1 Lummaus pu chuwaʼn eɏgew, inggew chi kaseɏ ud Cana, osaʼn ili ud Galilee. Ot inggew udchi ilan Jesus. 2 Ot laayagen bo cha Jesus ya cha disipulusla. 3 Laamin pun chi byeyas, imbyegan chi ilan Jesus kan siya, “Laamin chi byeyascha.”* 2:3 Ha byeyas cha Judio lampeɏpud chi byeɏat chi grape, isun chi tapoy.

4 Ot kalan Jesus kan siya, “Ila, achipun masapuɏʼn ibyegam chi kook. Mangamungak gey, ti chaampun chumtong chi timpuʼn mangipain-ak si kilabyelinku.”

5 Ot imbyegan ilala kan cha bubùulon, “Koonyu lu silu ibyegala kan chikayu.”

6 Ilinggew chi olom un bilatuʼn amutu si paway chi byeɏoy, un silliliman lataan si chelum.† 2:6 Liman lata willu singgasut un litro willu chuwampuɏu willu tiɏum puɏu un galun. Hachi useɏon cha Judio lu kooncha ugalichaʼn mambiɏu. 7 Kalan Jesus kan cha bubùulon, “Puluwonyu cha amutun alla si chelum.” Ot pinpilluchaʼn ustu. 8 Oli pun kalan Jesus kan chicha, “Gauchonyu ya itaugenyu mangichaychaɏan si kaseɏ.” Ot killingwacha. 9 Silimsiman pun chi mangichaychaɏan si kaseɏ chi chelum un lambyalin byeyas, ilayagela leɏakiʼn mangkaseɏ. Achipunla ammu leɏpuwan chi mampiyan byeyas (ngim ammun cha bubùulon, ti chicha langgaud si chelum). 10 Ot kalala kan siya, “Siyad kopyala un-ulaon cha tagu itaug chi mampiyaʼn byeyas. Ked lu achu lailum cha mangili, asi ot mitokweɏ buwatlaʼn byeyas. Ngim chikayu, asiyu gey intokweɏ mampiyaʼn byeyas si sala!”

11 Allaya ummulaʼn lakaskaschaaw un killingwan Jesus ud Cana, osaʼn ili ud Galilee. Ot impailala kilabyelinla ot lamati cha disipulusla kan siya.

12 Lagamput pu kaseɏ, ummoy si Jesus ud Capernaum. Kadwala si ilala, cha susuludla ya cha disipulusla ot illinggewcha udchi si lakapigan eɏgew.

13 Allà akit un chumtong chi Piyastan Lallausan ot ummoy cha Jesus ud Jerusalem. 14 Oli pun, ummoy si templo ot inchesala cha mallalaku si byaka, keɏlilu ya kalapati ya cha mansusupli si pilak un ummaammuy si lamisaancha. 15 Ot langwà Jesus si tilalin byaut ot pilabuɏakala cha ayam si templo; cha byaka ya cha keɏlilu. Ot lilitwedla cha lamisaan cha mansusupli ot liwakat chi pilakcha. 16 Imbyegala kan cha mallalaku si kalapati, “Man-itallay kayu kan cha alla! Achiyu mambyalilon lalakkuwan chi byeɏoy Amak!” 17 Ot simsimmok cha disipulus Jesus un liigili si ugud Apudyus un kalala, “Patunged mansigeb chi somsomokku ti achipuncha pulus ipotog chi byeɏoylu!”‡ 2:17 Psalm 69:9

18 Hachi ked, kalan cha papangat cha Judio kan Jesus, “Simma lakaskaschaaw un ipailam kan chikami un alla kalobbongam un mangwad chi katla?”

19 Ot summongbyat si Jesus, “Lu byakasonyu temploʼn alla, ked pauchok kasin si tiɏuʼn eɏgew.”

20 Ot kalan cha Judio, “Umoy si opatpuɏu ya olom tawon chi lampauchencha si temploʼn alla, ked ibyegam un pauchom kasin si tiɏuʼn eɏgew?” 21 Ngim ha templo un imbyegan Jesus ked ha long-egla. 22 Ot ummuli pun latagu si Jesus, simsimmok cha disipulusla un laoy chi imbyegala. Ot lamaticha si liigili un ugud Apudyus ya cha imbyegala.

23 Illinggew ked si Jesus ud Jerusalem si timpun chi Piyastan Lallausan, achu cha lamati kan siya si intullongcha cha lakaskaschaaw un killingwala. 24 Ngim achipun Jesus impiyeɏ long-egla kan chicha, ti ammula cha losan un tagu. 25 Ked achipun masapuɏ un awed mangibyega kan siya si kilatatagun cha tagu ti ammula awed si somsomokcha.