7
Ul 144,000 ionemittathe
1 Manakka elli locothakothe, anappimmakat uꞌrupa wothothïlettat woKapik acoꞌro nomipit mocapu ncik appik amumocoꞌrin, apakket kanang than akka akokkurot capu ana tok irapangka ana manna kira. 2 Anappimmakat uꞌrupa wothothïlettat woKapik wꞌrek anthan na acïngkï ummot ngngin awonu urret woKapik ikaik. Akwakkarat uꞌrupa wothothïlettat woKapik iocoꞌrin mpoꞌre cittan iokat woccot puꞌran itti wie capu ana tok irapangka ka kongo, 3 akwiꞌrekat uꞌrupa wothothïlettat woKapik iocoꞌrin itti, “Nantocoꞌro nokorronno iie capu ana tok irapangka ka kongo ana manna kira aron tharthuk okkot urret nomuthu moul iarekine Kapik konnon.” 4 Ana ittina mpoccïkathe maun mokkwion ithokkattanthet urret nomuthu men maun athar arrial ukuluk ana ikken arrial weꞌra ana ikken kocoꞌrin (144,000) noul woIccereil appik.
5 Ul woIoutha wokat athar attul ana ikken weꞌra (12,000) iokkattanthet urret.
Ul woRopin wokat athar attul ana ikken weꞌra (12,000) iokkattanthet urret.
Ul woCath wokat athar attul ana ikken weꞌra (12,000) iokkattanthet urret.
6 Ul wAccir wokat athar attul ana ikken weꞌra (12,000) iokkattanthet urret.
Ul woNapththalim wokat athar attul ana ikken weꞌra (12,000) iokkattanthet urret.
Ul woManacce wokat athar attul ana ikken weꞌra (12,000) iokkattanthett urret.
7 Ul woCcomoun wokat athar attul ana ikken weꞌra (12,000) iokkattanthet urret.
Ul woLaui wokat athar attul ana ikken weꞌra (12,000) iokkattanthet urret.
Ul woIaccakkar wokat athar attul ana ikken weꞌra (12,000) iokkattanthet urret.
8 Ul mothok moCapulun wokat athar attul ana ikken weꞌra (12,000) iokkattanthet urret.
Ul woIuccip wokat athar attul ana ikken weꞌra (12,000) iokkattanthet urret.
Ul woPeniemin wokat athar attul ana ikken weꞌra (12,000) iokkattanthet urret.
Ul woppot wakot eret wipuk
9 Anakka elli locothakothe animmakat cungkut coul woppot tokït kin comma manna ongantetta noul wonomothok appik ana ul mothok mothok ngkarru ken kurekkurek ana ul appik ana karru akin ocoꞌro tokït koprrok poIli ana tokït kothungkat. Okin thakot eret wipuk ana okin thonat uꞌri wokira kothemur inyaun. 10 Ana okin thokat cik akin iꞌre mpoꞌre cittan itti,
“Thoꞌrettat thoKapik konnon,
ikaik kikkoik noprrok,
ana thungkat.”
11 Ana uꞌrupa wothothïlettat woKapik appik wokat acoꞌro akkwet prrok ithoꞌrkït ana ul ittïttïk ana aꞌrupu iaik ngkït thapat iocoꞌrin. Ana okin thekathe toma ncik tokït koprrok ana okin thaꞌrakanthet Kapik ngaꞌrama, 12 akin ongwat itti,
“Amin,
thopira noka ana thrïk
ana thinaik nti ica ana thopirane noka,
ana thothiakine cik ana puꞌran
oka thoKapik konnon thupuththuput.
Amin.”
13 Ittina apilin nti iul ittïttïk ipittathin itti, “Oththan enthi ithakot eret wipuk? Ana okin thaat ngkartha?”
14 Ana mpothïanthok tit itti, “Pït pin, ngkwina.”
Ana kwiꞌrekathe itti, “Okin enthi ithokkot cik nti ithokkiettat thiak cannan, okin thimet eret wen ngüccük ngothungkat ana ngothikkiekanthet kin eret woꞌrillir. 15 Ilen akka,
Okin ocoꞌrine tokït koprrok poKapik,
akin orekinok nokkonokki ana nokkꞌrokkꞌra noppan toKapik tung.
Ana okkwi ipaik pikkoik noprrok pangwot nthokaik thung.
16 Okin thakorronno appiama,
ana manna pica pakorronno appokkwot kin.
Ana cïngkï cakorronno appokꞌrekin.
ana manna lü lꞌrek.
17 Akka thungkat ithaik ithoꞌrkït thoprrok thangwot kin,
kwipot kin nomakuꞌrang moiꞌri.
Ana Kapik kukukkot kin ngeme nti ikït.” 7.17 Mocumur 23.1–2; Iccaia 49.10