1 ናንጊና ናንጋ ጎዳ ሂዚ ጋዓኔ፦ «ታና ዖኦጪባኣ ዓሶሞ ታ ፔጋዼኔ፤ ታና ኮዒባኣዞንሢም ታ ጴዼኔ፤ ታና ካኣሽካኒ ኮዒባኣ ዴሮም ‹ዮኦ፥ ታኣኒ ሃይካኬ› ጌዔኔ። 65፡1 ሮሜ 10፡20። 2 ፔኤኮ ፑርቶ ማሊፆ ጊንፆ ዓኣዺ ኮሺ ማዔ ጎይፆ ሃንቱዋ፥ ዋይዞዋ ዒፃ ዴራ ታ ባንሢ ሙካንዳጉዲ ሮኦሮ ጉቤ ኩጮ ታኣኒ ዔያቶም ቤኤዜኔ። 65፡2 ሮሜ 10፡21። 3 ዬይ ዓሳ ዔቦ ቱኮ ጎዦ ጋራ ሜሌ ፆኦዞም ዒንጎ ባኣዚ ሺኢሺሢና፥ ጊንሣ ሃሣ ዢኢጮ ዓጮና ኮሺንቴ ቤዞይዳ ዑንጆ ጩቢሺሢና ታና ዻጋሳያኬ። 4 ዬያጉዲ ሃሣ ዔያታ ዱኡፒ ቤስካ ዴዓያ፥ ዓኣሺንቴ ቤሲዳ ዋኣንቶ ዎርቃያ፥ ጉዱንሢ ዓሽኪ ሙዓያ፥ ዔያቶኮ ዖቶ ጋራ ዒኢቴ ዓሽኮ ዋኣፆ ጌሣያኬ። 5 ዔያታ ፔና ‹ኑኡኒ ዱማዼያ ማዔሢሮ ኑ ባንሢ ዑኪፖቴ!› ጋዓኔ፤ ዬይ ባካ ሮኦሮ ጉቤ ታሚጉዲ ዔኤታ ታኣኮ ዼኤፖ ዻጎ ዔቂሳኔ።

6 «ዬይ ታ ቤርታ ፃኣፒንቲ ዓኣኔ፤ ጎኔና ጉቤ ታ ዔያቶም ማሂ ጪጋንዳኣፓዓቴም ዚቲ ጋዓዓኬ። 7 ዔያቶ ጎሞንታ ዔያቶኮ ዓዶንሢ ጎሞንታሮ ታ ኮሜ ኮፃንዳኔ፤ ዹኮ ዑፆይዳ ዒንጎ ባኮ ሜሌ ፆኦዞም ሺኢሼሢሮ፥ ጌሜሮ ዑፆይዳ ታና ዔያታ ጫሽኬሢሮ ዔያታ ማኬ ባኮና ዔያቶም ማኪንታንዳኔ፤ ዔያታ ማዼ ማዾጉዴያ ዔያታ ዔካንዳኔ» ጋዓኔ ናንጊና ናንጋ ጎዳሢ።

8 ናንጊና ናንጋ ጎዳ ሂዚ ጋዓኔ፦ «ዎይና ዓሚ ዓኣንቴ ‹ኮሺ ማዔ ዎይኖ ዑዣ ዒኢፓ ኬስካንዳሢሮ ቲቂፖቴ› ጋዓሢጉዲ፥ ታኣኒያ ታኣኮ ማዻ ዓሶሮ ጌዒጋፓ ዴሮ ጉቤና ባይዛዓኬ። 9 ያይቆኦቤም ናይ ታ ዒንጋንዳኔ፤ ዪሁዳ ታኣኒ ታኣኮ ዹኮ ዓጮ ዻካልሳንዳኔ፤ ታኣኒ ዶኦሬዞንሢ ዓጬሎ ዔካንዳኔ፤ ታ ዓይላ ዒኢካ ናንጋንዳኔ። 10 ሳኣሮኔ ጌይንታ ቤዛ ታና ዒናፓ ኮዓ ዜርፆም ማራቶ ሄንቆ ቤሲ፥ ዓኮሬ ዶኦጫኣ ባኣቶ ሄንቆ ቤሲ ማዓንዳኔ። 65፡10 ዒያ. 7፡24-25።

11 «ታና ናንጊና ናንጋ ጎዳ ዒንሢ ሃሺ፥ ታኣኮ ዱማዼ ዹኮዋ ዋሊ ‹ሎንሦ ኬኤዛ› ጌይንታ ሜሌ ፆኦዛሢም ሙኡዚ ዒንሢ ጊኢጊሼኔ፤ ሃሣ ‹ኮሺ ባሊቲ› ጌይንታ ፆኦዛሢም ሲኢሪንቴ ዎይኖ ዑዦና ዑዦ ዓንጎ ዒንሢ ኩንሤኔ። 12 ታኣኒ ዔኤሌ ዎዶና ዒንሢ ታኣም ዬሂባኣሢሮ፥ ታ ኬኤዜ ዎዶና ዒንሢ ዋይዚባኣሢሮ፥ ታኣም ዓይሢንቶ ሃሺ ፑርታ ማዻኒ ዒንሢ ዶኦሬሢሮ ዒንሢም ኮይሳማ ዎዻ ዓሲኮ ቤርታ ጉምዓቲ ጬንቾ ዓፓሮና ቲቂንቲሢኬ።» 13 ናንጊና ናንጋ ጎዳ ማዔ ፆኦዛሢ ሂዚ ጋዓኔ፦ «ታ ዓይላ ሙዓንዳኔ፥ ዒንሢ ጋዓንቴ ናይዺንታንዳኔ፤ ታ ዓይላ ዑሽካንዳኔ፥ ዒንሢ ጋዓንቴ ዼኤቢንታንዳኔ፤ ታ ዓይላ ዎዛዻንዳኔ፥ ዒንሢ ጋዓንቴ ቦርሲንታንዳኔ። 14 ታ ዓይላ ዔያቶኮ ዒኖ ዎዛፓ ዔቄያና ዓይናዻንዳኔ፤ ዒንሢ ጋዓንቴ ዒንሢኮ ዒና ዖያንዳሢሮ ዬኤካንዳኔ፤ ዓያና ዒንሢኮ ሜቃንዳሢሮ ‹ዉኡዉይ!› ጌዒ ዒንሢ ዒላታንዳኔ። 15 ታኣኒ ናንጊና ናንጋ ጎዳ ሃይቢም ዓኣሢ ዒንሢ ዒንጋንዳኔ፤ ዒንሢኮ ሱንፃ ታና ዶኦሬ ዓሶ ኮራ ጋዳማ ሱንሢ ማዓንዳኔ፤ ታ ዓይሎም ጋዓንቴ ሜሌ ሱንሢ ታ ጌሣንዳኔ። 16 ቤርታኣ ሜታ ዋሊንቴሢሮና ታ ዓኣፓፓ ዓኣሺንቴሢሮ ዓጬሎይዳ ዓንጆ ዓንጃ ዓሲ ታና ጉሙርቂንታ ፆኦዛሢ ሱንፆና ዓንጃንዳኔ፥ ጫኣቃሢያ ታ ሱንፆና ጫኣቃንዳኔ።»

17 «ታኣኒ ዓኪ ጫሪንቺና ዓኪ ሳዓና ማዣንዳኔ፤ ሃያኮ ቤርታ ዓኣሢ ቢያ ዋሊንታንዳኔ፤ ማሊንቲያ ማሊንታዓኬ። 65፡17 ዒሲ. 66፡22፤ 2ጴፂ. 3፡13፤ ዮሃ. ፆፔዻ 21፡1። 18 ጋዓንቴ ታኣኒ ማዣ ባኮና ዎዛዹዋቴ፤ ናንጊና ዎዛዺ ናንጉዋቴ፤ ዬሩሳላሜ ዎዛም፥ ዒዞኮ ዴሮዋ ዎዛዺ ናንጋንዳጉዲ ታኣኒ ማዣንዳኔ። 19 ታኣኒ ታ ቶኦኪና ዬሩሳላሜና ታኣኮ ዴሮናሮ ዎዛዻንዳኔ፤ ሃካፓ ሴካ ዬኤፒታቴያ ዒላቲ ዑኡሲ ዒኢካ ዋይዚንታዓኬ። 65፡19 ዮሃ. ፆፔዻ 21፡4። 20 ዒኢካ ዻካ ዎዴ ሌሊ ሼምፔና ናንጋንዳ ናይ፥ ናንጎ ሌዖዋ ሚሽኪባኣ ጋርቺ ጴዻዓኬ፤ ፔቴ ፄኤታ ሌዔ ኩሜ ዓሲ ሃይቄቴ ቃሚሢና ሃይቄያ ማዒ ፓይዲንታንዳኔ፤ ፔቴ ዓሲኮ ፄኤታ ሌዔ ኩሚባኣንቴ ሃይቄያታቴ ጋዳማና ሃይቄያጉዲ ፓይዲንታንዳኔ። 21 ታኣኮ ዴራ ፔኤም ማኣሪ ማዢ ናንጋንዳኔ፤ ዎይኖ ቱኪ ዓኣፖዋ ሙዓንዳኔ። 22 ዔያታ ማዤ ማኣሮይዳ ሜሌ ዓሲ ጌላዓኬ፤ ዔያታ ቱኬ ዓይጎ ባኣዚያ ማዖም ሜሌ ፃንጎ ዓሲ ሙዓዓኬ፤ ታኣኮ ዴራ ሚሢጉዲ ዖዶሲ ሌዔ ናንጋንዳኔ፤ ታኣኒ ዶኦሬ ዓሳ ላቢንቲ ማዺ ዴንቄ ባኮና ሚርጌ ዎዴም ዎዛዻንዳኔ። 23 ማዻ ዔያቶኮ ጉሪ ማዓዓኬ፤ ዔያታ ሾዔ ናኣቶና ናኣቶኮዋ ናኣቶ ጎዳ ዓንጄያ ማዓንዳሢሮ ናኣቶ ዔያቶኮ ባይሲንታ ሄላዓኬ። 24 ሃጊ ዔያታ ታና ዔኤሉዋንቴ ታ ዬሃንዳኔ፤ ኬኤዚ ዔያታ ጋፑዋንቴ ታ ዋይዛንዳኔ። 25 ያኣዮና ማራናይና ዎላ ሄንቃንዳኔ፤ ዞቢ ጌማይጉዲ ሾዳ ሙዓንዳኔ፤ ሾኦሺያ ሲላሊ ሌሊ ላዓንዳኔ፤ ታኣኮ ዱማዼ ዹኮይዳ ዔያታ ፔቴታዖ ዔኤቢ ዎኦታዓኬ፤ ዓሲ ዔያታ ዻዓዓኬ፥ ሙዓዓኬ» ሃያ ኬኤዜሢ ታና ናንጊና ናንጋ ጎዳኬ። 65፡25 ዒሲ. 11፡6-9።