1 Lagamput pu alla, gilaggakay Jesus cha ili ud Galilee. Issalan umoy ud Judea, ti pilanggop cha papangat cha Judio un patoyon siya.

2 Chanchali piyastan cha Judio un kalanchaʼn Piyastan chi Sigey,* 7:2 Ngadloncha piyastan chi sigsiggey, sinchuminggu. Losan cha Judio mangwa si sigsiggey ked siya inggewancha ta masmasmokcha aappucha si lalidtidchaɏalancha si lugeɏʼn lappun ummili si lampeɏpuwancha ud Egypt. 3 ot kalancha leɏakiʼn susulud Jesus kan siya, “Telam utla ked ingka ud Judea ta itullong cha disipuluslu udchi cha lakaskaschaaw un pin-am koon. 4 Ti lappun tagu si mangitaɏu si kawachila lu piolaʼn ipatigammu chi long-egla. Lu lakaskaschaaw chi koom, ipailam chi long-eglu kan cha losan un tagu.” 5 Ti ulay cha susuludla, achipuncha lamati kan siya.

6 Ot kalan Jesus kan chicha, “Chaampun chumtong chi ustuʼn timpu. Ngim chikayu, timpula losan un timpu. 7 Ti cha tagu utla lubung, achipun chikayu sangaon. Ngim sakon, sangaolak kan chicha ti ibyegbyegak chi kilalawwing cha kooncha. 8 Chikayu umoy makapiyasta. Achipulak umoy makapiyasta, ti chaampun gumatong chi timpuk.” 9 Hachi imbyegan Jesus ot latelan ud Galilee.

10 Lalikmud pun cha susuludlaʼn ummoy lakapiyasta, ummoy bo si Jesus. Ngim achipun lampappailaʼn ummoy. 11 Singsingngit cha papangat cha Judio siya si piyasta, un kalancha, “Chimma awedla?” 12 Achu cha ug-uggud cha amod un tagu mipanggop kan siya. Kalan cha uchum, “Siya bibiɏu un tagu.” Ngim kalan cha uchum, “Chakampun, ti allilawola cha tagu.” 13 Ngim lappun langilatak lan-ugud kan siya ti umogyatcha kan cha papangat cha Judio.

14 Langgilawa pun chi piyasta, ummoy si Jesus si templo ot lantudtuchu. 15 Patunged laschaaw cha papangat cha Judio ot kalancha, “Chimma langean chi taguʼn alla si kilalaingla, achipun mit lan-iswila?”

16 Ot kalan Jesus kan chicha, “Ha itudtuchuk chakampun si lampeɏpu si somsomokku, ngim lampeɏpu kan Apudyus un langibuun kan sakon. 17 Lu silu meɏyed un mangwa si pion Apudyus, maammuwala lu si Apudyus chi meɏpuwan chi itudtuchuk willu uwak un somsomokku. 18 Ti ha taguʼn siyad uguchola lampeɏpu si uwalaʼn somsomok, siyad singsingtola michayawala. Ngim ha taguʼn siyad singtola michayawan chi langibuun kan siya, ked tuttuwa ibyegbyegala ya lappun tulila† 7:18 Ha uchum un piolaʼn ibyega ked lappun byasuɏla. 19 Chakampun kamman si illidchon Moses chi lintog Apudyus kan chikayu? Ngim lippun tummuttuwa si hachiʼn lintog kan chikayu. Ti lu tiluttuwayu, achipunyu otyan simsimmok un otoyon sakon.”

20 Ot summongbyat cha tagu un kalancha, “Leɏapangka, silu lamlammok un mangtoy kan sika?”

21 Oli pun kalan Jesus, “Si lamingsan, ilagasak chi lasakit si eɏgew un man-illongan ot laschaaw kayu losan. 22 Ngim chikayu, gapu ta imbilin Moses un sogyatanyu cha leɏakiʼn alakyu, sogyatanyu ulay lu Sabyechuʼn man-illongan, chakampun si Moses chi langilugi ngim tilawidyu kan cha aappuyu.‡ 7:22 Leviticus 12:3 23 Lu sogyatanyu alak si Sabyechuʼn man-illongan ta achipun sumupling si lintog Moses, pakayuggey sumanga kan sakon, gapu ta ilagasak chi lasakit si Sabyechu? 24 Achi kayu manguis gapu si intullongyu, ngim manguis kayu si ustuʼn kopyan chi manguis.”

25 Kalan cha uchum un tagu ud Jerusalem, “Chakampun kamman un laoy chi taguʼn pionchaʼn patoyon? 26 Ilanyu ked! Alla mit un makaug-uggud kan cha tagu, ked lappun mit mibyegacha kan siya! Tuttuwa lin un ammun cha papangat un siya Kristu? 27 Ammu taku lu chilu leɏpuwan chi taguʼn alla, ngim lu umali Kristu, lappun sin-ammu lu chilu meɏpuwala.”

28 Si lantudtuchuwan Jesus si templo, lan-ichakeɏla gingala ot kalala, “Tuttuwa kamman un ammuyu sakon? Ammuyu kamman bo leɏpuwak? Chakampun si ummaliyak si uwak un somsomok. Ti ha langibuun kan sakon ked tuttuwa, ngim achipunyu ammu siya. 29 Ngim sakon, ammuk siya ti siya leɏpuwak ya siya langibuun kan sakon.”

30 Gapu si imbyegala, pilanggop cha papangat un chokmaan siya, ngim lappun kabyeeɏancha ti chaampun chumtong chi timpula. 31 Ngim achu cha lamati kan siya ot kalancha, “Lu umali si Kristu, sinchumadlu koolaʼn lakaskaschaaw lu ha killingwan chi taguʼn alla?”

32 Chingngeɏn cha Pariseo un sin-aagasaas cha amod un tagu mipanggop kan Jesus. Ot lambuun cha ap-apun cha papachi ya cha Pariseo kan cha guwechan chi templo un malokma kan siya. 33 Ot kalan Jesus, “Sin-akitan chi inggewak kan chikayu, ked mangulilak si langibuun kan sakon. 34 Singtonyu sakon ngim achipunyu sakon maochesan, gapu ta achipun kayu makaali si ayak.”

35 Ot lan-iillimus cha papangat cha Judio, un kalancha, “Udman lin chi ayala un achipun taku makaochas kan siya? Ha umoy lin kan cha ilin cha Gentil un awechen cha lawatak un Judio ya lantudtuchu kan cha Gentil? 36 Simma piola lin un uguchon chi kalala, ‘Singtonyu sakon ngim achipunyu sakon maochesan ya chilu ayak achipun kayu makaali.’ ”

37 Si alungus un eɏgew chi piyasta, ha kapotogen un eɏgew, summiked si Jesus ot chilakeɏla gingala un kalala, “Lu silu mauwaw, umali kan sakon ta umilum. 38 Ti kalan chi ugud Apudyus,

40 Chingngeɏn ked cha tagu imbyegan Jesus, kalan cha uchum kan chicha, “Siya tuttuwaʼn propeta un uuwayon taku!”

41 Kalan cha uchum, “Siya si Kristu!” Ngim kalan cha uchum, “Chakampun un mampeɏpu Kristu ud Galilee! 42 Ti liigili si ugud Apudyus un ha Kristu meɏpu si galak David ked miyalak ud Bethlehem un ilin Ari David.”* 7:42 2 Samuel 7:12; Micah 5:2 43 Ot langkalakalasi cha kasomsomkan cha tagu mipanggop kan siya. 44 Pion cha uchum kan chichaʼn chokmaan siya, ngim lappun lakaiteɏod langchon kan siya.

45 Langulin cha guwecha si templo kan cha ap-apun cha papachi ya cha Pariseo. Ot kalan cha papangat cha papachi ya cha Pariseo, “Payuggey achi inggetong siya utla?”

46 Summongbyat cha guwecha, “Lappun tagù lan-ugud un isun chi taguʼn hachi!”

47 Ot kalan cha Pariseo kan chicha, “Ha ilallilaw chikayu bo? 48 Awed kamman osa kan cha papangat cha Judio willu cha Pariseo un lamati kan siya? 49 Ked cha taguʼn mamati kan siya, machusacha ti lappun ammucha mipanggop si lintog Moses.”

50 Ked si Nicodemus un osa kan chicha ya siya hachiʼn ummoy kan Jesus si osaʼn labi, kalala kan chicha, 51 “Si lintog taku, achipun makwaʼn chusaon taku osaʼn tagu lu achipun taku yan chongɏon ya ammuwon lu simma kingwala.”

52 Oli pun kalancha kan siya, “Ha iGalileeka bo? Achaɏom kappay chi ugud Apudyus ta maammuwam un lappun propeta un mampeɏpuʼd Galilee.” 53 Ot lansilasilacha ummoyon si byeɏoycha.