍द ओबाज़्‍याक उसिसराए, “गुर्बा, आव ध्‍यान झ़िम काता आः चाव जैसिउ उलिज़्‍याव,” है यादोक ते, 2 येसुए, “हैज़, आव भरी चिऊचिके। खाली ङा जेलाई साचो है ङादाचिज़्या, छींनी तछा आव भरी तैःद लुँए तर्त लुँ ब रहिन्‍या माले,” है यादोक्‍यो।

3 नकिन जाँवाक येसु जैतून दाँदात च़ुसिद उलिज़्‍याक उसिसर याबातङ अलगज़ा ओल्‍योक बाद, “आव नपाँ भरी खर्क ओतारिज़्‍याव, नँ हुन्‍या बेला स़ोनो आव जुक खेम्‍न्‍या बेलाकाव सरेस किताव ओतारिज़्‍याव? गेलाई है दासिके,” है यादोक ते, 4 येसुए, “जेलाई सुवाराए झुकैचिर्‍या, जे सैंसिद जोगोइसिद लिच्‍यो। 5 मिँर ङा ङामिन कुद ‘ङा ज़ ख्रीस’ है लिद कुधु ज़ हुद कुधुलाई याराझुकैरिज़्‍यार। 6 स़ोनो ‘आङ लरैं ताज़्या, होङ लरैं ताज़्या’ है यालिज़्‍याव जेथैक जे ताछे·च्‍यो। आव जुनी ब ताव ज़ परिए, खाली नो खेम्‍न्‍या बेला माःक। 7 नोकिन ङ़ादा जात जात, राज्‍या राज्‍या लरैं दान्‍या लेर। पो पोल भोंचालोर अनिकालर ब तारिज़्‍या। 8 आव भरी मेंमाए ज़ा दैन्‍या बेलाक ओघर्लिज़्याव मिताव सुरूलाव दुख वाज़ लिज़्‍या।

9 “नो बेलाक जेलाई मनी जेखिरी पसिद सूँपिद सैःचिरिज़्‍यार। जे ङामिनतावर जेतावए प़ाइँ जातलाव मिँराए सोचिरिज़्‍यार। 10 नो बेलाक कुधुए ज़ यायुँ क़्याद ङालाई ऱास्‍नारिज़्‍यार। नोर ख्‍वा ख्‍वार या याल ब सोसिद धोका यासिरिज़्‍यार। 11 फरी कुधुए ज़ आव ङापाँ बले·द तँदा पैन्‍यार जैसिद कुधुलाई ज़ याराबले·रिज़्‍यार। 12 आव मानुवात अधर्मलाव य़ेन बनै ज़ उमचिउए कुधु मिँराए यामया खेस्‍रिज़्या। 13 खाली जो आव दुखर ओमाखेमा पै थ॰रिज़्‍या, होए ज़ अजम्‍बरी जुनी दैन्‍या ले। 14 परमेस्‍वरए ओराज्‍यालाव आव चाव था संसार भरिलाव काना कुनीङाव प़ाइँ जातलाव मिँराए थैद परमेस्‍वरए ओसाची यादैवत, बल्‍ल आव जुक ब खेम्‍न्‍या ले।

15 “है जैद आव ब सैंच्‍यो, जे दानिएल अगमबक्ताए ओसरो मिताव नो ध्‍यान झ़िमलाव चोखो पोल तोबो फुरी हुद ऩुल्‍पा ऩुल्‍मा ओजैहुव जेरँःक, 24:15 दान ९:२७; ११:३१; १२:११ 16 हो बेलाक यहूदियाल लिज़्‍यावर गों जीदा ओधोंःरक। 17 थालात लिज़्‍यावर ब याझ़िमलाव याआल मालर ताच़ानारक। 18 एँःल लिज़्‍यावर मनी याक्‍वार च़ाना याझ़िमदा ताबारक। 19 नो बेलाक याफूल याज़ा ल्‍योर स़ोनो नुइँ सवैज़्याव आमार युँ नावज़ार। 20 खाली धोंःन्‍या बेला ज़्‍यूँःव साहाक स़ोनो ऩासिन्‍या छ्याम ताताक लिद परमेस्‍वरलाई पोंखारिच्‍यो। 21 हो बेलाकाव दुख बनै धो सहिउ तारिज़्‍या। निताव दुख आव संसार सुरू ओतावकिन आःपै माहुताए, निताव दुख नोकिन छींनी ब तान्‍या माले। 24:21 दान १२:१ 22 निताव बेला तावका ताव ज़ उलिकिन सु ज़ रहिन्‍या मालेर। खाली ओल परमेस्‍वरए छाँतिद ओरानैज़्‍याव उमींराए जूँनी नो बेला सुतुईंद्यान्‍या ले।

23 “नो बेलाक जेलाई सुवाराए, ‘ख्रीस आङ हुद ले, होङ हुद ले,’ है यादाचिकिन नोरालाई तारापतिच्‍यो। 24 ख्‍वार ङा ङामिन कुद ख्रीस जैसिद हुन्‍या लेर, ख्‍वार परमेस्‍वरए उपुरूसनी पाँव जैसिद हुन्‍या लेर। नोराए अचम्‍ब अचम्‍बलाव सरेसर य़ेनर जैद कुधुलाई झुकैन्‍या लेर। परमेस्‍वरए ओराछाँतिउरालाई मनी झुकैन्‍या छ्यास लिज़्‍या। 25 है जैद आव पाँर जेलाई ङ़ादा ज़ है दाद ङानैचिए। 26 मिँराए जेलाई, ‘ख्रीस फलाना बनल हुद ले,’ है यादाचिक होदा ताबाच्‍यो, फरी ‘झ़िम जींल लिज़्‍या,’ है यादाचिकिन नोराए यापाँ ब तापतिच्‍यो। 27 ङा मिँ मिन्‍सिउ ङाहुन्‍या छ्याम किताव पुर्बङ बिजुली उमिल्‍किक पछ्युँङ पै ज़गै जैज़्‍याव, हिताव ज़ ङा मनी प़ाइँए रँःन्‍याक मी चिकलामत ज़ हुन्‍या ङाले। 28 किताव खरल ओताक वाज़ का गिद्दर हुज़्‍यार, हिताव ज़ तान्‍या ले।”

29 “हो बेलाकाव दुख ओखेमोत निमी ब चुम चुमो तारिज़्‍या, स़्यावैए ओज़गै ब म़ारिज़्‍या, सोरोर ब नमतिन तेरिज़्‍यार, नमताव भरी ब यासतर म़ाद थोनो·सिन्‍या लेर। 24:29 यसै १३:१०; ३४:४; इज ३२:७; योए २:१०,३१; ३:१५ 30 नाःत ज़ मिँ मिन्‍सिउ ङाहुन्‍या सरेस नमत रैंःरिज़्‍या। बनै ज़गै मगैव ङासक्तीरास बादलरास स्‍वर्गनी ङाहुज़्‍याव आव मानुवाताव प़ाइँ जातलाव मिँराए रँःद नोर यायुँर स्‍यासे सतेन्‍या लेर। 24:30 दान ७:१३; जक १२:१०-१४ 31 नाःत ज़ तोबो भोंकरए ओर्गात स्‍वर्गताव ङाचाकर्‍यार ङारापरींवत नोराए नाम नमलाव प़ाइँ काना कुनीलाव छाँतिद ङारानैज़्‍याव ङामींरालाई ङाल्‍योक यारादुप्‍रिज़्‍यार।”

32 “आव ब सैंच्‍यो, किताव नेभारा सीं ओमोम्‍नाक ‘उभ्‍याली उहुनाव ची ओल्‍यो’ है जेलिज़्‍या, 33 हिताव ज़ नो है ङादाचिउ पाँ भरी ओतानाज़्याव जेरँःक ‘ख्रीस उहुन्‍या बेला ओतानाव ची ओल्‍यो’ लिन्‍या सैंच्‍यो। 34 ङा जेलाई साचो है ङादाचिज़्‍या, आव भरी ओमातावा पै आव जुक खेम्‍न्‍या माले। 35 आव नाम नम ते खेम्‍न्‍या ले, ङा ङापाँ ते खर्क ज़ म़ान्‍या माले।”

36 “नो छ्याम, नो बेला सुए ज़ मासैंर। स्‍वर्गताव चाकर्‍याराए ब मासैंर, परमेस्‍वरए ओज़ाए ब मासैंव, स्‍वर्गताव ङाबाबुए वाज़ सैंज़्‍याव। 37 है जैद ङा मिँ मिन्‍सिउ ङाहुन्‍या बेला नोआए ओपालाकाव मिताव ज़ तारिज़्‍या। 24:37 उत ६:५-८ 38 नोआए ओपालाकाव मिँर ब ऱीए ओमारागदैवा पै ज़्‍याद ओद, ज्‍यार रेर ब दाव य़ेन ज़ यादोज़्‍याव। नोआ ऱी जहाजल ओमापसिवा पै नोर नो य़ेन दाव ज़ यानैज़्‍याव। 39 ऱीए साम सुम ओमारागदैवा पै ‘इताव गेतारिज़्‍या’ लिन्‍या मासैंकेर। ङा मिँ मिन्‍सिउ ङाहुन्‍या छ्याम ब हिताव ज़ तारिज़्‍या। 24:39 उत ७:६-२४ 40 नो बेलाक एँःल य़ेन दाज़्‍यावनिलाई तोबोलाई लाँरिज़्‍याव, तोबोलाई ख्‍यानैरिज़्‍याव। 41 हिताव ज़ फरी राँथै हे·ज़्‍याव मेंमानिलाई तोबोलाई लाँरिज़्‍याव, तोबोलाई ख्‍यानैरिज़्‍याव।

42 “है जैद सैंसिद लिच्‍यो, जेप्रभु आव छ्याम हुरिज़्‍या लिन्‍या जेमासैंए। 43 आव ब सैंच्‍यो, तोबो झ़िमए ओर्गेए ‘चोर आछिम रील आः बेलाक हुरिज़्‍या’ लिन्‍या ओसैंकिन नो सैंसिद लिद उझ़िम पा·व माएखेहो। 44 हिताव ज़ जे मनी सैंसिद लिच्‍यो, काराव ल्‍यो ताकिन ङा मिँ मिन्‍सिउ मनी जेमासैंद उमँःजानी ज़ ङाहुरिज़्‍या।”

45 “किताव तोबो धनी मिँए सतस दाज़्याव ओतह ल्‍यो ओनोकोरलाई उझ़िमलाव य़ेन भरी उकुइत याद ओय़ेन दाज़्यावरालाई थिक बेलाक ज़्‍यावर यान्‍या जैद ओख्‍यानैक, 46 नो नोकोरए सतस य़ेन ओदोज़्‍याव ओघरपतीए ओदैहुकिन नो नोकोर असिक दैव ज़ तान्‍या ले। 47 ङा साचो है ङादाचिज़्‍या, नो ओघरपतीए प़ाइँ ज़ उकुइत यान्‍या ले। 48 फरी नो नोकोर माचाव ओताकिन, ‘ङाघरपती हतप्‍त माहु,’ लिद, 49 ओलस य़ेन दोज़्यावरालाई प़ोद, ओल ज़्‍याद ओद मँःए मँःए ओबाऱिज़्‍याक, 50 ओमासैंद ओघरपतीए ओदैहुकिन, 51 नोलाई चम चम जैद कैफतीर ओराख्‍याज़्‍याव पोल ख्‍यान्‍या ले। नल नलावरास याहार ङर ङर कैद चिर्लनी बिर्ल घर्न्‍या लेर।”