1 Si osaʼn eɏgew, ummoy lalluwalu si Jesus si osaʼn lugeɏ. Ot lagamput pun, kalan chi osaʼn disipulusla kan siya, “Apu, tudtuchuwam u chikami un malluwalu un isun chi intudtuchun John kan cha disipulusla.”

2 Kalan Jesus kan chicha, “Lu malluwalu kayu, katla koonyu:

5 Ot lan-alig si Jesus un kalala, “Lu awed osa kan chikayu un umoy si biɏunla si gawan labi, ked kalala, ‘Biɏun, pabuluchelak u si tiɏun bussung un tilapay, 6 ti kaggetong chi biɏunku un lambyaat ked lappun ipakanku kan siya.’ 7 Ked lu kalan chi biɏunlu, ‘Tumaktakka. Lichakig chi olob ya lasuyop kami kan cha alak. Chakpun bumangon ya mangtod ulay silu.’ 8 Ibyegak kan chikayu, sigulachuʼn bumangon ta idchola imusom, un chakampun si mipagapu ta biɏunlu siya. Ngim gapu ta achipun mabiin un mangipatut un manchawat.

9 “Ked ibyegak kan chikayu, lu awed masapuɏyu, kochewonyu kan Apudyus ot idchola kan chikayu. Lu awed singtonyu, maochesanyu. Ked lu mangkongkong kayu si sawang, milukat kan chikayu. 10 Ti losan un mangkochew kan Apudyus, maatod chi kochewola, ked ha mansingit si piolaʼn sington, maochesala, ya milukat chi sawang kan cha losan un mangkongkong.

11 “Somsomkonyu alla: Silu kan chikayu un aamma chi mangtod si uɏog lu mangkochew chi alakyu si ikan? 12 Willu idchem kamman si gayyaman lu mangkochew si ipɏug? 13 Chikayuʼn malagbyasuɏ, lu ammuyuʼn mangtod si bibiɏu kan cha alakyu, kaguɏa bo kan Amayuʼd langit un mangàatod si bibiɏu! Ti siya idchola Ispiritun Apudyus kan cha losan un mangkochew kan siya.”

14 Si osaʼn eɏgew, pileɏyaw Jesus chi aɏan un langumeɏ si osaʼn leɏaki. Ummoyon pu aɏan, lan-ugud chi laumeɏ, ot laschaaw cha amod un tagu. 15 Ngim kalan cha uchum un tagu, “Si Beelzebul un pangat cha aɏan chi langatod kan Jesus si kilabyelin un mameɏyaw kan cha aɏan.” 16 Inggew cha uchum un pionchaʼn sikapan si Jesus ot chilawatcha kan siya un mangwa si lakaskaschaaw un mangipaila un Apudyus chi leɏpuwan chi kilabyelinla.

17 Ngim ammun Jesus chi somsomokcha, ot kalala kan chicha, “Ulay siluʼn ili lu mantitillalungcha mampapatoy, mayam-ancha. Isulad chi simbyeyan un achipun mangkakatulusan, maasibbyakawcha. 18 Lu gubyaton Satalas cha asin-aaɏanla, mangkiged chi mampangatala ya ha kalobbongancha ked lappun kakwaancha. Ibyegak laoy ti kalanyu un Beelzebul chi langatod si kilabyelinku un mameɏyaw kan cha aɏan. 19 Ngim lu siya langatod si kilabyelinku, siya bo langatod si kilabyelin cha bubuɏunyu un mameɏyaw si aɏan. Ti ha koon cha bubuɏunyu, hachi mampaloklok un laillachu kayu! 20 Ngim lu peɏyawok cha aɏan gapu si kilabyelin Apudyus un awed kan sakon, alliya mangipaloklok un gummatong kan chikayu Mampangatan Apudyus.

21 “Miyalig si Satalas un taguʼn mangkoscheɏ un lan-eemas, un byebyentayala byeɏoyla, ked lappun man-akaw kan cha kukkuwala. 22 Ngim lu umali osaʼn lakoskoscheɏ lu siya ta patoyola ya ilabyakla siya, man-aɏad cha emasla un mantetegochen chi simbyeɏoy. Ked bilingabingayla cha losan un silamsamla kan cha bubuɏunla.

23 “Lu silu achipun tumimpuyug kan sakon, siya bumusuɏ kan sakon. Ya lu silu achipun tumuɏung kan sakon un manguppun kan cha tagu, ked siya umabuɏ.”

24 Ot intuɏuy Jesus lan-alig un kalala, “Lu telan chi aɏan chi osaʼn laaɏan, ked umoyla geggakayon chi lugeɏ un lappun bilumɏoy ta mansingit si inggewala. Ked lu lappun maochesala, kalala si somsomokla, ‘Mangulilak si byeɏoyku.’ 25 Ked lu mangulin ya inchesalaʼn pummeɏkas ya bummaɏu. 26 Ked umoy man-ayeg si pituʼn kadwalaʼn aɏan un sillumawik lu siya, ked inggewcha si hachiʼn tagu. Ked ha makwa si hachiʼn tagu si alungusla, singkumaɏu chi kasasaedla lu chamchamu.”

27 Si langug-ugguchen Jesus si laoy, inggew chi osaʼn byebyai kan cha amod un tagu un kalala, “Pian chi byebyai un langiyalak ya lalagibi kan sika!”

28 Summongbyat si Jesus un kalala, “O, ngim simpumian cha chumngeɏ ya tumuttuwa si ugud Apudyus!”

29 Ummachu-achu pun cha taguʼn ummaguyut kan Jesus, kalala, “Lummawing cha tagu si salaʼn lolap! Manchawatcha si lakaskaschaaw, ngim lappun maatod kan chicha. Siyà abus un ipailak chi lakaskaschaaw un isun chi lakwa kan Jonah. 30 Ti si Jonah,* 11:30 Ha lakwa kan Jonah un propeta si awi, ilukmun chi chakeɏn ikan. Ot illinggew si tiɏuʼn eɏgew si buwang chi ikan, ngim ilayyuwalan Apudyus siya ot inyutan chi ikan siya si teɏanteg. siyà laluttuwaan cha iNeneve un Apudyus chi langibuun kan siya. Katchi bo makwa kan Sakon un Alak chi Tagu ta maluttuwaan cha tagu si salaʼn timpu un Apudyus chi langibuun kan sakon.

31 “Lu chumtong chi Eɏgew un Manguisan Apudyus kan cha losan un tagu, lumoswa byebyaiʼn Reyna ud Sheba ta pabyasuɏon chikayu un tagu si salaʼn lolap. Ti ulay lu adchayuwan chi lampeɏpuwalaʼn ili, ummoyla inggettok chingngeɏ lasilib un tudtuchun Ari Solomon. Ibyegak kan chikayu, awed si sala utla chi langatngatu lu Ari Solomon.

32 “Lu chumtong chi Eɏgew un Manguisan Apudyus kan cha tagu, sumiked cha iNineve ta pabyasuɏon chikayu, ti lambyabyawicha si byasbyasuɏcha si chingngeɏcha imbyegbyegan Jonah. Ibyegak kan chikayu, awechak utla un langatngatu lu Jonah!”

33 Kasin lan-alig si Jesus un kalala, “Lappun tagu si tonggela silaw ya inseinla willu lakkobyela si chungchung, ngim ipatayla si ustuʼn papattayan ta mampadcha lu lumlok cha tagu.

34 “Ha ata, siya silaw chi long-eg. Lu lappun chipiktun chi ata, isun chi mampadcha losan chi long-eg. Ngim lu awed chipiktun chi ata, isun chi manggikbot losan chi long-eg. 35 Ked ammaanyu ta achipun gumikbot chi silaw un inggew kan chikayu. 36 Ngim lu losan lasilawan chi long-eg un lappun akit gikbotla, mampadcha malomsomkanyu un isun chi lasilawan kayu si bibiɏuʼn silaw.”

37 Lagamput pun si Jesus lan-ugud, ilayagen chi osaʼn Pariseo siya ta umoy makakan ud uwacha, ot lilumlok ot inyamuylaʼn langan. 38 Laschaaw chi Pariseo si intullongla Jesus un achipun lambiɏu sakbyey un mangancha.

39 Ot kalan Apu Jesus kan siya, “Chikayuʼn Pariseo, peɏpeɏkasonyu lasin chi tasayu ya paklaanyu, ngim ha somsomokyu laplu si kilaagum ya kilalawwing. 40 Laoggog kayu. Chakampun kamman si kingwan Apudyus chi chaɏom chi long-eg ya lasin? 41 Ngim idchonyu kan cha kapus chi inggew si tasayu ya pinggenyu ked pumeɏkas chi losan un kilatataguyu.

42 “Kadchegu kayuʼn Pariseo! Ti mangtod kayu si ingkasimpuɏun chi apityuʼn latlatung un mampalamlaw si makan un isun cha minta, ruda ya uchum. Ngim ilissanyu kilalintog ya achipunyu ay-ayaton si Apudyus. Masapuɏn koonyu cha laoy ked achiyu liwatan cha uchum un lapotpotog.

43 “Kadchegu kayuʼn Pariseo! Ti pipionyuʼn umamuy si kabiɏuwan un tugew si sinagoga ya pionyuʼn machaychayaw si kaachuwan cha tagu. 44 Kadchegu kayu! Isuyu lobon un lappun meɏkala un gusguschen cha tagu ti achipun cha ammu.”

45 Kalan chi osaʼn mistulun chi lintog, “Mistulu, si katlat un man-uugudlu mipati kami bo labìilan!”

46 Summongbyat si Jesus un kalala, “Kadchegu kayuʼn mimistulun chi lintog! Ipabukudyu manchegson kan cha tagu, ngim achipun kayù akit tumuɏung kan chicha. 47 Kadchegu kayu! Ti ingkopyaanyu si mangkabyaɏun lobon cha propeta un pilatoy cha aappuyu. 48 Ked hachi mangiteulanyu ya mangipain-anyu un umallamung kayu si kingwan cha aappuyu un pilatoycha cha propeta ked ingkopyaanyu chicha si loboncha. 49 Gapu si hachi, lipaila kilalaing Apudyus un kalala, ‘Mangibuulak kan cha propeta ya cha apostoles kan chicha. Ngim patoyoncha uchum ya paligatancha cha uchum.’ 50 Chikayuʼn tagu si salaʼn lolap chi mangikaɏu si cha lapatoy un propeta, malipud si lakwaan chi allaʼn lubung. 51 Lallugi si lamatoyancha kan Abel inggala si lamatoyan cha kan Zechariah, un lapatoy si lambyeatan chi altar ya templo. O, ibyegak kan chikayuʼn tagu si salaʼn lolap, un chikayu mangikaɏu si chusan cha losan un lakwa kan chicha.

52 “Kadchegu kayuʼn mimistulun chi lintog! Ti intaɏuyu chi tebik chi katuttuwaan kan cha tagu. Issanyu un lumlokcha ked ipalityu bo cha pionchaʼn lumlok!”

53 Ummoyon pun si Jesus si hachiʼn byeɏoy, lilugiyan cha Pariseo ya cha mimistulun chi lintog un chillawon siya ya lappun achicha ilim-imus kan siya, 54 ta sikapancha siya ta awed misawangla si ugud un mambyatayancha un mampabyasuɏ kan siya.