1 गे निताव गेपाँक, “गेङ़ाक अइज़ चाव जैसिद यासतैंसिज़्‍याव ताखेहो,” है तालिच्‍यो। गेलाई छुतराए माँःती जेल्‍योदा गेहुदी ब जेल्‍योनी गेबादी ब, “आव मिँ इताव ज़, ओय़ेनर ब इताव ज़ लिज़्‍या,” लिद काता चिथी सर्द याव उपरिज़्‍याव रो? 2 गेय़ेन सरैंःद्याज़्‍याव चिथी ते जेक्‍याँताव गेदोव य़ेन ज़ लिज़्‍या। नो चिथी भरी गेयुँल ज़ सर्सिउ लिज़्‍या, प़ाइँए प़रिधुन्‍या ब लिज़्‍या। 3 है जैद जे ज़ गेजूँनी गेसाची याज़्‍याव ख्रीसए सर्द ओयासिउ चिथी। नो चिथी मसीए सर्सिउ ब माःक, लुँए फल्‍यात खुपिसिउ ब माःक। जींदो परमेस्‍वरए छैंव उपुरूसनी युँत ज़ सर्द्याव दोज़्‍याव। 3:3 प्रस २४:१२; यर ३१:३३; इज ११:१९; ३६:२६

4 आव जेजूँनी है ङालिज़्‍याव पाँ भरी ख्रीसनी परमेस्‍वरए दाद्यासिवा ज़ लिद ङायुँ हुबो ज़ लिज़्‍या। 5 जो य़ेन तादी ब गेनी ताव है लिद गे है गेमालिधुइ, परमेस्‍वरए वाज़ ओय़ेन दाधुन्‍यार जैसिज़्‍याव। 6 गेलाई साःरो बाचालाव य़ेन दान्‍या स्‍यासोर जैज़्‍याव मनी ओल परमेस्‍वर ज़। नो बाचा पाखाताव सर्सिउ कानुन मिताव ते माःक, परमेस्‍वरए छैंव उपुरूसनी युँल ज़ ताज़्‍या। नो पाखाताव सर्सिउ कानुनए सिन्‍याल झाःज़्‍याव, छैंव पुरूसए ते अजम्‍बरी जुनी यासिज़्याव। 3:6 यर ३१:३१

7 नो ङ़ादाङाव सिन्‍याल झाःज़्‍याव लुँए फल्‍याताव खुपिसिउ कानुनए मोसाए ओङाः बनै ज़गै ज़गै ओतावए नो ज़गै छ्यावा पै वाज़ उरहिदी ब इस्राएलीर मोसाए ओङाःत माभाल्‍सिधुकेर। 3:7 प्रस ३४:२९ 8 है जैद नो छैंव पुरूसनिकाव साःरो ओदोज़्‍याव ओय़ेन झन ज़ ज़गै मगैव कै जैद माताके? 9 निताव सिन्‍या सजाल झाःज़्‍याव कानुन उगुन ल्‍यो ज़गैव ओताकिन, परमेस्‍वरए उयुँलाव मिताव जैव दोज़्‍याव साःरो ते झन ज़ उगुन ल्‍यो ज़गै मगैव ताज़्‍याखेहो सानी। 10 नो साःरो बनै ज़ ज़गै मगैव ओतावए ङ़ादाङाव ज़गैलाई ओज़गै सम़ैदिक्‍यो। 11 नो ओज़गै म़ावलाई ओज़गै ल्‍यो है गेदोकिन, नो ओज़गै माम़ाज़्‍यावलाई झन ज़ ओज़गै ल्‍यो है ल्‍यो परिके।

12 है जैद नो गेरासथैज़्‍याव साःरो पाँ गेयुँ हुप्‍द माछे·द ज़ गेरासथैज़्‍या। 13 गे नो मोसाए ओङाःताव ज़गै ओखेम्‍नादी ब, “इस्राएलीराए आव ज़गैत माभाल्‍सिधुर,” लिद ओङाः कप्‍द ओराएज़्याव मिताव गे ते आव साःरो ज़गैव पाँ कबो मापरिए। 3:13 प्रस ३४:३३ 14 नोर यायुँ बनै खाव एकोहोर्‍यासोर यातावए मोसाए ओङाः कप्‍द याएक्‍यो। आःपै ब कानुनलाव पाँ याप़रिदी ब नोरालाई कप्‍सिउ मिताव ज़ लिज़्‍या। नो पाँ ख्रीसए ओक्‍याँत याथ·रैधुकिन वाज़ फैसिज़्‍या। 15 खाली नोर आःपै मोसाए ओसरो पाँ याप़रिक काता ज़ मासैंन्‍यार यायुँ कप्‍सिउ मितावर ज़ लिज़्‍यार। 16 प्रभुए ल्‍योदा युँ फर्कैकिन वाज़ नो युँलाई मासैंन्‍या जैज़्‍याव कप्‍सिउ फैसिज़्‍या। 3:16 प्रस ३४:३४ 17 प्रभु ते पुरूस ज़। जोए ओक्‍याँत प्रभुए उपुरूसए बास दाद नैव, नो मिँलाई प़ाइँ फैसिउ लिज़्‍या। 18 गे ख्रीसए उमिनतावर गेङाः माकप्‍सिउ मितावर गेतावए प्रभुए ओज़गै सरैंःज़्‍याव धर्पन मितावर गेलिज़्‍या। गेप्रभुए ओज़गै खा गेरँःज़्‍या, हाःज़ गे मनी ओल उपुरूसनी ओगेर सरैंःद्याद ओल मिताव ज़ तानाद ज़गैवर गेतानाज़्‍या।