1 Gilamput pun Jesus ilugud chi laoy, lantanged ud langit ot kalala, “Ama, chillumtong chi timpu. Pachayawam sakon un Alaklu taplu pachayawak bo sikaʼn Amak. 2 Ti illidchom kan sakon chi kalobbongan un manturay kan cha losan un tagu ta idchek si biyeg un mallalayun cha losan un impiyeɏm kan sakon. 3 Ked ha allaʼn biyeg un mallalayun, siya mangagammuwanchaʼn sika abus chi tuttuwaʼn Apudyus ya sakon si Jesu Kristu un imbuunlu. 4 Inchaychayawku sika kan cha tagu utla lubung ti gilamputku tilungpeɏ cha impakwam kan sakon. 5 Ked si sala, Ama, pachayawam sakon si sangwalam, un isun chi langipachayawam kan sakon si inggewak kan sika si chaampun chi lubung makwaan.

6 “Impatigammuk sika kan cha taguʼn impiyeɏm kan sakon utla lubung. Tagum chicha ked illidchom chicha kan sakon ot tilungpeɏcha ugudlu. 7 Ked si sala, ammucha un losan un illidchom kan sakon ked lampeɏpu kan sika. 8 Ked intudtuchuk kan chicha cha ugudlu un illidchom kan sakon, ot tiluttuwacha. Ammucha un tuttuwaʼn lampeɏpuwak kan sika ya patiyoncha un imbuulak kan sika.

9 “Iluwaluwak chicha. Achipunku iluwaluwan cha achipun mamati, ngim cha taguʼn impiyeɏm kan sakon, ti tagum chicha. 10 Ti losan un mamati kan sakon, tagum chicha, ya taguk bo chicha. Ked michaychayawak kan chicha. 11 Ked si sala, umaliyak kan sika. Lappulak si lubung, ngim matelancha utla lubung. Lasantuwan un Ama, ayyuwalam chicha gapu si kilabyelin chi ngachenlu un illidchom kan sakon* 17:11 Ha liigili si manuscript si Greek ked seɏaklibyem cha impiyeɏm kan sakon gapu si kilabyelin chi ngachenlu. Siya bo si v. 12. taplu mantitimpuyug cha somsomokcha un isun chi somsomokta. 12 Si illiinggewak kan chicha, ilayyuwalak chicha gapu chi kilabyelin chi ngachenlu un illidchom kan sakon. Sileɏaklibyek chicha, ked lappun ulay ossaan kan chicha un lataɏak, malaksig si hachiʼn taguʼn laikodchong un mataɏak taplu matungpeɏ liigili un ugud Apudyus.

13 “Si sala, umaliyak kan sika, ked ibyegbyegak cha laoy kan chicha ta makaganggalascha kan sakon un lappun mangkuɏangala. 14 Impakaammuk chi ugudlu kan chicha. Ked siya mansasangaan cha achipun mamati kan chicha ti isucha sakon, chakampun si ikamacha ugalicha kan cha achipun mamati. 15 Ama, chakampun si chawatok un kaalom chicha utla lubung, ngim siyad chawatok chi seɏaklibyem chicha kan Satalas. 16 Ti isucha sakon un achipuncha mibilang kan cha achipun mamati. 17 Useɏom chi katuttuwaan un ugudlu un mameɏkas kan chicha taplu mansimbicha kan sika un ustu. 18 Isun chi langibuulam kan sakon utla lubung, kamatchi bo langibuulam kan chicha si lubung. 19 Gapu kan chicha, idchok chi long-egku kan sika ta mapeɏkascha bo si katuttuwaan.

20 “Chakampun un abuscha si iluwaluwak. Iluwaluwak bo cha mamati kan sakon gapu si itudtuchucha. 21 Iluwaluk un man-os-ossaancha losan. Ama, awed cha otyan kan chita, un isun chi awechem kan sakon ya awechak bo kan sika. Man-os-ossaancha otyan taplu mamati cha tagu un sika langibuun kan sakon. 22 Ha langipachayawam kan sakon, isun bo chi mangipachayawak kan chicha ta mantitimpuyugcha un isun chi lantimpuyugenta. 23 Pasigka awed kan sakon ya pappasigak bo awed kan chicha. Mantitimpuyugcha otyan un lappun mangkuɏangala taplu mangagammuwan cha tagu un sika langibuun kan sakon ya ay-ayatom chicha un isun chi man-aayatlu kan sakon.

24 “Ama, ha piok kan cha allaʼn impiyeɏm kan sakon ked iinggewcha kan sakon ud langit ta itullongcha kachayawak un illidchom kan sakon, ti ilay-ayatlu sakon si chaampun chi lubung makwaan.

25 “Lalintog un Ama, cha achipun mamati kan sika, achipuncha ammu sika. Ngim ammuk sika, ked cha disipulusku, tagammucha un sika langibuun kan sakon. 26 Impakaammuk sika kan chicha, ked ituytuɏuyku ipakaammu taplu ha ayatlu kan sakon, awed kan chicha ya awechak bo kan chicha.”