2
ናንጊና ናንጋ ኮሹሞ
(ሚኪ. 4፡1-3)
1 ዓሞፄ ናኣዚ ዒሲያሴ ዪሁዳ ዓጮና ዬሩሳላሜ ካታሞ ዛሎ ኬኤዜ ሃይሳ ያዺኬ፦
2 ዎዶኮ ጋፒንፃ ሄላዛ
ናንጊና ናንጋ ጎዳኮ ጌኤዦ ማኣራ ማዢንቴ ዹካ
ሃንጎ ዹኮይዳፓ ቢያ ባሺ ጴዻንዳኔ፤
ጌሜሮይዳፓ ቢያ ኮሺ ዼጊ ጋዓንዳኔ፤
ዴሬ ቢያ ዬያ ባንሢ ጎዓንዳኔ።
3 ዬያሮ ሚርጌ ዴራ፦
«ዎጌ ፂዮኔይዳፓ፥ ፆኦሲ ቃኣላ ዬሩሳላሜይዳፓ ጴዻንዳሢሮ
ሃኒ ሙኩዋቴ፥ ናንጊና ናንጋ ጎዳ ዹኮ ኑ ኬስኮም፤
ያይቆኦቤ ፆኦዛሢ ጌኤዦ ማኣሪ ኑ ዓኣዾም፤
ዒዚ ፔ ማሊፆ ኑ ማዻንዳጉዲ ኑና ዔርዛንዳኔ፤
ኑኡኒያ ዒዛ ጎይፆና ዓኣዻንዳኔ» ጋዓንዳኔ።
4 ዒዚ ሚርጌ ዴሮ ባኣካ ዎጊሢና ዎሊፓ ዱማሳ ባኮ ባይዛንዳኔ፤
ዬያሮ ጬንቾ ዓፓሮ ዔያታ ማራሻ፥ ዎርፆ ሃሣ ባኣቺ ማሂ ዔያታ ዹይሳንዳኔ፤
ፔቴ ካኣታ ባጋሢ ዑፃ ዖልዚ ዔቂሳዓኬ፤ ዬካፓ ዖልዚ ዛላ ዔራኒ ኮዓያ ባኣያ ማዓንዳኔ። 2፡4 ዒዩ. 3፡10።
5 ዒንሢ ያይቆኦቤ ናኣታ!
ሃኒ ሙኩዋቴ! ፆኦሲ ፖዓ ኑ ሃንቶም!
ፆኦሲ ኬሊ
6 ፆኦዛሢዮ! ያይቆኦቤ ዜርፆ ማዔ ኔ ዴሮ ቴርፄይዲ ኔ ሃሼኔ፤ ዬያ ኔ ማዼሢ ሳዔላ ዓባ ኬስካ ባንፆ ዓጮ ዓሶ ዦዋቶና ፒሊስፄኤሜ ዓሶ ማርሾና ኩሜሢሮ፥ ሃሣ ኔ ዴራ ሜሌ ዴሮና ዎላ ፔቴ ማዔሢሮኬ። 7 ሳዓ ዔያቶኮ ቢራና ዎርቄና ኩሜሢሮ፥ ቆላ ዔያቶኮ ኮሺ ሚርጌኔ፤ ዓጫ ዔያቶኮ ፓራ ኩሜኔ፥ ዔያቶኮ ሳርጌሌ ዖይታኣ ፓይዲንቱዋያኬ። 8 ዬያ ሌሊቱዋንቴ ሳዓ ዔያቶኮ ሜሌ ፆኦዞና ኩሜኔ፤ ዔያታ ፔ ኩጮና ማዤ ባኮም ዔያታ ዚጋኔ።
9 ዬያፓ ዔቄያና ዔያቶ ቢያሢዳ ቦርሲንቲና ዻውሲንቲ ሄላንዳኔ፤ ናንጊና ናንጋ ጎዳሢዮ! ዻቢንቶ ዔያቶም ዓቶም ጌይፖ!
10 ናንጊና ናንጋ ጎዳኮ ጎሪንቶና ዒዛኮ ዒጊቻ ዼኤፑማፓኣ ቶላኒ ላሎ ቆኦፖና ሳዖ ዔቶናይዳ ዓኣሺንቱዋቴ! 2፡10 ዮሃ. ፆፔዻ 3፡10፤ 6፡15፤ 2ቴስ. 1፡9። 11 ዖቶርቃ ዓሳ ቦርሲንታንዳኔ፤ ሄርሺንታ ዓሳኣ ዻውሲንታንዳኔ፤ ዬኖ ኬሎና ናንጊና ናንጋ ጎዳ ሌሊ ቦንቾና ዼጊ ዼጊ ጋዓንዳኔ። 12 ቢያ ባኮ ዎይሣ ጎዳ ዖቶርቃ ዓሶና ሄርሺንታ ዓሳ ዻውሲንታንዳ ኬሊ ሜንሤኔ። 13 ዒዚ ዼኤፖ ዼኤፖ ሊባኖኦሴ ሚፆና ባኣሳኔ ዓጮኮ ሻኣቦ ባይዛንዳኔ። 14 ዼኤፖ ዼኤፖ ዹኮና ጌሜሮ ጌሜሮ ሂርኪዲ ቦኦሊ ማሃንዳኔ። 15 ካታሞኮ ኬልቂ ኮሾና ዲፆንታ ዋርዲዮ ቤዞዋ ቢያ ሂርኪዳንዳኔ፤ 16 ሚርጌና ሚዛጲሶና ሜሆንታ ቴርሴሴ ዓጮ ዋኣፆ ካኣሚሎዋ ዒ ዔኤዺሳንዳኔ፤ 17-18 ዓሶኮ ዖቶሩሙማ ባይቃንዳኔ፤ ሄርሺንቲ ሆኦሊንቲፃኣ ዔያቶኮ ጋፓንዳኔ፤ ሜሌ ፆኦዛኣ ቢያ ባይቃንዳኔ፤ ዬኖ ዎዶና ናንጊና ናንጋ ጎዳ ሌሊ ቦንቾና ዼጊ ዼጊ ጋዓንዳኔ።
19 ናንጊና ናንጋ ጎዳ ሳዖ ዓጊሣኒ ሙካ ዎዶና ዒዛኮ ጎሪንቶና ዒጊቻ ዼኤፑማፓ ቶላኒ ላሎ ቆኦፖና ሳዖ ዔቶናይዳ ዓኣሺንታኒ ዔያታ ማላንዳኔ። 20 ዓሳ ዬያቶም ዚጋንዳጉዲ ፔ ኩጮና ሚዛጲሲ ኮሾና ቢሮና ዎርቆ ማላቶ ዖኦቻሢና ፓቃቶናም ኬኤሪ ዔያታ ዓኣዻንዳኔ። 21 ናንጊና ናንጋ ጎዳ ሳዖ ዓጊሣኒ ሙካ ዎዶና ዒዛኮ ጎሪንቶና ዒጊቻ ዼኤፑማፓ ዓኣሺንቲ ቶላኒ ላሎ ቆኦፖና ሳዖ ዔቶናይዳ ዔያታ ዓኣሺንታንዳኔ።
22 ዓካሪ ሲኢዺና ዑኡሲ ዔካ፥ ሃይቃ ዓሲና ጉሙርቂፃ ዒንሢኮ ዓቶንጎ፤ ዬይ ዓይጎዋ ፓሡዋሴ።