1 Yirriṯi Katutjalu Muutjanya watjaṉu Yitjurilaku walytja ngaṉṯitja tjuṯa yaṉṯayaṉṯalkitjangku. Yalatji watjara paluru watjaṉu tjana tjaatji kaliki palyara palunya Katutjanya puḻkapungkunytjaku. 2 Tjaatji palunya kaliki tiṉa tjana palyara pupatjunu. Kaliki palula yunngu tjangi tilitjarra maṉkurrpa ngarangi. Tiipulaṯarra ngarangi. Tiipula palula tjana mangarri puriiti tjunkula wantipayi Katutjaku. Ngurra palunya yaṉangu tjuṯangku yini yalatji watjalpayi, “Katutjaku ngurra ngururrpanya.” 3 Tiipulangka tjangi ngaranyingka wirriḻi mantarra kutjupangku waralyngarala yangatjunangi. Mantarra palula wirriḻi Katutjaku ngurra ngarangi. Ngurra palunya yaṉangu tjuṯangkuya yini yalatjiya watjalpayi, “Katutjaku ngurra yunngunya.” 4 Ngurra palula tiipula puḻi kuultatjanu palyaṉutja ngarangi. Palulanguru kutjara puyu paṉṯi palyatjarra puyutjunkupayi Katutjaku. Tiipula palula yila pukutju yurrunpa palyaṉutja tjana ngaratjunu. Yurrunpa kuulta pangki nguwanpa tjana palyara pukutju palula tjayiṯiwana nganytjatjunu. Pukutjungka yunngu ngarringi tiitji kuultatjanu palyaṉutja, mangarri yini maanatjarra. Pukutju palula puḻi wirulypa kutjarra ngarringi, wati Yiranaku watiyaṯarra. Watiya paluru yirriṯi yukiritjarrarringu. Puḻi wirulypa kutjarra palula Katutjalu watjara wakaṉu. 5 Pukutju palula katu ngarangi ilkari ngurrara nguwanpa kutjarra, kuultatjanu palyaṉutja yuṉpapula ngaparrku ngaranytjala. Katutjanya ngangkari tiṉatjarra nyinanytjakutupula ngaparrku ngarala nintiṉingi. Pukutjungka katu Katutjanya aḻṯurunytju nyinapayi. Paluru tjanampa kuya waṉipayi. Yalatji yulytja paluru tjana kalikingka ngarangi. Yulytja kutjupa tjuṯaṯarra palula ngarangi, yunngu.

Ngayulu wiya nyurrangarrinya wangka yulytja palunyatjarra piyuku nintilku. 6 Yulytja paluru tjana yalatji tjaatji kalikingka ngaranytjala tuḻkuku mayutju tjuṯa rawalingku palula tjarrparra waarrkarringkupayi, Katutjaku tuḻku palyalkitja. Katutjaku ngurrangka yunngulingku wiya tjana tjarrpapayi, Katutjaku ngurra ngururrpa kutjuya ngarala palyalpayi waarrka. 7 Mantarra waralyngarala yangatjunanyingka wirriḻi wati kutju tjarrpapayi, tuḻkuku mayutju tiṉa. Paluru tjuṯangara wiya tjarrpapayi, warri kutjupangka warri kutjupangka kutju. Warringka kutjungara paluru tjarrpapayi. Tjarrparra pulukakuṉu ngurrka yintilpayi, Katutjalura kuya palumpaṉu waṉinytjaku. Ngaṉṯilpi tjanampa piyuku yintilpayi, Katutjalu yaṉangu tjuṯaku kuya waṉinytjaku. 8 Katutjaku kurrunpangku nganaṉanya yalatji nintiṉi. Tjaatji kaliki yalatji ngaranytjala yaṉangu kuyakuya tjuṯa wiya kalikingka tjarrparra Katutjaku ngurra yunngukutu tjarrpapayi palula wangkakitja. 9 Kaliki palunya kulira nganaṉa kuwarri tjukarurrungku kulintjaku. Nganaṉa tjaatji tiṉakutu kuka tjawirrilyi katirra ngaratjunkupayi, pungkula Katutjaku kutjantjaku. Yalatji tuḻkuku mayutjungku pungkula kutjantjala nganaṉa wiya Katutjaku kalyparringkupayi. 10 Luwu yalatji tjawirrilyi Katutjaku katinytjaku ngaranyi. Luwu kutjupa tjuṯaṯarra ngaranyi yalatji. Mangarri pala tjuṯa kutjula ngalkuntjaku, kutjupa tjuṯa nganaṉa ngalkuntjawiyangku wantinytjaku. Kuka pala tjuṯa kutjula ngalkuntjaku, kutjupa tjuṯa nganaṉa ngalkuntjawiyangku wantinytjaku. Nganaṉa ngaatjanya kutju tjikintjaku kutjupa tjuṯa wiya nganaṉa tjikintjaku. Nganaṉa tjukarurrungku paltjintjaku, yaṉangu walytja. Luwu paluru tjana rawawiya ngaraku. Ngarala ngula luwu paluru tjana wiyarriku. Katutjalu nganaṉanya watjalku luwu kutjupawanalpi piyuku nyinanytjaku.

11 Kala, Yiitju Kurayitjanya kuwarri nganampa tuḻkuku mayutju tiṉa nyinanyi ngurra palyangka kutu kanyilkitja. Paluru ilkaringka tjaatji kaliki nguwanpangka tjarrpangu. Tjaatji kaliki palunya wiya yaṉangu manta ngurrara tjuṯangku palyaṉingi, Katutjalu palyaṉu. 12 Yirriṯi tuḻkuku mayutju tjuṯa tjana tjuṯangara tjarrparra waarrkarringkupayi. Ilkaringka kaliki nguwanpa palula Yiitjunya kutjungara tjarrparra tjukarurru yanu Katutjaku ngurra yunngukutu nganampa kuya waṉikitja. Wiya paluru pulukakuṉu tjinguru nanikutakuṉu ngurrkatjarra tjarrpangu. Ngurrka walytjatjarra paluru tjarrpangu yurrunpa watiyangka waralyngarala ngurrka yintirra mirrirringkulaṯarra.

13 Muutjaku wangkawana tuḻkuku mayutju tjuṯangku yaṉangu kuyatjarra tjuṯangka pulukapa nanikutakuṉu ngurrka yintilpayi. Paluru tjana puluka wiima kutjara tjuṉpa kutju mantjira katirra tjanala yaṉangu tjuṯangka wiilypungkupayi. Yalatji tjanala ngurrka yintira yiḻminyi wiilypunganyingka, Katutjalu tjanampa kuya waṉipayi. 14 Yalatji tjana pulukakuṉu ngurrka tjanala yintintjala, Katutjakulpiya kalypa nyinapayi. Katutjaku nganaṉa kalypa nyinanyi Yiitju Kurayitjanya ngurrka walytja yintirra tjawirrilyi nguwanparringutjangka. Yalatji paluru kuya palyalpayiwiya tjawirrilyi nguwanparringu, Katutjaku kurrunpangku nintiṉutjangka. Paluru ngurrka maṯupurra nganampa yintirra mirrirringu, nganaṉa kuya palyalpayi tjuṯa tjukarurru palumpa nyinanytjaku.

15 Muutjaku wangkawana nyinarra yaṉangu tjuṯa Katutjaku puṯu tjukarurru nyinapayi. Yiitju Kurayitjanya watiyangka waralyngarala mirrirrinytjala paluru tjana palumpa walytjarringkula nyinanyi. Kala, Katutjalu piyuku watjaṉu palunya tjananya, nganaṉanyaṯarra tjungura yaṉṯayaṉṯalkitjangku kana kutu nyinanytjaku. 16 Yiitju Kurayitjanya tjawirrilyi nguwanpa mirrirrinytjala Katutjalu watjaṉu yaṉangu tjuṯa yaṉṯayaṉṯalkitjangku. Wangka palunya nguwanpa Tjuwu wati tjuṯangku tjiḻpirringkula mirrirrikitjangku watjalpayi katjangku yulytja tjuṯa mantjintjaku. Mirrirringanyingka katjangkulpi mantjilpayi. 17 Tjiḻpi kana nyinanytjala katjangku wiya mantjilpayi. 18-19 Wangka palunya nguwanpa Katutjalu watjaṉutja tjuṯa Muutjalu tjananya yaṉangu tjuṯa tjakultjunu. Palurulpi pulukakuṉu nanikutakuṉu ngurrka mantjira kapingka yintiṉu. Paluru parrka mantarratjarra mantjira ngurrkangka tjarrpatjunkula piipa Katutjaku wangkatjarrangka yintiṉu, yaṉangu tjuṯawanaṯarralpi tjanala yintiṉu. 20 Yalatji yintira Muutjalu tjananya watjaṉu, “Nyurrangarrinya yaṉṯayaṉṯalkitjangku Katutjalu nyurrangarrinya watjaṉu palumpa wangka tjuṯaku tjukarurru nyinanytjaku. Ngurrka ngaatjanya nyakula nyurrangarri tjukarurru nyinakitjangku kulintjaku.” 21 Yaṉangu tjuṯangka tjanala yintira Muutjalu ngurrka palunya katirra tjaatji kalikiwana parra yintiṉu. Kaliki palula yunngu tjarrparra yulytja tjuṯawanaṯarra ngurrka parra yintiṉu. 22 Muutjaku luwu palulawana tuḻkuku mayutju tjuṯangku tjaatjikuṉu yulytja yuwankarrawana ngurrka parra yintilpayi, yulytja paluru tjana palya ngaranytjaku, Katutjaku maṯupurra. Tjawirrilyi pungkula ngurrka yintintjawiyangka, Katutjalu wiya yaṉanguku kuya waṉipayi. Tjawirrilyi pungkula ngurrka yintintjala kutju, kuya tjanampa waṉipayi. Muutjaku wangka yalatji ngaranyi.

23 Yuwa, yalatji tuḻkuku mayutju tiṉangku tjawirrilyi pungkula tjaatjiku yulytjawana yintilpayi Katutjaku kutju yulytja tjuṯa ngaranytjaku. Katutjaku tjaatji ilkaringka yulytja yilta tjuṯa ngaranyi. Katutjalu wiya kuliṉu kutjupangku puluka tjiipipaka pungkula ngurrka palulawana yintintjaku. Paluru ngurrka kutjupa kuliṉingi. 24 Yiitju Kurayitjanya ngurrka yintirra tuḻkuku mayutju nganampa Katutjaku ngurra ilkaringka tjarrpangu nganampa palunya tjapilkitja. Wiya paluru tjaatji kalikingka mantangka tjarrpangu Katutjaku ngurra yunngu ngarakitja, wiya, tjaatji ngurra ilkaritjangka tjarrpangu. 25-26 Warri kutjupa kutjupangka tuḻkuku mayutju tiṉa tjaatji kalikingka tjuṯangara tjarrpapayi. Tjarrparra mantarra waralyngarala yangatjunkupayingka wirriḻi, Katutjaku ngurra yunngunguru ngurrka tjuṯangara yintilpayi, pulukakuṉu ngurrka, palumpaṉu ngurrka walytjawiya. Yiitju Kurayitjanya wiya tuḻkuku mayutju palunya tjananya nguwanpa tjuṯangara nganampa kuya waṉikitja Katutjaku ngurra ilkaringka tjarrpangu, kutjungara paluru tjarrpangu, tjawirrilyi nguwanparringkula kuya nganampa waṉikitja. Yuwa, Katutjalu watjaṉutjangka tayimingka paluru kutjungara tjawirrilyi nguwanparringkula watiyangka waralyngarala mirrirringu, nganampa kuya paluru waṉikitja.

27 Yaṉangu yuwankarra nganaṉaṯarra kutjungara mirrirriku. Nganaṉa mirrirringkula ngula kanarringkula Katutjala kuutawutjungka ngaraku, yuwankarra kutjupa tjuṯaṯarra. 28 Nganaṉanya nguwanpa Yiitju Kurayitjanya kutjungara mirrirringu, tjawirrilyi nguwanparringkula. Yalatji mirrirringu yaṉangu yuwankarraku nganampa kuya waṉikitja. Ngula paluru mantakutu ngalya yankula wiya piyuku mirrirriku nganampa kuya piyuku waṉikitja. Kala, kutjungara paluru tjawirrilyi nguwanparringkula mirrirringu nganampa kuya waṉikitja. Paluru ngula ngalyankula nganaṉanya palumpa walytja kutjupa tjuṯaṯarra mantjira katiku kana kutu nyinanytjaku, ilkaringka.