1 Palunyatjanu ilkari ngurrara kutjungku tiitji mantawana tjutira ngalyankula ngayunya watjaṉu, “Ngalya yarra! Nintilkuṉanta Katutjalu kungka kuya palyalpayi pungkunytjala. Kungka paluru wati kutjupa kutjupangka kuṉṯawiya ngarripayi maniku. Paluru yuru tiṉangka katu nyinapayi. 2 Mayutju tjuṯa, manta tjuṯa ngurrara tjuṯaya yankula kungka palula ngarripayi, wiyaya kuṉṯarringkula palunya wantipayi, wiya. Palulakutu tjana yankula waama tjikira turaangkarringkula ngarripayi, kutu.”

3 Palulanguru ilkari ngurrarangku, Katutjaku kurrunpangkuṯarra ngayunya Tjaananya ngurra kapiwiyawana katingu. Ngurra palula ngayulu tjikipaka kutjupa, tjatjaka nyangu, kungkatjarra. Yurrunpa kungka paluru tjikipaka palula kaḻparra katu nyinapayi. Tjikipaka paluru yini kuya tjuṯatjarra nyinapayi, yurrunpa wangka palunya wakara wantingutja tjuṯatjarra. Katutjalu yini palunya tjuṯa nyakula ngurrkurringu. Tjikipaka paluru kata tjapanpalatjarra nyinangu. Kata palula tjanala wuuna tiinpala ngarangu. 4 Kungka paluru turitji marutjarra nyinangu, tjatjakatjarraṯarra. Riinga kuultatjarra nyinangu nikilitjitjarraṯarra. Panikina kuultatjanu palyaṉutja marangku paluru kanyiṉingi. Kungka paluru wati tjuṯangka tjanala kutu kuya palyara nyinapayi. Yalatji kuya kutu palyaṉutjangka, ilkari ngurrarangku piipangka wakara panikina palula yurrunpa tjunu. Panikina piipa palunyatjarra kungka paluru kanyiṉingi. 5 Kungka palula ngalyangka wangka wakaṉutja ngarangu. Wangka palunya nyakula yaṉangu tjuṯangku puṯu kulilpayi. Wangka paluru yalatji nguwanpa ngarangu, “Tawunu Papilunanya ngurrara tjuṯangku kuya kutu palyaṉi. Palumpa tjanampa ngayulu kungka mayutju tiṉa nyinanyi. Ngayulu tjananya tjingapunganyi kuya kutu palyantjaku.”

6 Yirriṯi yaṉangu yunytjuwiya tjuṯangku mantangka Yiitjuku walytja tjuṯa mirri pungkupayi. Kungka paluru tjananya ngurrka tjikira turaangkarripayi. Ngayulu Tjaanalu nyangu kungka palunya turaangka nyinanyingka. Nyakula ngayulu puṯu kuliṉingi. 7 Ilkari ngurrara paluruṉi piyuku watjaṉu,

“Nyuntu wiya puṯu kulintjaku. Ngayuluṉanta nintilku kungka palunya, tjikipaka tjatjakakuṯarra. 8 Tjikipaka palunya nyuntu nyangu. Irriṯi paluru nyinapayi, kuwarri wiyalpi nyinanyi. Ngula paluru ngaṯi tiṉanguru kanarringkula pakalku. Kutjupangkulpi palunya mirri pungku. Yaṉangu tjuṯaya nyinaku Katutjaku walytjawiya. Katutjalu manta ilkariṯarra palyalkitjangku wiya tjananya yini tjuṯa palumpa piipangka wakalpayi kana nyinanytjaku, wantingu tjananya. Paluru tjana tjikipaka kanarringutja nyakula puṯu kulilku, ‘Tjikipaka paluru kuya, mirri ngarrimara kanarrinytjawiya.’

9-10 “Wangka ngaatjanya ninti tjuṯangkunyurra kulintjaku. Tjikipaka paluru kata tjapanpalatjarra nyinangu. Palunya nguwanpa puḻi tjapanpala mantangka ngaranyi. Kata tjapanpala palunya nguwanpa mayutju tiṉa payipala nyinarra mirrirringu. Mayutju kutju kuwarri nyinanyi, mayutju kutjupalpi ngula nyinaku. Mayutju paluru rawawiya nyinarra wiyarriku.”

11 Palunyatjanu ilkari ngurrara paluruṉi Tjaananya watjaṉu, “Tjikipaka tjatjaka palunya nyuntu nyangu. Paluru irriṯi nyinapayi, kuwarri wiya nyinanyi. Paluru nyinarra mayutju tiṉalpi nyinaku, mayutju panyapa tjapanpala nguwanpa. Palunyatjanu mayutju tiṉa palunya kutjupangkulpi mirri pungku.”

12 Ilkari ngurrara paluruṉi piyuku Tjaananya watjaṉu, “Tjikipaka palunya nyuntu nyangu wuuna tiinpalatjarra. Wuuna tiinpala palunya nguwanpa mayutju tiinpalalpi nyinaku. Paluru tjana tjikipaka palulawana mayutju tjuṯa rawawiya nyinarra wiyarrikulpiya. 13 Mayutju paluru tjana tjungu wangkarra wangka kutjuwana kulilku, wiya tjana ngurrkurriku, wiya. Paluru tjana tjikipaka palunya watjalku yalatji, ‘Nyuntu kutju nganampatju mayutju tiṉa nyinamalpa, nyuntunya kutjulatju kulinmalpa.’ 14 Mayutju paluru tjana waarrkana tjuṯa yaḻṯirra tjungulku. Waarrkana paluru tjana mayutju paluru tjanaṯarra kulilku tjiipi wiima palunya pungkula wantirriyalkitjangku. Wiya tjana palunya pungkula wantirriyalku, wiya. Tjiipi paluru, palumpa walytja tjuṯangkuṯarra palunya tjananya pungkula wantirriyalku. Yalatji tjananya pungkula wantirriyalku mayutju tiṉangku nyinarra. Paluru mayutju manta ngurrara tjuṯangka wirriḻi nyinaku, mayutju tiṉalingku. Palumpa walytja tjuṯa tjananya Katutjalu ngulytjulku. Tjana tjiipi palumpa tjukarurru kutu nyinaku.”

15 Piyukuṉi ilkari ngurrara paluru watjaṉu yalatji, “Yuru tiṉangka kungka kuya palyalpayi paluru nyinangu, panyapan nyuntu nyangu. Yurungka wiya paluru yilta nyinapayi. Paluru yaṉangu tjuṯangka katu nyinapayi palumpa tjanampa mayutju. Yaṉangu tjaampala walytjararranpa wangka kutju wangkapayi tjuṯa nyinanyi. Yaṉangu tjaampala walytjararranpa kutjupa, wangka kutjupa wangkapayi tjuṯa nyinanyi. Yalatji yaṉangu walytjararranpa kutjupa kutjupa wangka walytjatjarra nyinanyi. 16 Wuuna tiinpala panyapa nyuntu nyangu. Wuuna paluru tjana yaṉangu nguwanpa wangkapayi. Paluru tjana, tjatjaka tjikipaka paluruṯarra kungkaku yunytjuwiyalpi nyinaku. Paluru tjana kungka palula mantarra yarrara waṉinytjala nikitilpi nyinaku. Yulytja palumpaṯarra tjana mantjira katirra waṉiku. Palulanguru paluru tjana kungka palunya ngalkura warungka waṉikulpi, kamparra wiyarrinytjaku. 17 Yilta, Katutjalu tjananya tjingapungku mayutju paluru tjapanpala tjikipaka palula yalatji watjantjaku, ‘Nyuntu kutju nganampatju mayutju tiṉa nyinamalpa, nyuntunya kutjulatju kulinmalpa.’ Palunyatjanu tjana tjikipaka palumpa waarrkana tjuṯa nyinaku. Yalatjiya nyinaku Katutjaku wangka kutjupalpi yiltarrinytjala.”

18 Palunyatjanu ilkari ngurrara paluruṉi piyuku watjaṉu, “Nyuntu kungka kuya panyapa nyangu. Paluru kuya nyinapayi nguwanpa tawunu tiṉa kuya ngaranyi. Tawunu palula tjana kuya palyara nyinapayi, kututja. Mayutju manta ngurrara tjuṯa tawunu palumpa yunyparringanyi. Tawunu palunya ngurrara tjuṯangku watjantjala mayutju paluru tjana kulira palyalpayi.”